ⵜⵙⴳⵎⴹ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵎⵕⵕⴰⴽⵛ-ⴰⵙⴼⵉ, ⴰⵙⵙ ⵏ ⵓⴽⵡⴰⵙ 7 ⵉⴱⵔⵉⵔ 2022, ⵜⴰⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵜⴰⵢⵢⴰⵡⵜ ⴰⴽⴷ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵎⵕⵕⴰⴽⵛ, ⵜⵙⵡⵓⵜⵜⵙ ⵜⴰⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵙⵔ ⵏ ⵜⵓⵙⵙⵏⴰ ⵏⵏⵙ ⵖ ⴷⴰⵔ ⵜⵙⵓⵜⵉⵏ ⵏ ⵉⵎⴰⵍ.

ⵜⵙⵡⵓⵜⵜⵙ ⵜⵎⵢⴰⵇⵇⴰⵏⵜ ⴰⴷ ⵜⴰⵢⵢⴰⵡⵜ ⵏⵏⴰ ⵉⵙⴳⵎⴹ ⵎⴰⵙⵙ ⵎⵓⵃⵎⵎⴰⴷ ⵎⵚⵟⴰⴼⴰ ⵍⵄⵕⵉⵚⴰ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵎⵕⵕⴰⴽⵛ-ⴰⵙⴼⵉ, ⴷ ⵎⴰⵙⵙⴰ ⵅⴰⴷⵉⵊⴰ ⵍⵃⴰⵔⵉⵔⵉ, ⵜⴰⵏⵎⵀⴰⵍⵜ ⵏ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵎⵕⵕⴰⴽⵛ, ⴰⵎⵔⴰⵔⴰ ⵏ ⵜⵉⵔⵎⵉⵜⵉⵏ ⵉⵏⴳⵔ ⵜⴼⵓⵍⵉⵏ ⵙ ⵙⵏⴰⵜ ⴰⴼⴰⴷ ⴰⴷ ⵜⵜⵓⵙⴷⵓⵙⵏⵜ ⵜⵉⵏⴷⵉⵜⵉⵏ ⵏ ⵜⵎⵓⵔⵉ, ⵉⴱⵓⵖⵍⵓ ⵓⵙⵡⵉⵏⴳⵎ ⴳ ⵢⵉⴳⵔ ⵏ ⵜⵎⵓⵔⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ; ⴰⵙⵔⵇⴱ ⵏ ⵇⴰⵃ ⵜⵙⵏⵜⴰⵢ ⵙⵡⵓⵜⵜⵙⵏⵉⵏ ⵜⴰⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵡⵓⵔⵉ ⵏ ⵓⴱⴰⵔⴰⵣ ⵙⵔⵙ ⵉⵥⵍⵉⵏ ⴳ ⵓⴳⵏⵙ ⵏ ⵓⵙⴰⵢⵔⴰⵔ ⵏ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵎⵕⵕⴰⴽⵛ; ⴷ ⵓⵍⴰ ⵜⴰⴷⵔⴰⵡⵜ ⴳ ⵓⵙⵔⵓⵙ ⵏ ⵉⵙⴰⴽⴰⵜⵏ ⵏ ⵓⵙⵎⵓⵜⵜⴳ ⵙⵎⵓⵏⵏⵉⵏ ⵉⵏⴳⵔ ⵎⴰⴷ ⵉⴳⴰⵏ ⵉⵎⵉⵥⵉⵕ ⴷ ⵓⵙⵏⵉⵙ ⴳ ⵢⵉⴳⵔ ⵏ ⵜⵎⵓⵔⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴳⴳⴰⵔ.

ⵙ ⵜⵎⵍⴷⴰ ⴰⴷ, ⵉⵙⴷⴷⵉⴷ ⵎⴰⵙⵙ ⵍⵄⵕⵉⵚⴰ ⵎⴰⵙ "ⵜⵙⵡⵓⵜⵜⵙ ⵜⵎⴷⵔⴰⵡⵜ ⴰⴷ ⴰⵙⵕⵚⵚⴰ ⵏ ⵉⵎⴰⵙⵙⵏ ⵉⵎⵔⵙⴰⵍⵏ ⵉ ⵓⵎⵢⴰⵡⴰⵙ ⴷ ⵓⵣⴷⴰⵢ ⴰⴽⴷ ⵜⵓⴳⵜ ⵏ ⵜⵎⵔⵙⴰⵍ ⵜⵉⵏⵎⵍⴰⵏⵉⵏ ⴰⴼⴰⴷ ⴰⴷ ⵜⴻⵜⵜⵓⵙⴷⵓⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷⴰⵔ ⵉⵎⵃⴹⴰⵕⵏ ⴷ ⵜⵙⵓⵜⵉⵏ ⵏ ⵉⵎⴰⵍ", ⵉⵙⵙⵎⵜⵔ ⵙ ⵜⵉⵍⴰⵍⵜ ⵜⴰⵎⵇⵇⵔⴰⵏⵜ ⵏⵏⴰ ⵜⵜⵓⵔⴰⵔ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵎⴰⴷ ⵉⵥⵍⵉⵏ ⵙ ⵓⵙⵎⵓⵜⵜⴳ ⵙ ⵓⵙⴷⵓⵙ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵏⴷⵉⵜⵉⵏ ⵏ ⵜⵎⵓⵔⵉ ⴷⴰⵔ ⵉⵙⵍⵎⴰⴷⵏ ⵏ ⵉⵎⴰⵍ.

ⵙⴳ ⵜⵙⴳⴰ ⵏⵏⵙ, ⵜⵙⴱⵔⵔⴽ ⵎⴰⵙⵙⴰ ⵍⵃⴰⵔⵉⵔⵉ ⵙ ⵜⵎⴷⵔⴰⵡⵜ ⵜⴰⵎⵓⴼⴰⵢⵜ ⵏⵏⴰ ⵉⵣⴷⵉⵏ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵎⵕⵕⴰⴽⵛ ⴷ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵎⵕⵕⴰⴽⵛ-ⴰⵙⴼⵉ, ⵏⵏⴰ ⵉⴼⴰⵡⵏ ⵙ ⵓⵎⴰⵜⴰ ⴳ ⵓⵙⵔⵓⵙ ⵏ ⵓⵙⴳⵔⴰⵡ ⴰⵙⴳⵎⴰⵏ ⵥⵍⵉⵏⵉⵏ ⵙ ⵓⵙⴷⵓⵙ ⵏ ⵜⵓⵙⵙⵏⴰ ⵏ ⵜⵎⵓⵔⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ, ⵜⵉⵏⵉ ⵎⴰⵙ ⵔⴰⴷ ⵜⴰⵡⵙ ⵜⵎⵢⴰⵇⵇⴰⵏⵜ ⴰⴷ ⴳ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵙⵍⵎⴰⴷⵏ ⵉⵎⴰⵏⵓⵏⵏ ⵅⴼ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵓⵔⵉ ⴷ ⵓⵙⵎⴰⵜⵜⵉ ⵏ ⵜⵉⵏⴷⵉⵜⵉⵏ ⴰⴷ ⵉ ⵜⵙⵓⵜⵉⵏ ⵏ ⵉⵎⴰⵍ.

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵢⴰⵎⵓ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⴰⴷ ⵜⴰⵢⵢⴰⵡⵜ ⴳ ⵓⵙⴰⵜⵉ ⵏ ⵓⵙⵎⵀⵍ ⵏ ⵉⵙⵓⵖⴰⴷ ⵏ ⵜⵎⵢⴰⵇⵇⴰⵏⵜ ⵏ ⵓⵙⴰⵜⵉ ⵏⵏⴰ ⵉⵜⵜⵓⵙⴷⵖⵉⵏ ⴰⴽⴷ ⵜⵙⴷⴰⵡⵉⵜ ⵍⵇⴰⴹⵉ ⵄⵢⵢⴰⴹ ⴳ ⴽⵟⵓⴱⵕ 2020 ⴷ ⵜⵎⵢⴰⵇⵇⴰⵏⵜ ⵏ ⵓⵙⴰⵜⵉ ⵉⵜⵜⵓⵙⴳⵎⴹⵏ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵍⵎⴷ ⴰⵏⴰⴼⵍⵍⴰ ⴳ ⴷⵓⵊⴰⵏⴱⵉⵔ 2020.