ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⵉⴼⴰⵡⵜ ⵏ ⵡⴰⵙⵙ ⴰⴷ ⴰⴽⵡⴰⵙ 19 ⵉⵏⵏⴰⵢⵔ 2023 ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⴷⴰ ⵜⵙⵖⵣⴰⵏ “ⵜⵎⵢⴰⴷⴰⵙⵜ ⵏ ⵓⴽⵛⵛⵓⵎ ⵏ ⵓⵙⵇⵇⵉⵎ ⵜⴰⵎⵓⵏⵉ ⵏ ⵜⵙⴰⵖⵓⵍⵜ ⵜⵓⵍⴳⵉⵏⵜ ⴷ ⵜⵣⵔⴼⴰⵏⵜ ⴳ ⵓⵙⵎⴽⵍ ⵏ ⵇⴰⵃ ⵜⵎⵓⴽⵔⵉⵙⵉⵏ ⵜⵉⵣⵔⴼⴰⵏⵉⵏ, ⴳ ⵉⵥⵥⵍⵎⴹ ⵏ ⵍⵎⵖⵔⵉⴱ, ⵜⴰⴳⵓⵜ ⵏⵏⵙ, ⴰⴳⵎⵎⵓⴹ ⵏⵏⵙ ⴷ ⵉⴼⴼⵓⵙ ⵏⵏⵙ".

ⵜⵙⵙⵎⵜⵔ ⵎⴰⵙⵙⴰ ⴱⵓⵄⵢⵢⴰⵛ, ⴳ ⵓⵙⴼⵙⵔ ⵏⵏⵙ ⵙ ⵜⵎⵍⴷⴰ ⵏ ⵓⵏⵎⵓⵇⵇⴰⵔ ⴰⵣⵔⴰⵡⴰⵏ ⵏⵏⵉ ⵜⵙⵏⵎⴰⵍⴰ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵅⴼ ⵉⵎⵔⵙⵉ "ⵜⵉⵎⴰⵢⵏⵓⵜⵉⵏ ⵏ ⵜⵎⵙⴰⵔⵜ ⵜⴰⵏⴰⵎⵓⵔⵜ ⴷ ⵜⵣⵎⵎⴰⵔ ⵏ ⵜⴷⵉⴱⵍⵓⵎⴰⵙⵉⵜ ⵜⴰⵎⵙⴷⴰⵖⵜ: ⵓⵎⵄⵉⵏⵏ ⴷ ⵉⵙⵓⵜⵔⵏ ⵏ ⵓⵙⴷⴳⵔ", ⵎⴰⵙ "ⵉⵖⵜⵙ ⵍⵎⵖⵔⵉⴱ, ⵙ ⵜⵡⵉⵍⴰ ⵜⴰⵎⵅⴰⵙⵜ ⴷ ⵜⵉⵔⴰⵜ, ⴷ ⴳ ⵓⵎⵏⴰⴹ ⵏ ⵜⵓⵚⴽⴰ ⴷ ⵓⵙⴳⴳⵓⴷⵉ ⴰⴷⵉⵎⵓⵇⵕⴰⵟⵉ ⴷ ⵓⵙⵓⵖⵍ ⵏ ⵓⵎⵢⴰⵖ ⵏ ⵜⵉⵔⴰⵜ ⵏ ⵓⵡⴰⵏⴽ ⴳ ⵓⵎⵏⵉⴷ ⵏ ⵜⵓⴳⵜ ⵏ ⵜⴷⵉⵏⴰⵎⵉⵢⵉⵏ ⵜⵉⵏⴰⵎⵓⵏⵉⵏ ⵜⵉⵏⴰⵎⵓⵔⵉⵏ ⵙⵡⵓⵜⵜⵙⵏⵉⵏ ⵜⴰⵏⴼⵔⵓⵜ ⵏ ⵜⴼⴰⴷⵉⵡⵉⵏ ⵏ ⵓⵎⵓⵜⵜⵉ ⴰⴷⵉⵎⵓⵇⵕⴰⵟⵉ, ⴰⵙⵡⵓⵔⵉ ⵏⵏⵙ ⴰⵡⴷ ⵅⴼ ⵓⵙⵡⵓⴷⴷⵓ ⵏⵏⵙ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵇⴰⵃ ⵜⵙⴳⴳⵯⵉⵏ, ⵏⵏⵉ ⴳ ⵍⵍⴰⵏⵜ ⴰⵡⴷ ⵜⵙⴳⴳⵯⵉⵏ ⵏ ⵉⴼⴼⵓⵙ, ⴷ ⵜⵙⵏⵙⵉ ⵏ ⵉⵍⴳⴰⵎⵏ ⵏ ⵜⵣⵔⴼⵜ ⵏ ⵓⵎⵓⵜⵜⵉ ⵣⴷⵉⵏⵉⵏ ⵙ ⵓⵙⴳⴳⴷ ⵏ ⵓⵎⴰⵍⴰⴷ ⴷ ⵓⵣⵓⵣⵣⴼ ⵏ ⵜⵉⴷⵜ ⴷ ⵡⴰⵔ ⴰⵍⴰⵙ ⴷ ⵓⵃⵟⵟⵓ ⵏ ⵜⵎⴽⵜⵉⵜ". 

ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵓⵙⵔⴼⵓⴼⵏ 13 ⵏ ⵓⵔⵣⴰⴼ ⵙ ⵉⴷⵖⴰⵔⵏ ⵏ ⵜⴼⴰⵜⵉⵜ ⵣⵖ ⵜⴷⵔⴼⵉ ⴳ ⵜⵙⴳⴳⵯⵉⵏ ⵏ ⵉⴼⴼⵓⵙ, ⵙⴳⵉⵙⵏ 7 ⵏ ⵉⵔⵣⴰⴼⵏ ⵙ ⵉⴷⵖⴰⵔⵏ ⵉⵔⵣⴼ ⵙⵔⵙⵏ ⵜⵉⴽⴽⵍⵜ ⵉⵣⵡⴰⵔⵏ ⴷ 6 ⵏ ⵉⵔⵣⴰⴼⵏ ⵏ ⵓⴹⴼⴼⵓⵕ ⵙ ⵉⴷⵖⴰⵔⵏ ⵏⵏⵉ ⵙ ⵢⴰⴷ ⵉⵔⵣⴼ, ⵙⴳⵉⵙⵏ ⵜⵉⵥⵍⴰⵢⵉⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴷ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ ⵏ ⵍⵄⵢⵓⵏ ⴷ ⴷⴷⴰⵅⵍⴰ ⴷ ⵓⴳⵍⵎⵉⵎ. 

ⴳ ⵓⵎⵏⴰⴹ ⴰⴷ, ⵜⵙⵙⴽⵜⵉ ⵙ ⵜⵓⵍⵖⴰ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵜⵖⵓⵔⵉ ⵏⵏⵙ ⵉ ⵓⵙⵇⵇⵉⵎ ⵃⵎⴰ ⴰⴷ ⵉⴷⵔⵓ ⴳ ⵓⵙⴳⵔⴰⵡ ⵏ ⵓⵕⵓⴱⴱⴰ ⵉ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵓⵙⵎⵏⵉⴷ ⵏ ⵜⵉⵔⵎⵉⵜ ⵏ ⵓⵙⵇⵇⵉⵎ ⴷ ⵉⵎⵉⵙ ⵏⵏⵙ ⴳ ⵢⵉⴳⵔ ⴰⴷ, ⴷ ⵓⵍⴰ ⵜⵉⵔⵎⵉⵜ ⵏ ⵜⵎⵢⴰⵇⵇⴰⵏⵜ ⵜⴰⴽⵙⵡⴰⵜ ⵏⵏⵉ ⵉⵙⵙⴳⵎⴹ ⵓⵙⵇⵇⵉⵎ ⴰⴽⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴳ ⵓⵙⴳⴳⵯⴰⵙ ⵏ 2022. 

ⴳ ⵎⴰⴷ ⵉⵥⵍⵉⵏ ⵙ ⵓⵎⵢⴰⵖ ⵏⵏⵙ ⴰⴽⴷ ⵉⵏⴳⵎⴰⵎⵏ ⴷ ⵉⴳⵔⴰⵡⵏ ⵏ ⵜⵎⵜⵜⴰ ⵉⵎⵓⵏⵏ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵉⵜⵜⵎⵢⴰⵡⴰⴹ ⵓⵙⵇⵇⵉⵎ ⵙ ⵜⵡⵉⵍⴰ ⵜⴰⵍⵓⴳⴰⵏⵜ ⴰⴽⴷ ⵓⵙⵉⵔⴰ ⵏ ⵓⵎⴰⵍⴰⵍ ⴰⵎⴰⵜⵜⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⴳⴳⵯⵉⵏ ⵏ ⵢⵉⴼⴼⵓⵙ, ⵢⴰⵡⵙ ⴳ ⵜⴰⵏⴰⴹⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵅⴼ ⵜⵏⵣⵔⵓⴼⵜ, ⴰⵔ ⵉⵙⵙⵉⴼⵉⴹ ⵓⵙⵇⵇⵉⵎ ⵉ ⵜⵙⵎⵉⵔⵉⵜ ⵜⴰⵏⴰⴹⵉⵏ ⵜⵉⵣⵎⵣⴰⵏⵉⵏ ⵉⵎⵎⴰⵍⵏ ⵜⴰⴷⵉⵏⴰⵎⵉⵜ ⵜⴰⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵏⴰⴹⵜ ⴰⴷ, ⵉⵎⵢⴰⵖ ⴰⴽⴷ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵅⴼ ⴽⵔⴰ ⵏ ⵡⴰⴷⴷⴰⴷⵏ ⵓⴼⵔⵉⴷⵏ, ⵎⴽⴷⴰ ⵉⵜⵜⵎⵢⴰⵖ ⴰⴽⴷ ⵉⵏⴳⵎⴰⵎⵏ ⵜⵜⵡⴰⵙⵔⴰⵙⵏⵉⵏ ⵙ ⵜⴱⵔⵉⴷⵜ ⵏ ⵜⴻⵜⴳⴰⵔⵉⵏ ⵏ ⵜⵎⵜⵜⴰ ⵉⵎⵓⵏⵏ ⵙ ⵜⴰⵏⴰⴹⵉⵏ ⵜⵉⵣⵎⵣⴰⵏⵉⵏ ⴷ ⴰⴽⴷ ⵉⵎⴰⵙⵙⵏ ⵉⴳⵔⴰⵖⵍⴰⵏⵏ ⴷ ⵉⵙⴳⴰⵡⴰⵏⵏ ⵏⵏⵉⴹⵏ. 

ⴳ ⵓⵎⵏⴰⴹ ⵏ ⵓⵙⵓⵜⴳ ⵏⵏⵙ ⵉ ⵜⵢⴰⴼⵓⵜⵉⵏ ⵏ ⵓⵎⵢⴰⵖ ⵏ ⵓⵙⵇⵇⵉⵎ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵓⵙⴳⴰⵡⴰⵏ, ⵜⵙⵙⵎⵜⵔ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴱⴷⴷⴰ ⵜⵙⴷⴷⵉⴷⵏⵜ ⵅⴼ ⵓⵙⵓⵖⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵙⴽⵜⵉ ⵙ ⵜⵓⵍⵖⴰ ⵏ ⵜⴰⵏⴰⴹⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴰⵙⴳⴳⵯⴰⵙ ⵏ 2022 ⵙ ⵓⵎⵢⴰⵖ ⵏ ⵓⵙⵇⵇⵉⵎ ⴰⴽⴷ ⵜⵙⵎⵉⵔⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵙ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴳ ⵜⵙⴳⴳⵯⵉⵏ ⵏ ⵢⵉⴼⴼⵓⵙ ⵏ ⵜⴳⵍⴷⵉⵜ.