ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵎⵓⵙⵙⵓⵜⵏ ⵏ ⵜⴳⴳⵓⵔⴰ ⵉⵕⵥⵎⵏ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵏⵏⵉ ⵉⵜⵜⵓⵙⵏⵎⴰⵍⴰⵏ ⵙⴳ 17 ⴰⵔ 21 ⵎⴰⵢⵢⵓ 2023 ⴳ ⵜⵖⵔⵎⵜ ⵏ ⴼⴰⵙ, ⵙ ⵢⴰⵏ ⵓⵙⴰⵢⵔⴰⵔ ⵉⵛⵛⴰⵕⵏ ⵉⵏⴳⵔ ⵓⵙⵇⵇⵉⵎ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵎⴰⵢⴰ ⵏⵏ ⴳ ⵓⵙⴰⵜⵉ ⵏ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ ⴳ ⵢⵉⴳⵔ ⵏ ⵓⵙⵎⵓⵜⵜⴳ ⴷ ⵓⵙⴷⵓⵙ ⴷ ⵓⵔⵣⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵖⵏⵜ ⵏ ⵜⵏⴼⵔⵓⵜ ⵏⵏⵉ ⵉⵜⵜⵓⵙⴳⵎⴹⵏ ⴳ 14 ⵛⵓⵜⴰⵏⴱⵉⵔ 2022.
ⴳ "ⵓⵙⴰⵢⵔⴰⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵉⵛⵛⴰⵕⵏ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ, ⵜⵜⵓⵙⵏⵓⴱⴳⵏ ⵉⵏⵔⵣⴰⴼ ⴳⴳⵓⵜⵏⵉⵏ, ⵜⵜⵡⴰⴼⴽⴰⵏ ⴰⵙⵏ ⵉⵙⵉⵙⴼⵉⵡⵏ ⵅⴼ ⵉⵙⵓⵖⴰⴷ ⵏ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵏⵏⵉ ⵉⵙⵎⴰⵏⵏ ⴰⵙⵇⵇⵉⵎ ⴷ ⵜⵎⵀⵍⴰ ⴷ ⵜⵙⵎⵉⴳⴰⵍ ⵏⵏⵙⵏ, ⵜⵜⵡⴰⴼⵙⵔⵏⵜ ⵜⵥⵕⵉⴳⵉⵏ ⵜⵉⵎⵢⴰⵏⴰⵡⵉⵏ ⵏ ⵓⵙⵇⵇⵉⵎ, ⴰⵎ ⵜⴰⵏⴰⴹⵉⵏ ⴷ ⵉⵎⵏⴰⴷⵏ, ⵜⵜⵓⵙⵏⵎⴰⵍⴰⵏⵜ ⴳⵉⵙ ⴽⵉⴳⴰⵏ ⵏ ⵜⵉⵍⴰⵍ ⵏ ⵓⵎⵢⴰⵖ ⵉⵜⵜⵡⴰⵥⵍⴰⵢⵏ ⵉ ⵡⴰⵣⵣⴰⵏⵏ ⵏ ⵜⵓⴳⵜ ⵏ ⵉⵙⵎⵉⵍⵏ.
ⵉ ⵓⵙⴽⵜⵉ, ⵜⵙⵡⵓⵜⵜⵙ ⵜⵎⵢⴰⵇⵇⴰⵏⵜ ⵏ ⵓⵙⴰⵜⵉ, ⵏⵏⵉ ⵅⴼ ⵜⴷⴷⴰ ⵜⴷⵔⴰⵡⵜ ⴰⴷ, ⴰⵙⴱⵓⵖⵍⵓ ⵏ ⵜⵡⵓⵔⵉ ⵉⵛⵛⴰⵕⵏ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵃⵎⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵖⴰⵡⴰⵙⵏ ⵏ ⵓⵙⴰⵏⵓⵏ ⴷ ⵓⵙⵎⵓⵜⵜⴳ ⵏ ⵍⴱⵓⵍⵉⵙ, ⵜⴳ ⴰⵙⴰⴳⵯⵎ ⴷ ⵓⵏⵎⵎⴰⵍ ⵉⵙⵙⵓⵜⵉⵢⵏ ⵉ ⵜⵙⵎⵉⴳⴰⵍ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵜⵜⵓⵙⵎⴰⴳⵍⵏ ⵙ ⵓⵣⵣⴳⵉⵔ ⵏ ⵉⵙⵍⴳⵏⵏ, ⴷ ⵡⴰⵏⵏⴰⵍ ⵏ ⵜⵓⴳⴳⴰⵣ ⵏⵏⵉ ⵜⵜⴳⴳⴰ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴳ ⵓⵙⴷⵓⵙ ⵏ ⵜⵎⵙⴽⵔⵉⵏ ⵜⵉⵣⵣⵓⵍⴰⵏⵉⵏ ⴷ ⵜⴽⵛⵛⵓⵎⵉⵏ ⵏ ⵓⴱⴰⵔⴰⵣ ⵙ ⵓⵙⴽⴰⵔ ⵙ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴰⵎⵓⵏ ⴳ ⵢⵉⴳⵔⴰⵏ ⵏ ⵓⵎⵢⴰⵡⴰⵙ ⴰⴷ, ⴰⵙⵏⵎⴰⵍⴰ ⵏ ⵜⵙⵓⵜⵍⵉⵏ ⴷ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⵉ ⵓⵙⴷⵓⵙ ⵏ ⵜⵓⵙⵙⵏⵉⵡⵉⵏ ⴷ ⵜⵙⵓⴳⴰⵔ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵚⴰⵃⴰⵏ ⵉ ⵓⵙⵓⵜⴰⵢ ⴷ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵙⴱⵖⵔ ⵙⴳ ⵜⵎⵓⵣⴰⵢⵉⵏ ⴷ ⵜⵙⵓⵖⴰⵍ ⵣⴷⵉⵏⵉⵏ ⵙ ⵉⵣⵔⴼⴰⵏ ⴷ ⵜⴷⵔⴼⵉⵏ ⴷ ⵉⵎⵓⵙⵙⵓⵜⵏ ⵉⵎⵔⵙⴰⵍⵏ, ⴷ ⴰⵡⴷ ⴰⵙⴷⵓⵙ ⵏ ⵓⵎⵏⵉⴷ ⴰⵣⵔⴼⴰⵏ ⵏⵏⵉ ⵉⴳⴰⵏ ⵜⴰⵙⴰⵜⵓⵔⵜ ⵜⴰⴷⵙⵍⴰⵏⵜ ⴳ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⵏ ⵍⴱⵓⵍⵉⵙ ⴳ ⴰⴽⴽⵯ ⵜⵎⵙⴽⵔⵉⵏ ⵜⵉⵙⵖⵏⴰⵏⵉⵏ.
