ⴳ ⵓⵏⵄⴰⵕ ⴰⵎⴰⵢⵏⵓ ⵃⵎⴰ ⴰⴷ ⵢⵉⵍⵉ ⵡⴰⴷⴷⵓⵔ ⴷ ⵓⵙⵢⵉⵍⵉ ⵏ ⵉⵣⵔⴼⴰⵏ ⴳ ⵓⵎⵏⴰⴹ ⵏ ⵓⵙⴳⴳⴷ ⵏ ⵉⵎⴰⵍⴰⴷⵏ ⵏ ⵉⵣⵔⵉ ⴳ ⵉⴼⵔⵉⵇⵢⴰ, ⵜⵙⵙⵏⴽⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⴷⴳⴳⵯⴰⵜ ⵏ ⵉⴹⵍⵍⵉ ⴰⵙⵙ ⵏ ⵓⴽⵕⴰⵙ 30 ⵉⴱⵔⵉⵔ 2025, ⵢⴰⵜ ⵜⴳⵓⵔⵉ ⵜⴰⵎⵏⵄⴰⵕⵜ ⵉⵜⵜⵓⵙⵙⵓⵍⴰⴼⵏ ⵙⴳ ⵜⵓⴳⴳⵓⴳⵜ ⴳ ⵜⴳⵉⵔⴰ ⵏ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⴼⵔⵉⵇⵉ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ, ⵉⵜⵜⵓⵙⵏⵎⴰⵍⴰⵏ ⴳ ⵓⵙⴰⵜⵉ ⵏ ⵜⵙⵓⵜⵍⵜ ⵜⵉⵙⵙ 83 ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵖⵔⴰ ⴳⵉⵙ ⵙ ⵓⵙⵎⴰⵢⵏⵓ ⵏ ⵓⵙⵡⵉⵏⴳⵎ ⴳ "ⵜⵣⵔⴼⵜ ⵏ ⵡⴰⵔⵔⴰⵣ" ⵙⴳ ⵓⵎⵏⵉⴷ ⵏ ⵜⵏⵥⴰⵕ ⵜⵉⴼⵔⵉⵇⵉⵢⵉⵏ ⵜⵉⵜⵔⴰⵔⵉⵏ.

"ⵜⵓⵙⵉ ⵉⴼⵔⵉⵇⵢⴰ ⵙⴳ ⵜⵙⵓⵜⵉⵏ ⵉⵣⵔⵉⵏ ⵜⴰⵎⴰⵜⴰⵔⵜ ⵏ ⵓⵏⴰⴳⵔⴰⵡ ⴰⵔⵓⵖⴷⵉⵎ"…. ⵙ ⵎⴽⴰ ⵜⵕⵥⵎ ⵎⴰⵙⵙⴰ ⴱⵓⵄⵢⵢⴰⵛ ⵜⴰⴳⵓⵔⵉ ⵏ ⵜⴳⵉⵔⴰ ⵏ ⵓⵙⴳⵔⴰⵡ ⴰⴼⵔⵉⵇⵉ, "[ⴰⵏⴰⴳⵔⴰⵡ] "ⵉⵙⴽⵔⵏ ⵙⴳ ⵜⵙⴱⴱⴰⴱⵜ ⴳ ⵓⴼⴳⴰⵏ ⵜⴰⵙⵉⵍⴰ ⵏ ⵓⵙⴽⴰⵔ ⵏ ⵡⴰⵢⴷⴰ ⵅⴼ ⵓⵙⵙⵉⴹⵏ ⵏ ⵓⵙⵏⵜⵔ ⴷ ⵜⴳⵓⴹⵉⵡⵉⵏ ⵜⵉⴼⵔⵉⵇⵉⵢⵉⵏ ⵉⴳⴳⵓⵜⵏ".

ⵜⴰⵎⴷⴰⴳⴰⵣⵜ, ⵜⴰⵙⵓⵙⵎⴰⵏⵜ ⵏ ⵡⴰⴷⴷⵓⵔ ⴷ ⵓⵔ ⵜⴻⵜⵜⵓⵇⴱⴰⵍ ⵙ ⵜⵡⵉⵍⴰ ⵜⴰⴼⴳⴰⵏⵜ… ⴰⴽⴽⵍⵓ, ⴷ ⵓⵙⵜⴰⵊⵕ ⴳ ⵓⴼⴳⴰⵏ, ⴷ ⵓⵙⵜⵄⵎⴰⵔ, ⴷ ⵜⴰⵍⵖⵉⵡⵉⵏ ⵢⴰⴹⵏⵉⵏ ⵏ ⵓⵙⵓⴳⴳⵍ ⴷ ⵓⵙⵖⵍⵍⴰ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵕⵛⵎⵏ ⴰⵙⴰⴳⵎ ⵏ ⵜⵙⵓⵜⴰ ⵙ ⴽⵓⵍⵍ ⵏⵏⵙⵏⵜ ⵉⴳⴳⴰ ⴷⴼⴼⵉⵔ ⵏⵏⵙⵏⵜ ⵉⵥⵓⵕⴰⵏ ⵉⵖⴱⴰⵏⵏ ⴷ ⵉⴷⵔⵉⵣⵏ ⵉⵖⵣⵉⴼⵏ ⵏ ⵓⵙⵓⴼⵖ ⵙⴳ ⵉⵣⵔⴼⴰⵏ, ⵓⵔ ⵣⵔⵉⵏⵜ ⵉⵎⵢⴰⴷⴰⵙⵏ ⵏⵏⵙⵏⵜ ⴰⵔ ⴰⵙⵙ ⴰ. ⴳ ⵓⵙⴰⵜⵉ ⴰⴷ, ⵜⵙⴷⴷⵉⴷ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ ⵎⴰⵙ ⵉⴳⴰ "ⵓⵙⴼⵓⵖ" ⴰⴼⵔⵉⵇⵉ ⴳ ⵢⴰⵏ ⵡⴰⴽⵓⴷ "ⵜⴰⵎⴽⵜⵉⵜ ⵜⴰⵎⵉⴷⵉⵔⵜ ⵏ ⵜⵓⵎⵍⴰⵢ ⵏ ⵉⵣⵔⵉ", ⵉⵙⵓⵍ "ⴰⵏⴳⵉⵙ ⵏ ⵓⵙⵜⵍⴰⵎ ⴰⵙⵓⵍⴰⵏ".

ⵖⵉⵔ ⵎⴰⵙ ⵉⵙⵙⴽⴰⵔ ⵓⵡⴰⵜⵜⵙ ⵖⵔ ⵓⵙⵖⵍⴼ ⵏ ⵉⵎⴰⵍⴰⴷⵏ ⴰⴷ ⵎⵏⵏⴰⵡ ⵏ ⵜⵏⵥⴰⵕ: ⵜⴰⵏⵥⴰⵕⵜ ⵏ ⵜⵎⵙⵜⴳⴳⴰⵔⵜ, ⴷ ⵜⴰⵏⵥⴰⵕⵜ ⵏ ⵜⵉⵣⵎⵔⵜ, ⴷ ⵜⴰⵏⵥⴰⵕⵜ ⵏ ⵓⵡⵜⵜⴰⵙ ⴰⵎⴳⴳⴰⵔⵓ. ⵎⴽⴷⴰ ⵙⵎⵏⵉⴷⵏⵜ ⵜⵉⵔⵎⵉⵜⵉⵏ ⴳ ⵉⵎⵏⴰⴹⵏ ⵢⴰⴹⵏⵉⵏ, ⵜⵏⵏⴰ ⴱⵓⵄⵢⵢⴰⵛ, ⵓⵔ ⵉⴳⴷⵉ ⵓⵙⵖⵍⴼ ⵏ ⵓⵎⴰⵍⴰⴷ ⵢⵉⵡⵉⵙ, ⵎⴰⴷ ⵜⴳⴰ ⵜⴰⵍⵖⵉⵡⵉⵏ ⵏⵏⵙ, ⵉ ⵓⵙⴷⵔⵓⵙ ⵏ ⵉⵥⵓⵕⴰⵏ ⵏ ⵓⵎⵣⵔⵓⵢ ⵏⵖ ⵉ ⵓⵙⴽⵙⵉ ⵏ ⵉⵎⵣⴰⵔⴰⵢⵏ ⵉⵍⵍⴰⵏ ⴰⵙⵙ ⴰ.

ⴳ ⵉⴳⴳⵉ ⵏ ⵓⵙⵖⵓⵏ ⵏ ⵓⵙⵔⵙ ⵏ ⵓⵙⵖⵍⴼ ⵏ ⵉⵎⴰⵍⴰⴷⵏ ⴰⴷ ⴳ ⵓⵙⴰⴽⴰ ⵙ ⵉⵡⵜⵜⴰⵙⵏ ⵉⵖⵣⵉⴼⵏ, ⴷ ⵡⴰⵔⴰⵙⵄⵜⴰⴱⴰⵔ ⵏⵏⵙ ⴰⵎ ⵓⵎⵊⵕⵉ ⴰⵣⵔⴰⵢ, ⵜⵏⵏⴰ ⴱⵓⵄⵢⵢⴰⵛ: ⵉⵅⵚⵚⴰ ⴰⴷ ⵉⴱⴷⴷ ⴽⵔⴰ ⵏ ⵓⵙⴰⴽⴰ ⵏ ⵓⵙⵖⵍⴼ ⵏ ⵉⵎⴰⵍⴰⴷⵏ ⵏ ⵓⵣⵔⵉ ⴰⴷ ⴰⵎⵍⵉⵍ "ⵅⴼ ⵓⴷⵔⴰⵡ ⴰⵎⵢⴰⴳⴰⵏ ⵏ ⵜⴳⵔⵓⵎⵎⵉⵏ ⵏⵏⴰ ⵉⴹⵉⵚⵏ ⵙ ⵓⴱⵔⵉⴷ ⴰⵙⵔⵉⴷ ⵏⵖ ⴰⵡⵙⵔⵉⴷ ⵙ ⵉⵎⴰⵍⴰⴷⵏ ⵉⵣⴷⵉⵏ ⵙ ⵜⵕⵥⵉⵢⵉⵏ", ⵜⵄⵜⴰⴱⵔ ⵎⴰⵙ ⵓⵔ ⵉⴳⵉ ⵓⴷⵔⴰⵡ ⵏⵏⵙⵏ ⵖⴰⵙ ⴰⵙⵖⵓⵏ, ⵎⴰⵛⴰ ⵉⴳⴰ ⵙ ⵓⴷⵙⵍ ⴰⵙⵖⵣⵏ ⴰⴼⴰⵡ ⵙ ⵉⵣⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ ⵏⵏⴰ ⵉⵜⵜⵓⵕⵥⴰⵏ.

ⵜⵙⵙⴼⴰⵡ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵎⴰⵙ ⵏⵥⵉⵏ ⵉⵙⴰⴽⴰⵜⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴳ ⵉⴼⵔⵉⵇⵢⴰ ⴷ ⴰⵎⵔⵉⴽⴰ ⵜⴰⵍⴰⵜⵉⵏⵉⵜ ⵎⴰⵙ ⵣⵎⵔⵏ ⵉⵎⴰⵙⵙⵏ ⵏ "ⵜⵣⵔⴼⵜ ⵏ ⵡⴰⵔⵔⴰⵣ"  ⴰⴷ ⵜⵜⵓⵙⵖⵉⵡⵙⵏ, ⵜⵜⵓⵣⵣⴳⵉⵔⵏ ⴷ ⵣⵎⵔⵏ ⴰⴷ ⵍⴽⵎⵏ ⵉⴳⵎⵎⴰⴹⵏ ⵉⵜⵜⵡⴰⵜⵜⵙⵏ. ⵜⵉⵏⵉ, ⴳ ⵓⵙⴰⵜⵉ ⴰⴷ, ⵎⴰⵙ ⵓⵔ ⵉⴳⵉ ⵓⵙⵙⴳⴷ ⵏ ⵓⵎⴰⵍⴰⴷ ⵖⴰⵙ ⴰⵙⴰⴷⵎⵔ ⵉ ⵉⵙⵏⵜⵔⵏ ⵏ ⵉⵣⵔⵉ, ⵎⴰⵛⴰ ⵉⴳⴰ ⴰⴼⵔⴷⵉⵙ ⵓⵔ ⵉⵜⵜⵓⴱⴹⴰⵏ ⵙⴳ ⵓⵙⴰⴽⴰ ⴰⵙⵓⵍⴰⵏ ⵉ ⵓⵙⵔⵙ ⵏ ⵉⵙⵏⴼⵍⵏ ⵓⵚⴽⵉⵡⵏ ⵉⵙⵓⵍⴰⵏⵏ, ⴷ ⵓⵙⵓⵖⵍ ⵏ ⵓⵙⵓⵖⵏ ⴰⴳⵔⴰⵡⴰⵏ ⵙ ⵓⵙⵎⴰⵢⵏⵓ ⵏ ⵓⵙⵡⵉⵏⴳⵎ ⵅⴼ ⵢⵉⵎⴰⵍ ⵅⴼ ⵉⵙⵓⴷⴰⴼ ⵉⵎⴰⵢⵏⵓⵜⵏ ⴷ ⵓⵚⴽⵓ ⵏ ⵓⴼⵔⴰⴽ ⴰⴳⵔⴰⵡⴰⵏ ⵢⵓⴳⵉⵏ ⴰⴽⴽⵯ ⵜⴰⵍⵖⵉⵡⵉⵏ ⵏ ⵓⴽⴽⵍⵓ ⴷ ⵜⵕⵥⵉ ⵏ ⵡⴰⴷⴷⵓⵔ ⴰⵏⴼⴳⴰⵏ".

ⴰⵡⴰⵜⵜⵙ ⵖⵔ ⵜⵣⵔⴼⵜ ⴰⵙⵙ ⴰ, ⵜⵔⵏⴰ, ⵓⵔ ⵉⵣⵎⵉⵔ ⴰⴷ ⵉⴱⴷⴷ ⵖⴰⵙ ⵅⴼ ⵢⴰⵜ ⵜⵓⵙⵏⵜ ⵜⴰⵏⵎⴰⵜⴰⵔⴰⵜ ⵏⵖ ⵜⵉⵙⵓⵔⵉⴼⵉⵏ ⵉⵥⵍⵉⵏ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵙ ⵎⴽⴰ ⵜⵙⴷⴷⵉⴷ ⴳ ⵜⴳⵓⵔⵉ ⵏⵏⵙ ⵅⴼ ⵓⵙⵖⵓⵏ "ⴰⴷ ⵜⵉⵍⵉ ⵜⵣⵔⴼⵜ ⵜⴰⴷⵎⵙⴰⵏⵜ ⴳ ⵡⴰⵎⵎⴰⵙ ⴷ ⵓⴳⵏⵙ ⵏ ⵜⵙⵔⵜⴰⵢ ⵏ ⵓⵙⴳⴳⴷ ⵏ ⵓⵎⴰⵍⴰⴷ ⴰⴷ", ⴰⴽⴷ ⴽⵓ ⵎⴰⴷ ⵉⵙⵙⵓⵜⵓⵔ ⵖⴰⵢⴰⴷ ⵏ ⵓⵙⵔⵙ ⵏ ⵉⵖⴰⵡⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵉⵜⵜⵓⵙⵡⴰⵍⴰⵏ ⵙ ⵓⵥⵍⴰⵢ ⵖⵔ ⵡⴰⵎⵓⵏⵏ ⴽⵓⴽⴹⵏⵉⵏ ⴳ ⵓⵎⵣⵔⵓⵢ, ⴳ ⵜⵙⴳⴰ ⵏ ⵓⵙⵙⵔⵇⴱ ⵏ ⵜⵙⵏⵜⴰⵢ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⵉⴷⵍⵙⴰⵏⵉⵏ ⵏⵏⴰ ⵉⵙⵡⵓⴷⴷⵓⵏ ⵉⴼⵔⵉⵇⵉⵢⵏ ⴷ ⵡⴰⵔⵔⴰⵡ ⵏ ⵉⴼⵔⵉⵇⵢⴰ ⴳ ⴱⵕⵕⴰ.

ⴳ ⵜⴳⵉⵔⴰ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵅⴼ ⵜⵉⵍⴰⵍⵜ ⵜⴰⵎⴰⵏⴰⵔⵜ ⵏⵏⴰ ⵜⵜⵓⵔⴰⵔⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ, ⵏⵏⴰ ⵜⵙⵏⵓⵎⵎⵍ ⵎⴰⵙ ⴳⴰⵏⵜ ⵜⵉⵙⴳⴳⵯⵉⵏ ⵜⵉⵎⵙⴽⴰⵔⵉⵏ ⵜⵉⴷⵙⵍⴰⵏⵉⵏ, ⴳ ⵓⵏⵜⴰⵎ ⵏ ⵉⴷⵔⵉⵣⵏ ⵉⵙⵓⵍⴰⵏⵏ ⵏ ⵉⴱⴽⴽⵉⴹⵏ ⵉⵎⵣⵔⴰⵢⵏ, ⴷ ⵓⵙⵓⵜⵔ ⵏ ⵉⵙⵓⵖⵏⵏ ⵉⴽⵎⴰⵎⵏ ⴳ ⵉⴳⵔⴰⵏ ⵏ ⵓⵙⵖⵣⵏ ⴷ ⵓⵙⴳⴳⴷ ⵏ ⵉⵎⴰⵍⴰⴷⵏ ⴷ ⵜⵏⴼⵔⵓⵜⵉⵏ ⵏ ⵡⴰⵔⴰⵍⴰⵙ. ⵜⵉⵍⴰⵍⵜ ⵏ ⵉⵏⴳⵎⴰⵎⵏ ⴰⴷ ⴷ ⵜⴰⴷⵙⵍⴰⵏⵜ ⴷ ⵜⵏⴱⵣⴰⵣⵜ ⵉ ⵓⵙⵙⴼⵍⴷ ⵙ ⵉⵎⵙⵍⵉ ⵏ ⵓⵏⴳⵉⵙⵏ ⴷ ⴰⵢⵜ ⴷⴰⵔⵙⵏ, ⴷ ⵜⵙⵉⵍⴰⵡⵜ ⵏ ⵉⵙⵓⵎⵔⵏ ⵉⴷⵓⵙⵏ ⵅⴼ ⵉⴱⵔⴷⴰⵏ ⵏ ⵓⵙⴳⴳⴷ ⴷ ⵉⵎⴰⵙⵙⵏ ⵏⵏⵙ.

ⵅⴼ ⵓⵙⴳⵔⴰⵡ:

ⵉⵜⵜⵓⵙⵏⵎⴰⵍⴰ ⴰⵙⴳⴳⵯⴰⵙ ⴰⴷ ⵅⴼ ⵓⵣⵎⵣ ⵏ ⴽⵕⴰⴹ ⵏ ⵡⵓⵙⵙⴰⵏ ⴳ ⵜⵖⵔⵎⵜ ⵜⴰⵎⴰⵏⵓⵏⵜ ⵏ ⴳⴰⵎⴱⵢⴰ, ⴱⴰⵏⵊⵓⵍ ⴷⴷⴰⵡ ⵏ ⵜⵎⴰⵜⴰⵔⵜ "ⴰⵙⴳⴳⵯⴰⵙ ⵏ ⵓⵙⴳⴳⴷ ⵏ ⵉⵎⴰⵍⴰⴷⵏ: ⵜⴰⵣⵔⴼⵜ ⵉ ⵉⴼⵔⵉⵇⵉⵢⵏ ⴷ ⵓⴳⴳⵉⴷⵏ ⵉⵍⵓⵍⵏ ⵙⴳ ⵓⵥⵓⵕ ⴰⴼⵔⵉⵇⵉ ⵙ ⵓⵙⴳⴳⴷ ⵏ ⵓⵎⴰⵍⴰⴷ", ⵉⵡⴰⵜⵜⵙ ⵓⵙⴳⵔⴰⵡ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴰⴷ ⵉⵙⴽⵔ ⵢⴰⵜ ⵜⴷⴰⴱⵓⵜ ⵉ ⵓⵎⵙⴰⵡⴰⵍ ⴷ ⵓⵙⵎⵢⴰⵏⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵏⴳⵔ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵔⵣⵓⵜⵏ ⴷ ⵉⵎⵙⴽⴰⵔⵏ ⵉⵙⵔⵜⴰⵏⵏ, ⴷ ⵓⵎⵢⴰⵡⴰⵙ ⵉ ⵜⵙⵉⵍⴰⵡⵜ ⵏ ⵜⵙⵜⵔⴰⵜⵉⵊⵉⵢⵉⵏ ⵏ ⵓⵏⵄⴰⵕ ⵉ ⵜⵎⵙⴰⵔⵉⵏ ⵏ ⵓⵙⴳⴳⴷ ⵏ ⵓⵎⴰⵍⴰⴷ ⴳ ⵓⵙⵡⵉⵔ ⴰⴷⵖⴰⵔⴰⵏ ⴷ ⵓⵏⴰⵎⵓⵔ ⴷ ⵓⴳⵔⴰⵖⵍⴰⵏ. ⵉⵏⵏⵓⵎⵙ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⵙⴳⴳⵯⴰⵙ ⴰⴷ ⵅⴼ ⵉⵙⵏⵜⴰⵍ ⵉⵎⵢⴰⵏⴰⵡⵏ, ⵉⴼⴰⵡⵏ ⴳⵉⵙⵏ: ⴰⴽⴽⵍⵓ ⴰⵎⴰⵢⵏⵓ, ⵜⴰⵣⵔⴼⵜ ⵏⴳⵔ ⵜⴰⴳⴳⴰⵢⵉⵏ ⴳ ⵜⵙⵔⵜⴰⵢ ⵏ ⵓⵙⴳⴳⴷ ⵏ ⵓⵎⴰⵍⴰⴷ, ⴰⵏⵄⴰⵕ ⴰⴳⵔⴰⵖⵍⴰⵏ ⵉ ⵜⵣⵔⴼⵜ ⵏ ⵡⴰⵔⵔⴰⵣ, ⴷ ⵜⵙⵜⵔⴰⵜⵉⵊⵉⵢⵉⵏ ⵏ ⵓⵙⵎⵔⵙⵍ ⵏ ⵜⵎⴳⴳⵉⵜⵉⵏ ⵜⵉⵎⵙⵖⵍⴰⴼⵉⵏ ⴷ ⵉⴱⵔⴷⴰⵏ ⵏ ⵓⵙⴷⵓⵙ ⵏ ⵓⴱⵔⵉⴷ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ.