ⵜⵉⵎⵙⴽⵔⵉⵏ ⵜⵉⵏⴰⵎⵓⵔⵉⵏ ⵜⵉⵎⵓⴼⴰⵢⵉⵏ, ⵉⵙⴰⵡⵔⵏ ⵏ ⵉⵙⵏⴰⵎⵏ ⵉⵅⴰⵜⴰⵔⵏ, ⴷ ⵉⵙⴰⴽⴰⵜⵏ ⵏ ⵓⵙⵎⵀⵍ ⵏ ⵢⴰⵏ ⵉⵥⵕⵉ ⴰⵖⵟⴰⴼⴰⵏ, ⴰⵖⵣⵓⵔⴰⵏ
ⵜⴱⴷⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴳ ⵢⴰⵏ ⵓⵏⵎⵓⵇⵇⴰⵔ ⵉⵥⵍⵉⵏ ⴷⵉⴷⵙ ⴳ ⵓⴱⵕⵍⴰⵎⴰⵏ ⴰⴱⵔⵉⵟⴰⵏⵉ, ⵅⴼ ⵉⵙⵔⴰⵙ ⴼⴰⵡⵏⵉⵏ ⴳ ⵓⵡⴰⵜⵜⵙ ⴰⵎⵖⵔⵉⴱⵉ ⴰⵙⵓⵍⴰⵏ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ
"ⴰⵙⵓⵖⵏ ⵏ ⵍⵎⵖⵔⵉⴱ ⵙ ⵓⵙⵏⴰⵎ ⴰⵙⵓⵍⴰⵏ ⵓⵔ ⵉⴳⵉ ⵖⴰⵙ ⴰⵙⵜⴰⵢ ⴰⵙⵔⵜⴰⵏ (…), ⵎⴰⵛⴰ ⴽⵓ ⴰⵙⵏⴰⵎ ⵉⴳⴰ ⵜⴰⴷⵉⵏⴰⵎⵉⵜ ⵜⴰⵎⵓⵏⴰⵏⵜ ⴷ ⵓⵎⵢⴰⴳ ⴰⴳⵔⴰⵡⴰⵏ ⵉⵙⴷⴷⵉⴷⵏ ⴰⵙⵓⵖⵏ ⵉⴷⵓⵙⵏ ⴳ ⵓⵔ ⵉⵍⵍⵉ ⵓⵖⵓⵍ ⵙ ⵓⵙⴷⵓⵙ ⵏ ⵜⵏⴱⴰⴹⵜ ⵏ ⵓⵙⵍⴳⵏ"
ⵍⵓⵏⴷⵓⵏ, ⴰⵙⵙ ⵏ ⵓⵢⵏⴰⵙ 24 ⵎⴰⵕⵚ 2025 – ⴳ ⵢⴰⵏ ⵢⵉⵏⴰⵡ ⵜⵙⵙⵏⴽⴷ ⵜⵉⴼⴰⵡⵜ ⵏ ⵡⴰⵙⵙ ⴰ ⴳ ⵢⴰⵏ ⵓⵏⵎⵓⵇⵇⴰⵔ ⵉⵥⵍⵉⵏ ⴷⵉⴷⵙ, ⵙ ⵜⵉⵍⵉⵜ ⵏ ⵉⴱⵕⵍⴰⵎⴰⵏⵉⵢⵏ ⴷ ⵉⴷⵉⴱⵍⵓⵎⴰⵙⵉⵢⵏ, ⴳ ⵓⴱⵕⵍⴰⵎⴰⵏ ⴰⴱⵔⵉⵟⴰⵏⵉ, ⵅⴼ ⵓⵙⴰⴽⴰ ⵏ ⵜⵣⵣⵉⴳⵣⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⵜⵙⴰⵡⵍ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵉⵙⵔⴰⵙ ⵉⴼⴰⵡⵏⵉⵏ ⴷ ⵡⵉⵢⵢⴰⴹ ⵓⴼⵔⵉⴷⵏ ⴳ ⵓⵙⴰⴽⴰ ⵏ ⵓⵙⵏⴰⵎ ⴰⵎⵖⵔⵉⴱⵉ ⴰⵙⵓⵍⴰⵏ, ⵅⴼ ⵓⵣⵎⵣ ⵏ ⵙⵏⴰⵜ ⵜⵎⵔⴰⵡⵉⵏ ⴷ ⵓⵣⴳⵏ.
ⵙⴳ ⵓⴱⵓⵢ ⴰⴽⴷ ⵜⵕⵥⵉⵢⵉⵏ ⵀⵔⵛⵏⵉⵏ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⵖⵔ ⵜⵖⵓⵔⵉ ⵏ ⵉⵣⵔⵉ ⵃⵎⴰ ⴰⴷ ⵉⵜⵜⵓⵚⴽⴰ ⵢⵉⵎⴰⵍ ; ⴷ ⵙⴳ ⵓⵙⴷⵙⵜⴰⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⴰⵢⵜⵜⵓⵜ ⵏ ⵉⵙⵓⵖⵏⵏ ⵉⵣⵔⴼⴰⵏⵏ ⵉⴳⵔⴰⵖⵍⴰⵏⵏ ⵅⴼ ⵓⵣⵣⵔⴰⴼ ⴰⵏⴰⵎⵓⵔ ⵖⵔ ⵉⵙⴰⵡⵔⵏ ⵏ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⴼⵔⴰⴳ ⵏ ⵡⴰⴷⴷⵓⵔ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵉⵙⵎⵉⵍⵏ ⴽⵓⴽⴹⵏⵉⵏ …
ⴰⵙⴰⴽⴰ ⴰⵣⵣⵉⴳⵣⴰⵏ ⴷ ⵓⵍⵓⴳⴰⵏ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵔ ⵉⵜⵜⴷⴷⵓ ⵙ ⵜⵙⵓⵔⵉⴼⵉⵏ ⵉⴷⵓⵙⵏ ⵙ ⵓⵎⵙⴰⵙⴰ ⴷ ⵢⴰⵏ ⵉⵥⵕⵉ ⴰⵎⴰⴼⴰⵡ ⴷ ⴰⵖⵣⵓⵔⴰⵏ, ⴳ ⵡⴰⵕⵕⴰⵥ ⵏⵏⵖ ⴰⴳⵔⴰⵡⴰⵏ ⵉ ⵜⵏⵥⴰⵕ ⴷ ⵓⵡⴰⵜⵜⵙ ⵉⵛⵛⴰⵔⵏ ⵉ ⵓⵣⴷⴰⵢ ⵏ ⵓⵙⵏⴰⵎ.
ⵙ ⵎⴽⴰ, ⵜⵙⵙⵉⴷⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵜⵉⵔⵎⵉⵜ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ, ⵏⵏⴰ ⵎⵉ ⵉⵙⴼⵓⴳⵍⵓ ⵍⵎⵖⵔⵉⴱ ⴰⵙⴳⴳⵯⴰⵙ ⵉⵣⵔⵉⵏ ⵙ ⵓⴽⵜⵜⵓⵢ ⵏⵏⵙ ⵡⵉⵙ 20, ⵜⵙⵎⵖⵔ ⵜⴰⴷⵉⵏⴰⵎⵉⵜ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵡⴰⵛⵓⵏⵉⵏ ⵏ ⵓⵏⴳⵉⵙⵏ, ⵏⵏⴰ ⵙⴳ ⴷ ⵉⴼⴼⵖ ⵢⴰⵏ ⵓⵙⵖⵍⴼ ⵉⵙⵏⴼⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⵖⵔ ⵓⵙⴰⵜⵉ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵉⵙⵙⵏⵜⵉⵏ ⵙ ⵓⵙⵔⵓⵙ ⵏⵏⵙ ⵉ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ. ⴰⵎⵙⴰⴳⴰⵔ ⴰⵎⵣⵡⴰⵔⵓ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵏⴳⵔ ⵜⵉⵔⴰⵜ ⵏ ⵓⵡⴰⵏⴽ ⴷ ⵡⴰⵎⵓⵏ, ⵉ ⵜⵖⵓⵔⵉ ⵏ ⵜⴰⵙⵏⴰ ⵏ ⵉⵣⵔⵉ ⴷ ⵓⵙⵓⵎⵓ ⵏ ⵓⵏⴳⵉⵙⵏ ⴷ ⵓⵚⴽⵓ ⵏ ⵢⵉⵎⴰⵍ.
ⵜⴰⵙⵏⵜⴰⵢⵜ ⴰⴷ ⵓⵔ ⵉⵍⵉⵏ ⴰⵏⴰⵡ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵜⵎⵣⵡⴰⵔⵜ ⴳ ⵓⵙⵡⵉⵔ ⴰⵎⵏⵥⴰⵡ ⴷ ⴳ ⵓⴳⵔⴰⵖⵍⴰⵏ, ⵉⴽⴽⴰ ⵓⵎⴰⵍⴰⵍ ⴰⵎⴰⵜⵜⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵙⵏⵓⵎⵎⵍ ⵜⵜ ⴳ ⴷⵓⵊⴰⵏⴱⵉⵔ 2024 ⵙ "ⴰⵙⵔⵙ ⵉⴼⴰⵡⵏ ⴳ ⵓⵎⵣⵔⵓⵢ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ" ⴳ ⵓⵎⴰⴹⴰⵍ, ⵜⴷⵔⵓ, ⵙ ⵓⵎⵙⴰⵙⴰ ⴷ ⵓⵎⵙⵜⴳⴳⴰⵔ ⴰⵏⵎⵜⵜⴰ, "ⴳ ⵓⵙⵎⴽⵍ ⵏ ⵜⵕⵥⵉⵢⵉⵏ, ⵜⴳ ⵜⴰⵙⵉⵍⴰ ⵜⴰⴷⵙⵍⴰⵏⵜ ⴳ ⵓⵙⴰⴽⴰ ⵏ ⵓⵣⵓⵣⵣⴼ ⵏ ⵜⵉⴷⵜ ⴷ ⵓⵎⵙⴼⵔⵓ ⴰⴽⴷ ⵉⵣⵔⵉ".
ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⵜⵔⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵓⵔ ⵜⴱⴷⴷ ⵖⴰⵙ ⵅⴼ ⵓⵙⵢⵉⵍⵉ ⵏ ⵉⵣⵔⴼⴰⵏ ⴷ ⵓⵙⵓⵎⵓ ⵏ ⵓⵏⴳⵉⵙⵏ ⴷ ⵓⵙⵎⴽⵍ ⵏ ⵉⵣⵔⵉ, ⵎⴰⵛⴰ ⵜⴳⴰ ⵜⴰⵏⵇⵇⵉⴹⵜ ⵏ ⵓⴱⵓⵢ ⴷ ⵓⵙⵏⴼⵍ ⴰⵎⵢⴰⴳⴰⵏ ⴳ ⵓⵙⴰⴽⴰ ⵏ ⵍⵎⵖⵔⵉⴱ ⵖⵔ ⵓⵙⵏⴰⵎ ⴷ ⵓⵎⵓⵜⵜⵉ ⴰⴷⵉⵎⵓⵇⵕⴰⵟⵉ ⴷ ⵓⵏⴱⴰⴹ ⴰⵎⵓⴼⴰⵢ ⴷ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵍⴰⵡⴰⵏ ⴰⴽⴽⵯ ⴷⴼⴼⵉⵔ ⵓⵙⴷⵙⵜⴰⵔ ⵏ ⵉⵙⵖⵍⴰⴼ ⵏⵏⵉ ⴷ ⵜⴼⵍ ⵜⵉⵔⵎⵉⵜ ⴰⴷ.
ⵜⵙⵎⵖⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷⴷⴰⵡ ⵍⵇⵓⴱⵜ ⵏ ⵓⴱⵕⵍⴰⵎⴰⵏ ⴰⴱⵔⵉⵟⴰⵏⵉ, ⵙ ⵓⵙⵏⴰⵎ ⵏ ⵓⵙⵍⴳⵏ ⵏ ⵜⵡⵊⴰ ⴰⵙⴳⴳⵯⴰⵙ ⵏ 2004, ⵙ ⵎⴰⴷ ⵙⴳⵉⵙ ⵉⵍⴽⵎⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ, ⵙ ⵍⴰⵡⴰⵏ ⴰⴽⴽⵯ ⴳ ⵓⵎⵏⴰⴹ ⵏⵏⵖ ⴰⵙⴳⴰⵡⴰⵏ.
ⵉⴳⴰ ⵓⵙⵏⴰⵎ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ "ⴰⵙⵔⵙ ⴰⵎⵣⵔⴰⵢ ⴳ ⵓⵙⴰⴽⴰ ⵏ ⵡⴰⵎⵓⵏ ⴰⵎⵖⵔⵉⴱⵉ"… ⴰⵙⵏⴰⵎ, ⵓⵔ ⵉⵏⵏⵉⵏ ⴰⴷ ⵉⵜⵜⵡⴰⵍⴽⴰⵎ "ⵎⵔ ⵉⴷ ⵉ ⵢⵉⵥⵕⵉ ⴰⵖⵟⴰⴼⴰⵏ ⴷ ⴰⵖⵣⵓⵔⴰⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⵙⵏⴼⵍⵏ ⴰⵣⵣⵉⵀⵣⵉ ⴰⵎⵓⵏⴰⵏ ⵎⴳⴰⵍ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵓⵙⴰⴽⴰ ⵏ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ ⵖⵔ ⵡⴰⵎⵎⴰⵥ ⴰⴽⵎⴰⵎ, ⵓⵔ ⵉⵍⵉⵏ ⴰⵏⴰⵡ ⴳ ⵜⵎⵏⴰⴹⵜ."
ⴷⴼⴼⵉⵔ ⵏ ⵙⵉⵎⵔⴰⵡ ⵏ ⵉⵙⴳⴳⵯⴰⵙⵏ ⵏ ⵓⵙⵎⵀⵍ, ⴷ ⵙ ⵢⴰⵏ ⵉⵥⵕⵉ ⴰⵎⵙⵎⵏⵉⴷ, ⵉⵕⵥⵎ ⵍⵎⵖⵔⵉⴱ ⵢⴰⵏ ⵓⵙⴰⴽⴰ ⴰⵎⴰⵢⵏⵓ ⴰⵙⴳⴳⵯⴰⵙ ⵏ 2023 ⵉ ⵓⵣⵣⵔⴰⵢ ⵉ ⵓⵙⵍⴳⵏ ⵜⵉⴽⵍⵜ ⵜⵉⵙⵙ ⵙⵏⴰⵜ ⴳ ⵓⵣⵎⵣ ⵏ ⵙⵏⴰⵜ ⵜⵎⵔⴰⵡⵉⵏ… ⴳ ⵓⵎⵏⴰⴹ ⵏ ⵜⵎⵢⴰⴷⴰⵙⵜ ⵏ ⵓⵙⵏⴰⵎ ⴰⵙⵓⵍⴰⵏ, ⵃⵎⴰ ⴰⴷ ⵢⵉⵍⵉ ⵓⵙⵎⴽⵍ ⵏ ⵉⵎⴰⵍⴰⴷⵏ ⵉⵍⵍⴰⵏ ⴷ ⵓⵙⴷⵓⵙ ⵏ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ ⵙ ⵜⵡⵉⵍⴰ ⵉⴳⴳⵓⵜⵏ, ⵎⴰⵢⴰ ⴰⴷ ⵉⵜⵜⵙⴷⴷⵉⴷⵏ ⴰⵙⵓⵖⵏ ⵉⴷⵓⵙⵏ ⵙ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵜⵡⵜⵎⵉⵏ.
ⴰⵙⵏⴼⵍ ⵏ ⵓⵙⵍⴳⵏ ⵏ ⵜⵖⵍⴰⵏⵜ ; ⴰⵙⴷⵓⵙ ⵏ ⵓⵙⴷⵙⵜⴰⵔ ⵏ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ ⴷ ⵜⵙⵓⵎⵓⵜ, ⴷ ⵡⴰⵔⴰⵙⵏⵓⵃⵢⵓ ⴷ ⵜⴰⵜⵜⵓⵢⵜ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ; ⴰⴷⴰⴼ ⵏ ⵜⵎⵖⴰⵔⵜ ⵖⵔ ⵜⴰⵣⵣⵓⵍⵜ ⵏ ⵍⵄⴷⵓⵍ, ⴰⵙⴷⵓⵙ ⵏ ⵓⵡⵇⵇⵔ ⵏ ⵓⵎⵏⵣⴰⵢ ⵏ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ ⴷ ⵓⵙⴱⴷⴷⵉ ⵏ ⵜⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⴳ ⵜⵏⵖⵎⴰⵙⵜ, ⴰⵙⵍⴳⵏ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ, ⵉⵙⴽⵉⵍ ⵏⴳⵔ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴳ ⵓⵣⴷⴰⵢ ⴷ ⵉⴽⴰⵍⵉⵡⵏ ⵏ ⵉⵎⵣⵡⵓⵔⴰ (ⵉⵙⵓⵍⴰⵍⵉⵢⵏ), ⴰⵣⴷⴰⵢ ⵏ ⵓⵙⴷⵓⵙ ⵏ ⵜⴷⵔⴰⵡⵜ ⵜⴰⵙⵔⵜⴰⵏⵜ ⵏ ⵜⵡⵜⵎⵉⵏ ⴷ ⵓⵙⵎⴷⵢⴰ ⵏⵏⵙⵏⵜ… ⵉⵙⵔⴰⵙ ⴳ ⵜⵡⴰⴷⴰ ⵏ ⵓⵙⵏⴰⵎ ⴰⵙⵓⵍⴰⵏ, ⵎⴽⴷⴰ ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ… "ⵓⵔ ⴳⵉⵏ ⵖⴰⵙ ⵉⵙⵏⴼⵍⵏ ⵓⵍⴳⵉⵏⵏ ; ⵎⴰⵛⴰ ⴷⴰ ⵎⵎⴰⵍⵏ ⵉⵥⵕⵉ ⵖⵔ ⵢⴰⵏ ⵡⴰⵎⵓⵏ ⴳ ⵜⵍⵍⴰ ⴽⵉⴳⴰⵏ ⵏ ⵜⵖⵣⵓⵔⴰⵏⵜ ⴷ ⵓⵙⵓⵎⵓ".
ⵜⵙⴰⵡⵍ ⵎⴰⵙⵙⴰ ⴱⵓⵄⵢⵢⴰⵛ, ⴷⴰⵜ ⵉⴳⵎⴰⵎⵏ ⴳ ⵓⴱⵕⵍⴰⵎⴰⵏ ⴰⴱⵔⵉⵟⴰⵏⵉ, ⵅⴼ ⵓⵙⴰⵡⵔ ⵏ ⵓⴼⵔⴰⴳ ⴰⵏⴰⵎⵓⵏ ⴳ ⵍⵎⵖⵔⵉⴱ, ⴷ ⵜⵉⵍⴰⵡⵜ ⵏ ⵜⴷⵔⴼⵉ ⵏ ⵓⵡⵏⵏⵉ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⵙ ⵉⵣⵎⴰⵣ ⵏⵏⵙ ⴷ ⵜⵏⵥⴰⵕ ⵏⵏⵙ, ⴳ ⵍⵎⵖⵔⵉⴱ ⴷ ⵓⵎⴰⴹⴰⵍ, ⴷ ⵉⵙⵉⵣⵡⵉⵔⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⴳⵏⵙⵓ ⵏ ⵓⵙⴰⵢⵔⴰⵔ ⴰⴷ, ⴷ ⵉⴼⵔⴷⵉⵙⵏ ⵏ ⵜⵎⵢⴰⴷⴰⵙⵜ ⵏ ⵍⵎⵖⵔⵉⴱ ⴳ ⵓⵚⴽⵓ ⵏ ⵉⵙⵏⴰⵎⵏ ⵏⵏⵙ ⵙ ⴽⵕⴰⴹⵜ ⵜⵔⵙⴰⵍ ⵏⵏⵙ : ⴰⵎⵙⴰⵙⴰ, ⴳ ⵓⴷⵖⴰⵔ ⵏ ⵓⵔⵣⵣⵓ ⵅⴼ ⵉⵎⵛⴰⵛⴽⴰⵜⵏ ⵉⵖⴱⴰⵏ ; ⵉⵙⵍⵍⵡⵉ ⵉ ⵓⵙⵏⵎⴰⵍⴰ ⴷ ⵓⵙⵔⵙ ⵏ ⵉⴼⵙⴰⵢⵏ ⵉⵎⵙⴰⵙⴰⵏ ⴷ ⵉⵙⵉⵣⵡⵉⵔⵏ ⵏ ⵓⵎⵏⴰⴹ ⴰⵏⴰⵎⵓⵔ ; ⵜⴰⵎⵢⴰⴷⴰⵙⵜ ⵜⴰⵏⵊⵎⵓⵜ ⵜⴰⵎⵢⴰⴳⴰⵏⵜ , ⵏⵏⴰ ⵉⵜⵜⵏⴼⵔⵓⵏ ⴰⵙⴷⵔⵓⵡ ⵏ ⴰⴽⴽⵯ ⵉⵎⵙⴽⴰⵔⵏ ⴳ ⵜⵎⵏⴰⴹⵉⵏ ⵏ ⵍⵎⵖⵔⵉⴱ ⵙ 12… ⵜⴰⵎⵢⴰⴷⴰⵙⵜ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, "ⵉⵔⵣⵣⵓⵏ ⵅⴼ ⵉⴼⵙⴰⵢⵏ ⵉⵣⵔⴼⴰⵏⵏ ⵉⵏⵎⵣⵓⵕⴰⵏⵏ ⵙ ⵜⵖⴱⵉ ⴳ ⵜⵉⵍⴰⵡⵜ ⵜⴰⵏⴰⵎⵓⵏⵜ ⴷ ⵜⴷⵍⵙⴰⵏⵜ ⴳ ⵍⵎⵖⵔⵉⴱ."
ⴰⵙⵙⵉⴷⴷ ⵅⴼ ⵉⵙⴰⴽⴰⵜⵏ ⵏ ⵓⵙⵏⴰⵎ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵉⴳⴰ ⴰⵡⴷ ⵜⵓⵙⵏⵜ ⵙ ⵜⵏⵥⴰⵕ ⵏⵏⴰ ⵎⵉ ⵓⵔ ⵉⵜⵜⴰⴼ ⵍⵎⵖⵔⵉⴱ ⴽⵔⴰ ⵏ ⵓⴷⴷⵉⵙ ⵏ ⵓⵍⵎⴰⴹ ⴳ ⵜⵓⵙⵏⵜ ⵙⵉⵔⵙⵏⵜ, ⴳ ⵓⵡⴰⵜⵜⵙ ⵏⵏⵙ ⴰⴼⴰⴷ ⴰⴷ ⵉⵙⵏⴼⵍ ⴰⵙⵡⵓⴷⴷⵓ ⴰⴷⵙⵜⴰⵔ ⴷ ⵓⵏⴰⵡⴰⵢ ⵖⵔ ⵜⵉⵍⴰⵡⵜ ⵜⴰⵎⵉⴷⵉⵔⵜ ⴷ ⵜⴽⵎⴰⵎⵜ… "ⴰⵙⵉⵣⵡⵔ ⴰⵖⴰⵡⵍⴰⵏ ⵏⵡⴰⵜⵜⵙ ⴰⴷ ⵜ ⵏⵍⴽⵎ ⴰⴽⴽⵯ", ⴰⴷ ⵜⵔⵏⴰ.
ⴰⵙⵓⵖⵏ ⵏ ⵍⵎⵖⵔⵉⴱ ⵙ ⵓⵙⵏⴰⵎ ⴰⵙⵓⵍⴰⵏ ⵓⵔ ⵉⴳⵉ ⵖⴰⵙ ⴰⵙⵜⴰⵢ ⴰⵙⵔⵜⴰⵏ, ⵎⴰⵛⴰ ⵉⴳⴰ ⴰⵙⵖⵓⵏ ⴰⵖⴰⵔⴰⵏ ⵏⵏⴰ ⵔⴰⴷ ⵉⴷⵔⵓ ⴱⵍⴰ ⵜⵓⵔⴷⴰ ⴳ ⵓⵍⴽⴰⵎ ⵙ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵎⵢⴰⵎⴰⵥ ⴰⵏⴰⵎⵓⵏ ⴳ ⵓⵣⵎⵣ ⵓⵖⵣⵉⴼ, ⴰⵙ ⵜⵙⵎⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
