ⵜⵔⵣⴼ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵙ ⵏ ⵓⵢⵏⴰⵙ 18 ⵉⴱⵔⵉⵔ 2022, ⵙ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵉⵣⵔⴼⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ, ⵜⴰⵙⴷⴰⵡⵉⵜ ⵍⵇⴰⴹⵉ ⵄⵢⵢⴰⴹ ⴳ ⵎⵕⵕⴰⴽⵛ, ⴳ ⵓⵙⴰⵜⵉ ⵏ ⵢⴰⵏ ⵓⵏⵎⵓⵇⵇⴰⵔ ⴰⵎⵢⴰⵖ ⴰⴽⴷ ⵉⵎⵃⴹⴰⵕⵏ ⵏ ⵓⵎⴰⵙⵜⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⵜⵉⵎⴰⵜⴰⵢⵉⵏ ⴷ ⵉⵎⵃⴹⴰⵕⵏ ⵏ ⵜⵓⵔⴰⴳⵜ ⴳ ⵓⵙⵍⴳⵏ ⴰⵎⴰⵜⴰⵢ ⴷ ⵜⵎⴰⵙⵙⴰⵏⵉⵏ ⵜⵉⵙⵔⵜⴰⵏⵉⵏ, ⵜⴷⵔⵓ ⴳⵉⵙ ⵉⵎⵔⵙⵉ ⵏ "ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ...ⵉⵎⵙⴰⵔⴰⵙⵏ, ⵓⵎⵄⵉⵏⵏ ⴷ ⵉⵏⴰⵥⴰⵕⵏ". ⴹⴰⵕⴰⵜ ⵎⴰⴷ ⵜⵙⵉⵡⵍ ⵅⴼ ⵓⴱⵓⵖⵍⵓ ⵏ ⵓⵎⴹⴰⴽⴰⵕ ⵏⵏⴰ ⵜⵙⵙⵏ ⵜⴳⵔⵓⵎⵎⴰ ⵜⴰⴳⵔⴰⵖⵍⴰⵏⵜ ⴳ ⵎⴰⴷ ⵉⵥⵍⵉⵏ ⵙ ⵓⵙⵔⵙ ⵏ ⵓⴼⵔⴷⵉⵙ ⴰⴷⵍⵙⴰⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴳⵎⵉ ⵅⵉⴼⵙ, ⵜⵖⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵙⵎⴰⵢⵏⵓ ⵏ ⵉⵖⴰⵡⴰⵙⵏ ⵉⵏⵎⵍⴰⵏⵏ ⴷ ⵓⵙⵎⵙⴰⵙⴰ ⵏⵏⵙⵏ ⴰⴽⴷ ⵉⵙⵏⴼⵍⵏ ⵜⵜⵓⵙⴷⴷⵔⴼⵏⵉⵏ ⵏⵏⴰ ⵉⵙⵙⵏ ⵡⴰⵎⵓⵏ ⴳ ⵎⴰⴷ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴷⴷⵖ "ⵜⴳⴰ ⵜⵙⵎⵉⴳⵍⵜ ⵏ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵖⴰⵔⴰⵙⵜ ⵜⴰⴼⵍⵙⴰⴼⵜ ⴷ ⵜⴱⵉⴷⴰⴳⵓⵊⵉⵜ ⵉⵙⵡⵓⵜⵜⵙⵏ ⴰⵙⵙⵓⵖⵍ ⵏ ⵉⵙⴱⴷⴰⴷⵏ ⵏ ⵜⵎⵜⵜⴰ ⵉⵎⵓⵏⵏ ⴷ ⵓⵙⵎⵀⵍ ⵏ ⵉⵎⵏⵣⴰⵢⵏ ⵏ ⵉⵙⴽⵉⵍ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ... ⵙ ⵜⵎⵙⴽⵔⵉⵏ ⵜⵉⵎⴳⵔⵓⵜⵉⵏ ⴷ ⵡⴰⵏⵍⵍⵉⵜⵏ ⵉⵙⵙⴱⴷⴰⴷⵏ ⵜⵉⴽⵕⴹⵉ ⴷ ⵓⴽⵙⴰⵏ, ⴰⵔ ⵜⴰⵟⵟⵓ ⵜⵉⵏⴷⵉⵜⵉⵏ ⵛⵛⴰⵕⵏⵉⵏ ⵉⵏⵏⴰⵍⵏ ⴰⴼⵔⴰ ⴷ ⵉⵙⴽⵉⵍ, ⵉⵙⵙⴱⴷⴰⴷⵏ ⴰⵙⵏⵓⵃⵢⵓ". ⴳ ⵓⵎⵏⴰⴹ ⵏ ⵓⵙⴽⵜⵉ ⵙ ⵓⵙⴰⴽⵓⴷ ⵏ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵣⴷⴰⵢ ⵏⵏⵙ ⵙ ⵜⵎⴰⵢⵏⵓⵜⵉⵏ ⵜⵉⵙⴳⵎⴰⵏⵉⵏ ⴳ ⵓⵙⵡⵉⵔ ⴰⴼⵍⵙⴰⴼ ⴷ ⵓⵙⵡⵉⵔ ⵓⵙⵏⵉⵙ, ⵜⵙⵙⵏⴽⴷ ⵎⴰⵙⵙⴰ ⴱⵓⵄⵢⵢⴰⵛ ⵉⵙⵖⵍⴰⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵎⴰⴷ ⵉⵥⵍⵉⵏ ⵙ ⵜⵎⴰⵎⴽⵉⵏ ⴷ ⵜⴱⵔⵉⴷⵉⵏ ⵏ ⵓⵙⴷⵍⵙ ⴳ ⵢⵉⴳⵔ ⵏ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵙⵖⵣⵏⵜ ⵅⴼ ⵓⴹⴼⴼⵓⵕ ⵏⵏⵙ ⵉ ⵉⵙⴰⴽⴰⵜⵏ ⵏ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ. ⴰⵔ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⴷⴰ ⵜⵜⵡⴰⴱⴹⴰⵡ ⵜⵎⵙⵙⵉⵔⴷⵜ ⵏ ⵓⵙⵎⵓⵜⵜⴳ ⵜⴰⵎⴷⵢⴰⵜ ⵙ ⴽⵉⴳⴰⵏ ⵏ ⵜⴼⵔⴽⵉⵡⵉⵏ, ⵙⴳⵉⵙⵏⵜ: ⵜⴰⵎⵣⴰⵡⵉⵜ ⵜⴰⵏⵎⴳⴰⵔⵜ ⵏⵏⴰ ⵉⵙⵙⵏⵜⴰⵢⵏ ⵙⴳ ⵢⴰⵏ ⵓⵙⴳⴳⵓⵔ ⴰⴱⵉⴷⴰⴳⵓⵊⵉ; ⴰⵙⴳⵣⵍ ⵏ ⵓⵎⵏⴰⴷ ⴳ ⵢⴰⵜ ⵜⵎⵙⵍⴰⵢⵜ ⵉⵜⵜⴰⵡⵉⵏ ⵙ ⵢⴰⵏ ⵓⵙⴱⴷⴰⴷ (ⵏⵉⵖ ⵓⴳⴳⴰⵔ) ⵙⴳ ⵉⵙⴱⴷⴰⴷⵏ ⵏ ⵉⴹⵕⵉⵚⵏ ⵉⵣⵔⴼⴰⵏⵏ; ⴰⵕⵥⵥⵓⵎ ⵏ ⵓⵎⴹⴰⴽⴰⵕ ⵉⵜⵜⵓⵙⵙⵓⴷⵙⵏ ⴷ ⵉⵜⵜⵓⵙⵙⵏⵥⴰⵏ ⵅⴼ ⵜⵎⵙⵍⴰⵢⵜ ⵜⴰⵣⵔⴼⴰⵏⵜ; ⴰⵙⵡⴰⵍⴰ ⵏ ⵉⵙⵖⵍⴰⴼ ⵙ ⵉⵖⵔⴰⴷⵏ ⵉⵏⴰⵎⵓⵏⵏ ⴷ ⵜⵕⵥⵉⵢⵉⵏ ⵎⵎⵔⵡⴰⵙⵏⵉⵏ ⴷ ⵜⵉⴷ ⵉⵜⵜⵓⵣⵎⴰⵔⵏⵉⵏ. ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷⴰ ⵉⵜⵜⴷⵔⵓ ⵓⵙⵇⵇⵉⵎ ⴳ ⵜⵥⵕⵉⴳⵜ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙ ⵜⵉⵏⴷⵉⵜⵉⵏ ⵏⵏⵙ ⵙ ⴽⵉⴳⴰⵏ ⵏ ⵉⵎⴰⵙⵙⵏ ⴷ ⵜⵓⴳⵜ ⵉⵙⴰⵜⵉⵢⵏ, ⵙⴳⵉⵙⵏ ⴰⵙⴰⵢⵔⴰⵔ ⴰⵏⵎⵍⴰⵏ ⴷ ⵓⵏⴰⵥⵓⵕ ⴷ ⵓⵖⵔⵉⵎ ⴷ ⵓⵎⵙⴷⴰⵡ, ⵙ ⵢⴰⵜ ⵜⵡⵓⵔⵉ ⵏ ⵓⵙⵎⵓⵜⵜⴳ ⵉⵙⵡⵓⵜⵜⵙⵏ ⴰⵙⴷⵓⵙ ⵏ ⵜⵣⵎⵎⴰⵔ, ⵅⴼ ⵉⴳⴳⵉ ⵏ ⵜⵙⵖⵣⵏⵜ ⵏ ⵇⴰⵃ ⵡⴰⵏⴰⵡⵏ ⵏ ⵓⵡⵏⵏⵉ ⵏⵏⴰ ⵉⴳⴰⵏ ⵜⵉⴷⴰⴱⵓⵜⵉⵏ ⴷ ⵢⵓⵙⴰⵏⵉⵏ ⵉ ⵓⵣⵓⵣⵣⵔ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵎⴰⵥ ⵏ ⵜⴼⵓⵍⵉⵏ ⵇⴰⵃ ⵉⵜⵜⵓⵙⵡⵓⵜⵜⵙⵏ ⵉ ⵜⵉⵏⴷⵉⵜⵉⵏ ⵏⵏⵙ, ⵉⵏⵜⴰⵢⵏ ⵙ ⵜⵡⵉⵍⴰ ⵜⵓⵙⵔⵉⴷⵜ ⵡⴰⵍⴰ ⵜⴰⵔⵓⵙⵔⵉⴷⵜ, ⵙ ⵓⵙⴷⵓⵙ ⵏ ⵜⵣⵎⵎⴰⵔ (ⵜⵉⴼⵓⵍⵉⵏ ⵜⵉⵣⵣⵓⵍⴰⵏⵉⵏ, ⵉⵎⵙⵎⴰⴳⵍⵏ ⵙ ⵓⵣⵣⴳⵉⵔ ⵏ ⵓⵙⵍⴳⵏ, ⵉⵙⵎⴰⵜⵜⴰⴳⵏ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵏⴱⴷⴰⴷⵏ ⵅⴼ ⵓⵙⵡⵓⴷⴷⵓ ⵏⵏⵙⵏⵜ ⴷ ⵓⵣⵣⴳⵉⵔ ⵏⵏⵙⵏⵜ, ⵉⵎⵙⵓⵜⵓⵢⵏ ⵏ ⵜⵎⵔⵙⴰⵍ ⵏ ⵓⵏⵀⵍⵍⴰ ⴰⵏⴰⵎⵓⵏ ⵉⵡⴰⵍⴰⵏ ⵉ ⵡⴰⵣⵣⴰⵏⵏ ⴷ ⵜⵡⵜⵎⵉⵏ ⴷ ⵜⴼⵓⵍⵉⵏ ⴳ ⵓⵙⵓⵔⵙ ⵏ ⵓⵍⵎⴰⴹ, ⵉⵎⵙⵜⴰⵏⵏ, ⵉⵣⵣⵓⵍⴰⵏⵏ ⵏ ⵜⵖⵎⵙⴰ...). ⵓⵔ ⵉⴼⴰⵜ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⴷ ⵜⵙⵙⵎⵜⵔ ⵙ ⵉⵏⴰⵥⴰⵕⵏ ⵉⵎⵇⵇⵔⴰⵏⵏ ⵏⵏⴰ ⵉⵜⵜⵎⵏⴰⵍⴰⵏ ⵢⵉⴳⵔ ⵏ ⵓⵣⵓⵣⵣⵔ ⵏ ⵜⵓⵙⵙⵏⴰ ⵏ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴳⵎⵉ ⵅⴼ ⵜⵉⵏⴷⵉⵜⵉⵏ ⵏⵏⵙ, ⵜⵙⴷⴷⵉⴷ ⵎⴰⵙ ⵉⵙⵖⴰⵡⵙⴰ ⵓⵙⴷⴷⵉ ⵏ ⵓⵙⴷⵍⵙ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⵖⵣⵏ ⵏ ⵜⵖⴰⵔⴰⵙⵉⵏ ⵉⵜⵜⵓⵙⵎⴰⵢⵏⵓⵏ ⵉⵎⵓⵏⵏ ⴰⴽⴷ ⵉⵙⵏⴼⵍⵏ ⵏⵏⴰ ⵙⵙⵏⵏⵜ ⵜⵖⴰⵔⴰⵙⵉⵏ ⵜⵉⵎⵔⵣⴰ ⴷ ⵜⵖⴰⵔⴰⵙⵉⵏ ⵜⵉⵏⵎⵍⴰⵏⵉⵏ ⴷ ⵜⵎⵢⴰⵡⴰⴹⵉⵏ ⴷ ⵜⵉⵇⵏⵉⵢⵉⵏ, ⵎⴰⵢⴰ ⵏⵏ ⴳ ⵓⵙⴰⵜⵉ ⵏ ⵓⵙⵎⴰⵢⵏⵓ ⵏ ⵜⵖⴰⵔⴰⵙⵉⵏ ⴷ ⵜⵓⵎⵙⵉⵙⵜ ⵏⵏⵙⵏⵜ ⴰⴽⴷ ⵡⴰⵙⵙⴰⵔⵏ ⴷ ⵉⵙⵓⵖⴰⴷ, ⵜⵔⵏⵓ ⵎⴰⵙ ⵉⵙⵖⴰⵡⵙⴰ ⵓⵙⴷⵓⵙ ⵏ ⵜⵣⵎⵎⴰⵔ ⴳ ⵢⵉⴳⵔ ⵏ ⵓⵙⵎⵓⵜⵜⴳ ⴷ ⵓⵙⴰⵏⵓⵏ ⵙⴳ ⵓⵙⵇⵇⵉⵎ ⵜⴰⵙⵉⵍⴰⵡⵜ ⵏ ⵢⴰⵜ ⵜⵙⵜⵕⴰⵜⵉⵊⵉⵜ ⴳ ⵢⵉⴳⵔ ⵏ ⵓⵙⵎⵓⵜⵜⴳ ⴷ ⵜⵓⴽⴽⵉ ⵏ ⵓⵙⵉⵣⵡⵔ ⵉ ⵡⴰⵏⵏⴰⵍ ⵏ ⵜⵣⵎⵎⴰⵔ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴷ ⵉⵎⴳⴳⴰⵢⵏ ⴷ ⵉⵎⴷⵔⴰⵡⵏ ⵉⵏⵎⵏⴰⴹⵏ ⴷ ⵉⵏⴰⵎⵓⵔⵏ, ⴷ ⵜⵎⵓⵏⵜ ⴰⴽⴷ ⵜⵣⵎⵎⴰⵔ ⵏ ⵜⵏⴱⴰⴹⵜ ⵅⴼ ⵜⵙⵓⵍⴰⵏⵜ ⵏ ⵜⴷⵔⴰⵡⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⴼⵔⴽⵜ ⵜⵉⵙ ⴽⴽⵓⵥⵜ (2020-2024) ⵏ ⵓⵖⴰⵡⴰⵙ ⴰⵎⴰⴹⵍⴰⵏ ⵏ ⵓⵙⴷⵍⵙ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴳ ⵓⵎⵏⴰⴹ ⴰⴷ, ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⴳⴰ ⵜⵉⵍⵉⵜ ⵏ ⵜⵙⵓⴳⴰⵔ ⴷ ⵜⵣⵎⵎⴰⵔ ⵜⵉⵎⵖⵔⴰⵜⵉⵏ ⴷ ⵓⵙⵢⵉⵍⵉ ⴷ ⵓⵙⴱⵓⵖⵍⵓ ⴷ ⵓⵙⵏⴼⵍⵓⵍ ⵏ ⵉⵎⴰⵙⵙⵏ ⵉⴷⵉⴷⴰⴽⵜⵉⴽⵉⵢⵏ ⴷ ⵉⵙⴳⵎⴰⵏⵏ ⴷ ⵓⵙⵎⵓⵜⵜⴳ ⵏ ⵇⴰⵃ ⵉⵡⵏⵏⵉⵜⵏ ⵉⴷⵍⵙⴰⵏⵏ ⴷ ⵉⵏⴰⵥⵓⵕⵏ ⴳ ⵓⵣⵓⵣⵣⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵍⵎⵎⴰ ⴰⵏⵄⴰⵕ ⵅⴼ ⵓⵙⵉⵍⵉⵢ ⵏ ⵓⵙⵡⵉⵔ ⵏ ⵓⵜⵓⵢ ⵓⵍⴳⵉⵏ ⵏ ⵉⵙⴳⵔⴰⵡⵏ ⵉⵙⴳⵎⴰⵏⵏ ⴳ ⵓⵙⴰⵢⵔⴰⵔ ⴰⵏⵎⵍⴰⵏ. ⵜⵙⴷⴷⵉⴷ ⵓⵍⴰ ⵅⴼ ⵜⵉⵍⴰⵍⴰⵜ ⵏⵏⴰ ⵉⵣⵎⵔ ⴰⴷ ⵜⵜ ⵢⵓⵔⴰⵔ ⵓⵎⴳⴳⴰⵢ ⴰⵎⵓⵟⵟⵓⵏ ⴳ ⵎⴰⴷ ⵉⵣⴷⵉⵏ ⵙ ⵜⵣⵎⵔⵜ ⵏⵏⵙ ⵅⴼ ⵜⵏⴽⵔⴰ ⵙ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵕⵥⵉ ⵏⵏⵙⵏⵜ, ⵜⵉⵏⵉ ⵎⴰⵙ ⴷ ⵏⵜⵜⴰⵏ ⴷ "ⵓⵏⴰⵥⴰⵕ ⵏⵏⴰ ⴱⴰⵀⵔⴰ ⵉⵎⵎⵔⴽⵙⵏ", ⵙ ⵉⴱⴷⴷⵉ ⵅⴼ ⵜⴱⵔⵉⴷⵉⵏ ⵏ ⵓⵙⵎⵓⵜⵜⴳ ⵏⵏⵙ ⵉ ⵉⴱⵓⵖⵍⵓⵜⵏ ⵉⵜⵉⴽⵏⵓⵍⵓⵊⵉⵢⵏ ⴷ ⵉⵎⴰⵙⵙⵏ ⵉⵜⵔⴰⵔⵏ ⵏ ⵓⵎⵢⴰⵡⴰⴹ, ⵉⵜⵜⵡⴰⵙⵙⴰⵏⵏ ⵙ ⵓⵏⵖⴰⵍ ⵏⵏⵙ ⴰⵎⵇⵇⵔⴰⵏ, ⴳ ⵓⵣⵓⵣⵣⵔ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵙⴰⵢⵔⴰⵔⵏ ⵏ ⵉⵄⵔⵔⵉⵎⵏ ⴷ ⵡⴰⵣⵣⴰⵏⵏ, ⵙ ⵜⵡⵉⵍⴰ ⵜⴰⵎⵙⵙⵓⴷⵙⵜ ⵉⵙⵓⵍⵏ. ⴳ ⵓⵎⴳⴳⴰⵔⵓ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴰⴷⴼ ⵏ ⵜⵏⴽⵔⴰ ⵜⴰⴷⵍⵙⴰⵏⵜ ⵉⵜⵜⴰⴷⵊⴰⵏ ⴰⵎⵓⵏ ⴰⴷ ⵉⴷⵉⵡⵍ ⵅⴼ ⵜⵎⵙⵍⴰⵢⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵙⵉⵍⴰⵡⵜ ⵏ ⵜⵎⵔⴰⵔⵓⵜⵉⵏ ⵉ ⵜⵎⵙⴰⵔⵉⵏ ⵜⵉⵜⵔⴰⵔⵉⵏ, ⵜⵙⴷⴷⵉⴷ ⵅⴼ ⵜⵎⵙⵜⴳⴳⴰⵔⵜ ⵜⴰⵏⴰⵎⵓⵏⵜ ⵏ ⵜⵙⴷⴰⵡⵉⵜ ⵜⴰⵎⵖⵔⵉⴱⵉⵜ ⴰⴼⴰⴷ ⴰⴷ ⵜⴳ ⵜⴰⵡⵏⵏⴰⴹⵜ ⵉⵜⵜⴹⵉⵚⵏ ⴳ ⵡⴰⵏⴰⵡ ⵏ ⵉⵎⵢⴰⵙⵙⴰⵜⵏ ⴷ ⵓⵙⵎⵓⵜⵜⴳ ⵏ ⵡⴰⵏⵏⵍⵉⵜⵏ ⵉⴷⴷⵖ " ⵜⴳⴰ ⵜⴰⵎⵖⵔⴰⵜⵜ, ⵓⴳⴳⴰⵔ ⵏ ⴽⵔⴰ ⵏ ⵜⵎⵔⵙⵍⵜ ⵢⴰⴹⵏⵉⵏ, ⴰⴼⴰⴷ ⴰⴷ ⵜⴳ ⵓⵔ ⴷ ⵅⵙ ⵜⴰⵎⵙⴷⵍⵜ ⵏ ⵜⵉⵏⴷⵉⵜⵉⵏ ⵏ ⵉⵙⴽⵉⵍ ⴷ ⵓⴱⵓⵔⵣ ⵎⴰⵛ ⴰⵡⴷ ⵜⴰⵎⵙⵔⵓⵙⵜ ⵏ ⵜⵓⵍⴳⵉⵏⵜ ⵏⵏⵙ ⵜⴰⵡⵏⴳⵉⵎⵜ ⴷ ⵜⵙⵔⵜⴰⵏⵜ". ⵉⵜⵜⵡⴰⵙⵙⵏ ⵓⵏⵎⵓⵇⵇⴰⵔ ⴰⴷ ⴰⵎⵢⴰⵖ, ⵏⵏⴰ ⵜⵙⵏⵎⴰⵍⴰ "ⵜⴳⵔⵓⵎⵎⴰ ⵏ ⵓⵔⵣⵣⵓ ⵅⴼ ⵜⵎⵙⵙⵓⴳⵓⵔⵜ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ" ⴷ "ⵓⵙⴰⵔⵎ ⵏ ⵜⵖⵓⵔⵉⵡⵉⵏ ⵜⵉⴷⵙⵜⴰⵔⵉⵏ ⴷ ⵓⵙⴼⵙⵉ ⵏ ⵜⴰⵙⵙⴰⵙⵉⵏ ⴷ ⵜⵙⵔⵜⴰⵢ" ⵉⴹⴼⵕⵏ ⵉ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵉⵣⵔⴼⴰⵏⵉⵏ ⴷ ⵜⴷⴰⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵎⵕⵕⴰⴽⵛ, ⵙ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵜⵎⵏⴰⴹⵜ ⵏ ⵎⵕⵕⴰⴽⵛ-ⴰⵙⴼⵉ, ⵎⴰⵙⵙ ⵎⵚⵟⴰⴼⴰ ⵍⵄⵕⵉⵚⴰ, ⴷ ⴽⵔⴰ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ, ⴰⵏⵙⵙⵉⵅⴼ ⵏ ⵜⵙⴷⴰⵡⵉⵜ ⵍⵇⴰⴹⵉ ⵄⵢⵢⴰⴹ ⵎⴰⵙⵙ ⵃⴰⵙⴰⵏ ⴰⵃⴱⵉⴹ, ⴷ ⵉⵎⵙⵜⴳⴳⴰⵔⵏ ⵏ ⵜⵖⵉⵡⴰⵏⵜ ⴷ ⵉⵎⵣⴷⴰⵢⵏ ⵏ ⵉⵙⴰⵔⵎⵏ ⵏ ⵉⵔⵣⵣⵓⵜⵏ ⵏⵏⵙ ⴷ ⵉⵎⵃⴹⴰⵕⵏ ⵏ ⵓⵎⴰⵙⵜⵔ "ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⵜⵉⵎⴰⵜⴰⵢⵉⵏ".