ⵜⵙⵙⵉⴷⴼ ⵢⴰⵜ ⵜⴰⵏⴰⴹⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ, ⴰⵏⵟⵓⵏⵢⵓ ⴳⵓⵜⵉⵔⵉⵛ, ⵏⵏⴰ ⵔⴰⴷ ⵉⵜⵜⵓⴼⵙⴰⵔ ⴳ ⵜⵡⴰⵍⴰ ⵜⵉⵙⵙ 63 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ (7 ⵛⵓⵜⴰⵏⴱⵉⵔ - 9 ⴽⵟⵓⴱⵕ 2026), ⵙⵏⴰⵜ ⵜⵙⵏⵜⴰⵢⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵎⵉ ⵜⴳⴰ ⴰⵎⵉⵏⴰ ⴱⵓⵄⵢⵢⴰⵛ ⵜⴰⵏⵙⵙⵉⵅⴼⵜ ⵏⵏⵙ, ⴳ ⵜⵎⵙⴽⵉⵔⵉⵏ ⴷ ⵜⵙⵏⵜⴰⵢⵉⵏ ⵜⵉⵎⵓⴼⴰⵢⵉⵏ ⵏⵏⴰ ⵣⵎⵎⴻⵎⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ.

ⵣⴳ ⵜⵉⵔⵎⵉⵜⵉⵏ ⵏⵏⴰ ⵜⵙⵜⵉ ⵜⴰⵏⴰⴹⵜ ⴰⴷ, ⴰⴷ  ⵅⴼⵙⵏⵜ ⵉⵙⵙⵉⴷⴷ, ⴰⵎⵣⵉⵣⵣⵍ ⴰⵏⴰⵎⵓⵔ ⵏⵏⴰ ⵉⵙⵏⵜⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵏⵓⵡⴰⵏⴱⵉⵔ 2025 ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵏⵏⴰ ⵉⵙⵏⵢⵢⴰⵛⵏ  ⵜⵉⵎⵖⴰⵔⵉⵏ ⴷ ⵜⵛⵉⵔⵔⴰⵜⵉⵏ.

ⵉⴳⴰ ⵓⴽⴰⴱⴰⵕ ⴰⵏⴰⵎⵓⵔ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⵢⴰⵏ ⵣⴳ ⵉⴼⵔⴷⵉⵙ ⵓⵎⵣⵉⵣⵣⵍ ⴰⴷ, ⴰⵛⴽⵓ ⵜⴽⴽⴰ ⴷ ⵎⵏⵏⴰⵡ ⵜⵎⵏⴰⴹⵉⵏ ⵏ ⵜⴳⵍⴷⵉⵜ ⵙ 36 ⵏ ⵓⵙⵔⵙ ⴳ 12 ⵏ ⵜⵎⴷⵉⵏⵜ ⴷ 12 ⵏ ⵜⵎⵏⴰⴹⵜ ⴳ 16 ⵏ ⵡⴰⵙⵙ, ⵙ ⵉⵡⵜⵜⴰⵙⵏ ⵏ ⵓⵙⴼⵔⴽ ⵙ ⵉⵎⵉⵣⵉⵜⵏ ⵏ ⵜⴽⵕⴹⵉ ⵏⵏⴰ ⵜⵙⵙⵀⵡⵉⵏ ⵜⵉⴽⵏⵓⵍⵓⵊⵉⵜ ⴷ ⵓⵙⵙⵔⵇⴱ ⵏ ⵡⵓⵏⴳⵉⵙⵏ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵅⴼ ⵓⵙⴼⵔⴰⵢ.

ⵓⵔ ⵉⴱⴷⴷⵉ ⵓⵎⵣⵉⵣⵣⵍ  ⵖⴰⵙ ⵅⴼ ⵓⴽⴰⴱⴰⵕ, ⵎⴰⵛⴰ ⴰⵔ ⵉⵜⵜⴱⴷⴷⴰ ⴰⵡⴷ ⵅⴼ ⵓⵙⵏⵎⴰⵍⴰ ⵏ ⴽⵕⴰⴹ ⵉⵙⴼⵙⴰⵔ ⴳ ⵉⵙⴰⵔⴰⴳⵏ ⵉⴳⴷⵓⴷⴰⵏⵏ ⵉⵎⵇⵇⵔⴰⵏⵏ ⴳ ⵜⵎⴷⵉⵏⵜ ⵏ ⵕⵕⴱⴰⵟ, ⴷ ⵢⴰⵏ ⵓⴼⵙⴰⵔ ⵏ ⵓⵙⵉⴷⴷ ⵏⵏⴰ ⵉⴳⴰⵏ ⴰⵎⵣⵡⴰⵔⵓ ⵏⵏⴰ ⵉⵙⴰⵡⴰⵍⵏ ⵅⴼ ⵜⵙⵓⵎⵔⵜ ⵜⴰⵣⵔⴼⴰⵏⵜ, ⵏⵏⴰ ⵉⴳⴰⵏ ⴰⵎ ⵢⴰⵜ ⵣⴳ ⵜⵔⵎⵉⵜⵉⵏ ⵜⵉⵎⵏⵣⴰⵖ ⵏⵏⴰ ⴳ ⵜⵜⵓⵙⵙⵎⵔⵙ  ⵜⵉⴽⵏⵓⵍⵓⵊⵉⵜ ⵉ ⵓⵙⴼⵔⴽ ⵙ ⵜⵙⵓⵎⵔⵜ ⵜⴰⵣⵔⴼⴰⵏⵜ. ⵉⴽⴽⴰ ⵓⴼⵙⴰⵔ ⴰⴷ ⴳ ⵜⵎⵏⵉⴷⵜ  ⵏ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵉⵙⴷⵉⴽⵏ ⵅⴼ ⵡⵓⵏⴳⵉⵙⵏ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵎⴳⴰⵍ ⵏ ⵜⵉⵎⵖⴰⵔⵉⵏ ⴷ ⵜⵔⴱⴰⵜⵉⵏ. ⴰⵎ ⵓⵢⵏⵏⴰ ⵉⵙⵙⵎⵔⵙ ⵓⵙⵇⵇⵉⵎ ⴳ ⵓⵎⵣⵉⵣⵣⵍ ⵜⵉⵜⵉⵇⵏⵉⵢⵉⵏ ⵏ ⵜⵖⵉⵙⵜ ⵜⴰⵙⵎⴳⵔⵓⵜ ⵉ ⵡⴰⵍⴰⵙ ⵏ ⵓⵙⵎⵏⵉⴷ ⵏ ⵜⵓⴳⴳⵉⵡⵉⵏ ⵏ ⵡⵓⵏⴳⵉⵙⵏ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⵙ ⵉⵡⵔⵉⴽⵏ ⵉⵜⵜⵓⵙⴽⴰⵔⵏ ⵙ ⵓⵙⵙⴰⵔⵓ ⴰⵎⵓⵟⵟⵓⵏ.

ⵉⴷ ⵜⴰⵙⵏⵜⴰⵢⵜ ⵜⵉⵙⵙ ⵙⵏⴰⵜ ⵏⵏⴰ ⵜⵙⵙⵉⴷⴼ ⵜⴰⵏⴰⴹⵜ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴳ ⵜⵎⵙⴽⵉⵔⵉⵏ ⵜⵉⵎⵓⴼⴰⵢⵉⵏ, ⵜⵣⴷⵉ ⴷ ⵓⴹⴼⴼⵓⵕ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵉⵛⵉⵔⵔⴰⵏ ⴱⴰⵛ ⴰⴷ ⵙⵡⵊⴷⵏ ⵙ ⵉⵅⴼⴰⵡⵏ ⵏⵏⵙⵏ ⵢⴰⵜ ⵜⴰⵏⴰⴹⵜ ⵜⴰⵎⵙⴰⴷⴰⵖⵜ, ⴷⴰⵜ ⵏ ⵓⵙⵎⵏⵉⴷ ⵏⵏⵙ ⵉ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵉⵛⵉⵔⵔⴰⵏ. ⴰⵔ ⵉⵙⵎⴰⵜⴰⵔ ⵡⴰⵏⴰⵡ ⴰⴷ ⵏ ⵜⵙⵏⵜⴰⵢⵉⵏ, ⵜⵉⵔⴰⵜ ⵏ ⵜⴼⴽⵉ ⵏ ⵡⴰⵎⵎⴰⴽⵏ ⵉ ⵉⵛⵉⵔⵔⴰⵏ ⴷ ⵓⵙⵅⴰⵜⵔ ⵏ ⵜⴷⵔⴰⵡⵜ ⵏⵏⵙⵏ ⴳ ⵉⵎⴰⵙⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵜⵉⴽⴽⵉ ⵏ ⵢⴰⵏ ⵓⵙⴰⵢⵔⴰⵔ ⵉ ⵓⵡⵏⵏⵉ ⵅⴼ ⵜⴰⵏⵏⴰⵢⵉⵏ ⵏⵏⵙⵏ ⴷ ⵓⵙⵉⵜⴳ ⵏ ⵜⵉⵍⴰⵡⵜ ⵏ ⵉⵣⵔⴼⴰⵏ ⵏⵏⵙⵏ ⵙ ⵉⵅⴼⴰⵡⵏ ⵏⵏⵙⵏ ⵎⵏⵉⴷ ⵏ ⵜⵎⴰⴷⴷⴰⵙⵉⵏ ⵏ ⵜⵎⵜⵜⴰ  ⵜⵉⵥⵍⴰⵢⵉⵏ.

ⵜⵜⵓⵙⵉⴷⴼⵏⵜ ⵙⵏⴰⵜ ⵜⵙⵏⵜⴰⵢⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵢⴰⵏ ⵉⵎⵉⵔ ⵓⵙⵍⵉⴷ ⵣⴳ ⵜⴰⵏⴰⴹⵜ ⵏ ⴳⵓⵜⵉⵔⵉⵛ  ⵉ ⵓⵙⵎⵏⵉⴷ ⵏ ⵉⵣⵓⵔⴰⵜ ⵣⴳ ⵜⵙⵏⵜⴰⵢⵉⵏ ⴷ ⵜⵎⵙⴽⵉⵔⵉⵏ ⵜⵉⵎⵓⴼⴰⵢⵉⵏ ⵏⵏⴰ ⵙⵙⵎⵔⵙⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵙ ⵓⵎⵙⴰⵙⴰ ⴰⴽⴷ ⵜⴰⵏⴰⴹⵜ, ⵢⵉⵡⴹ ⵡⵓⵟⵟⵓⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵓⵖⵣⵉⵏⵉⵏ ⴳ ⵓⵎⴰⴹⴰⵍ 119 ⵏ ⵜⵎⵔⵙⵍⵜ ⴰⵔ ⵢⵓⵏⵢⵓ 2026, ⵣⴳ ⴷⵉⴽⵙⵏⵜ 91 ⵏ ⵜⵎⵔⵙⵍⵜ ⵢⵓⵎⵥⵏ ⴰⵙⵎⵉⵍ «ⴰ», ⵏⵏⴰ ⵉⵙⵎⴷⵏ ⵙ ⵜⴰⵍⵖⴰ ⵜⴰⵏⵎⴷⵓⵜ ⵉ ⵉⵎⵏⵣⴰⵢⵏ ⵏ ⴱⴰⵔⵉⵙ ⵉⵣⴷⵉⵏ ⴷ ⵜⵙⵉⵎⴰⵏⵜ ⴷ ⵜⵎⴰⴳⵓⵜ ⴷ ⵜⵍⵍⵓⴳⵏⴰ ⴷ ⵜⵕⵡⵉ. ⴰⵔ ⵉⵜⵜⴳⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⴳ ⵜⵎⵔⵙⴰⵍ ⵏⵏⴰ ⵢⴰⵎⵎⵓⵏ ⴳ ⵓⵙⵎⵉⵍ «ⴰ». ⴰⵔ ⵜⵙⵎⴰⵜⴰⵔ ⵜⴰⵏⴰⴹⵜ ⵎⴰⵙ  ⵜⵙⵓⵍ 28 ⵏ ⵜⵎⵔⵙⵍⵜ ⵢⴰⴹⵏⵉⵏ ⴳ ⵓⵙⵎⵉⵍ «ⴱ», ⵏⵏⴰ ⵉⵎⵎⴰⵍⵏ ⴰⵎⵙⴰⵙⴰ ⵓⵔ ⵉⵙⵎⵉⴷⵏ ⵉ ⵉⵎⵏⵣⴰⵢⵏ ⵏ ⴱⴰⵔⵉⵣ.

ⴰⵔ ⵜⵙⴷⴷⵉⴷ ⵜⴰⵏⴰⴹⵜ ⵎⴰⵙ ⵓⵔ ⵢⴰⴷ ⴷⴰ ⵜⵜⴳⴳⴰⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵖⴰⵙ ⵜⵉⵍⴰⵍⵜ ⵜⴰⵎⵛⴰⵡⴰⵕⵜ, ⵎⴰⵛⴰ ⴰⵖⵓⵍⵏⵜ ⴰⵔ ⵜⵜⴳⴳⴰⵏⵜ ⴰⵡⴷ ⵜⵉⵍⴰⵍ ⵜⵉⴷⵙⵍⴰⵏⵉⵏ ⴳ ⵎⵏⵏⴰⵡ ⵏ ⵜⵙⵓⵎⴰⵔ ⵉⵣⴷⵉⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ. ⵣⴳ ⵜⵉⵍⴰⵍ ⴰⴷ, ⵜⵉⴹⴰⴼ ⵏ ⵡⴰⵏⵙⵉⵡⵏ ⵏ ⵡⴰⵎⵎⴰⵥ ⴷ ⵜⴼⴰⵜⵉⵜ ⵣⴳ ⵜⵍⴻⵍⵍⵉ ⴷ ⵡⴰⵔⴰⵢ ⵣⴳ ⵓⵙⵔⴼⵓⴼⵏ, ⴷ ⵜⵏⵥⵉ ⵏ ⵉⵙⵜⴰⵢⵏ ⴷ ⵓⴼⵔⴰⴳ ⵏ ⵉⵙⵎⵉⵍⵏ ⵉⵎⴷⵍⵉⴼⴰⵏ ⴳ ⵜⵎⵀⴰⵍ ⵏ ⵉⵙⵜⴰⵢⵏ, ⴰⵡⴷ ⴰⵎⵣⴰⵖ ⵅⴼ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵉⵎⵣⵡⴰⴳⵏ ⴷ ⵡⵓⴳⴳⵉⴷⵏ ⴳ ⵡⴰⴷⴷⴰⴷ ⵏ ⵓⵄⴹⵓⴱⵓ. ⴰⵎ ⵓⵢⵏⵏⴰ  ⴷⴰ ⵜⵜⴰⵡⴹⵏ ⵉⴳⵔⴰⵏ ⵏ ⵜⴽⵛⵛⵓⵎⵉⵏ ⵏⵏⵙⵏⵜ  ⵖⵔ  ⵜⵉⵔⵎⵉⵜⵉⵏ ⵏ ⵓⴹⴼⴼⵓⵕ ⵏ ⵉⵙⴷⴰⵡⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵓⵙⵏⵎ ⵏ ⵉⵎⴰⴷⴰⵍⵏ ⵏ ⵡⵓⵏⴳⵉⵙⵏ ⵏ ⵜⵕⵥⵉⵡⵉⵏ, ⴷ ⵓⵙⵇⵙⵉ ⵏ ⵜⵎⵙⵙⵓⵔⵉⵏ ⴳ ⵢⵉⴳⵔ ⵏ ⵜⵡⵓⵔⵉⵡⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵎⵣⴰⵖ ⵅⴼ ⵓⵣⵔⴼ ⴳ ⵜⵡⵏⵏⴰⴹⵜ ⵉⵖⵓⴷⴰⵏ.

ⴰⵔ ⵜⵜⴰⵏⵏⴰⵢ ⵜⴰⵏⴰⴹⵜ ⵎⴰⵙ ⴰⵖⵓⵍⵏⵜ ⵜⵉⵍⴰⵍ ⴰⴷ ⴳⴰⵏⵜ ⵜⵉⴷⵙⵍⴰⵏⵉ ⵉ ⵓⵙⵓⵖⵍ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵖⵔ ⵜⵙⵔⵜⴰⵢ ⴷ ⵜⵖⴰⵔⴰⵙⵉⵏ ⴷ ⵜⵎⵙⴽⵉⵔⵉⵏ ⵢⵉⴽⵎⴰⵎⵉⵏ ⴳ ⵓⵙⵡⵉⵔ ⴰⵏⴰⵎⵓⵔ.

ⴳ ⵓⵎⵏⴰⴹ ⴰⴷ, ⴰⵔ ⵉⵙⵏⵄⴰⵜ ⵓⵙⵉⴷⴼ ⵏ ⵙⵏⴰⵜ ⵜⵉⵔⵎⵉⵜⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵙⴽⵉⵔⵉⵏ ⵜⵉⵎⵓⴼⴰⵢⵉⵏ ⴳ ⵓⵎⴰⴹⴰⵍ, ⴰⵎ ⵢⴰⵜ ⵜⵓⵙⵏⵜ ⵙ ⵜⵎⵖⵔⵜ ⵏ ⵜⵙⵏⵜⴰⵢⵉⵏ ⵏⵏⴰ ⵉⵙⵏⵜⵉ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵜⴰⵎⵓⵟⵟⵓⵏⵜ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵉⵛⵉⵔⵔⴰⵏ ⴳ ⵓⵏⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴰⵔ ⴷ ⵜⵜⴷⴷⵓ ⵜⴰⵏⴰⴹⵜ ⴰⴷ ⵏ ⵜⵎⵜⵜⴰ ⴳ ⵓⵙⴰⵜⵉ ⵏ ⵓⵣⵣⴳⵉⵔ ⵏ ⵓⵖⵜⴰⵙ ⵉⴼⴼⵖⵏ ⵣⴳ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵎⵉ ⵉⵖⵔⴰ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵙⵡⵊⴷ ⵏ  ⵢⴰⵜ ⵜⴰⵏⴰⴹⵜ ⵜⴰⵙⴳⴳⵯⵙⴰⵏⵜ ⵅⴼ ⵜⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.