11 ⵛⵓⵜⴰⵏⴱⵉⵔ 2025- ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⴰⵏ ⵓⴳⵔⴰⵡ ⵏ ⵉⵎⵓⵣⴰⵢⵏ ⴳ ⵎⵉⵚⵕ ⵉⵜⵜⵓⵥⵍⴰⵢⵏ ⵉ ⵓⵎⴹⴰⴽⴰⵕ ⵏ ⵓⵙⵎⵓⵜⵜⴳ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⴰⵏⴰⵎⵓⵔ ⵉⵥⵍⵉⵏ ⵙ ⵜⵎⵙⵙⵏⵜⵉⵜⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵓⵏⵎⵓⵇⵇⴰⵔ ⴰⴷ ⵙⴳ ⵜⵓⴳⴳⵓⴳⵜ, ⵉⵙⴷⴷⵉⴷ ⵎⴰⵙⵙ ⵅⴰⵍⵉⴷ ⵕⵕⵎⵍⵉ, ⴰⵏⵎⵀⴰⵍ ⵏ ⵓⵎⵢⴰⵡⴰⵙ ⴷ ⵉⵎⵢⴰⵙⵙⴰⵜⵏ ⵉⴱⵕⵕⴰⵏⵉⵢⵏ, ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵜⵎⵙⵜⴳⴳⴰⵔⵜ ⵏ ⵜⵎⵙⵙⵏⵜⵉⵜⵉⵏ ⵜⵉⵅⴰⵜⴰⵔⵉⵏ ⴳ ⵓⵙⴰⵜⵉ ⵏ ⵜⵏⵥⴰⵕ ⴷ ⵉⵏⵏⴳⵣⵓⵜⵏ ⵏⵏⴰ ⵉⵙⵙⵏ ⵓⵎⴰⴹⴰⵍ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵎⴽⴷⴰ ⵉⵙⵎⵏⵉⴷ ⵜⵓⴳⴳⴰⵣ ⵏⵏⴰ ⵉⵜⵜⵓⵙⴽⴰⵔⵏ ⴳ ⵍⵎⵖⵔⵉⴱ, ⵙⴳⵉⵙⵏⵜ ⴰⵙⵉⴷⴼ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⴰⵏⴰⵎⵓⵔ ⴳ ⵓⵙⴰⵜⵉ ⵏ ⵜⵙⵜⵔⴰⵜⵉⵊⵉⵜ ⵏ ⵓⵙⵏⵎⴰⵍⴰ ⵏ ⵡⴰⴽⴰⵙ ⵏ ⵓⵎⴰⴹⴰⵍ 2030. ⴷ ⵓⵙⵢⵉⵍⵉ ⵏ ⵜⵓⴳⴳⴰⵣ ⵏ ⵓⵙⵇⵇⵉⵎ ⴳ ⵢⵉⴳⵔ ⴰⴷ ⵙ ⵓⵙⵎⴽⵍ ⵏ ⵜⵏⵓⵔⵣⵉⵏ, ⴷ ⵓⵙⵙⵓⴼⵖ ⵏ ⵉⵙⵖⵍⴰⴼ, ⴷ ⵓⵙⴽⴰⵔ ⵏ ⵜⵖⵓⵔⵉⵡⵉⵏ, ⵖ ⵢⴰⵎⵓ ⵢⴰⵏ ⵓⵙⴼⵙⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵓⵏⵏⵓⵏⵜ ⵉⵜⵜⵓⵣⵓⵣⵣⵔⵏ ⴳ ⵓⵙⵉⵜ ⵏ ⵍⴼⵉⴼⴰ.., ⴷ ⵓⵍⴰ ⵜⵉⵍⴰⵍ ⵏ ⵓⵙⵎⵓⵜⵜⴳ ⴷ ⵓⵙⴷⵓⵙ ⵏ ⵜⵥⴹⴰⵕⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵓⵍⵍⵉⵢⵏ.

ⵉⵙⵙⴽⵜⵉ ⵓⵙⵇⵇⵉⵎ ⴰⵡⴷ ⵜⴰⴷⵔⴰⵡⵜ ⵏⵏⵙ ⵜⴰⴳⵔⴰⵖⵍⴰⵏⵜ ⵙ ⵜⴳⵎⴰⵎⵜ ⵏⵏⵙ ⴳ ⵜⵏⵇⵇⵉⴹⵜ ⵏ ⵓⵎⵢⴰⵡⴰⴹ ⵜⴰⵏⴰⵎⵓⵔⵜ ⵏ OCDE ⴷ ⵓⵎⵢⴰⵡⴰⵙ ⵏⵏⵙ ⴰⴽⴷ ⵜⵔⴰⴱⴱⵓⵜ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵜⵎⵙⵙⵏⵜⵉⵜⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴷⴷⵉⴷ ⴳ ⵜⴳⵉⵔⴰ ⵎⴰⵙ ⵉⵙⵖⴰⵡⵙⴰ ⵓⵎⵓⵔⵙ ⵏ ⴽⵔⴰⵢⴳⴰⵜ ⴰⵖⴰⵡⴰⵙ ⵏ ⵜⵡⵓⵔⵉ ⴰⵏⴰⵎⵓⵔ ⵙ ⵜⵉⵔⴰⵜ ⵜⴰⵙⵔⵜⴰⵏⵜ ⵉⴷⵓⵙⵏ, ⴷ ⵜⴷⵔⴰⵡⵜ ⵜⴰⵎⵢⴰⴳⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⴰⴽⴷ ⵜⴹⴼⵕⵉ ⵏ ⵜⵎⵙⴰⵔⵉⵏ ⵜⵉⵎⴰⵢⵏⵓⵜⵉⵏ ⴰⵎ ⵜⵖⵉⵙⵜ ⵜⵉⵎⵍⵥⵉⵜ, ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⵏ ⵜⵕⵡⵉ ⵏⵏⵙ ⴷ ⵜⴰⵙⵓⵍⵜ ⵏⵏⵙ.