ⵜⵖⵔⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵙⴷⵓⵙ ⵏ ⵓⵖⵏⴰⵙ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴰⵍⵍⴰⵍ ⵏ ⵜⵣⵎⵎⴰⵔ, ⴰⴽⴰⵎ ⵏ ⵜⵎⵣⵡⴰⵔⵜ ⵅⴼ ⵡⴰⵔⴰⵢ ⴰⵎⵢⴰⴳⴰⵏ ⵙⴳ ⵓⵙⵔⴼⵓⴼⵏ. ⵉⴷⴷⴰ ⴷ ⵎⴰⵢⴰ ⵏⵏ ⴳ ⵓⵏⵎⵓⵇⵇⴰⵔ ⵏⵏⴰ ⵉⵙⵏⵎⴰⵍⴰ ⵓⴽⴰⴱⴰⵕ ⴰⵎⵖⵍⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵊⵓⵏⵉⴼ, ⴰⵙⵙ ⵏ ⵓⵙⵉⵎⵡⴰⵙ 11 ⵎⴰⵕⵚ 2022, ⵙ ⵜⴷⵔⴰⵡⵜ ⵏ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ, ⴷ ⵜⵏⵙⵙⵉⵅⴼⵜ ⵏ ⵜⵏⴼⵍⵓⵙⵜ ⵏ ⵜⵙⵏⵜⴰⵢⵜ ⵏ ⵡⴰⵏⵏⴰⵍ ⵏ ⵜⵙⵖⵣⵏⵜ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵓⴱⵕⵓⵜⵓⴽⵓⵍ ⵏⵏⵙ ⴰⵙⵎⵎⵓⴷ (CTI2024), ⴷ ⵜⵏⵙⵙⵉⵅⴼⵜ ⵏ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ.

ⵜⵙⵎⵏⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵢⴰⵏ ⵓⵙⵎⴰⵇⵇⵍ ⵅⴼ ⵓⵎⵣⵔⵓⵢ ⵏ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵏⵏⴰ ⵉⴽⴽⴰ ⵍⵎⵖⵔⵉⴱ ⵢⵓⵎⵥ, ⴹⴰⵕⴰⵜ ⴰⵙⵔⵓⵙ ⵏⵏⵙ, ⵜⵉⵙⴽⵯⴼⴰⵍ ⵢⴰⵜⵜⵓⵢⵏ ⴳ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⴷ ⵉⵙⵉⵣⵡⵉⵔⵏ ⵏⵏⴰ ⵉⵙⵖⵉⵡⵙ ⵓⵙⵇⵇⵉⵎ ⴰⴼⴰⴷ ⴰⴷ ⵉⵏⵏⴰⵍ ⵜⴰⵡⵓⵔⵉ ⵏ ⵉⵎⵉⵙ ⴷ ⵉⴳⵉ ⵏ ⵜⵡⵓⵔⵉⵡⵉⵏ ⵏⵏⵙ. ⵉⴳⴰ ⵉⵎⵉⵙ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵍⵎⵖⵔⵉⴱ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵙⴳ ⵉⴱⵔⵉⵔ 2020 ⵙⵉⵎⵔⴰⵡ ⴷ ⵙⵎⵎⵓⵙ (25) ⵏ ⵓⵔⵣⴰⴼ ⵉ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ, ⴷ ⵓⵔⵣⴰⴼ ⵏ ⵓⴹⴼⴼⵓⵕ, ⴰⴼⴰⴷ ⴰⴷ ⵉⵎⴷⵉ, ⵉⵙⵎⵀⵍ ⵜⵉⵥⵍⴰⵢⵉⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ. ⵜⵜⵓⴳⴰⵏ ⵉⵔⵣⴰⴼⵏ ⴰⴷ ⵙ ⵜⵓⴳⵜ ⵏ ⵉⴷⵖⴰⵔⵏ ⵏ ⵓⵏⵓⴼ ⵙⴳ ⵜⴷⵔⴼⵉ ⴳ ⵙⴰⵜ ⵏ ⵜⵎⵏⴰⴹⵉⵏ ⵏ ⵜⴳⵍⴷⵉⵜ.

"ⴰⵎⵢⴰⵡⴰⵙ, ⴰⵙⵖⴰⵏ, ⴰⵍⵍⴰⵍ ⵏ ⵜⵣⵎⵎⴰⵔ ⵏ ⵉⵎⴰⵙⵙⵏ, ⴰⵎⴷⴰⵢ ⴷ ⵓⵏⵎⴰⵍⴰ ⴳ ⵓⵙⵙⵓⴼⵖ ⵏ ⵜⴰⵏⴰⴹⵉⵏ ⴷ ⵉⴼⵔⴷⵉⵙⵏ ⵉⴷⵙⵍⴰⵏⵏ ⵏ ⵓⵙⴷⵓⵙ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ... ⵜⵙⵖⴰⵡⵙⴰ ⵜⵕⵡⵉ ⵏⵏⵙⵏ ⵙ ⵜⵎⵣⵡⴰⵔⵜ ⵜⵉⵎⵉⴷⵉⵜ ⵉⵣⵎⵔⵏ ⴰⴷ ⵢⴰⵍⵍ ⵉⵏⴰⵥⴰⵕⵏ ⴰⴷ, ⴰⵙⵉⵣⵡⵔ ⵏ ⵉⵏⴰⵥⴰⵕⵏ ⵉⵎⴰⵢⵏⵓⵜⵏ ⵃⵎⴰ ⴰⴷ ⵙⴽⵔⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵜⵉⵙⵎⵉⴳⴰⵍ ⵏⵏⵙⵏ ⴷ ⵜⵡⵓⵔⵉⵡⵉⵏ ⵏⵏⵙⵏ", ⴰⴷ ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵓⵙⵔⵙ ⵏ ⵉⵥⵕⵉ ⵅⴼ ⵜⵓⴳⴳⴰⵙ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵏⵄⴰⵕ ⵏ ⵓⵙⵔⵓⵙ ⵏ ⵉⵥⵟⵟⴰⵜⵏ ⵉⵙⴳⴰⵡⴰⵏⵏ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ.

ⵜⵙⵎⵍ ⴷⴰⵖ ⵎⴰⵙⵙⴰ ⴱⵓⵄⵢⵢⴰⵛ, ⵎⴰⵙ ⵉⴳⴰ "ⵉⴳⵉ ⵏ ⴰⵎⵢⴰⴳⴰⵏ ⴷ ⵉⵎⵕⵡⵉ ⵏ ⵜⵥⵍⴰⵢⵜ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⴷ ⴰⴱⵔⵉⴷ ⴰⵙⵓⵍⴰⵏ, ⵉⵙⵖⴰⵡⵙⴰⵏ ⵙ ⵜⴷⵉⵏⴰⵎⵉⵜⵉⵏ ⴷ ⵉⴳⵉⵜⵏ ⵉⵎⴰⵢⵏⵓⵜⵏ ⵅⴼ ⵜⵎⵢⴰⴳⴰⵏⵜ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ". ⴳ ⵓⵏⵎⵓⵇⵇⴰⵔ ⴰⴷ, ⵙⵙⵓⵍⵖⵜⵏⵜ ⵜⵎⴷⵔⴰⵡⵉⵏ ⵙ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴷ ⵜⵎⵣⵡⴰⵔⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴷⴷⵉⴷⵏⵜ ⵅⴼ ⵡⴰⴷⴷⵓⵔ ⵏ ⵓⵙⵖⴰⵏ ⴷ ⵓⴱⵟⵟⵓ ⵏ ⵜⵉⵔⵎⵉⵜⵉⵏ ⵉⵏⴳⵔ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵎⴽⴷⴰ ⵖⵔⴰⵏ ⵙ ⵜⵙⵖⵣⵏⵜ ⵏ ⵉⵡⴰⵏⴽⵏ ⵅⴼ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵉⵥⵍⵉⵏ ⵙ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴷ ⵓⴱⵕⵓⵜⵓⴽⵓⵍ ⵏⵏⵙ ⴰⵙⵎⵎⵓⴷ, ⵜⴰⵙⵖⵣⵏⵜ ⵏ "ⵉⵎⵏⵣⴰⵢⵏ ⵏ ⵎⵉⵏⴷⵉⵣ" ⵉⴷⴷⵖ ⴳⴰⵏ ⵉⵎⵉⵙ ⵉⵏⵏⴰⵍⵏ ⴰⵔⴰⵢ ⵙⴳ ⵓⵙⵔⴼⵓⴼⵏ.