ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵙ ⵏ ⵓⵢⵏⴰⵙ 12 ⴷⵓⵊⴰⵏⴱⵉⵔ 2022, ⵎⴰⵙ ⵉⴳⴰ ⵓⵙⵢⵉⵡⵍ ⵏ ⵜⵓⵎⵥⵉⵢⵉⵏ ⵢⴰⵜ ⵜⵓⵎⴰⵏⵜ ⵜⵓⴷⴷⵉⵙⵜ ⴷ ⵎⴰⵙ ⵓⵔ ⵓⴷⴰⵏ ⵉⵙⵍⴳⵏⵏ ⵡⴰⵃⴷⴰⵜⵏ ⵉ ⵓⵙⴱⴷⴷⵉ ⵏⵏⵙ, ⵎⴰⵢⴰ ⵏⵏ ⴳ ⵢⴰⵏ ⵓⵏⵎⵓⵇⵇⴰⵔ ⵉⵜⵜⵓⵙⵏⵎⴰⵍⴰⵏ ⵙ ⵜⵎⵍⴷⴰ ⵏ ⵓⵎⵣⵉⵣⵣⵍ ⵏ 16 ⵏ ⵡⴰⵙⵙ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ, ⵉⵙⵎⵏⵉⴷ ⴳⵉⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴼⵏⵉⵇⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵎⵣⴷⴰⵖⵏ ⴳ ⵍⵎⵖⵔⵉⴱ ⵢⴰⵜ ⵜⵖⵓⵔⵉ ⵅⴼ "ⵜⵎⵛⵓⵛⵛⴹⵉⵏ ⵜⵉⵏⵣⵔⴰⴼⵉⵏ ⵉⵜⵜⵓⵙⵖⵣⵏⵏ ⵉ ⵓⵙⵉⵡⵍ ⵏ ⵜⴰⵣⵣⴰⵏⵉⵏ".

ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⴳⴰ ⵜⵖⵓⵔⵉ ⴰⴷ, ⵏⵏⵉ ⵔⴰⴷ ⵜⴻⵜⵜⵓⴳⴰ ⵜⵡⵓⵔⵉ ⵏ ⵓⵙⴷⵖⵉ ⵏⵏⵙ ⵃⵎⴰ ⴰⴷ ⵜⴳ ⵜⴰⵖⵓⵔⵉ ⵜⴰⴷⵉⵏⴰⵎⵉⴽⵜ, ⵎⴽⴷⴰ ⵉⴳⴰ ⵡⴰⴷⴷⴰⴷ ⵏ ⵓⵔⵎⵎⵓⵙ ⵏ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ, "ⵜⵙⵢⴰⴼⴰ ⵙ ⵜⵎⵓⴽⵔⵉⵙⵉⵏ ⵏⵏⵉ ⴰⵖ ⵉⵙⵖⴹⴼⵏ ⵙ ⵓⵎⵓⵜⵜⵉ ⵙⴳ ⵜⵖⵓⵔⵉ ⵏ ⵜⵍⴽⴰⵎⵜ (Conséquence) ⵙ ⵜⵖⵓⵔⵉ ⵏ ⵓⴷⵔⵉⵣ (Impact), ⵙⵍⴰⵡⴰⵏ ⴰⴽⴽⵯ ⴰⴷⵔⵉⵣ ⵏ ⵏⴳⵔ ⵜⵙⵓⵜⵉⵏ (Impact intergénérationnel) ⴳ ⵎⴰⴷ ⵉⵥⵍⵉⵏ ⵙ ⵜⵓⵙⵓⵔⵉⵏ ⵏ ⵜⵓⵎⴰⵏⵜ ⴰⴷ ⵅⴼ ⵜⴰⵣⵣⴰⵏⵉⵏ ⴷ ⵓⵙⵉⴷⴼ ⵙ ⵉⵣⵔⴼⴰⵏ ⵉⴷⵙⵍⴰⵏⵏ, ⴷ ⵡⴰⴷⴷⵓⵔ ⵏ ⵓⵕⵥⵥⵓⵎ ⵏ ⵜⵙⵏⵜⴰⵢⵉⵏ ⴰⴽⴷ ⵉⵎⴳⴳⴰⵢⵏ ⵏⵜⴰⵢⵏⵉⵏ ⵙ ⵓⵙⵎⵀⵍ ⵏ ⵓⵔⵎⵎⵓⵙ ⵏ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ".

ⴳ ⵓⵙⵉⵡⵍ ⵏⵏⵙ ⵅⴼ ⵜⵉⵏⴷⵉ ⵢⴰⵜⵜⵓⵢⵏ ⵏ ⵜⵖⵓⵔⵉ ⴰⴷ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵜⵙⵎⵏⵉⴷ ⵉⵙⴱⴷⴰⴷⵏ ⵓⵍⴳⵉⵏⵏ ⵏ ⵜⵓⵎⴰⵏⵜ ⵏ ⵓⵙⵢⵉⵡⵍ ⵏ ⵜⴰⵣⵣⴰⵏⵉⵏ ⴳ ⵓⵙⵡⵉⵔ ⵏ ⵉⵏⴰⵡⴰⵢⵏ ⴷ ⵉⵔⵎⵎⵓⵙⵏ ⵙ ⵜⵓⵙⵙⵏⴰ ⵏ ⵜⵡⴰⵍⵉⵜ ⵏ ⵉⵏⴱⴹⴰⵡⵏ ⵏⵏⵉ ⵢⴰⴽⴽⴰⵏ ⵜⴰⵢⵢⵉⵀⵜ ⵏ ⵓⵙⵢⵉⵡⵍ ⵏ ⵡⴰⵣⵣⴰⵏ ⴷ ⵉⵎⴳⴳⴰⵢⵏ ⵢⴰⴹⵏⵉⵏ ⴰⵎⵓⵏⵉⵏ ⴳ ⵓⵙⵎⴽⵍ ⵏ ⵜⵓⵜⵜⵔⵉⵡⵉⵏ ⵏ ⵓⵙⵢⵉⵡⵍ ⵅⴼ ⵓⵎⵏⵣⴰⵢ ⵏ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ. ⵜⵙⵉⵙⴼⵉⵡ ⵎⴰⵙ ⴷⴰ ⵜⴰⴽⴽⴰ ⴰⵡⴷ ⵉⵙⴱⴷⴰⴷⵏ ⴳ ⵓⵙⵡⵉⵔ ⵏ ⵓⵏⵄⴰⵕ ⵙ ⵓⵙⵎⵙⴰⵙⴰ ⵏ ⵉⵙⵍⴳⵏⵏ ⵉⵏⴰⵎⵓⵔⵏ ⴰⴽⴷ ⵡⴰⵔⵔⴰⵜⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵜⵙⵖⵣⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵓⵎⴰⵜⴰ, ⴷ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵙ ⵓⵥⵍⴰⵢ, ⴷ ⴳ ⵓⵙⵡⵉⵔ ⵏ ⵓⵙⴱⵓⵖⵍⵓ ⵏ ⵓⴼⵔⴰⴽ ⴰⵣⵔⴼⴰⵏ ⵙ ⵡⴰⵍⴰⵙ ⵏ ⵓⵙⵔⵙ ⵏ ⵉⵥⵕⵉ ⵅⴼ ⵉⵏⴰⵡⴰⵢⵏ ⵉⵏⴰⵎⵓⵏⵏ ⵉⴼⵔⴳⴰⵏⵏ ⵏ ⵜⵎⵥⵉ.

ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵜⵙⵉⵙⴼⵉⵡ ⵜⵖⵓⵔⵉ ⵎⴰⵙ ⵉⴳⴰ ⵓⵔⵎⵎⵓⵙ ⵏ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ ⴰⵔⵎⵎⵓⵙ ⴰⵡⵏⴳⵉⵎ ⵉⴳ ⵓⵔ ⵏⵟⵟⴰⴼ ⵉⵎⴰⵙⵙⵏ ⵓⵎⵀⵉⵍⵏⵏ ⵏ ⵓⵣⵣⵓⴳⵣ ⵏⵏⵙ, ⵜⵙⵉⵙⴼⵉⵡ ⴰⴷⴷⵓⵔ ⵏ ⵜⵙⵉⵍⴰⵡⵜ ⵏ ⵓⵔⵎⴰⵙ ⵓⵎⵀⵉⵍ ⴰⵏⴱⵔⵉⴷ ⵉⵎⵓⵏⵏ ⵉ ⵓⵔⵎⵎⵓⵙ ⴰⴷ, ⵏⵏⵉ ⵜⵜⴰⵏⵏⴰⵢ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⴰⵔⵎⵎⵓⵙ ⴰⴷⵉⵏⴰⵎⵉⴽⵉ ⵉⵣⴷⵉⵏ ⵏⵉⵜ ⵙ ⵡⴰⵣⵣⴰⵏⵏ ⵉⴳⴰⵏ ⵜⴰⴳⵔⵓⵎⵎⴰ ⵜⴰⵏⴼⴳⴰⵏⵜ ⴷ ⴽⵓ ⴰⵣⵣⴰⵏ ⵡⴰⵃⴷⴰⵜ, ⵜⵉⵏⵉ ⵎⴰⵙ ⵉⴳⴰ ⴰⵎⵏⵣⴰⵢ ⴷ ⵓⵣⵔⴼ ⴷ ⵜⵎⴳⴳⵉⵜ ⵜⴰⵏⴱⵔⵉⴷⵜ ⵏⵏⵉ ⴷⴰⵔ ⴰⵎⵢⴰⵙⵙⴰ ⴰⴼⵓⵍⴰⵏ ⴰⴽⴷ ⵓⵎⵏⵣⴰⵢ ⵏ ⵜⴷⵔⴰⵡⵜ, ⵉⴷⴷⵖ ⵓⵔ ⵜⵍⵍⵉ ⵜⵏⴰⴼⵓⵜ ⵜⴰⵎⵓⴼⴰⵢⵜ ⴱⵍⴰ ⴰⵙⵙⴷⵔⵓ ⵏ ⵡⴰⵣⵣⴰⵏⵏ ⴳ ⵜⴱⵔⵉⴷⵜ ⵏ ⵓⵙⵉⵜⵜⵉ ⵏ ⵜⵖⵜⴰⵙⵜ.

ⵓⵔ ⵜⴻⵜⵜⵓ ⵎⴰⵙⵙⴰ ⴱⵓⵄⵢⵢⴰⵛ ⴰⴷ ⵜⵙⵙⴽⵜⵉ ⵙ ⵓⵙⵖⵍⴼ ⵏ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⵏⵏⵉ ⴷ ⵉⴷⴷⴰⵏ ⴳ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵜⴰⵎⴳⴳⴰⵔⵓⵜ ⵏ ⵓⵙⵇⵇⵉⵎ ⵜ ⵉⴳⴰⵏ ⴷ ⵓⵙⵎⵓⵜⵜⴳ ⴰⵖⵣⵓⵔⴰⵏ ⵉ ⵜⵎⵥⵉ ⴳ ⵍⵍⴰⵏ ⵇⴰⵃ ⵉⵙⵍⴳⵏⵏ ⵏⵏⵉ ⴷⴰⵔ ⴰⵎⵢⴰⵙⵙⴰ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏ ⵙ ⵓⵙⴽⴰⵔ ⵙ ⵉⵙⴱⴷⴰⴷⵏ ⵉⴷⵙⵜⴰⵔⵏ, ⵉⴽⴽ ⵓⵙⵇⵇⵉⵎ ⵉⴼⴽⴰ ⴰⵎⵏⴰⴷ ⵏⵏⵙ ⵅⴼ ⵜⵎⵜⵜⴰⵡⵉⵏ ⵏ ⵓⵙⵍⴳⵏ ⵏ ⵡⴰⵣⵣⴰⵏ ⴳ ⵓⵎⵣⵉⵣⵣⵍ ⵏⵏⵉ ⵉⵙⵏⵎⴰⵍⴰ ⴰⵙⴳⴳⵯⴰⵙ ⵏ 2019.

ⵙⴳ ⵜⵙⴳⴰ ⵏⵏⵙ, ⵉⵙⵉⵙⴼⵉⵡ ⵎⴰⵙⵙ ⵍⵡⵉⵙ ⵎⵓⵕⴰ, ⴰⴳⵏⵙⴰⵙ ⴰⵎⵣⴷⴰⵖ ⵏ ⵓⵙⵉⵔⴰ ⵏ ⵜⴼⵏⵉⵇⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵎⵣⴷⴰⵖⵏ ⴳ ⵍⵎⵖⵔⵉⴱ, ⵎⴰⵙ ⵓⵔ ⵉⴳⵉ ⵓⵙⵢⵉⵡⵍ ⵏ ⵜⵓⵎⵥⵉⵢⵉⵏ ⵖⴰⵙ ⵜⵉⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ, ⵎⴰⵛ ⴰⵡⴷ ⴰⵎⵓⴽⵔⵉⵙ ⴰⵎⵇⵇⵔⴰⵏ ⵏ ⵜⴷⵓⵙⵉ ⵜⴰⵎⴰⵜⴰⵢⵜ, ⵉⵔⵏⵓ ⵎⴰⵙ ⵓⵔ ⴷⴰ ⵉⵕⵥⵥⴰ ⵡⴰⵏⴰⵡ ⴰⴷ ⵏ ⵢⵉⵡⵍ ⵖⴰⵙ ⵉⵣⵔⴼⴰⵏ ⵏ ⵜⴰⵣⵣⴰⵏⵉⵏ ⵜⴰⵀⵍⵏⵉⵏ, ⵎⴰⵛ ⴰⵡⴷ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⵏⵏⵙⵏⵜ, ⵉⵙⵉⵙⴼⵉⵡ ⵎⴰⵙ ⴷⴰ ⵜⵙⵖⴹⴰⴼ ⵜⵓⵎⴰⵏⵜ ⴰⴷ ⵙ ⴽⵉⴳⴰⵏ ⵏ ⵉⵏⴰⵥⴰⵕⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵙⴳⵎⴰⵏⵏ..., ⴰⵎ ⵥⵥⵍⴹ ⴷ ⵓⴽⵓⴽⴹ ⴷ ⵉⴼⵉⵍ ⴰⵏⵎⵍⴰⵏ ⴷ ⵎⴰⵕⵕⴰ ⴰⵏⴰⵡⵏ ⵏ ⵜⴽⵕⴹⵉ, ⵉⵙⵉⵙⴼⵉⵡ ⴰⴷⴷⵓⵔ ⵏ ⵓⵙⵎⵀⵍ ⵏ ⵉⵙⴱⴷⴰⴷⵏ ⵓⵍⴳⵉⵏⵏ ⵉⴳⵔⴰⵖⵍⴰⵏⵏ ⴷ ⵉⵏⴰⵎⵓⵔⵏ ⵣⴷⵉⵏⵉⵏ ⵙ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ ⵉ ⵓⵙⵙⵉⵏⴼ ⵉ ⵜⵎⵓⴽⵔⵉⵙⵉⵏ ⴰⴷ.