ⵜⴰⵔⵉⴷⵉⵔⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ
ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ
ⵉⵙⵙⵏⴱⴹ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴳ 6 ⴷⵓⵊⴰⵏⴱⵉⵔ 2018, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵜⴽⴽⴰ ⵎⴰⵙⵙⴰ ⴱⵓⵄⵢⵢⴰⵛ ⵜⴳⴰ ⵜⴰⵎⵙⵇⴰⴷⵜ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵜⵎⵉⵣⴰⵔ ⵏ ⵙⵙⵡⵉⴷ ⴷ ⵍⴰⵜⴼⵢⴰ (ⵍⵉⵜⵡⴰⵏⵢⴰ) ⵙⴳ ⵡⴰⵢⵢⵓⵔ ⵏ ⵛⵓⵜⴰⵏⴱⵉⵔ 2016. ⵎⴽⵍⵍⵉ ⵜⴽⴽⴰ ⵣⵡⴰⵔ ⵜⴳⴰ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⴼⵉⴷⵉⵕⴰⵍⵉⵜ ⵜⴰⴳⵔⴰⵖⵍⴰⵏⵜ ⵏ ⵜⵙⵇⵇⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (FIDH), ⴹⴰⵕⴰⵙ ⵜⴳ ⵜⴰⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⴼⵉⴷⵉⵕⴰⵍⵉⵜ, ⵜⴳ ⵜⴰⵎⵖⴰⵔⵜ ⵜⴰⵎⵖⵔⵉⴱⵉⵜ ⵜⴰⵎⵣⵡⴰⵔⵓⵜ ⵏⵏⴰ ⵉⵙⵙⵉⵅⴼⵏ ⴽⵔⴰ ⵏ ⵜⵎⴰⴷⴷⴰⵙⵜ ⵜⴰⵣⵔⴼⴰⵏⵜ ⵜⴰⵏⴰⵎⵓⵔⵜⴽ, ⵉⴷⴷⵖ ⵜⴻⵜⵜⵡⴰⵙⵜⴰⵢ ⵅⴼ ⵉⵅⴼ ⵏ ⵜⵎⴰⴷⴷⴰⵙⵜ ⵜⴰⵎⵖⵔⵉⴱⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ (OMDH) ⵙⵏⴰⵜ ⵜⵉⴽⴽⴰⵍ ⵉⵏⵏⴹⴼⵕⵏ. ⴳ ⵓⵣⵎⵣ ⵉⵣⵔⵉⵏ, ⵜⴽⴽⴰ ⵎⴰⵙⵙⴰ ⴱⵓⵄⵢⵢⴰⵛ ⵜⴳⴰ ⵜⴰⴳⵎⴰⵎⵜ ⵉⵜⵜⵓⵙⵎⴰⴳⵍⵏ ⵙ ⵓⵎⵙⴰⵡⴰⴹ ⴳ ⵓⴱⵔⵙⵉⵔⴰ ⵏ ⵓⵎⴰⵡⵙⴰⵙ ⴰⵎⵣⴰⵡⴰⵔⵓ ⴰⵎⵣⵡⴰⵔ, ⵎⴰⵙⵙ ⵄⴱⴷ ⵕⵕⴰⵃⵎⴰⵏ ⵍⵢⵓⵙⴼⵉ, ⵎⴽⵍⵍⵉ ⵜⵙⵡⵓⵔⵉ ⵜⴰⵏⵖⵎⴰⵙⵜ ⴷ ⵜⵎⵛⵛⵉⵡⵕⵜ ⴳ ⵢⵉⴳⵔ ⵏ ⵓⵎⵙⴰⵡⴰⴹ ⴰⵎⵔⵙⴰⵍ.
ⵜⵜⵡⴰⵙⵜⴰⵢ ⵎⴰⵙⵙⴰ ⴱⵓⵄⵢⵢⴰⵛ, ⵏⵏⴰ ⴷ ⵉⴼⴼⵖⵏ ⴳ ⵢⵉⴳⵔ ⵏ ⵜⵎⴰⵙⵙⴰⵏⵉⵏ ⵜⵉⴷⵎⵙⴰⵏⵉⵏ, ⵏⵏⴰ ⵉⵙⴰⵡⴰⵍⵏ ⴽⵉⴳⴰⵏ ⵏ ⵜⵓⵜⵍⴰⵢⵉⵏ (ⵜⴰⵄⵕⴰⴱⵜ, ⵜⴰⵎⴰⵣⵉⵖⵜ, ⵜⴰⴼⵕⴰⵏⵚⵉⵚⵜ, ⵜⴰⵏⴳⵍⵉⵣⵜ ⴷ ⵜⵚⴱⵍⵢⵓⵏⵉⵜ), ⴰⴷ ⵜⴳ ⵜⴰⴳⵎⴰⵎⵜ ⴳ ⵓⴳⵔⴰⵡ ⴰⵎⵙⵎⵍⴰⵏ ⵏ ⵓⵣⵣⵔⴰⵢ ⵉ ⵓⴷⵓⵙⵜⵓⵔ ⵏ ⵍⵎⵖⵔⵉⴱ ⵏ ⵓⵙⴳⴳⵯⴰⵙ ⵏ 2011, ⴷ ⵜⴳⵎⴰⵎⵜ ⴳ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵜⵎⵔⵙⵍⵜ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵏ ⵡⴰⵍⴰⵙ ⵏ ⵓⵙⵉⴷⴼ ⵏ ⵉⵎⵖⵣⵓⵜⵏ. ⵜⴷⵔⵓ ⴰⵡⴷ ⴳ ⴽⵉⴳⴰⵏ ⵏ ⵉⵏⴳⵎⴰⵎⵏ ⴷ ⵜⵎⴰⴷⴷⴰⵙⵉⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ, ⵙⴳⵉⵙⵏⵜ: ⵜⴰⵙⵇⵇⵉⵎⵜ ⵜⴰⴽⴰⴷⵉⵎⵉⵜ ⵏ ⵓⴳⵔⴰⵡ ⴰⵎⴰⴹⵍⴰⵏ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵣⵔⴼ ⴰⴳⵔⴰⵖⵍⴰⵏ, ⴷ ⵓⵙⴳⵔⴰⵡ ⵏ ⵜⵎⵏⴰⴹⵜ ⵏ ⵓⴳⵎⵎⵓⴹ ⴰⵏⴰⵎⵎⴰⵙ ⴷ ⵉⵥⵥⵍⵎⴹ ⵏ ⵉⴼⵔⵉⵇⵢⴰ ⵉ ⵜⵙⵖⵣⵏⵜ ⵏ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵏ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏⵉⵏ ⵏ ⵓⴷⵔⵡⵙ ⵏⵉⵖ ⵜⴰⵎⵔⵔⵓⵜ ⵉⵀⵔⵛⵏ ⵏⵉⵖ ⵜⴰⵔⵜⵏⴼⴳⴰⵏⵜ ⵏⵉⵖ ⴰⵎⵔⵎⴷ, ⴷ ⵓⵙⵔⵇⴱ ⵏ ⵓⵙⵔⵓⵙ ⵏ ⵢⵉⵎⵉⵙ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ (MNP).
ⵜⴳⴰ ⴰⵡⴷ ⵜⴰⴳⵎⴰⵎⵜ ⵉⵣⵔⵉⵏ ⵏ ⵓⵙⴳⵔⴰⵡ ⴰⴼⵔⵉⵇⵉ ⵏ ⵓⵎⴰⵜⵔ ⵓⵖⵔⵉⵎ ⵉ ⵍⴱⵓⵍⵉⵙ ⴷ ⵓⵙⴱⴷⴷⵉ ⵏ ⵜⴽⵕⴹⵉ (APCOF), ⴷ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴳⵔⴰⵡ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵏ ⵓⵎⵓⴽⵏ ⵏ ⵜⵙⴷⴰⵡⵉⵜ ⵏ ⵉⵡⴰⵏⴽⵏ ⵉⵄⵕⴰⴱⵏ, ⴷ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⴹⴼⵕⵏ ⵉ ⵓⵥⵟⵟⴰ ⴰⵡⵕⵓ-ⴰⵏⴰⵎⵎⴰⵙ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ "ⵜⴷⵔⴼⵉ ⵏ ⵜⵎⵙⵎⵓⵏⵜ" (2009-2011).
ⵎⴽⵍⵍⵉ ⵜⴳⴰ ⵎⴰⵙⵙⴰ ⴱⵓⵄⵢⵢⴰⵛ, ⵜⴰⴳⵎⴰⵎⵜ ⵜⴰⵎⴽⵔⴰⵙⵜ ⵏ ⵜⵎⴰⴷⴷⴰⵙⵜ ⵜⴰⵎⵖⵔⵉⴱⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ (OMDH) ⴷ ⵜⵎⵙⵎⵓⵏⵜ ⵊⵓⵙⵓⵕ - ⴰⵏⵎⵓⴳⴳⴰⵔ ⵏ ⵜⵡⵜⵎⵉⵏ ⵜⵉⵎⵖⵔⵉⴱⵉⵢⵉⵏ ⴷ ⵡⴰⵎⵎⴰⵙ ⵏ “ⵍⴽⴰⵡⴰⴽⵉⴱⵉ ⵏ ⵓⵎⵓⵜⵜⵉ ⴰⴷⵉⵎⵓⵇⵕⴰⵟⵉ” ⵖ ⵜⵓⵏⵙ, ⵜⴰⵎⴰⵔⵉⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵙⵇⵇⵉⵎⵜ ⵏ ⵓⵜⵓⵢ ⵉⵜⵜⵓⵙⵎⴰⴳⵍⵏ ⵙ ⵓⵙⵎⵓⵜⵜⴳ ⵏ ⵜⵎⴰⵎⴽⵜ ⵏ ⵓⵙⵡⵓⵔⵉ ⴰⵏⴰⵎⵓⵔ ⴳ ⵢⵉⴳⵔ ⵏ ⵜⵓⴳⴷⵓⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ (2008-2010), ⴷ ⵓⵙⵎⵀⵍ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ.
ⵙⴳ ⵜⵙⴳⴰ ⵢⴰⴹⵏⵉⵏ, ⵜⴷⵔⵓ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⵎⵣⵉⵣⵣⵍⵜ ⵏ ⵓⵏⵄⴰⵕ ⴰⵙⵔⵜⴰⵏ ⴳ ⵜⵎⴰⵥⵓⵏⵜ ⴰⴷⵉⵙ ⴰⴱⴰⴱⴰ, ⵜⵎⵎⴰⵖ ⴰⴷ ⵜⵙⵖⵣⵏ ⵜⵎⵓⵏⵉ ⵜⴰⵕⵉⵇⵉⵜ ⴰⴱⵕⵓⵜⵓⴽⵓⵍ ⵉⵣⴷⵉⵏ ⵙ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵎⴽⵍⵍⵉ ⵜⴷⵔⵓ ⴳ ⵓⵏⵄⴰⵕ ⵏ ⵓⵙⵖⵣⵏ ⵅⴼ ⵜⵎⵢⴰⵇⵇⴰⵏⵜ ⵏ ⵜⵎⵙⵏⴽⴰⵔⵜ ⵏ ⵓⵏⵖⵓⴱⵓ ⵓⵛⵛⵉⵍ ⵙ ⵢⵉⴳⵉ ⵏ ⵓⵣⴷⴰⵢ, ⴳ ⵓⵙⴰⵜⵉ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵏ ⵜⵡⵓⵔⵉ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵖⵉ ⵅⴼ ⵢⴰⵜ ⵜⵎⵣⵉⵣⵣⵍⵜ ⵉⵙⵡⵓⵜⵜⵙⵏ ⴰⵙⵖⵣⵏ ⵅⴼ ⵜⵎⵢⴰⵇⵇⴰⵏⵜ ⵏ ⵜⵎⵙⵏⴽⴰⵔⵜ ⵏ ⵓⵏⵖⵓⴱⵓ ⵓⵛⵛⵉⵍ.
ⵉⵙⵙⵓⴳⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵉ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵏⵏⴰ ⵢⵓⵎⵥⵏ ⴽⵉⴳⴰⵏ ⵏ ⵜⵙⵎⵖⵓⵔⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ, ⵙⵍⴰⵡⴰⵏ ⵜ ⴰⴽⴽⵯ ⵍⵍⵉⵖ ⵜⴳⴰ ⵜⴰⵎⵙⵜⴰⵏⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴰⵎⴰⴷⴰⵢⵜ ⵏ ⵓⴷⴰⴱⵓ ⵙⴳ ⵜⵙⴽⵯⴼⵍⵜ ⵏ ⵓⴼⵙⵢⴰⵏ ⵅⴼ ⵜⵎⵔⵉⵙⵜ ⵏⵏⵙ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⴷⴰⵢⵜ ⵏ ⵓⴷⴰⴱⵓ ⵙⴳ ⵜⵙⴽⵯⴼⵍⵜ ⵏ ⵓⵎⵏⴰⵢ, ⵅⴼ ⵜⵡⵓⵔⵉⵡⵉⵏ ⵏⵏⵙ ⵍⵍⵉⵖ ⵜⴳⴰ ⵜⴰⴳⵎⴰⵎⵜ ⴳ ⵜⵙⵇⵇⵉⵎⵜ ⵜⴰⵎⵛⵛⵉⵡⴰⵕⵜ ⵏ ⵓⵣⵣⵔⴰⵢ ⵏ ⵓⴷⵓⵙⵜⵓⵔ, ⵎⴽⵍⵍⵉ ⴰⵙ ⵜⴻⵜⵜⵡⴰⴼⴽⴰ ⵜⵎⴰⴷⴰⵢⵜ ⵏ ⵜⴰⵍⵉⵍⵜ ⵏ ⵡⴰⴷⴷⵓⵔ ⴰⵏⴰⵎⵓⵔ ⵙ ⵜⴼⵙⵏⴰ ⵏ ⵓⵎⵏⴰⵢ ⵣⵖ ⴷⴰⵔ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵏ ⴼⵕⴰⵏⵚⴰ.
ⴳ ⵓⵙⴰⵜⵉ ⵏ ⵜⵎⵣⵉⵣⵣⵍⵜ "IStand With Her" ⵏⵏⴰ ⵜⵕⵥⵎ ⵜⴳⵏⵙⴰⵙⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴳⴳⵯⴰⵙ ⵏ 2011 ⵙ ⵓⴽⵜⵜⵓⵢ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ, ⵜⴻⵜⵜⵡⴰⵙⵜⴰⵢ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴳ ⵙⵎⵎⵓⵙⵜ ⵏ ⵜⵡⵜⵎⵉⵏ ⵜⵉⵎⵓⵣⴰⵔ ⵏⵏⴰ ⵉⴼⴽⴰⵏ ⴽⵉⴳⴰⵏ ⵙⴳ ⵜⵓⴷⵔⵜ ⵏⵏⵙⵏⵜ ⵉ ⵜⵖⵏⵙⴰ ⵖⵉ ⵅⴼ ⵢⴰⵏ ⵓⵎⴰⴹⴰⵍ ⴳ ⵜⵍⵍⴰ ⵜⴳⵣⵉ ⵏ ⵜⵙⵏⴳⴰⴷⴷⴰⵢⵜ ⵏⴳⵔ ⵡⴰⵏⴰⵡⵏ ⵙ ⵙⵉⵏ. ⴳ 2024 ⴳ ⵎⴰⴷⵔⵉⴷ, ⵜⵉⵡⵉ ⵎⴰⵙⵙⴰ ⴱⵓⵄⵢⵢⴰⵛ "ⵜⴰⵙⵎⵖⵓⵔⵜ ⵏ ⵜⵎⵖⴰⵔⵜ ⵏ ⵉⵎⴰⵍ 2024 ", ⵏⵏⴰ ⵜⴽⴽⴰ ⵜⵎⵙⵎⵓⵏⵜ ⵏ ⵜⵉⴷⴷⵓⴽⴽⵍⴰ ⵜⴰⵚⴱⵍⵢⵓⵏⵉⵜ-ⵜⴰⴼⵕⴰⵏⵚⵉⵚⵜ, ⵙ ⵓⵙⵎⵖⵔ ⵏ " ⵜⵎⵔⵉⵙⵉⵏ ⵏⵏⵙ ⵉⵕⵚⴰⵏ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ".
ⵜⵍⵓⵍ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⵖⵔⵎⵜ ⵏ ⵜⵉⵟⵡⴰⵏ ⴳ ⵎⵔⴰⵡ ⴷⵓⵊⴰⵏⴱⵉⵔ, ⴰⵙⴰⴽⵓⴷ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⴰⵙⴳⵯⵙⴰⵏ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴳ ⵜⴰⵎⴰⵔⴰⵡⵜ ⵏ ⵙⵉⵏ ⵉⵃⵏⵊⵉⵔⵏ.