ⵎⵙⴳⵔⴰⵏⵜ, ⵜⴰⴷⴳⴳⵯⴰⵜ ⵏ ⵓⵙⵉⵎⵡⴰⵙ 30 ⵛⵓⵜⴰⵏⴱⵉⵔ 2022, ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵏ ⵓⵙⵎⵓⵜⵜⴳ ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵚⴰⵃⴰⵏ ⵉ ⵉⵎⵙⵖⴰⵏⵏ ⵜⵜⵓⵙⵎⴰⴳⵍⵏⵉⵏ ⵙ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴹⴼⵕⵏⵉⵏ ⵉ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵏⵏⵉ ⵉⵙⴷⵍ ⵓⵙⵉⵏⴰⴳ ⵕⵕⴱⴰⵟ - ⴷⵔⵉⵙ ⴱⵏⵣⴽⵔⵉ - ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵉⵣⵉ ⵜⴰⵣⴳⵔⴰⵔⵜ ⵉⵏⴳⵔ 26 ⴷ 30 ⵛⵓⵜⴰⵏⴱⵉⵔ 2022. 

ⴳ ⵜⴳⵓⵔⵉ ⵏⵏⵙ ⴳ ⵜⴼⵓⴳⵍⴰ ⵏ ⵓⵎⵙⴳⵔⴰ ⵏ ⵜⵙⵓⵜⵍⵜ ⴰⴷ, ⵜⵓⵍⵍⵖ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵙ ⵡⴰⴷⴷⵓⵔ ⵏ ⵜⵎⵢⴰⵇⵇⴰⵏⵜ ⵉⵜⵜⵓⵙⴳⵎⴹⵏ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ ⴷ ⵜⵡⵍⴰⴼⵜ ⵏⵏⴰ ⴷⴰⵔⵙ ⵉⵍⵍⴰⵏ, ⵓⵔ ⵖⴰⵙ ⴷ ⴳ ⵓⵙⵡⵉⵔ ⴰⵏⴰⵎⵓⵔ, ⵎⴰⵛ ⴰⵡⴷ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵉⴷⴷⵖ ⵜⵓⵡⴹ ⵜⵖⵍⴰⵖⴰⵍⵜ ⵏⵏⵙ ⴰⵙⵇⵇⵉⵎ ⵏⵓⵕⵓⴱⴱⴰ ⴳ ⵙⵜⵕⴰⵙⴱⵓⵕⴳ, ⵏⵏⴰ ⵉⴳⴰⵏ ⵢⴰⵏ ⵙⴳ ⵉⵏⴳⵎⴰⵎⵏ ⵉⴳⵔⴰⵖⵍⴰⵏⵏ ⵜⵜⵓⵙⵎⴰⴳⵍⵏⵉⵏ ⵙ ⵓⴹⴼⴼⵓⵕ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ. ⵜⵔⵏⵓ ⵎⴰⵙ ⵉⵙⵜⵉ ⵓⵙⵇⵇⵉⵎ ⵏ ⵓⵕⵓⴱⴱⴰ ⵜⴰⵎⵢⴰⵇⵇⴰⵏⵜ ⴰⴷ ⵃⵎⴰ ⴰⴷ ⵜⴳ ⵜⵉⵎⵙⴽⵔⵜ ⵜⴰⵎⵓⴼⴰⵢⵜ, ⵢⵉⵔⵉ ⴰⴷ ⵜⵜ ⵉⴱⴹⵓ ⴰⴽⴷ ⵉⵡⴰⵏⴽⵏ ⵢⴰⴹⵏⵉⵏ. 

ⵜⵍⴰⵖⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵜⵜⵡⴰⵖⵔⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ/ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴰⴷ ⵢⵉⵍⵉ ⵜⵉⵣⵡⵉⵔⵉ ⵏ ⴽⵟⵓⴱⵕ ⴰⴷ ⴳ ⵓⵙⴳⵔⴰⵡ ⵏ ⵓⵕⵓⴱⴱⴰ ⵉ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵃⵎⴰ ⴰⴷ ⵉⵙⵎⵏⵉⴷ ⵜⵉⵔⵎⵉⵜ ⴰⴷ, ⵏⵏⵉ ⵉⵜⵜⵡⴰⵙⵙⴰⵏⵏ ⵙ ⵓⵙⵎⵀⵍ ⵏⵏⵙ ⵙ ⵓⵙⵔⵉⴷ ⴹⴰⵕⴰⵜ ⵎⴰⴷ ⵜⴻⵜⵜⵓⵙⵙⴳⵎⴹ ⴳ 14 ⵛⵓⵜⴰⵏⴱⵉⵔ 2022, ⵜⵙⴷⴷⵉⴷ ⵎⴰⵙ ⴱⴷⴷⴰ ⵢⵓⵊⴰⴷ ⵓⵙⵇⵇⵉⵎ ⵏ ⵓⵕⵓⴱⴱⴰ ⴰⴼⴰⴷ ⴰⴷ ⵉⵙⵙⵏⴽⴷ ⴰⵎⵛⴰⵡⴰⵕ ⵉ ⵡⵉⴷⴰ ⵢⵓⵡⵣⵏⵉⵏ ⵅⴼ ⵓⵙⵎⵀⵍ ⵏ ⵓⵙⵍⴳⵏ ⵃⵎⴰ ⴰⴷ ⵉⴱⵓⵖⵍⵓ ⵓⵙⵡⵉⵔ ⵏ ⵜⵎⵙⴽⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵏⵖ. 

ⴳ ⵓⵙⵉⵡⵍ ⵏⵏⵙ ⵅⴼ ⵓⵎⵢⴰⵖ ⵏ ⵜⵏⵓⴼⴰ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴰⴽⴷ ⵉⵙⵖⵍⴰⴼ ⴷ ⵉⵏⵥⵉⵜⵏ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵙⴳ ⵓⵙⴳⴳⵯⴰⵙ ⵏ 2020, ⵜⵓⵍⵍⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵎⵢⴰⵖ ⵓⵎⵏⵉⴳ ⵏ ⵓⵏⴳⵎⴰⵎ ⵏ ⵜⵏⴼⵔⵓⵜ ⴰⴽⴷ ⵉⵙⵖⵍⴰⴼ ⴰⴷ ⵏⵏⵉ ⵜⵙⴷⴷⵉⴷ ⵎⴰⵙ ⵉⴳⴰ ⵓⵡⵜⵜⴰⵙ ⵙⴳⵉⵙⵏ ⴰⵙⵖⵓⴷⵓ ⵏ ⵜⵎⵙⵓⵜⴰⵍ ⵏ ⵜⵡⵓⵔⵉ ⴳ ⵓⴳⵏⵙⵓ ⵏ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ. 

ⵙⴳ ⵜⵙⴳⴰ ⵏⵏⵙ, ⵉⵙⵙⵓⵜⴳ ⵓⴳⵏⵙⴰⵙ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴰⵏⵎⴰⵜⵔ ⴰⵎⴰⵜⴰⵢ ⵎⴰⵙⵙ ⴰⵃⵎⴰⴷ ⴰⵢⵜ ⵟⵟⴰⵍⴱ, ⵜⴰⵙⵏⵜⴰⵢⵜ ⵏ ⵓⵙⵇⵇⵉⵎ ⵙ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵉⵚⴰⵃⴰⵏ ⵉ ⵉⵙⵓⵜⴰⵢ ⵏ ⵜⵎⵔⵙⵍⵜ ⵏ ⵜⵏⴼⵔⵓⵜ ⵉⵜⵜⵓⵙⵎⴰⴳⵍⵏ ⵙ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴰⴼⴰⴷ ⴰⴷ ⵜⵖⵓⴷⵓ ⵜⵉⴳⴰⵡⵜ ⵏ ⵜⵎⵔⵙⵍⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵍⵓⵎⵎⵏ ⴳ ⵎⴰⴷ ⵉⵥⵍⵉⵏ ⵙ ⵡⵉⴷ ⵢⵓⵡⵣⵏⵉⵏ ⵅⴼ ⵓⵙⵡⵓⴷⴷⵓ ⵏ ⵜⵖⴰⵡⵙⵉⵡⵉⵏ ⵏ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⴳ ⵓⵙⵡⵉⵔ ⵏ ⵜⵏⴱⴷⴰⴷⵉⵏ ⵜⵉⵏⵎⵏⴰⴹⵉⵏ. 

ⵉⵙⵙⴽⵕⵥ ⵏⵉⵜ ⵅⴼ ⵡⴰⴷⴷⵓⵔ ⵏ ⵓⵙⵖⵓⵏ ⵏ ⵉⵎⵙⵜⴳⴳⴰⵔⵏ ⵏ ⵜⵎⵔⵙⵍⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵙ ⵜⴰⵣⵣⵓⵍⴰⵏⵜ ⴳ ⵜⵉⴳⴰⵡⵜ ⵏ ⵜⵙⵎⵉⴳⴰⵍ ⵏⵏⵙⵏ ⵙ ⵓⵡⵇⵇⵔ ⵉⵙⵎⴷⵏ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⵜⵉⴽⵙⵡⴰⵜⵉⵏ ⵏ ⵉⵏⵎⵓⵔⴰⵏ. ⵢⵉⵏⵉ ⵎⴰⵙ ⴰⵢⵜ ⵟⵟⴰⵍⴱ ⵎⴰⵙ ⵜⴳⴰ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵉⵏⴳⵔ ⵜⵎⵔⵙⵍⵜ ⵏ ⵜⵏⴼⵔⵓⵜ ⴷ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⵓⵣⵓⵔⵜ ⴷ ⵜⵎⵙⴽⵔⵜ ⵜⴰⵎⵓⴼⴰⵢⵜ ⵙ ⵉⵜⵜⵡⴰⵣⵎⴰⵔ ⴰⴷ ⵜⵜⵓⵙⵎⴰⵜⴰ, ⵜⴻⵜⵜⵓⵙⴷⵓⵙ ⴳ ⵓⵙⵡⵉⵔ ⴰⵏⴰⵎⵓⵔ ⴰⴼⴰⴷ ⴰⴷ ⵜⵉⵍⵉ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⴼⵔⴰⴳ. 

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⴰⵎⵓⵏ ⴽⵉⴳⴰⵏ ⵏ ⵉⵙⴳⵓⵎⵏ ⴳ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵜⴰⵎⵣⵡⴰⵔⵓⵜ, ⵏⵏⵉ ⵉⵚⴰⵃⴰⵏ ⵉ ⵎⴰⴷ ⵢⴰⵥⴹⵏ ⵉ 20 ⵏ ⵓⵎⴰⵍⴰⵍ ⴷ ⵜⵎⴰⵍⴰⵍⵜ ⵏ ⵍⴱⵓⵍⵉⵙ ⵉⵙⵎⴷⵢⴰⵏ ⵜⵓⴳⵜ ⵏ ⵜⵎⵏⴰⴹⵉⵏ ⵏ ⵍⵎⵖⵔⵉⴱ, ⵜⵏ ⵉⴳⴰⵏ ⵙ ⵓⵥⵍⴰⵢ ⴷ : "ⵉⵣⵔⴼⴰⵏ ⵏ ⵓⴼⴳⴰⵏ, ⵉⵎⵏⵣⴰⵢⵏ ⴷ ⵜⵎⵙⴽⵔⵉⵏ": "ⵉⵣⵔⴼⴰⵏ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴷⴷⴰⵡ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ"; "ⵉⵏⴳⵎⴰⵎⵏ ⵏ ⵓⵎⴷⴰⵢ ⴷ ⵡⴰⵔⴰⵢ ⴷ ⵓⵙⵎⴰⵎⵎⵉ", ⴷ ⵓⴳⴳⴰⵔ. ⵜⵎⵙⴳⵔⴰ ⵜⵙⵓⵜⵍⵜ ⵙ ⵜⵓⴽⴽⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵉ ⵉⵙⵍⴽⵉⵏⵏ ⵏ ⵜⴷⵔⴰⵡⵜ ⵉ ⵉⵎⵙⴱⵖⵔⵏ ⴷ ⵜⵎⵙⴱⵖⵔⵉⵏ ⴷ ⵉⵙⵍⴽⵉⵏⵏ ⵏ ⵓⵙⵏⵉⵎⵎⵔ ⵉ ⵉⵙⵓⵜⴰⵢ ⴷ ⵜⵙⵓⵜⴰⵢⵉⵏ ⴷⵔⵓⵏⵉⵏ ⴳ ⵓⵎⵓⵔⵙ ⵏ ⵜⵙⵓⵜⵍⵜ ⴰⴷ.