ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ, ⴰⵙⵙ ⵏ ⵓⴽⵕⴰⵙ 30 ⵎⴰⵕⵚ 2022 ⴳ ⵟⴰⵏⵊⴰ, ⵙ ⵜⵎⴷⵔⴰⵡⵜ ⴰⴽⴷ ⵜⵙⵏⵓⵔⴰⵢⵜ ⵜⴰⴱⵍⵊⵉⴽⵉⵜ ⵉ ⵓⵎⵢⴰⵡⴰⵙ (ENABEL), ⵢⴰⵜ ⵜⵙⵇⵇⴰⵢⵎⵓⵜ ⵅⴼ ⵉⵎⵔⵙⵉ: "ⴰⵣⵔⴼ ⵏ ⵉⴱⵕⵕⴰⵏⵉⵢⵏ ⴳ ⵓⵙⵉⴷⴼ ⵙ ⵜⵡⵓⵔⵉ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ". ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵙ ⵜⵎⵍⴷⴰ ⴰⴷ, ⵜⵙⵙⴽⵜⵉ ⵎⴰⵙⵙⴰ ⵙⴰⵍⵎⴰ ⵟⵟⵓⴷ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ, ⵙ ⵜⵥⵍⴰⵢⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⴳⴰⵏ ⵜⵉⵎⵔⵙⵍⵜ ⵜⴰⵎⴳⴳⴰⵢⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ, ⴰⵎ ⵜⵉⵎⵙⴰⵔⵉⵏ ⵣⴷⵉⵏⵉⵏ ⵙ ⵜⵎⵣⵡⴰⴳⵜ ⴷ ⵓⵣⵡⴰⴳ, ⵜⵉⵏⵉ ⵎⴰⵙ ⴷⴰ ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵓⴹⴼⴼⵓⵕ ⵏ ⵓⵙⵎⵀⵍ ⵏ ⵉⵡⵜⵜⴰⵙⵏ ⴷ ⵉⵙⵓⵖⴰⴷ ⵏ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⴳ ⵢⵉⴳⵔ ⵏ ⵜⵎⵣⵡⴰⴳⵜ ⴷ ⵜⵓⵔⴳⵙⴰ ⵙ ⵓⵎⵙⴰⵙⴰ ⴰⴽⴷ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ.

ⴳ ⵎⴰⴷ ⵉⵥⵍⵉⵏ ⵙ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵜⵎⵣⵡⴰⴳⵜ, ⵜⵙⵙⵎⵜⵔ ⵎⴰⵙⵙⴰ ⵙⴰⵍⵎⴰ ⵟⵟⵓⴷ ⵎⴰⵙ ⵉⵙⵖⵣⵏ ⵍⵎⵖⵔⵉⴱ ⵜⵉⵎⵢⴰⵇⵇⴰⵏⵉⵏ ⵜⵉⴷⵙⵍⴰⵏⵉⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵓⵎⴰⵕ ⵜⴰⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵇⴰⵃ ⵉⵎⵙⵡⵓⵔⵉⵢⵏ ⵉⵎⵣⵡⴰⴳⵏ ⴷ ⵓⴼⵔⵉⴷⵏ ⵏ ⵜⵡⵊⵉⵡⵉⵏ ⵏⵏⵙⵏ ⴷ ⵜⵎⵢⴰⵇⵇⴰⵏⵉⵏ ⵏ ⵜⵎⴰⴷⴷⴰⵙⵜ ⵏ ⵜⵡⵓⵔⵉ ⵓⵟⵟⵓⵏ 97 ⴷ 143, ⴷ ⵓⵍⴰ ⴰⵙⵖⵣⵏ ⵏ ⵍⵎⵖⵔⵉⴱ ⵉ ⵓⵎⵉⵔⵓ ⴰⵎⴰⴹⵍⴰⵏ ⵏ ⵜⵣⵡⴰⴳⵜ ⵜⴰⵎⵏⴼⵔⵓⵜ ⴷ ⵜⵎⵙⵙⵓⴷⵙⵜ ⴷ ⵜⵍⵓⴳⴰⵏⵜ ⴳ 11 ⴷⵓⵊⴰⵏⴱⵉⵔ 2018 ⴳ ⵎⵕⵕⴰⴽⵛ.

ⴳ ⵓⵙⵡⵉⵔ ⵏ ⵉⴹⵕⵉⵙⵏ ⵓⵍⴳⵉⵏⵏ ⵉⵏⴰⵎⵓⵔⵏ, ⵜⵙⵙⴼⴰⵡ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵎⴰⵙ ⵉⵙⴳⴷⵍ ⵓⴷⵓⵙⵜⵓⵔ ⵇⴰⵃ ⴰⵏⴰⵡⵏ ⵏ ⵓⵙⵏⵓⵃⵢⵓ, ⵉⵙⴹⵕⵚ ⴳ ⵓⵎⴰⴳⵔⴰⴷ 30 ⵎⴰⵙ ⴷⴰ ⵜⵜⴼⵊⵊⵉⵊⵏ ⵉⴱⵕⵕⴰⵏⵉⵢⵏ ⵙ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ ⵉⵜⵜⵡⴰⵙⵙⵏ ⵉ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ, ⵜⵔⵏⵓ ⵎⴰⵙ ⴷ ⵢⵓⵡⵉ ⵓⵙⵍⴳⵏ ⵏ ⵜⵡⵓⵔⵉ ⵅⴼ ⵡⴰⵔ ⴰⵙⵏⵓⵃⵢⵓ ⴷ ⵡⴰⵔ ⵜⵕⵥⵉ ⵏ ⵓⵎⵏⵣⴰⵢ ⵏ ⵓⵏⴳⵉⴷⴷⵉ ⵏ ⵉⵣⵎⴰⵣ ⴰⴼⴰⴷ ⴰⴷ ⵜⵉⵍⵉ ⵜⵏⴼⵔⵓⵜ ⵏ ⵉⵙⴽⵉⵍ ⴳ ⵉⵣⵔⴼⴰⵏ ⵉⴷⵎⵙⴰⵏ ⴷ ⵉⵏⴰⵎⵓⵏ ⵉ ⵉⵎⵙⵡⵓⵔⵉⵢⵏ ⵉⵎⵖⵔⵉⴱⵉⵏ ⴷ ⵉⴱⵕⵕⴰⵏⵉⵢⵏ, ⵜⵙⵙⴼⴰⵡ ⵏⵉⵜ ⴷⴰⵖ ⵉⵎⵓⴽⵔⵉⵙⵏ ⵏⵏⴰ ⵙⵓⵍⵏⵏⵉⵏ ⴳ ⴽⵔⴰ ⵏ ⵜⵎⵜⵜⴰⵡⵉⵏ ⵏ ⵓⵙⵍⴳⵏ ⴰⴷ, ⵉⴷⴷⵖ ⴷⴰ ⵉⵙⵙⵓⵖⵏ ⵜⵉⵍⵉⵜ ⵏ ⵜⴼⴰⴷⴰ ⵏ ⵜⵖⵍⴰⵏⵜ ⵜⴰⵎⵖⵔⵉⴱⵉⵜ, ⵎⴰⵢⴰ ⵏⵏ ⵉⴳⴰ ⵏⵉⵜ ⴰⵙⵏⵓⵃⵢⵓ ⵎⴳⴰⵍ ⵉⴱⵕⵕⴰⵏⵉⵢⵏ.

ⵙ ⵓⵎⵢⴰⵙⵙⴰ ⴰⴽⴷ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⵎⵣⵡⴰⴳⵜ ⴷ ⵓⵣⵡⴰⴳ, ⵜⵙⵙⴼⴰⵡ ⵜⴳⵏⵙⴰⵙⵜ ⵏ ⵜⵙⵏⵓⵔⴰⵢⵜ ⵜⴰⴱⵍⵊⵉⴽⵉⵜ ⵉ ⵓⵎⵢⴰⵡⴰⵙ, ⵎⴰⵙⵙⴰ ⴰⵍⵉⴽⵙⴰⵏⴷⵔⴰ ⴼⴰⵔⵙⴽⵓ, ⵎⴰⵙ ⵜⵙⵡⵓⵜⵜⵙ ⵜⵙⵏⵓⵔⴰⵢⵜ ⴰⵙⴷⵓⵙ ⵏ ⵓⵏⵎⵢⴰⴼⴰ ⵉⵏⴳⵔ ⵜⵓⴳⵜ ⵏ ⵉⵎⴳⴳⴰⵢⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵏⵎⵏⴰⴹ ⴷ ⵓⴷⵖⴰⵔⴰⵏ ⵃⵎⴰ ⴰⴷ ⵉⵎⵓⵔⵙ ⵓⵙⵎⵀⵍ ⴷ ⵓⵣⵣⴳⵉⵔ ⵏ ⵉⵡⵜⵜⴰⵙ ⵏⵏⵙ ⵉⵙⵡⵓⵜⵜⵙⵏ ⵜⴰⵏⴼⵔⵓⵜ ⵏ ⵓⴼⵊⵊⵉⵊ ⵏ ⵉⵎⵣⵡⴰⴳⵏ ⴷ ⵉⵎⵔⴳⵓⵙⵏ ⵙ ⵉⵣⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ.

ⵜⵔⵏⵓ ⵜⵎⵙⵙⵉⵡⵍⵜ ⴰⴷ ⵏⵉⵜ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵓⵙⵓⵜⴳ ⵏ ⵜⵉⵔⵎⵉⵜⵉⵏ ⵛⵛⴰⵕⵏⵉⵏ ⴷ ⵓⵙⵉⴷⴷ ⵅⴼ ⵜⵓⴳⵜ ⵏ ⵜⵙⵏⵜⴰⵢⵉⵏ ⴳ ⵢⵉⴳⵔ ⵏ ⵓⵙⵉⴷⴼ ⴰⴷⵎⵙⴰⵏ ⵏ ⵉⵎⵣⵡⴰⴳⵏ, ⴷ ⵉⴱⴷⴷⵉ ⵅⴼ ⵜⵉⵍⴰⵡⵜ ⵏ ⵓⵙⵡⵓⵔⵉ ⵏⵏⵙⵏ ⴷ ⵓⵙⵡⵜⵜⵓ ⵏ ⵉⵣⴰⴽⴰⵏ ⵏⵏⴰ ⵉⵙⵡⵓⵜⵜⵓⵏ ⴰⵙⵉⴷⴼ ⵏⵏⵙⵏ ⵙ ⵜⵡⵓⵔⵉ, ⴳ ⵓⵎⵏⵉⴷ ⵏ ⵜⵙⵉⵍⴰⵡⵜ ⵏ ⵉⵙⵖⵍⴰⴼ ⵓⵎⵀⵉⵍⵏ ⵅⴼ ⵓⵙⴱⵓⵖⵍⵓ ⵏ ⵉⵙⵓⵔⵙⵏ ⵏⵏⵙⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏⵏⵉ ⴰⵙⵏ ⵉⵙⵙⵡⵀⴰⵏⵏ ⴰⵙⵉⴷⴼ ⴰⵎⵢⴰⴳⴰⵏ ⴳ ⵡⴰⵎⵓⵏ ⴰⵎⵖⵔⵉⴱⵉ.

ⵜⴻⵜⵜⵡⴰⵙⵙⵏ ⴰⵡⴷ ⵜⵉⵏⴰⵡⵜ ⴰⴷ ⵙ ⵜⵎⴷⵔⴰⵡⵜ ⵏ ⵉⴳⵏⵙⴰⵙ ⵅⴼ ⵜⴳⵏⵙⴰⵙⵜ ⵜⴰⵎⴰⵜⵜⴰⵢⵜ ⵏ ⵜⵖⴰⵡⵙⵉⵡⵉⵏ ⵏ ⵉⵎⵔⴳⵓⵙⵏ ⴷ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵜⵎⵣⵡⴰⴳⵜ ⴷ ⵜⵎⵔⵙⴰⵍ ⵜⵓⵏⴱⵉⴹⵉⵏ ⴷ ⵜⴳⵔⴰⵡⵉⵏ ⵜⵉⵏⴰⵎⵓⵔⵉⵏ, ⴷ ⵓⵍⴰ ⵜⵉⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵣⵓⵏⵉ ⵜⵓⵙⵍⵉⴳⵜ ⴷ ⵉⵙⵍⵎⴰⴷⵏ ⵉⵎⵔⵣⵓⵜⵏ ⴷ ⵉⵏⵖⵎⴰⵙⵏ .