ⵜⵙⴳⵎⴹ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵎⴰⵙⵙ ⵄⴱⴷ ⵍⵍⴰⵟⵉⴼ ⵃⵎⵎⵓⵛⵉ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵡⵉⵏ ⵓⵎⴰⵜⵔ ⵏ ⵡⴰⵎⵓⵔ ⴰⵏⴰⵎⵓⵔ, ⴰⵙⵙ ⵏ ⵓⴽⵕⴰⵙ 14 ⵛⵓⵜⴰⵏⴱⵉⵔ 2022, ⵜⴰⵎⵢⴰⵇⵇⴰⵏⵜ ⵏ ⵓⵙⴰⵜⵉ ⵉ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵎⵔⵙⴰⵍ ⴳ ⵢⵉⴳⵔ ⵏ ⵓⵙⴰⵏⵓⵏ ⴷ ⵓⵙⴷⵓⵙ ⵏ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵣⵣⵓⵍⵜ ⵏ ⵜⵏⴼⵔⵓⵜ. ⵜⵙⵢⴰⴼⴰ ⵜⵎⵢⴰⵇⵇⴰⵏⵜ ⴰⴷ ⵙ ⵜⴽⵕⵥⵉ ⵉⵛⵛⴰⵕⵏ ⴷ ⵜⵉⵔⴰⵜ ⵉⵕⵚⴰⵏ ⵉ ⵜⵏⵓⴼⴰ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵜⵓⴳⵜ ⵏ ⵢⵉⴳⵔⴰⵏ ⵏ ⵓⵙⴰⵏⵓⵏ, ⵙ ⵉⵙⵡⵉⵔⵏ ⵏⵏⵙ ⵉⴷⵙⵍⴰⵏⵏ ⴷ ⵉⵙⵓⵍⴰⵏⵏ ⴷ ⵉⵎⵥⵍⴰⵢⵏ, ⴷ ⵓⵙⴷⵓⵙ ⵏ ⵓⵎⵄⵉⵏⵏ ⵉⵣⵔⴼⴰⵏⵏ ⵏⵏⴰ ⵜⵓⵡⴹ ⵜⵎⴰⵣⵉⵔⵜ ⵏⵏⵖ ⴳ ⵢⵉⴳⵔ ⵏ ⵓⵙⵎⵀⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ. ⵜⵙⵡⵓⵜⵜⵙ ⵜⵎⵢⴰⵇⵇⴰⵏⵜ ⴰⴷ, ⵏⵏⴰ ⵉⵙⵙⵕⵚⴰⵏ ⴰⵏⵏⴰⵍⵏ ⵏ ⵓⵎⵢⴰⵡⴰⵙ ⴰⵎⵔⵙⴰⵍ ⴰⵙⵓⵍⴰⵏ, ⴰⵙⴱⵓⵖⵍⵓ ⵏ ⵜⵡⵓⵔⵉ ⵉⵛⵛⴰⵕⵏ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵓⴼⴰ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴱⵔⵉⴷⵉⵏ ⵏ ⵓⵙⴰⵏⵓⵏ ⴷ ⵓⵙⵎⵓⵜⵜⴳ ⵏ ⵍⴱⵓⵍⵉⵙ ⵃⵎⴰ ⴰⴷ ⵜⴳ ⵜⴰⵙⴰⵖⵓⵍⵜ ⴷ ⵓⵙⵎⵎⴰⵍ ⵉⵙⵙⵓⵜⵉⵢⵏ ⵉ ⵜⵙⵎⵉⴳⴰⵍ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵜⵜⵓⵎⴰⴳⵍⵏ ⵙ ⵓⵙⵎⵀⵍ ⵏ ⵉⵙⵍⴳⵏⵏ, ⴷ ⵡⴰⵏⵏⴰⵍ ⵏ ⵜⵓⴳⴳⴰⵣ ⵏⵏⴰ ⵜⵜⴳⴳⴰ ⵜⵎⵔⵙⵍⵜ ⵏ ⵜⵏⴼⵔⵓⵜ ⵉ ⵓⵙⴷⵓⵙ ⵏ ⵜⵎⵙⴽⵔⵉⵏ ⵜⵉⵣⵣⵓⵍⴰⵏⵉⵏ ⴷ ⵉⴽⵛⵛⵓⵎⵏ ⵏ ⵓⴱⴰⵔⴰⵣ ⵙ ⵓⵎⵙⴰⵙⴰ ⴰⴽⴷ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴰⵎⵓⵏⵏ ⴳ ⵢⵉⴳⵔⴰⵏ ⵏ ⵓⵎⵢⴰⵡⴰⵙ, ⵉⵏⵏⵓⵕⵥⵎⵏ ⵅⴼ ⴽⵉⴳⴰⵏ ⵏ ⵜⵙⵏⵜⴰⵢⵉⵏ ⴷ ⵉⵙⵖⵏⵓⵜⵏ ⵏ ⵓⵎⵓⵔⵙ ⵏ ⵢⵉⵎⴰⵍ, ⴰⵙⵏⵎⴰⵍⴰ ⵏ ⵜⵙⵓⵜⴰⵍ ⴷ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⵉ ⵓⵙⴷⵓⵙ ⵏ ⵜⵓⵙⵙⵏⴰ ⴷ ⵜⵙⵓⴳⴰⵔ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵚⴰⵃⴰⵏ ⵉ ⵉⵙⵓⵜⴰ ⴷ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵙⴱⵖⵔ ⵙⴳ ⵜⵎⵓⵣⴰⵢ ⴷ ⵜⵙⵓⵖⴰⵍ ⵣⴷⵉⵏⵉⵏ ⵙ ⵉⵣⵔⴼⴰⵏ ⴷ ⵜⴷⵔⴼⵉⵏ ⴷ ⵉⵎⵓⵙⵙⵓⵜⵏ ⵉⵎⵔⵙⴰⵍⵏ, ⴷ ⵓⵍⴰ ⴰⵙⴷⵓⵙ ⵏ ⵓⵎⵏⵉⴷ ⴰⵣⵔⴼⴰⵏ ⵉⴳⴰⵏ ⴰⵍⵍⴰⵍ ⴰⴷⵙⵍⴰⵏ ⴳ ⵜⴱⵔⵉⴷⵉⵏ ⵏ ⵓⵙⵎⵓⵜⵜⴳ ⵏ ⵍⴱⵓⵍⵉⵙ ⴷ ⵇⴰⵃ ⵜⵎⵙⴽⵔⵉⵏ ⵜⵉⵙⵖⵏⴰⵏⵉⵏ. ⵙ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⴰⴷ, ⵔⴰⴷ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴳ 20 ⵛⵓⵜⴰⵏⴱⵉⵔ 2022, ⵢⴰⵜ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵅⴼ ⵉⵏⴰⵡⴰⵢⵏ ⴷ ⵜⵎⵙⴽⵔⵉⵏ ⵣⴷⵉⵏⵉⵏ ⵙ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵡⴰⵏⴰⵡ ⵢⴰⴹⵏⵉⵏ ⵏ ⵓⵎⵔⵔⵜ ⵏⵉⵖ ⴰⴷⵔⵡⵙ ⵏⵉⵖ ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ ⴳ ⵓⵣⵎⵣ ⵏ ⵓⵙⴱⴷⴷⵉ ⴷ ⵓⵙⵙⴼⵍⴷ ⴷ ⵓⵙⵔⵓⵙ ⴷⴷⴰⵡ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ, ⵔⴰⴷ ⴳⵉⵙ ⵉⵍⵉⵏ ⵓⴷⵎⴰⵡⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⵉⵙⵎⴷⵢⴰⵏ ⵉⵎⴰⵙⵙⵏ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴽⴷⴰ ⵔⴰⴷ ⵉⵜⵜⵡⴰⵕⵥⴰⵎ ⵓⵖⴰⵡⴰⵙ ⵏ ⵓⵙⵎⵓⵜⵜⴳ ⴰⵎⵙⵙⵓⵎⵓ ⴳ ⵉⵍⵍⴰ ⵓⵙⴷⴷⵉ ⵏ ⵜⵙⵓⵡⴰⵔ ⵏ ⵓⵙⴰⵏⵓⵏ ⵉⵚⴰⵃⴰⵏ ⵉ ⵜⵎⵙⵖⴰⵏⵉⵏ ⴷ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵜⵜⵓⵙⵎⴰⴳⵍⵏⵉⵏ ⵙ ⵜⵏⵎⴰⵜⵔⵜ ⵏ ⵉⴷⵖⴰⵔⵏ ⵜⵜⵡⴰⵥⵍⴰⵢⵏⵉⵏ ⵙ ⵓⵙⵔⵓⵙ ⴷ ⵜⴼⴰⵜⵉⵜ ⵙⴳ ⵜⴷⵔⴼⵉ.