ⵉⵙⵓⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⴰ ⵉⵜⵜⴳⴳⴰ ⴰⵎⴹⴰⴽⴰⵕ ⵏⵏⵙ ⵉⵏⵏⵓⵕⵥⵎⵏ ⵅⴼ ⵜⴽⵕⴹⵉ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ "ⴰⴽⵡⴰⵙ ⵏ ⵓⴼⵔⴰⴳ", ⵙ ⵓⵙⵏⵎⴰⵍⴰ ⵏ ⵜⵉⵏⴰⵡⵜ ⵜⵉⵙ ⴽⵕⴰⴹⵜ, ⴰⵙⵙ ⵏ ⵓⴽⵡⴰⵙ 31 ⵎⴰⵕⵚ 2022, ⵉⵜⵜⵡⴰⵥⵍⴰⵢⵏ ⵙ ⵜⵏⴽⴷⴰ ⵏ ⵜⵖⵓⵔⵉ ⵅⴼ ⵜⴰⵏⴰⴹⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ ⵅⴼ ⵜⵙⴱⴱⴰⴱⵜ ⵙ ⵉⵡⴷⴰⵏ ⴳ ⵍⵎⵖⵔⵉⴱ ⵏⵏⴰ ⴷ ⵜⵙⵙⵓⴼⵖ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵣⴷⴰⵢ ⵏ ⵜⵎⴳⴳⵉⵜⵉⵏ ⵏ ⵓⵙⴱⴷⴷⵉ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ ⴷ ⵡⴰⵔⴰⵢ ⵙⴳⵉⵙ. ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵏ ⵜⵉⵏⴰⵡⵜ, ⵏⵏⴰ ⵉⵏⵏⴰ ⵙ ⵜⵎⵓⵔⴰⵢⵜ ⵎⴰⵙⵙ ⵃⵍⵉ ⴽⴰⵔⵉⵎⵉ, ⴰⵏⴳⵎⴰⵎ ⵏ ⵓⵙⵇⵇⵉⵎ, ⵜⵍⴰⵖⴰ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵙⵙⵓⴼⵖ ⵏ ⵜⴰⵏⴰⴹⵜ ⴰⴷ ⵏⵏⴰ ⵉⴳⴰⵏ ⵜⴰⵎⵣⵡⴰⵔⵓⵜ, ⵏⵏⴰ ⴳ ⵉⴷⵔⵓ ⵓⵙⵇⵇⵉⵎ ⵙ ⵜⴼⵔⵉⵙⵜ ⵏ ⵓⵏⴳⵎⴰⵎ ⴳ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵣⴷⴰⵢ ⵏ ⵜⵎⴳⴳⵉⵜⵉⵏ ⵏ ⵓⵙⴱⴷⴷⵉ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ ⴷ ⵡⴰⵔⴰⵢ ⵙⴳⵉⵙ, ⵜⵉⵏⵉ ⵎⴰⵙ ⵜⴳⴰ "ⵜⴰⵏⴰⴹⵜ ⵜⴰⵎⵣⵡⴰⵔⵓⵜ ⵅⴼ ⵜⴽⵕⴹⵉ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ ⴷ ⵜⵙⵙⵏⴹⵡⵜ ⵜⴰⵎⴰⵏⴰⵡⵜ ⴳ ⵢⵉⴳⵔ ⵏ ⵓⵙⵙⵓⴼⵖ ⵏ ⵜⴰⵏⴰⴹⵉⵏ ⴷ ⵓⵏⵜⴰⵎ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵏⵖ", ⵜⵔⵏⵓ ⵎⴰⵙ ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵜⴳⴰ ⵜⵎⵢⵓⵔⵜ ⴰⴷ ⵜⵉⵎⵙⴽⵔⵜ ⵉⵖⵓⴷⴰⵏ ⵏⵏⴰ ⵔⴰⴷ ⵉⴳ ⴰⵜⵉⴳ ⵉⵜⵜⵡⴰⵔⵏⴰⵏ ⵉ ⵜⵎⵙⴽⵔⵜ ⵜⴰⵣⵔⴼⴰⵏⵜ ⴳ ⵜⵎⴰⵣⵉⵔⵜ ⵏⵏⵖ, ⵎⴽⴷⴰ ⵔⴰⴷ ⵉⵙⴷⵓⵙ ⴰⵏⵙⴰ ⵏ ⵍⵎⵖⵔⵉⴱ ⴳ ⵓⵙⵡⵉⵔ ⴰⴳⵔⴰⵖⵍⴰⵏ. ⵜⵙⵏⵓⵎⵎⵍ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⴱⴽⴽⵉⴹ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ ⵙ ⵓⴱⴽⴽⵉⴹ ⵓⴷⴷⵉⵙ ⴷ ⵓⵔⴰⴼⵔⴰⵔ ⵓⵎⴰⵍⵍⴰⵙ, ⵉⵛⵇⵇⴰ ⴰⴷ ⵜⵜⵓⵙⵏⵓⵃⵢⵓ ⵅⴼ ⴽⵔⴰ ⵏ ⵉⴱⴽⴽⵉⴹⵏ ⵢⴰⴹⵏⵉⵏ ⵏⵏⴰ ⴰⵙ ⵉⵔⵡⴰⵙⵏ, ⵜⵙⴼⴰⵡ ⵎⴰⵙ ⵓⵔ ⵉⵡⵀⵉⵏ ⴰⴷ ⴼⵍⵍⴰⵙ ⵉⵍⵉⵏ ⵉⵙⵏⵎⴽⵜⴰ ⵉⴷⴷⵖ ⵓⵔ ⵜⵍⵍⵉ ⵜⵙⵉⵍⴰ ⵏ ⵉⵙⴼⴽⴰ ⵜⴰⵏⴰⵎⵓⵔⵜ ⵉⵎⵎⴰⵍⵏ ⴰⴽⵙⴰⵢ ⴰⵏⵉⵍⴰⵡ ⵏ ⵜⵓⵎⴰⵏⵜ ⴷ ⵓⵍⴰ ⴰⵎⵢⴰⵏⴰⵡ ⵏ ⵉⵎⴳⴳⴰⵢⵏ ⴳ ⵢⵉⴳⵔ ⵏ ⵓⵣⵣⴳⵉⵔ ⵏ ⵓⵙⵍⴳⵏ, ⵅⴼ ⵉⴳⴳⵉ ⵏ ⵎⴰⵙ ⵓⵔ ⵉⵣⵔⵉ ⵅⴼ ⵓⵙⵉⴷⴼ ⵏ ⵓⵙⵍⴳⵏ 27.14 ⵉⵣⴷⵉⵏ ⵙ ⵜⵙⴱⴱⴰⴱⵜ ⵙ ⵉⵡⴷⴰⵏ ⵙ ⵓⵣⵣⴳⵉⵔ ⵅⵙ ⵙⵎⵎⵓⵙ ⵏ ⵉⵙⴳⴳⵯⴰⵙⵏ. ⵎⴰⵢⴰ ⵏⵏ ⴰ ⵅⴼ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, "ⵉⵇⵇⴰⵏ ⴰⴷ ⵉⵜⵜⵡⴰⴼⴽ ⵓⵙⵉⵣⵡⵔ ⵉ ⵓⵙⵎⵓⵜⵜⴳ ⴷ ⵓⵙⵎⵓⵜⵜⴳ ⴰⵙⵓⵍⴰⵏ ⵉ ⵇⴰⵃ ⵉⵎⴳⴳⴰⵢⵏ, ⵙⴳ ⵉⴼⵙⵢⴰⵏⵏ ⵏ ⵍⴱⵓⵍⵉⵙ ⴰⵏⵣⵔⴰⴼ ⴷ ⵉⵏⴱⴹⴰⵡⵏ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵉⵏⴱⴹⴰⵡⵏ ⵏ ⵉⴱⴹⵉ ⴷ ⵉⵎⴳⴳⴰⵢⵏ ⵓⵖⵔⵉⵎⵏ. ⴳ ⵜⵖⵓⵔⵉ ⵉⵎⵎⴱⴹⴰⵏ ⵉ ⵜⴰⵏⴰⴹⵜ ⴰⴷ ⵜⴰⵏⴰⵎⵓⵔⵜ, ⵉⴼⵙⵔ ⵓⵏⵎⵀⴰⵍ ⵏ ⵜⵖⴰⵡⵙⵉⵡⵉⵏ ⵜⵉⵏⴱⴽⴰⴹⵉⵏ ⴷ ⵓⵙⵓⵔⴼ ⴳ ⵜⵎⴰⵡⴰⵙⵜ ⵏ ⵜⵣⵔⴼⵜ, ⵎⴰⵙⵙ ⵀⵉⵛⴰⵎ ⵍⵎⴰⵍⴰⵟⵉ, ⵜⵉⵎⵙⵓⵜⴰⵍ ⴷ ⵉⴼⵔⵓⵔⵉⵜⵏ ⵏ ⵉⴳⵉ ⵏ ⵜⴰⵏⴰⴹⵜ ⴰⴷ ⵜⴰⵎⵣⵡⴰⵔⵓⵜ ⵏⵏⴰ ⵉⵙⵖⵣⵏⵏ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⵉⵙⵏⴰⵍⵏ ⵅⴼ ⴽⴽⵓⵥ ⵏ ⵉⵙⴳⵓⵎⵏ, ⵏⵉⵜⵏⵉ ⴷ ⵡⴰⵔⴰⵢ ⴷ ⵓⴼⵔⴰⴳ ⴷ ⵓⵏⵀⵍⵍⴰ ⵉⵍⵎⵎⴰ ⴷ ⵜⵎⴷⵔⴰⵡⵜ. ⵎⴽⴷⴰ ⵉⴼⵙⵔ ⴰⴱⵔⵉⴷ ⵏⵏⴰ ⵉⴹⴼⴰⵕ ⵍⵎⵖⵔⵉⴱ ⵅⴼ ⵓⵙⴱⴷⴷⵉ ⵏ ⵓⴱⴽⴽⵉⴹ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ ⵙ ⵜⵙⵖⵣⵏⵜ ⵏ ⵇⴰⵃ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵣⴷⵉⵏⵉⵏ ⵙ ⵓⵏⴰⴳⵔⴰⵡ ⵏ ⵓⴼⵔⴰⴳ ⵏⵏⴰ ⵅⴼ ⵉⴱⴷⴷ ⵓⵙⴱⴷⴷⵉ ⵏ ⵉⵡⴷⴰⵏ. ⵎⵙⴰⵙⴰⵏ ⵉⵎⴷⵔⴰⵡⵏ ⴳ ⵓⵏⵎⵓⵇⵇⴰⵔ ⴰⴷ ⵅⴼ ⵓⵙⵓⵖⵏ ⵏ ⵓⵙⴼⵙⵉ ⵏ ⵉⴱⴽⴽⵉⴹⵏ ⴰⴷ ⵙⴳ ⵜⵓⴳⵜ ⵜⵙⴳⴳⵯⵉⵏ ⵏⵏⵙⵏⵜ ⵜⵉⵏⴰⵎⵓⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⴷⵍⵙⴰⵏⵉⵏ... ⴷ ⵓⵍⴰ ⴰⵙⵢⵉⵡⵏ ⵏ ⵉⵙⵏⵎⵍⵏ ⵏⵏⴰ ⵣⴷⵉⵏⵉⵏ ⵙ ⵓⴱⴽⴽⵉⴹ ⴰⴷ ⴷ ⵓⵙⵔⵇⴱ ⵏ ⵓⵏⴳⵉⵙⵏ ⵅⴼ ⵓⴼⵓⵖ ⵙⴳ ⵉⴼⵙⵜⵉ ⵏⵏⵙⵏ ⴷ ⵓⵙⴼⵔⴽ ⵏⵏⵙⵏ ⵙ ⵜⵏⴼⵔⵓⵜ ⴷ ⵓⴼⵔⴰⴳ ⵃⵎⴰ ⴰⴷ ⴷⵔⵓⵏ ⴳ ⵓⵙⵉⵙⴼⵉⵡ ⵏ ⵓⴱⴽⴽⵉⴹ ⴰⴷ ⴷ ⵓⵙⵡⵓⵜⵜⵓ ⵏⵏⵙ, ⴷ ⵓⵍⴰ ⴰⵙⵓⵖⵏ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⴰⵙⵙⵏ ⵏ ⵓⵏⵄⴰⵕ ⵓⵖⵔⵉⵎ, ⵙ ⵡⴰⵏⵏⴰⵍ ⵅⴼ ⵉⵎⴳⴳⴰⵢⵏ ⵏ ⵉⴷⵔⴰⵙⵏ ⵉⵎⵣⵡⵓⵔⴰ ⵏ ⵓⵙⴱⴷⴷⵉ ⵏ ⵓⴱⴽⴽⵉⴹ ⴰⴷ ⵃⵎⴰ ⴰⴷ ⵉⵜⵜⵡⴰⵍⴽⴰⵎ ⵓⵔⵎⴰⵙ ⴰⵎⵢⵉⵡⵏ ⵏ ⵜⵓⵚⴽⴰ ⵏⵏⵙ ⵜⵓⵍⴳⵉⵏⵜ, ⴷ ⵓⵍⴰ ⴰⵙⵡⵀⵏ ⵏ ⵓⵙⵔⵓⵙ ⵏ ⵜⵎⵙⵎⵓⵏⵉⵏ ⵜⵉⵎⵥⵍⴰⵢⵉⵏ ⴳ ⵢⵉⴳⵔ ⴰⴷ. ⵣⵎⵎⴻⵎⵏ ⵉⵎⴷⵔⴰⵡⵏ ⴰⵎⴰⵟⵍ ⵉⴳⴳⵓⵜⵏ ⵏⵏⴰ ⵙⵙⵏⵜ ⵜⴱⵔⵉⴷⵉⵏ ⵜⵓⵍⴳⵉⵏⵉⵏ ⴳ ⵓⵙⵎⴽⵍ ⵏ ⵉⴱⴽⴽⵉⴹⵏ ⵏ ⵜⵙⴱⴱⴰⴱⵜ ⵙ ⵉⵡⴷⴰⵏ, ⴰⵢⵍⵍⵉ ⵓⵔ ⵉⵜⵜⴰⵡⵙⵏ ⴳ ⵓⵡⴰⴹ ⵏ ⵓⵙⵙⵓⵎⵓ ⵏ ⵓⵏⴳⵉⵙⵏ, ⵖⵔⵏ ⵙ ⵓⵙⴳⵓⴷⵉ ⵏ ⵜⵓⴳⴳⴰⵙ ⵏ ⵜⵓⴳⵜ ⵏ ⵉⵎⴳⴳⴰⵢⵏ ⵅⴼ ⵓⵙⴱⴷⴷⵉ ⵏ ⵓⴱⴽⴽⵉⴹ ⴰⴷ ⴷ ⵓⵙⵡⵜⵜⵓ ⵏⵏⵙ ⵃⵎⴰ ⴰⴷ ⵓⵔ ⵜⵜⵡⴰⵙⵖⵍⵍⴰⵏ ⵉⴷⵔⵉⵎⵏ ⴰⴷ ⴳⴳⵓⵜⵏⵉⵏ ⴳ ⵓⵙⵥⵕⴼ ⵏ ⵉⴱⴽⴽⵉⴹⵏ ⵢⴰⴹⵏⵉⵏ. ⵉⴼⵓⴽ ⴰⴷ ⵏⵙⵙⵎⵜⵔ ⵎⴰⵙ ⵜⵙⵙⵏⵜ ⵜⵉⵏⴰⵡⵜ ⴰⴷ, ⵏⵏⴰ ⵜⵙⵡⵓⴷⴷⴰ ⵎⴰⵙⵙⴰ ⵙⴰⵍⵎⴰ ⵟⵟⵓⴹ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ, ⵜⴰⴷⵔⴰⵡⵜ ⵏ ⵎⴰⵙⵙ ⵍⵎⵀⴷⵉ ⵔⵔⵎⵉⵍⵉ, ⴰⵏⵙⵙⵉⵅⴼ ⵏ ⵓⴼⵔⴷⵉⵙ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵉⵙⵖⵏⵓⵜⵏ ⵏ ⵓⵎⵢⴰⵡⴰⵙ ⴳ ⵜⵎⵏⴰⴹⵜ ⵏ ⵉⴼⴼⵓⵙ ⵏ ⵓⵏⴰⵎⵎⴰⵙ ⴳ ⵓⵙⵇⵇⵉⵎ ⵏⵓⵕⵓⴱⴱⴰ, ⴷ ⵎⴰⵙⵙⴰ ⵙⵉⵀⴰⵎ ⵍⴼⵉⴳⵉⴳⵉ, ⵜⴰⵏⵎⵀⴰⵍⵜ ⵏⵓⵙⵉⵔⴰ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵉⵙⴷⵓⵀⴷⵓⵜⵏ ⴷ ⵓⴱⴽⴽⵉⴹ ⵉⵜⵜⵓⵙⵙⵓⴷⵙⵏ ⴳ ⵍⵎⵖⵔⵉⴱ, ⴷ ⵎⴰⵙⵙⴰ ⵃⴰⵢⴰⵜ ⴱⴰⵔⵃⵓ, ⵜⴰⵏⵙⵙⵉⵅⴼⵜ ⵏ ⵓⵏⴳⵎⴰⵎ ⵏ ⵜⴱⴷⴰⴷⵜ ⴰⴽⴷ ⵉⵎⵣⵡⴰⴳⵏ ⵏ ⴰⵙⵉⵢⴰ.