ⵉⵍⴰⵖⴰ ⵡⴰⵎⵎⴰⵙ ⵏ ⵉⵥⵥⵍⵎⴹ ⴷ ⵉⴼⴼⵓⵙ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴰⵙⵙ ⵏ ⵓⵙⵉⵎⵡⴰⵙ 16 ⵉⵏⵏⴰⵢⵔ 2024 ⴳ ⵍⵉⵛⴱⵓⵏⴰ (ⵍⴱⵓⵔⵜⵓⵖⴰⵍ) ⵅⴼ ⵜⵓⴽⴽⵉ ⵏ ⵜⵙⵎⵖⵓⵔⵜ ⵏ ⵉⵥⵥⵍⵎⴹ ⴷ ⵉⴼⴼⵓⵙ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, "ⵙ ⵓⵙⵓⵜⴳ ⵏ ⵜⴷⵔⴰⵡⵜ ⵏⵏⵙ ⵉⴼⴰⵡⵏ ⴳ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙⵏ".

ⵉⴷⴷⵓ ⴷ ⵓⵙⵜⴰⵢ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ ⴰⴷ ⵜⴰⵡⵉ ⵜⴰⵙⵎⵖⵓⵔⵜ ⴰⴷ ⵅⴼ "ⵜⵡⵓⵔⵉ ⵏⵏⵙ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵙⴰⵙⴰ ⵏⴳⵔ ⵜⴰⴳⴳⴰⵢⵉⵏ ⴷ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵓⵙⵡⵉⵔ ⴰⵏⴰⵎⵓⵔ (ⵍⵎⵖⵔⵉⴱ) ⴷ ⵓⵎⵏⵥⴰⵡ (ⴰⴼⵔⵉⵇⵢⴰ) ", ⵎⴰⵢⴰ ⴷ ⴰⴷ ⵉⵏⵏⴰ ⵓⵙⵉⵡⴹ ⵏ ⵜⵓⴽⴽⵉ ⵏ ⵜⵙⵎⵖⵓⵔⵜ.

ⵜⴰⵍⵍⵖ ⵜⵙⵇⵇⵉⵎⵜ ⵏ ⵜⵙⵎⵖⵓⵔⵜ, ⵙ ⵓⵎⵙⴰⵙⴰ ⴷ ⵓⵙⵉⵡⴹ, ⵙ ⵓⵎⵣⴰⵖ ⵏ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⵣⵔⴼ ⵏ ⵜⵓⴷⵔⵜ ⴷ ⵓⵏⵄⴰⵕ ⵏⵏⵙ ⵉⵅⴰⵜⴰⵔⵏ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵓⵍⴰ ⵜⵓⴳⴳⴰⵣ ⵏⵏⵙ ⴳ ⵓⵙⴷⵓⵙ ⵏ ⵜⵡⵓⵔⵉ ⴷ ⵜⵉⵍⴰⵍ ⵏ ⵡⴰⵎⵓⵏ ⵓⵖⵔⵉⵎ ⴳ ⵜⵎⵏⴰⴹⵜ ⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ. ⵜⴰⵍⵍⵖ ⵜⵙⵇⵇⵉⵎⵜ ⵙ ⵜⵓⴳⴳⴰⵣ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏ ⵉⵥⵥⵍⵎⴹ-ⵉⴼⴼⵓⵙ, ⵙ ⵓⵙⵏⴰⵍ ⵅⴼ ⵜⵉⵏⴷⵉⵜⵉⵏ ⵏ ⵜⴷⵉⵎⵓⵇⵕⴰⵟⵉⵜ ⵉⵛⵛⴰⵕⵏ, ⴰⴷ ⵉⵏⵏⴰ ⵓⵙⵉⵡⴹ.

ⵜⴳ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵎⵖⴰⵔⵜ ⵜⴰⵎⵖⵔⵉⴱⵉⵜ ⵜⴰⵎⵣⵡⴰⵔⵓⵜ ⴷ ⵡⵓⴷⵎ ⵡⵉⵙⵙ ⴽⵕⴰⴹ ⵏ ⵍⵎⵖⵔⴰⴱ ⵍⵍⵉ ⵢⵓⵡⵉⵏ ⵜⴰⵙⵎⵖⵓⵔⵜ ⵏ ⵉⵥⵥⵍⵎⴹ - ⵉⴼⴼⵓⵙ, ⴷⴼⴼⵉⵔ ⵏ ⵎⴰⵙⵙ ⵄⴱⴷ ⵕⵕⵃⵎⴰⵏ ⵍⵢⵓⵙⴼⵉ, ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ, ⵍⵍⵉ ⵉⴳⴰⵏ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵏ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 1999, ⴷ ⵓⵎⵛⵛⵉⵡⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙⵙ ⴰⵏⴷⵔⵉ ⴰⵥⵓⵍⴰⵢ ⴳ ⵓⵙⴳⴳⵯⴰⵙ ⵏ 2014.

ⵜⵜⵡⴰⴼⴽⴰ ⵜⵙⵎⵖⵓⵔⵜ ⴰⴷ ⴳ ⵜⵙⵓⵜⵍⵉⵏ ⵏⵏⵙ ⵉⵣⵔⵉⵏ ⵉ ⵡⵓⴷⵎⴰⵡⵏ ⵢⴰⵜⵜⵓⵢⵏ ⴳ ⵍⵍⴰⵏ ⵉⵏⵙⵙⵉⵅⴼⵏ ⵏ ⵉⵡⴰⵏⴽⵏ ⴷ ⵉⵎⵙⵜⴳⴳⴰⵔⵏ ⴰⵜⵜⵢⵏⵉⵏ (ⵅⵓⵔⵅⵉ ⵙⴰⵎⴱⴰⵢⵓ, ⴰⵏⵙⵙⵉⵅⴼ ⴰⵎⵣⵡⴰⵔ ⵏ ⴱⵓⵔⵜⵓⵖⴰⵍ ⴷ ⵓⴳⵏⵙⴰⵙ ⴰⵏⴰⴼⵍⵍⴰ ⵏ ⵜⵎⵜⵜⴰ ⵉⵎⵓⵏⵏ ⵏ ⵜⴰⴹⴰ ⵏ ⵜⵖⵔⵎⵉⵡⵉⵏ, ⵜⴰⴳⵍⵍⵉⴷⵜ ⵕⴰⵏⵢⴰ (ⵍⵓⵕⴹⵓⵏ), ⵍⵡⵉⵙ ⵉⵏⴰⵙⵢⵓ ⵍⵓⵍⴰ ⴷⴰ ⵙⵉⵍⴼⴰ (ⴰⵏⵙⵙⵉⵅⴼ ⵡⵉⵙ 35 ⵏ ⵍⴱⵕⴰⵣⵉⵍ), ⴱⵓⵔⵉⵙ ⵜⴰⴷⵉⵜⵛ, ⴰⵏⵙⵙⵉⵅⴼ ⴰⵎⵣⵡⴰⵔ ⵏ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ, ⵎⴰⵔⵉ ⵕⵓⴱⵉⵏⵙⵓⵏ, ⵜⴰⵏⵙⵙⵉⵅⴼⵜ ⵜⵎⵣⵡⴰⵔⵜ ⵏ ⵉⵕⵍⴰⵏⴷⴰ... ⵢⴰⵎⵓ ⴳ ⵜⵍⴳⴰⵎⵜ ⵏ ⵡⵉⵏⵏⴰ ⵢⵉⵡⵉⵏ ⵜⴰⵙⵎⵖⵓⵔⵜ ⵓⵏⴼⵍⵓⵙ ⴰⵎⴰⵜⴰⵢ ⵡⵉⵙ ⵙⴰ ⵏ ⵜⵎⵜⵜⴰ ⵉⵎⵓⵏⵏ, ⴽⵓⴼⵉ ⵄⴰⵏⴰⵏ, ⴷ ⵙⵓⵣⴰⵏ ⵊⴱⴱⵓⵔ, ⵜⴰⵏⵙⵙⵉⵅⴼⵜ ⵜⴰⵖⵓⵍⴰⵏⵜ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ.

ⵉⵇⵇⴰⵏⴷ ⴰⴷ ⵏⵙⵙⴽⵜⵉ ⵎⴰⵙ ⴷⴰ ⵜⵜⵓⴼⴽⴰ ⵜⵙⵎⵖⵓⵔⵜ ⵏ ⵉⵥⵥⵍⵎⴹ-ⵉⴼⴼⵓⵙ ⴽⵓ ⴰⵙⴳⴳⵯⴰⵙ ⵙⴳ ⵓⵙⴳⴳⵯⴰⵙ ⵏ 1995 ⵉ ⵙⵉⵏ ⵉⵎⵙⵜⴳⴳⴰⵔⵏ (ⵓⴷⵎⴰⵡⵏ, ⵉⵎⵖⵏⴰⵙⵏ ⴷ ⵉⵎⴳⴳⴰⵢⵏ, ⵏⵖⴷ ⵜⵉⵎⴰⴷⴷⴰⵙⵉⵏ) ⵏⵏⴰ ⴷⴰⵔ ⴰⴷⵡⴰⵍ ⴷ  ⴰⵙⵓⵖⵏ ⴰⵎⴰⴷⵓⵙ ⴷ ⵓⵙⵍⵉⴷ  ⴳ ⵓⵙⴷⵓⵙ ⵏ ⵜⴱⴷⴰⴷⵜ ⴷ ⵓⵎⵢⴰⵡⴰⵙ ⵉⵏⴳⵔ ⵉⵥⵥⵍⵎⴹ ⴷ ⵉⴼⴼⵓⵙ.