ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⵉⵙⵙⵏ ⵍⵎⵖⵔⵉⴱ ⴳ ⵎⵔⴰⵡ ⵏ ⵉⵙⴳⴳⵯⴰⵙⵏ ⵣⵡⴰⵔⵏⵉⵏ ⴳ ⵜⴰⵙⵓⵜ ⴰⴷ ⵉⵙⵏⴼⵍⵏ ⴼⴰⵡⵏⵉⵏ ⴳ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵜ ⵏ ⵓⵎⵎⵓⵄⴹⵕ, ⵙⵙⵏⵜⵉⵏ ⴰⴱⵔⵉⴷ ⵎⵏⵉⴷ ⵜⵓⵙⵏⵜ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵓⵙⴷⵓⵙ ⵏⵏⵙⵏ ⴳ ⵓⵙⵡⵉⵔ ⵓⵣⵔⵉⴼ ⴷ ⵓⵙⵡⵉⵔ ⴰⵎⵔⵙⴰⵍ ⴳ ⵎⵔⴰⵡ ⵏ ⵉⵙⴳⴳⵯⴰⵙⵏ ⵡⵉⵙ ⵙⵉⵏ ⵏ ⵜⴼⵔⴽⵜ ⴰⴷ, ⵜⵣⵎⵎⴻⵎ ⴳ ⵓⵎⵏⴰⴹ ⴰⴷ ⵏⵉⵜ ⵎⴰⵙ ⵜⴳⴰ "ⵜⵉⵍⴰⵡⵜ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵉⵙⵓⵍ ⵉⵙⵙⵏ ⴰⵎⵣⴰⵔⴰⵢ ⵉⴳⴳⵓⵜⵏ ⵉⵏⴳⵔ ⵜⵓⵙⵏⵜ ⵙ ⵉⵣⵔⴼⴰⵏ ⴷ ⵜⵎⵢⴰⴳⴰⵏⵜ ⵏⵏⵙⵏ ⴳ ⵜⵉⵍⴰⵡⵜ". 

ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴳ ⵜⵎⵙⵉⵔⵜ ⴰⴷ ⵏ ⵓⵕⵥⵥⵓⵎ ⵏⵏⵉ ⵜⵙⵎⵏⵉⴷ ⵜⴰⴷⴳⴳⵯⴰⵜ ⵏ ⵓⵙⵉⵏⴰⵙ 01 ⵏⵓⵡⴰⵏⴱⵉⵔ 2022 ⴳ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵏ ⵓⵙⴳⵎⵉ ⴳ ⵕⵕⴱⴰⵟ ⴷⴷⴰⵡ ⵜⵎⴰⵜⴰⵔⵜ "ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵉⵏⴳⵔ ⵜⵓⵙⵏⵜ ⴷ ⵜⵎⵢⴰⴳⴰⵏⵜ" ⵎⴰⵛ ⵉⴳⴰ ⵓⵙⴷⵓⵙ ⵏ ⵉⵎⴰⵙⵙⵏ ⵓⵣⵔⵉⴼⵏ ⴷ ⵉⵎⵔⵙⴰⵍⵏ ⵢⴰⵏ ⵓⵙⵔⵙ ⴰⴷⵙⵍⴰⵏ ⵉⵍⴰⵏ ⴰⴷⴷⵓⵔ ⴳ ⵓⴱⵔⵉⴷ ⵏ ⵜⵓⵙⵏⵜ ⵜⴰⵡⵓⵔⵎⴰⵏⵜ ⵙ ⵉⵣⵔⴼⴰⵏ, "ⵎⴰⵛ ⵓⵔ ⴷⴰ ⵜⵜⴰⵡⵉ ⵙ ⵓⵙⵉⴷⴼ ⴰⵎⵢⴰⴳⴰⵏ ⵏ ⵉⵣⵔⴼⴰⵏ", ⵜⵙⵙⵎⵜⵔ ⵎⴰⵙ ⵉⵣⴷⵉ ⵓⴼⵊⵊⵉⵊ ⵓⵙⵎⵉⴷ ⴷ ⵓⵎⵢⴰⴳⴰⵏ ⵙ ⵉⵣⵔⴼⴰⵏ ⵙ ⵜⵙⵏⵙⵉ ⵏ ⵉⵡⴰⵏⴽⵏ ⵉ ⴽⵕⴰⴹ ⵏ ⵉⵎⵏⴰⴷⵏ ⵏ ⵉⵎⵏⵣⴰⵢⵏ, ⵙ ⵜⵡⵉⵍⴰ ⵜⴰⵎⵢⴰⵙⵜ, ⵜⵜⵡⴰⵙⵙⵏⵏⵉⵏ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⴰⵡⵇⵇⵔ, ⴰⴼⵔⴰⴳ, ⴰⵙⵓⴼⵓ). 

ⴳ ⵜⵉⵣⵉ ⵏ ⵓⵙⵎⵏⵉⴷ ⵏⵏⵙ ⵉ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⴷ ⵓⵙⵓⵔⵙ ⵏ ⵜⵎⵢⴰⴳⴰⵏⵜ ⵏ ⵓⵙⵉⴷⴼ ⵏⵏⵙⵏ ⵙ ⵓⵣⵔⴼ ⴳ ⵓⵙⵍⵎⴷ ⴷ ⵜⵡⵓⵔⵉ ⴷ ⵜⴷⵓⵙⵉ ⴷ ⵜⴷⵔⴰⵡⵜ ⵜⴰⵙⵔⵜⴰⵏⵜ..., ⵜⵎⵙⴳⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵙ ⵎⴰⵙ ⵉⴳⴰ ⵎⴰⵢⴰ ⴷ ⵉⵍⵍⴰⵏ ⴳ ⵜⵉⵍⴰⵡⵜ ⵜⵓⵙⵏⵜ ⵙ ⵉⵣⵔⴼⴰⵏ ⵏ ⵓⵙⵎⵉⵍ ⴰⴷ, ⴳ ⵓⵣⵎⵣ ⵍⵍⵉ ⵖ ⵜⵙⵖⴰⵡⵙⴰ ⵜⵏⴼⵔⵓⵜ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴰⴷ ⴽⵉⴳⴰⵏ ⵏ ⵜⵓⴳⴳⴰⵣ. ⵜⵙⵡⵔⵔⵉ ⵜⵉⵎⵏⵜⴰⵍ ⵏ ⵓⵙⵓⵔⵙ ⴰⴷ ⵙ ⴽⵉⴳⴰⵏ ⵏ ⵜⵎⵏⵜⴰⵍ ⵍⵓⵎⵎⵏ ⵙⴳⵉⵙⵏⵜ ⴰⵏⵖⴰⵍ ⵏ ⵜⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⴷ ⵉⵙⵎⴷⵢⴰⵜⵏ ⵓⵣⴷⵉⵔⵏ ⵅⴼ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵡⴰⵎⵓⵏ; ⴰⵍⵎⴰⴹ ⵏⵉⵖ ⵜⴰⵏⴰⴱⴱⴰⵢⵜ ⵏ ⵓⵎⵢⴰⴼⴰ ⵉⵏⴳⵔ ⵜⵙⵔⵜⴰⵢ ⵜⵉⵏⵊⵎⵓⵜⵉⵏ ⴷ ⵓⵣⴷⴰⵢ ⵉⵏⴳⵔ ⵇⴰⵃ ⵉⵎⴳⴳⴰⵢⵏ ⴳ ⵢⵉⴳⵔ ⵏ ⵓⵎⵎⵓⵄⴹⵕ; ⵜⴰⵏⴰⴱⴱⴰⵢⵜ ⵏ ⵉⵙⴰⴷⴰⴼⵏ ⵙ ⵓⵔⵎⵎⵓⵙ ⵏⵏⵙ ⴰⵖⵣⵓⵔⴰⵏ, ⵎⴰⵢⴰ ⴰⴷ ⵉⵙⵡⵓⵜⵜⵓⵏ ⵜⴰⵣⵎⵔⵜ ⵏ ⵡⴰⴷⴰⴼ ⵙ ⵉⵣⵔⴼⴰⵏ ⴷ ⵓⴼⵊⵊⵉⵊ ⵙ ⵜⵏⵓⴼⴰ; ⴰⵎⵣⴰⵔⴰⵢ ⵉⵍⵍⴰⵏ ⴳ ⵓⵙⴷⵍ ⵏ ⵓⵙⴽⴰⵏ ⴰⴷⵓⵙⴰⵏ ⴳ ⵜⵎⵏⴰⴹⵉⵏ ⴰⴽⴽⵯ ⴷ ⵉⴹⵉⵚⵏ ⵏⵏⵙ ⵅⴼ ⵜⴷⵓⵙⵉ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ; ⴰⵏⵎⴰⵔ ⵏ ⵓⵙⵉⴷⴼ ⴰⵖⵣⵓⵔⴰⵏ ⵙ ⵜⵣⵔⴼⵜ ⴷ ⵜⵏⴰⴱⴱⴰⵢⵜ ⵏ ⵉⵙⵙⵓⴷⵙⵏ ⵏ ⵓⵙⵙⵡⵀⵏ ⴳ ⵜⴼⵔⴽⵉⵡⵉⵏ ⵏ ⵓⵎⵚⵉⵕⵉⴹ, ⴰⵎ ⴰⵙⵓⵖⵍ ⵙ ⵜⵓⵜⵍⴰⵢⵏ ⵏ ⵓⵙⵙⵉⵍⴼ, ⵎⴰⵢⴰ ⵏⵏ ⴰⴷ ⵉⵜⵜⴹⵉⵚⵏ ⵅⴼ ⵉⴳⵉ ⵏ ⵜⴼⴰⴷⵉⵡⵉⵏ ⵏ ⵓⵎⵚⴰⵕⴰⴹ ⵓⵖⴷⵉⵎ ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ 13 ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ. 

ⴳ ⵎⴰⴷ ⵉⵥⵍⵉⵏ ⵙ ⵜⵏⴱⵖⵓⵔⵜ ⵏ ⵓⵙⵎⵉⵍ ⴰⴷ ⵙⴳ ⵓⴼⵔⴰⴳ ⴰⵏⴰⵎⵓⵏ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵓⵔ ⴷⴰ ⵙⴱⵖⴰⵔⵏ ⵙⵉⵏ ⵉⴷ ⵡⵉⵙ ⴽⵕⴰⴹ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⵙⴳ ⴰⵡⴷ ⵢⴰⵏ ⵓⵏⴳⵔⴰⵡ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ, ⵉⵡⵔⵔⵉ ⵎⴰⵢⴰ ⵏⵏ ⵣⵡⴰⵔ, ⵙ ⵜⴷⵔⵙⵉ ⵏ ⵓⵎⵍⴰⵏ ⵣⴷⵉⵏⵉⵏ ⵙ ⵓⵙⵓⵔⵙ ⴰⵏⴰⵎⵓⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵍⵎⵖⵔⵉⴱ, ⴰⴼⴰⴷ ⴰⴷ ⵉⵜⵜⵡⴰⵥⵍⴰⵢ ⵡⴰⵏⵙⴰ ⵏⵏⵙⵏ ⴳ ⵓⵙⴰⵡⵔ ⵏ ⵓⵏⴰⴳⵔⴰⵡ ⵏ ⵓⴼⵔⴰⴳ ⴰⵏⴰⵎⵓⵏ, ⵉⵍⵎⵎⴰ ⴰⵏⵎⴰⵔ ⵏ ⵓⵙⵓⵖⵍ ⵏ ⵉⴹⵕⵉⵚⵏ ⵓⵍⴳⵉⵏⵏ ⵙ ⵉⵙⴰⴷⴰⴼⵏ ⵏ ⵜⵉⴷⵜ ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⵏ ⵓⴼⵔⴰⴳ ⴰⵏⴰⵎⵓⵏ ⵉ ⵓⵙⵎⵉⵍ ⴰⴷ ⴷ ⵓⵙⵙⵏⵜⵉ ⴳ ⵓⵣⵣⴳⵉⵔ ⵏ ⵓⴼⵔⴰⴳ ⴰⵏⴰⵎⵓⵏ. 

ⵜⵙⵎⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵜⴰⵎⵙⵉⵔⵜ ⵏⵏⵙ ⵏ ⵓⵕⵥⵥⵓⵎ ⵙ ⵜⵖⵓⵔⵉ ⵙ ⵉⴳⵉ ⵏ ⴽⵉⴳⴰⵏ ⵏ ⵉⵙⵡⵓⴷⴷⵓⵜⵏ ⵣⴷⵉⵏⵉⵏ ⵙ ⵉⴳⵔⴰⵏ ⵏ : ⵓⵣⵓⵣⵣⵔ ⵏ ⵓⴼⵔⴰⴽ ⵉ ⵓⵏⵎⴰⵍⴰ ⵏ ⵜⵙⵡⵉⵏⴳⵉⵎⵉⵏ ⴷ ⵉⵎⵏⴰⴷⵏ ⵣⴳⵍⵏⵉⵏ ⴷ ⵓⵙⵡⵓⵜⵜⵓ ⵏ ⵜⵎⵙⴽⵔⵉⵏ ⵜⵜⵟⵟⴰⵚⵏⵉⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ; ⴰⵙⴷⵖⵉ ⵏ ⵉⵙⴼⴽⴰ ⴷ ⵓⵎⵍⴰⵏ ⵏ ⵓⵙⵏⵎⴽⵜⴰ ⴰⵎⴰⵜⴰⵢ ⵏ ⵉⵎⵣⴷⴰⵖⵏ ⴷ ⵜⵣⴷⴷⵓⵖⵜ ⵙ ⵜⵙⵖⵣⵏⵜ ⵏ ⵉⵙⵇⵙⵉⵜⵏ ⵉⵏⵙⵎⴰⴷⵏ ⵣⵎⵔⵏⵉⵏ ⴰⴷ ⵢⴰⵡⵙ ⴳ ⵓⵃⵇⵇⴰ ⵏ ⵜⵙⴳⵓⵔⵉⵡⵉⵏ ⵜⵉⵎⵣⵡⵓⵔⴰ ⴷ ⵡⴰⵍⵍⴰⵍ ⵏ ⵓⵙⵖⴰⵍ ⵏ ⵜⵏⵓⵎⵉ ⵏ ⵓⵎⵍⴰⵏ ⵜⵜⵡⴰⵣⵎⵎⴰⵎⵏⵉⵏ. 

ⵎⴽⴷⴰ ⵜⵖⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵙ ⵉⴳⵉ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵜⵜⴰⵡⵉⵏⵉⵏ ⵙ ⵓⵙⵎⵀⵍ ⴰⵎⵢⴰⴳⴰⵏ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⴳ ⵍⵎⵖⵔⵉⴱ; ⴰⵙⵎⵀⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵜⴰⵎⵢⴰⴳⴰⵏⵜ ⵕⵡⴰⵏⵉⵏ ⴰⴽⴷ ⵉⴷ ⴱⵓ ⵜⵏⴰⴼⵓⵜ ⴷ ⵎⴰⴷ ⵜⵏ ⵉⵙⵎⴷⵢⴰⵏ ⴷ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵓⵎⵛⴰⵡⴰⵕ ⴷⵉⴷⵙⵏ ⵅⴼ ⵜⵓⵙⵙⵔⴰ ⵏ ⵓⵏⵀⵍⵍⴰ ⴰⵎⵔⵙⴰⵍ ⴷ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⵓⴳⴳⵓⵥⵜ ⵜⵓⵛⵛⵉⵍⵜ ⴷ ⵓⵙⵡⵔⵔⵉ ⵏ ⵜⵉⵍⴰⵍⵜ ⵏ ⵓⵡⴰⵏⴽ ⴳ ⵓⵙⵎⴰⴳⵍ ⴰⵖⵣⵓⵔⴰⵏ ⵙ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⴳ ⵓⵡⵇⵇⵔ ⵉⵙⵎⴳⵏ ⵉ ⵉⵎⵏⵣⴰⵢⵏ ⴷ ⵉⴱⴹⵉⵢⵏ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵉⴷⴷⵖ ⵉⴳⴰ ⴰⵡⴰⵏⴽ ⵢⴰⵎⵓⵏ ⴳ ⵜⵎⵢⴰⵇⵇⴰⵏⵜ ⴰⴷ.