ⵙⵢⴰⴼⴰⵏⵜ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⵙⵓⴼⵖ ⵏ ⵜⵏⵜⴰⵎⵜ ⵜⴰⵎⴳⴳⴰⵔⵓⵜ, ⵙⵙⵉⵜⴳⵏ ⴳⵉⵙ (ⵜ)ⵉⵎⴷⵔⴰⵡⵏ(ⵉⵏ)ⵜⴰⵡⵓⵔⵉ ⵏ (ⵜ)ⵉⵏⴰⵎⵣⴰⵖⵏ(ⵉⵏ) ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⴷⴷⴰⵙⵉⵏ ⴷ ⵜⵎⵔⵙⴰⵍ ⴷ ⵜⵓⴳⴳⴰⵣ ⵏⵏⵙⵏ(ⵜ) ⵃⵎⴰ ⴰⴷ ⵙⴱⵓⵖⵍⵓⵏ ⴰⵎⴹⴰⴽⴰⵕ ⴷ ⵜⵓⵚⴽⴰ ⵏ ⵓⵎⵙⴰⵡⴰⵍ ⵉⵕⵥⵎⵏ ⴷ ⵉⵎⵏⴰⵡⴰⵢⵏ; ⵙⵙⴽⵕⵥⵏ ⵎⴰⵙ ⵉⴽⴽⴰ ⵉⴳⴰ ⵓⵎⵙⴰⵡⴰⵍ ⴷ ⵓⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ, ⴷ ⵉⵙⵓⵍ ⵏⵉⵜ, ⵜⴰⵎⵙⵙⵉⵍⵉⵜ ⵜⴰⴷⵙⵍⴰⵏⵜ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ. 

ⵎⴹⴰⴽⴰⵕⵏ (ⵜ)ⵉⵎⴷⵔⴰⵡⵏ(ⵉⵏ), ⵙ ⵜⵖⴱⵉ, ⴽⵉⴳⴰⵏ ⵏ ⵜⵎⵏⵜⵉⵍⵉⵜ ⵉⵣⴷⵉⵏ ⵙ ⵉⵏⴰⵥⴰⵕⵏ ⵉⵥⵍⵉⵏ ⵙ ⴽⵕⴰⴹ ⵉⵎⵔⵙⵉⵜⵏ ⵉⵎⵎⴽⵛⴰⵎⵏ, ⵜⵏ ⵉⴳⴰⵏ ⴷ ⵜⵎⵣⵡⴰⴳⵜ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵜⵣⵔⴼⵜ ⵏ ⵓⵎⵜⵜⵉ/ⵜⵉⵎⴽⵜⵉⵜ, ⵙⵎⴰⵢⵏⵓⵏ ⴰⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵉⴳⴰⵏ ⴰⵙⴰⵢⵔⴰⵔ ⵏ ⵓⵎⵙⴰⵡⴰⵍ ⴷ ⵓⵎⴹⴰⴽⴰⵕ ⴷ ⵜⵓⵚⴽⴰ ⵏ ⵜⴼⵍⵙⵜ, ⵢⴰⴽⴽⴰⵏ ⵉⵣⵎⴰⵣ ⵏ ⵜⴷⵔⴰⵡⵜ ⵉⵙⵎⴷⵏ ⴷ ⵉⵏⴳⴰⴷⴷⴰⵏ ⴷ ⵏⵏⵉ ⵉⵟⵟⴰⴼⵏ ⵉⵡⵜⵜⴰⵙ ⵉ ⵜⵓⴳⵜ ⵏ ⵉⵎⴳⴳⴰⵢⵏ ⴳⴰⵏⵉⵏ ⵉⵎⵏⵜⴰⵢⵏ. ⵓⴳⴳⴰⵔ ⵏ 500 ⵏ ⵜⵎⴷⵔⴰⵡⵜ ⴷ ⵓⵎⴷⵔⴰⵡ ⵙⴳ ⵓⴳⴳⴰⵔ ⵏ 50 ⵏ ⵓⵡⴰⵏⴽ ⴱⴹⵓⵏ ⵓⴳⴳⴰⵔ ⵏ 500 ⵏ ⵜⵎⴷⵔⴰⵡⵜ ⴷ ⵓⵎⴷⵔⴰⵡ ⵏ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⴷⴷⴰⵏ ⵙⴳ 50 ⵏ ⵓⵡⴰⵏⴽ ⵜⵉⵎⵙⴽⵔⵉⵏ ⴷ ⵜⵎⵓⴼⴰⵢⵉⵏ ⵉⵙⵢⴰⴼⴰⵏ ⵙ ⵓⵙⵎⵓⵜⵜⴳ ⵉⵙⵖⵍⴰⴼ ⴷ ⵜⵙⵓⵎⵔⵉⵏ ⴷ ⵜⵙⵏⵜⴰⵢⵉⵏ ⵜⵉⵎⵢⴰⴳⴰⵏⵉⵏ ⵉⵕⵡⴰⵏ, ⵔⴰⴷ ⴳⵏ ⵜⴰⴷⴰⵙⵉⵍⵜ ⵏ ⵓⵏⵄⴰⵕ ⴰⴳⵔⴰⵖⵍⴰⵏ ⵉⵜⵜⵓⵙⵎⴰⵢⵏⵓⵏ ⵉⵙⴽⴰⵔⵏ ⵙⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴰⵙⵏⵜⵉ ⴷ ⵓⵎⵔⵏⵓ ⴷ ⵓⵡⵜⵜⴰⵙ, ⵔⴰⴷ ⵜⵜⵓⵙⵎⵏⵉⴷⵏ ⴳ ⵓⵙⴳⵔⴰⵡ ⴰⵎⴰⴹⵍⴰⵏ ⵡⵉⵏ ⴽⵕⴰⴹ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⴰⵕⵊⵓⵏⵜⵉⵏ. 

“ⵏⵔⴰ ⴰⴷ ⵏⴷⴷⵓ ⵙ ⴱⵢⵓⵏⵉⵙ ⴰⵢⵕⵉⵚ ⵙ ⵓⵏⴰⵔⵓⵣ ⴰⴷ, ⴷ ⵜⵡⴰⵔⴳⵉⵜ ⴰⴷ, ⴷ ⵓⵙⴷⴷⵉⴷ ⴰⴷ, ⴷ ⵜⵓⵎⵔⵜ ⴰⴷ ⵃⵎⴰ ⴰⴷ ⵏⵣⵣⵉⴳⵣ ⴰⵙⵙⵉⵍⵉ ⵏ ⵉⵎⵙⵍⵉ ⵏ (ⵜ)ⵉⵏⴰⵎⵣⴰⵖⵏ(ⵉⵏ) ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵖⴱⵉ ⵏ ⵜⵡⵓⵔⵉ ⵙ ⵢⵉⵎⴰⵏ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴷ ⵜⵉⵏⴷⵉⵜⵉⵏ ⵏⵏⵙⵏⵜ... ⵙ ⵢⴰⵜ ⵜⵡⵉⵍⴰ ⵉⵎⵍⵍⴰⵏ ⵜⵉⵣⵎⵎⴰⵔ ⵏ ⵉⵡⴰⵏⴽⵏ ⵏ ⵉⵥⵥⵍⵎⴹ ⴳ ⵓⴼⴰⵔⵙ ⵏ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ... ⵙ ⵓⵙⵏⵜⵉ ⵙⴳ ⵜⵖⵥⵓⵕⴰⵏⵜ ⵏ ⵉⵣⵔⴼⴰⵏ ⴷ ⵡⴰⵔ ⵜⵣⵎⵔⵜ ⵏ ⵓⴱⵟⵟⵓ ⵏⵏⵙⵏ". 

ⵙ ⵜⴳⵓⵔⵉⵡⵉⵏ ⴰⴷ ⴰⵙ ⵉⵙⵎⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⵜⵉⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⵎⵣⵡⴰⵔⵓ -ⴰⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵎⵢⴰⵡⴰⵙ ⴰⴽⴷ ⵡⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ - ⵍⵢⵓⵏⵉⵙⴽⵓ, ⴳ ⵙⵉⵏ ⵡⵓⵙⵙⴰⵏ (17-18 ⴱⵕⴰⵢⵕ 2023), ⵉⵙⴷⴷⵉⴷ ⵎⴰⵙ ⵉⵙⵙⵓⵖⵍ ⵓⵙⴳⵔⴰⵡ ⵜⴰⵣⵎⵔⵜ ⵏ ⵉⵎⵓⵣⴰⵢⵏ ⴷ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵜⵙⴳⴳⵯⵉⵏ ⴷ ⵉⵎⵏⵉⴷⵏ ⴷ ⵜⵎⵏⴰⴹⵉⵏ ⵜⵉⵊⵓⴳⵕⴰⴼⵉⵢⵉⵏ ⵉⴳⴳⵓⵜⵏⴷ ⵉⵎⵏⴰⵡⴰⵢⵏ, ⵙ ⵓⵙⵙⵓⴼⵖ ⵏ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴱⵓⵖⵍⵓ ⵏⵏⵙⵏⵜ. 

ⴳ ⵜⵖⵉⵎⵉⵜ ⵏ ⵓⵕⵥⵥⵎ ⵏ ⵓⵙⴳⵔⴰⵡ ⵏ ⵕⵕⴱⴰⵟ, ⵜⵙⵎⵏⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵢⴰⵜ ⵜⴳⵓⵔⵉ ⵏⵏⵉ ⴳ ⵜⵙⵡⴰⵍⴰ ⵜⴰⵖⵓⵔⵉ ⵉ ⵇⴰⵃ ⵉⵏⴰⵎⵣⴰⵖⵏ ⴷ ⵜⵏⴰⵎⵣⴰⵖⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ ⵃⵎⴰ ⴰⴷ "ⵏⵙⵎⵓⵏ ⵉⵎⵙⵍⵉⵜⵏ ⵏⵏⵖ, ⵙⴳ ⵕⵕⴱⴰⵟ ⴰⵔ ⴱⵢⵓⵏⵉⵙ ⴰⵢⵕⵉⵙ, ⴷ ⵉⴷⵖⴰⵔⵏ ⵢⴰⴹⵏⵉⵏ, ⵃⵎⴰ ⴰⴷ ⴳⵏ ⵢⴰⵏ ⵉⵎⵙⵍⵉ, ⵜ ⵉⴳⴰⵏ ⴷ ⵓⵏⵓⴳⴳⵓ ⴰⵎⴰⴽⴰⵢ, ⵉ ⵓⵙⴳⵉⴼⵢ ⵏ ⵓⴱⵓⵔⵣ ⴷ ⵜⵣⵔⴼⵜ ⴷ ⵉⵙⴽⵉⵍ. ⵜⵙⴷⴷⵉⴷ ⵎⴰⵙ ⵓⵔ ⵜⴳⵉ ⵜⴷⵔⴰⵡⵜ ⵏ ⵉⵡⴰⵏⴽⵏ ⵏ ⵉⴼⴼⵓⵙ ⴳ ⵓⵙⵔⵓⵙ ⵏ ⵉⵏⴰⵡⴰⵢⵏ ⴷ ⵜⵉⵏⴷⵉⵜⵉⵏ ⵜⵉⵎⴰⴹⵍⴰⵏⵉⵏ ⵢⴰⵏ ⵉⵎⵊⵕⵉ ⴰⵣⵎⵣⴰⵏ, ⵎⴰⵛ ⴰⴹⴼⴼⵓⵕ ⵏ ⵉⴱⵔⴷⴰⵏ ⵉⵎⴰⵢⵏⵓⵜⵏ ⵖⵔ ⵓⵡⴰⵏⴽ ⵏ ⵓⵙⵍⴳⵏ”. 

ⴰⵣⵎⵣ ⵏ ⵓⵙⵎⵖⵔ ⵏ ⵡⵓⴷⵎⴰⵡⵏ ⵉⵣⵔⴼⴰⵏⵏ ⵉⵏⴰⵎⵓⵔⵏⵏ ⴷ ⵉⴳⵔⴰⵖⵍⴰⵏⵏ ⵉⵎⵇⵇⵔⴰⵏⵏ ⵙⴳ ⵉⵣⵎⴰⵣ ⵉⴷⵓⵙⵏ ⵏ ⵓⵙⴳⵔⴰⵡ ⵏ ⵕⵕⴱⴰⵟ, ⵜⴰⵙⵏⵜⴰⵢⵜ ⵏ ⵓⵙⵎⵖⵔ ⵏ ⵡⵓⴷⵎⴰⵡⵏ ⵉⵣⵔⴼⴰⵏⵏ, ⴰⵙⵎⵖⵔ ⵉⴳⴰⵏ ⴰⵣⵎⵣ ⵏ ⵜⵓⵙⵏⵜ ⵉ ⵜⵓⴳⴳⴰⵣ ⵏⵏⵉ ⴳⴰⵏ ⵅⴼ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ. ⵉⵍⵍⴰ ⴷ ⵉⴹ ⴰⵏⵏ ⵢⵉⵎⴰⵏ ⵏ ⵉⴳⵍⵍⵉⵏ ⵄⴱⴷ ⵍⵇⴰⴷⵔ ⴰⵣⵔⵉⵄ, ⵏⵏⵉ ⵅⴼ ⵉⵏⵏⴰ ⵓⵎⴷⴷⴰⴽⴽⵯⵍ ⵏⵏⵙ ⴳ ⵜⵖⵏⵙⴰ, ⵎⴰⵙⵙ ⵟⵟⴰⵍⵄ ⵙⴰⵄⵓⴷ ⴰⵍⴰⵟⵍⴰⵙⵉ, ⵎⴰⵙ ⵉⴳⴰ ⴰⵣⵓⵔⵜ ⵉⴷⴷⵖ ⵉⴳⴰ ⵜⴰⵎⴰⵜⴰⵔⵜ ⵏ ⵉⵎⵏⵣⴰⵢⵏ ⴷ ⵜⴷⵍⵙⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ. 

ⴳ ⵓⵣⵎⵣ ⴰⴷ ⵏ ⵜⵓⵙⵏⵜ ⴷ ⵓⵙⵎⵖⵔ, ⵉⵜⵜⵓⴳⴰ ⵓⵙⵎⵖⵔ ⵉ ⵎⴰⵙⵙⴰ ⵙⵓⵢⴰⵟⴰ ⵎⴰⵢⴳⴰ ⴷ ⵎⴰⵙⵙ ⴰⵍⴱⵉⵕ ⵚⴰⵚⵓⵏ, ⴰⴽⴰⴷⵉⵎⵉⵢ ⴷ ⵓⵙⵍⵎⴰⴷ ⴰⵙⴷⴰⵡⴰⵏ ⵏⵏⵉ ⵉⴳⴰⵏ ⴰⵙⴳⵓⵎ ⵏ ⵓⵏⴼⵔⴰⵔ ⵉ ⵉⵎⴷⴷⵓⴽⴽⴰⵍ ⵏⵏⵙ ⴳ ⵉⴱⵔⴷⴰⵏ ⵏ ⵜⵖⵏⵙⴰ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵍⵎⵎⴰ ⵜⴻⵜⵜⵓⵙⵎⵖⵔ ⵜⵣⵔⴼⴰⵏⵜ ⵜⴰⵕⵊⵓⵏⵜⵉⵏⵉⵜ, ⵜⴰⵎⵖⵏⴰⵙⵜ ⵉⵙⵜⵉⵍⵍⴰ ⴱⴰⵕⵏⵣ ⴷⵉ ⴽⴰⵕⵟⵓ, ⵜⴰⵏⵙⵙⵉⵅⴼⵜ ⵏ ⵜⵎⴰⴷⴷⴰⵙⵜ "ⵉⴷ ⵉⵎⵎⴰ ⵜⵉⵎⵇⵇⵔⴰⵏⵉⵏ ⵏ ⵓⵙⴰⵔⴰⴳ ⵎⴰⵢⵢⵓ", ⴷ ⵎⴰⵙⵙⴰ ⵍⴰⵟⵉⴼⴰ ⵊⴱⴰⴱⴷⵉ, ⵜⴰⵣⵔⴼⴰⵏⵜ ⵜⴰⴽⵙⵡⴰⵜ ⴷ ⵜⴳⵎⴰⵎⵜ ⵜⴰⵎⵣⵡⴰⵔⵜ ⴳ ⵓⵙⵇⵇⵉⵎ ⴰⵎⵛⵛⵉⵡⵕ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, "ⵍⴰⵍ ⵏ ⵓⵙⵙⴼⵍⴷ ⴷ ⵓⵙⵃⵙⵙⵓ", ⵎⴽⴷⴰ ⵙ ⵜⵜ ⵉⵙⵏⵓⵎⵎⵍ ⵓⵎⴷⴷⴰⴽⴽⵯⵍ ⵏⵏⵙ ⵚⴰⵍⴰⵃ ⵍⵡⴰⴷⵉⵄ. 

ⴰⵏⵎⵖⵓⵔ ⴰⵎⴳⴳⴰⵔⵓ ⵏⵏⵉ ⵉⵜⵜⵓⵙⵎⵖⵔⵏ ⴳ ⵜⴼⵓⴳⵍⴰ ⵏ ⵜⵓⵙⵏⵜ ⵉⴳⴰ ⵜ ⵓⵎⵙⵜⴰⵏ ⴰⴼⴰⵍⴰⵚⵟⵉⵏⵉ ⵕⴰⵊⵉ ⵚⵚⵓⵕⴰⵏⵉ, ⴰⵏⵙⵙⵉⵅⴼ ⴰⵎⵙⵔⵓⵙ ⵏ ⵡⴰⵎⵎⴰⵙ ⴰⴼⴰⵍⴰⵚⵟⵉⵏⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵡⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⴰⵕⵊⵓⵏⵜⵉⵏ (CIPDH-UNESCO), ⴰⵎⴷⵔⴰⵡ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵏⵎⴰⵍⴰ ⵏ ⵓⵙⴳⵔⴰⵡ ⵏ ⵕⵕⴱⴰⵟ, ⴷ ⵓⵎⵙⵙⵓⵜⵉ ⵅⴼ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵍⴰⵕⵊⵓⵏⵜⵉⵏ ⴳ ⵎⴰⵕⵚ ⴷ ⵉⴷⴷⴰⵏ ⵉ ⵓⵙⴽⵜⵉ, ⴰⵙⴳⵔⴰⵡ ⴰⴳⵔⴰⵖⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⵜⵜⵓⵙⵏⵎⴰⵍⴰⵏ ⵅⴼ ⵓⵙⵙⵓⵊⴷ ⵉ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵜⵎⴰⵥⵓⵏⵜ ⵏ ⵍⴰⵕⵊⵓⵏⵜⵉⵏ ⴱⵢⵓⵏⵉⵚ ⴰⵢⵕⵉⵚ ⴳ ⵡⴰⵢⵢⵓⵔ ⵏ ⵎⴰⵕⵚ ⴷ ⵉⴷⴷⴰⵏ, ⵉⵜⵜⵡⴰⵙⵙⴰⵏ ⵙ ⵜⴷⵔⴰⵡⵜ ⵏ ⴽⵉⴳⴰⵏ ⵏ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳⵉⵙⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵉⵎⵓⵣⴰⵢⵏ ⵉⵎⵔⵙⴰⵍⵏ ⴷ ⵉⴽⴰⴷⵉⵎⵉⵢⵏ ⴷ ⵉⴳⵏⵙⴰⵙ ⵏ ⵜⵎⴰⴷⴷⴰⵙⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵓⵎⴰⵕ ⵜⵉⵎⵜⵜⴰ ⵉⵎⵓⵏⵏ ⴷ ⵜⴰⵎⵓⵏⵜ ⵏ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ.