ⴳ ⵜⵓⵏⵖⵉⵍⵜ ⵜⵉⵙⵙ ⵚⴹⵉⵚⵜ ⵏ ⵜⴼⵓⴳⵍⴰ ⵜⴰⵙⴳⵯⵙⴰⵏⵜ ⵜⴰⵏⴰⵎⵓⵔⵜ ⵏ ⵓⵡⵔⵉⴽ ⵏ ⵓⵙⴳⴳⵯⴰⵙ, ⵉⵙⵜⵉ "ⵓⵏⵣⵡⴰⵢ ⵎⵉⴷⵉⵏⴰ ⵉⴼ ⵉⵎ" ⵎⴰⵙⵙⴰ ⵎⵉⵎⵓⵏⴰ ⵙⵙⴰⵢⵉⴷ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⴷⴷⴰⵅⵍⴰ ⵡⴰⴷ ⴷⴷⴰⵀⴰⴱ, ⴳ ⵜⴼⵓⴳⵍⴰ ⵏⵏⴰ ⵜⵙⵏⵎⴰⵍⴰ ⴰⵙⵙ ⵏ ⵓⵙⵉⵎⵡⴰⵙ 07 ⵉⵏⵏⴰⵢⵔ 2022 ⴳ ⵜⵖⵔⵎⵜ ⵏ ⵍⵇⵏⵉⵟⵕⴰ.

ⴳ ⵜⴳⵓⵔⵉ ⵏⵏⴰ ⵜⴼⴽⴰ ⵙ ⵜⵎⵍⴷⴰ ⴰⴷ, ⵜⵙⵙⵉⵙⴼⵉⵡ ⵎⴰⵙⵙⴰ ⵎⵉⵎⵓⵏⴰ ⵙⵙⴰⵢⵢⵉⴷ ⵎⴰⵙ "ⵉⴳⴰ ⵓⵙⴷⵓⵙ ⵏ ⵜⵓⵙⵙⵏⴰ ⵏ ⵜⵓⵙⵏⴰⵙ, ⵙ ⵜⵉⴷⵜ, ⴷ ⵓⵙⵙⵓⵜⴳ ⵉⵖⵓⴷⴰⵏ ⵉ ⴽⵔⴰⵢⴳⴰⵜ ⵓⴳⴳⵉⴷ ⴷ ⵜⵣⵎⵎⴰⵔ ⵏⵏⴰ ⵏⵏ ⵉⵜⵜⴳⴳⴰ ⴰⵙⵎⴰⴳⴰⵍ ⴷ ⵓⵙⵙⵔⵇⴱ ⵅⴼ ⵉⴳⵉ ⵏ ⵓⴳⴳⴰⵔ ⵏ ⵜⵣⵎⵎⴰⵔ ⴷ ⵜⵓⴳⴳⴰⵙ, ⴷⴰⵜ ⴰⴷ ⵉⴳ ⴰⴷⴷⵓⵔ".

ⵜⵙⴷⴷⵉⴷ ⵎⴰⵙⵙⴰ ⵎⵉⵎⵓⵏⴰ ⵙⵙⴰⵢⵢⵉⴷ ⵎⴰⵙ ⵉⵟⵟⴰⴼ ⵓⵙⵙⵉⵎⵖⵓⵔ ⵏⵏⵙ ⵜⵓⴳⵜ ⵏ ⵉⵎⵏⵉⴷⵏ, ⴰⵎⵣⵡⴰⵔⵓ ⴳⵉⵙⵏ ⵉⴳⴰ ⵜ ⵜⵉⵎⵔⵙⵍⵜ ⵏ ⵜⵡⵎⴰⵏⵉⵜ, ⵜⵉⵏⵉ ⵎⴰⵙ ⵉⴳⴰ ⵓⵙⵙⵉⵎⵖⵓⵔ ⵏⵏⵙ "ⴰⵙⵙⵉⵎⵖⵓⵔ ⵉ ⵇⴰⵃ ⵜⵡⵜⵎⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴷ ⵉⴳⵎⴰⵎⵏ ⵓⵍⴰ ⵉⵎⵙⵡⵓⵔⵉⵢⵏ, ⵉⴷⴷⵖ ⴷⵔⵓⵏ ⴳ ⵜⵓⴳⴳⴰⵙ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵏⵖ", ⵜⵉⵏⵉ ⴰⵡⴷ ⵎⴰⵙ ⵉⵙⵙⵓⵜⴳ ⵓⵙⵙⵉⵎⵖⵓⵔ ⴰⴷ ⵜⴰⵎⵖⴰⵔⵜ, ⵉⵙⵉⵙⵙⵏ ⵙ ⵜⵎⵍⵉⵍⵜ ⵏⵏⵙ ⵜⴰⵏⴰⵎⵓⵏⵜ ⴷ ⵜⵣⵎⵎⴰⵔ ⵏⵏⵙ ⴰⴼⴰⴷ ⴰⴷ ⵜⴳ ⵜⴰⵎⴳⴳⴰⵢⵜ ⴳ ⵓⵙⵏⴼⵍ ⵉⵜⵜⵓⵙⵡⵓⵜⵜⴰⵏ ⴳ ⵡⴰⵍⴽⴰⵎ ⵏ ⵜⴰⵜⵜⵓⵢⵜ ⵜⴰⵏⴰⵎⵓⵏⵜ".

ⵜⵉⵏⵉ ⴷⴰⵖ ⵎⴰⵙⵙⴰ ⵎⵉⵎⵓⵏⴰ ⵙⵙⴰⵢⵢⵉⴷ ⵎⴰⵙ ⵉⴳⴰ ⵓⵙⵙⵉⵎⵖⵓⵔ ⴰⴷ "ⴰⵙⵙⵉⵎⵖⵓⵔ ⵉ ⵇⴰⵃ ⵉⵎⴳⴳⴰⵢⵏ ⵉⵏⴰⵎⵓⵏⵏ ⵏ ⵇⴰⵃ ⵉⴷⵖⴰⵔⵏ ⵏ ⵜⵉⴳⴰⵡⵜ ⴷ ⵜⴱⵔⴰⵜ ⵉⵜⵜⵓⵙⵡⴰⵍⴰⵏ ⵉ ⵡⴰⵎⵓⵏ, ⴰⴼⴰⴷ ⴰⴷ ⵜⵓⵖⵓⵍ ⵙ ⵓⴼⵓⵍⴽⵉ ⵅⴼ ⵇⴰⵃ ⵎⵉⴷⴷⵏ, ⴷⵔⵓⵏ ⴳ ⵓⵍⴽⴰⵎ ⵏ ⵓⵙⵎⵓⵙⵙⵓ ⴰⵖⵣⵓⵔⴰⵏ ⵅⴼ ⵜⵓⴳⵜ ⵏ ⵜⵎⵙⵍⴰⵢⵉⵏ ⴷ ⵉⵏⵣⴳⵓⵎⵏ ⵏ ⵓⵙⴽⴽⵉⵏ ⴰⴷⵖⵔⴰⵏ ⴷ ⵓⵎⴰⵜⴰⵢ".

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵎⵢⴰⵔ "ⵓⵏⵣⵡⴰⵢ ⵎⵉⴷⵉⵏⴰ ⵉⴼ ⵉⵎ" ⴽⵔⴰⵢⴳⴰⵜ ⴰⵙⴳⴳⵯⴰⵙ ⴰⴷ ⵉⵙⵙⵉⵎⵖⵓⵔ ⵉⵡⵔⵉⴽⵏ ⵉⵕⵛⵎⵏ ⴳ ⵓⵙⴳⴳⵯⴰⵙ ⴳ ⵜⵓⴳⵜ ⵏ ⵉⴳⵔⴰⵏ (ⵉⴳⵔ ⴰⵣⵔⴼⴰⵏ, ⵉⴳⵔ ⵏ ⵜⵏⴼⵔⵓⵜ, ⵉⴳⵔ ⴰⵏⵣⵔⴰⴼ ⴷ ⵓⵍⴳⵉⵏ) ⵉⴷⴷⵖ ⵏⵏ ⴳⴰⵏ ⴽⵉⴳⴰⵏ ⵏ ⵜⵓⴳⴳⴰⵙ ⴳ ⵉⴳⵔⴰⵏ ⵏⵏⴰ ⵖ ⵙⵡⵓⵔⵉⵏ .