ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ 57 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⴰⵜ ⵜⵉⵏⴰⵡⵜ ⵅⴼ "ⴰⵣⵣⴳⵉⵔ ⵏ ⵜⵎⵔⵉⵙⵉⵏ ⵏ ⵉⵡⴰⵏⴽⵏ ⵅⴼ ⵜⵉⵍⴰⵍⵜ ⵏ ⵜⵡⵊⴰ ⴳ ⵡⴰⵏⵏⴰⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵉⴳⵎⴰⵎⵏ ⵏⵏⵙ" ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ ⵓⴽⵕⴰⵙ 25 ⵛⵓⵜⴰⵏⴱⵉⵔ 2024, ⴳ ⵊⵓⵏⵉⴼ, ⵙ ⵓⵣⵎⵎⵣⵓ ⵏ ⵓⵣⵔⴰⵢ ⵏ 30 ⵓⵙⴳⴳⵯⴰⵙ ⵅⴼ ⵡⴰⵍⵖⵓ ⴰⵎⴰⵜⴰⵢ ⴰⴳⵔⴰⵖⵍⴰⵏ ⵏ ⵜⵡⵊⴰ.

ⴳ ⵓⵎⵏⴰⴹ ⴰⴷ, ⵉⵙⵙⵍⴽⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴽⵛⵛⵓⵎⵜ ⵏⵏⵙ ⵎⴰⵙ ⵉⵙⵙⴹⵕⵚ ⵓⴷⵓⵙⵜⵓⵔ ⴰⵎⵖⵔⵉⴱⵉ ⵅⴼ ⵡⴰⵙⵙⴰⵢ ⵏ ⵓⵡⴰⵏⴽ ⵜⵉⵎⵙⵜⴳⴳⴰⵔⵉⵏ ⵜⵓⵍⴳⵉⵏⵉⵏ ⴷ ⵜⵣⵔⴼⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⵉ ⵓⴼⵔⴰⴳ ⵏ ⵜⵡⵊⴰ, ⵉⵙⴷⴷⵉⴷ ⵅⴼ ⵢⵉⵎⴰⵏ ⵏⵏⵙ ⵉⴷⵓⵙⵏ ⵎⴰⵙ ⵓⵔ ⵏⵏⵉⵏ ⴰⴷ ⵉⵍⵉⵏ ⵉⵣⵔⴼⴰⵏ ⵏ ⵜⵡⵊⴰ ⴰⴽⴽⵯ ⴰⴱⵍⴰ ⵉⵖ ⵙⵔⵙⵏ ⴼⵊⵊⵉⵊⵏ ⵉⴳⵎⴰⵎⵏ ⵏⵏⵙ ⴰⴽⴽⵯ, ⴱⵍⴰ ⴰⵙⴽⴰⵔ ⵙ ⵓⵙⵓⵔⵙ ⵏⵏⵙⵏ, ⵉⵣⵔⴼⴰⵏ ⵏⵏⵙⵏ ⴷ ⵜⴷⵔⴼⵉⵏ ⵏⵏⵙⵏ.

ⴳ ⵓⵙⵉⵡⴰⵍ ⵏⵏⵙ ⵅⴼ ⵓⵙⵖⵓⵏ ⵏ ⵍⵎⵖⵔⵉⴱ ⵙ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵜⵡⵊⴰ, ⵉⵙⵙⴽⵜⵉ ⵓⵙⵇⵇⵉⵎ ⵙ ⵓⵎⵓⴽⵏ ⵏ ⵖⵉⵍⴰⴷ ⵉ ⵓⵙⵍⴳⵏ ⵏ ⵜⵡⵊⴰ, ⵏⵏⴰ ⵉⴳⴰⵏ ⵡⵉⵙⵙ ⵙⵉⵏ ⴷⴼⴼⵉⵔ ⵏ ⵓⵙⵏⴼⵍ ⵏ 2004, ⵏⵏⴰ ⵉⵙⵡⴰⵜⵜⵙⵏ ⴰⵙⴱⴷⴷⵉ ⵏ ⵜⵉⴼⵔⵔⵎⵉⵏ ⵜⵉⵣⵔⴼⴰⵏⵉⵏ ⴷ ⴰⴷ ⵉⴼⵔⴳ ⴰⴽⴽⵯ ⵉⴳⵎⴰⵎⵏ ⵏ ⵜⵡⵊⴰ, ⵙⵍⴰⵡⴰⵏ ⴰⴽⴽⵯ ⵜⵉⵎⵖⴰⵔⵉⵏ ⴷ ⵡⴰⵣⵣⴰⵏⵏ, ⴷ ⴰⴷ ⵉⵙⵙⴷⵔⵓⵡ ⵉⵎⵙⴽⴰⵔⵏ ⵉⵎⵢⴰⵏⴰⵡⵏ ⴳ ⵢⵉⴳⵔ ⴰⴷ.

ⴳ ⵓⵎⵏⴰⴹ ⴰⴷ, ⵉⵙⵙⴽⵜⵉ ⵓⵙⵇⵇⵉⵎ ⵙ ⵜⵎⵙⵙⴽⵜⵉⵜ ⵏⵏⵙ ⵏⵏⴰ ⴷ ⵉⵙⵙⴰⴼⵖ ⵅⴼ ⵓⵙⵏⴼⵍ ⵏ ⵓⵙⵍⴳⵏ ⵏ ⵜⵡⵊⴰ, ⵍⵍⵉ ⵉⵙⵙⵖⵍⴰⴼⵏ ⵙ ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ ⴷ ⵓⴼⵔⴰⴳ ⵏ ⵡⴰⵣⵣⴰⵏ, ⵎⴽⴷⴰ ⵉⵙⴷⴷⵉⴷ ⵓⵙⵇⵇⵉⵎ ⵅⴼ ⵜⴷⵔⴰⵡⵜ ⵏⵏⵙ ⵜⴰⵙⵓⵍⴰⵏⵜ ⵅⴼ ⵉⵙⵏⴼⵍⵏ ⵉⵎⵙⴷⴷⵓⵔⵏ, ⵙⵍⴰⵡⴰⵏ ⴰⴽⴽⵡ ⴰⵙⴱⵉⴷⴷ ⵏ ⵓⵣⵣⵉⴳⵣ ⵏ ⵓⵏⵄⴰⵕ ⵏⵏⵙ ⵅⴼ ⵉⵎⵓⴽⵏⵏ ⵉⴷⵙⵍⴰⵏⵏ, ⴳ ⵢⴰⵎⵓ ⴰⵡⴷ ⵓⵙⴱⴷⴷⵉ ⵏ ⵢⵉⵡⵍ ⵏ ⵡⴰⵣⵣⴰⵏⵏ, ⵜⴰⵏⴼⵔⵓⵜ ⵏ ⵉⵙⴽⵉⵍ ⴳ ⵓⵙⵍⵎⴷ, ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵉⵙⵎⵉⵍⵏ ⴽⵓⴽⴹⵏⵉⵏ, ⵉⵙⵙⴽⵜⵉ ⵎⴰⵙ ⵉⵙⴽⵔ ⵜⴰⴹⴼⵕⵉ ⵏ ⵜⵕⵥⵉⵢⵉⵏ ⵜⵉⵏⴰⵎⵓⵔⵉⵏ ⵙ ⵉⵎⴰⵙⵙⵏ ⵏⵏⵙ ⵉⵏⴰⵎⵓⵔⵏⵏ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵉⵎⵉⵙ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵙ ⵙⵏⴰⵜ ⴷ ⵎⵔⴰⵡⵜ.

ⴳ ⵜⴳⵉⵔⴰ ⵏ ⵜⴽⵛⵛⵓⵎⵜ ⵏⵏⵙ, ⵉⵖⵔⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵜⵏⴱⴰⴹⵜ ⴰⴷ ⵜⵙⴷⴷⵔⴼ  ⴰⵙⵔⵙ ⵏ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵜⴰⵡⵊⴰ ⴷ ⵜⵎⵥⵉ ⴷ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵜⵄⵄⵓⵔⵎⴰ ⴷ ⵜⵡⵓⵔⵉ ⵜⴰⵎⵙⵎⵓⵏⵜ, ⵏⵏⴰ ⵉⴳⴰⵏ ⵙⵏⴰⵜ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ.