ⵜⴳⴰ ⵜⵎⵢⴰⴳⴰⵏⵜ ⴳ ⵡⴰⵎⴰⵏ ⴷ ⵓⵙⵉⵣⴷⴳ ⵉ ⵜⵙⵓⵜ ⵏⵏⵖ ⴷ ⵜⵙⵓⵜⵉⵏ ⵏ ⵢⵉⵎⴰⵍ, ⴳ ⵓⵙⵏⴼⵍ ⵏⵏⵖ ⵉ ⵓⵙⵡⵓⴷⴷⵓ ⵏⵏⵖ ⵉ ⵓⵙⴱⴷⴷⵉ ⵏ ⵓⵙⵙⵎⵓⵔ ⵏ ⵡⴰⵎⴰⵏ ⴷ ⵜⵎⵏⵍⵍⵉⵜ ⵏ ⵓⵙⵖⵍⵍⴰ ⵏ ⵓⵙⴰⴳⵯⵎ ⴰⴳⴰⵎⴰⵏ ⴰⴷⵙⵍⴰⵏ ⵉ ⵓⵣⴳⴳⵓ ⴰⵏⴰⵎⵓⵏ ⴷ ⵜⵏⴼⵔⵓⵜ ⵏ ⵓⵣⵔⴼ ⵏ ⵇⴰⵃ ⴳ ⵡⴰⵎⴰⵏ ⵢⵓⵡⴷⴰⵏ ⴷ ⵉⵜⵜⵡⴰⴹⵎⴰⵏⵏ". ⵉⴷⴷⴰ ⴷ ⵎⴰⵢⴰ ⵏⵏ ⴳ ⵜⴳⵓⵔⵉ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⵙⵇⵇⴰⵢⵎⵓⵜ ⵜⴰⵎⵣⵡⴰⵔⵓⵜ ⵏ ⵓⵙⵖⵏⵓ ⵏ ⵜⵙⵇⵇⴰⵢⵎⵓⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⵅⴼ ⵜⵎⵙⴰⵔⵉⵏ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴰⵙⴳⵓⵎ ⵏ ⵜⵎⵣⵡⴰⵔⵓⵜ ⴳⵉⵙⵏⵜ ⵅⴼ "ⴰⵣⵔⴼ ⴳ ⵡⴰⵎⴰⵏ ⵜⴰⴼⴰⴷⴰ ⵜⴰⴷⵙⵍⴰⵏⵜ ⵉ ⵓⴼⵊⵊⵉⵊ ⵙ ⵉⵣⵔⴼⴰⵏ ⵏ ⵓⴼⴳⴰⵏ", ⴰⵙⵙ ⵏ ⵓⵙⵉⵏⴰⵙ 27 ⵛⵓⵜⴰⵏⴱⵉⵔ 2022 ⴳ ⵓⵙⵉⵏⴰⴳ ⵕⵕⴱⴰⵟ -ⴷⵔⵉⵙ ⴱⵏⵣⴽⵔⵉⵉ ⵉⵣⵔⴼⴰⵏ ⵏ ⵓⴼⴳⴰⵏ. 

ⴳ ⵓⵙⵉⵡⵍ ⵏⵏⵙ ⵅⴼ ⵜⵎⵏⵜⵉⵍⵉⵏ ⴱⴰⴹⵏⵉⵏ ⴳ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵏ ⵡⴰⵎⴰⵏ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵓⵔ ⵏⵥⴹⴰⵕ ⴳ ⵓⵎⵏⴰⴹ ⴰⵏⴰⵎⵓⵔ ⵏ ⵖⵉⵍⴰⴷ ⴰⴷ, ⴷ ⵓⵙⵔⵙ ⵏ ⵉⵥⵕⵉ ⵅⴼ ⵓⴱⵓⵖⵍⵓ ⵏ ⵉⵙⵏⵎⴽⴰⵜⵏ ⵏ ⵓⵙⵙⵎⵓⵔ ⵏ ⵉⵙⵓⴳⴰⵎ ⵏ ⵡⴰⵎⴰⵏ, ⴰⴷ ⵏⵙⵙⴱⴰ ⵎⴰⵙ ⵙⵙⵖⴱⴰⵏⵜ ⵜⵎⵏⵜⵉⵍⵉⵏ ⵜⵉⵏⴼⴳⴰⵏⵉⵏ ⵙ ⵜⵉⵍⴰⵍⵜ ⵏⵏⵙⵏⵜ ⴰⵙⵙⵎⵓⵔ ⵏ ⵡⴰⵎⴰⵏ, ⵙⵙⵎⵓⵔⵏⵜ ⴰⴳⵣⵣⵓⵎ ⴰⵎⵇⵇⵔⴰⵏ ⵏ ⵉⵙⵓⴳⴰⵎ ⵏ ⵡⴰⵎⴰⵏ, ⵙⵍⴰⵡⴰⵏ ⴰⴽⴽⵯ ⵡⵉⵏ ⵊⴰⵊ ⵏ ⵡⴰⴽⴰⵍ. 

ⴰⵔ ⵜⵜⴰⵏⵏⴰⵢ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴳⴰⵏ ⵡⴰⵎⴰⵏ ⴰⵢⴷⴰ ⴰⵏⴰⵎⵓⵔ ⴰⵎⵏⴱⴰⴹ, ⵉⵍⵍⴰ ⵅⴼ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴰⴷ ⵙⵡⵓⵔⵉⵏⵜ ⵅⴼ ⵓⵙⵏⴰⵎ ⵏ ⵓⵙⵡⵓⴷⴷⵓ ⵏⵏⵙ, ⵙ ⵜⵡⵉⵍⴰ ⵢⴰⴽⵙⵓⵍⵏ, ⵉ ⵓⵙⵙⵎⵓⵔ ⴰⵏⵉⵎⴰⵏ ⴷ ⵓⵙⴽⵔⴼ ⵏ ⵜⵎⴳⴳⵉⵜⵉⵏ ⴷ ⵓⵣⵣⵔⵓⵢ ⵅⴼ ⵡⴰⵜⵉⴳ ⵉ ⵓⵙⵎⵔⵙ ⵡⴰⵔ ⴰⵏⵉⵎⴰⵏ. ⵜⵉⵏⵉ ⵎⴰⵙ ⵉⵙⵡⵓⵜⵜⵙ ⵓⵙⵇⵇⵉⵎ ⵙ ⵓⵙⵏⵎⴰⵍⴰ ⵏ ⵜⵙⵇⵇⴰⵢⵎⵓⵜ ⴰⴷ ⵜⴰⴷⵔⴰⵡⵜ ⴳ ⵓⵙⵡⵓⵜⵜⵓ ⵏ ⵜⵎⵓⴽⵔⵉⵙⵉⵏ ⵜⵉⴷⵙⵍⴰⵏⵉⵏ ⵣⴷⵉⵏⵉⵏ ⵙ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵏ ⵡⴰⵎⴰⵏ, ⴷ ⵜⵙⵓⵎⵔⵜ ⵏ ⵉⴼⵙⵙⴰⵢⵏ ⵉ ⵓⵎⵏⴰⵍⴰ ⵏⵏⵙ ⵙⴳ ⵜⵖⵎⵔⵜ ⵏ "ⵓⵣⵔⴼ ⴳ ⵡⴰⵎⴰⵏ" ⵙ ⵓⵎⵢⴰⵙⵙⴰ ⵏⵏⵙ ⵙ ⵉⵣⵔⴼⴰⵏ ⵢⴰⴹⵏⵉⵏ, ⴰⵎⵣⵡⴰⵔⵓ ⴳⵉⵙⵏ ⴰⵣⵔⴼ ⴳ ⵜⵓⴷⵔⵜ, ⴷ ⵓⵣⵔⴼ ⵏ ⵜⵙⵓⵜⵉⵏ ⵏ ⵢⵉⵎⴰⵍ ⵙⴳ ⵡⴰⵢⴷⴰ ⴰⴷ ⵏ ⵜⵓⴷⵔⵜ ⵙ ⵓⵙⵎⵏⵉⴷ ⵏ ⵉⵎⵙⴳⵔⴰ ⴷ ⵉⵙⵖⵍⴰⴼ ⴳ ⵓⵎⵏⵉⴷ ⴰⴷ. 

ⴳ ⵎⴰⴷ ⵉⵥⵍⵉⵏ ⵙ ⵜⵎⴳⴳⵉⵜⵉⵏ ⵜⵜⵡⴰⵙⴰⵢⵏⵉⵏ ⵉ ⵓⵎⵏⴰⵍⴰ ⵏ ⵓⵙⵓⵔⵙ ⴰⴷ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵣⵎⵎⴻⵎ ⵓⵙⵇⵇⵉⵎ, ⴰⵔ ⴰⵙⵙ ⴰ, ⴷ ⵎⵇⵇⴰⵔ ⴷ ⵉⵏⵎⵔⴰⵏ ⵏ ⵡⴰⴷⴷⴰⴷ ⵏ ⵉⵖⴰⵡⵍⵏ ⵏ ⵡⴰⵎⴰⵏ, ⵎⴰⵙ ⵜⵙⵓⵍ ⵜⵓⴽⴽⵉ ⵏ ⵡⴰⵎⴰⵏ ⵉ ⵉⵏⵎⵓⵔⴰⵏ ⵎⵇⵇⴰⵔ ⵡⵔⵔⵉⵏⵜ ⴽⵔⴰ ⵏ ⵜⵖⵔⵎⵉⵏ ⵙ ⵜⵙⵖⵣⵏⵜ ⵏ ⵜⵎⴳⴳⵉⵜⵉⵏ ⵉ ⵓⵙⵙⵉⴷⵔⵓⵙ ⵏ ⵓⵏⵛⵜ, ⴷ ⵓⴱⵓⵢ ⵏ ⵡⴰⵎⴰⵏ ⴳ ⵜⵙⵔⴰⴳⵉⵏ, ⵎⴽⴷⴰ ⵉⴳⴰ ⵡⴰⴷⴷⴰⴷ ⴳ ⵜⵖⵔⵎⵜ ⵏ ⵓⵙⴼⵉ ⴳ ⵜⴳⵉⵔⴰ ⵏ ⵉⵎⴰⵍⴰⵙⵙ ⴰⴷ, ⵎⴽⴷⴰ ⵉⵣⵎⵎⴻⵎ ⵜⴰⵖⵜⴰⵙⵜ ⵜⴰⵎⴳⴳⴰⵔⵓⵜ ⵅⴼ ⵓⵥⵍⴰⵢ ⵏ ⵡⴰⵏⵏⴰⵍ ⴰⴳⴷⵓⴷⴰⵏ ⵉ ⴽⵔⴰ ⵏ ⵡⴰⵏⴰⵡⵏ ⵏ ⵜⴽⵔⵣⴰ. 

ⴳ ⵓⵙⵉⵡⵍ ⵏⵏⵙ ⵅⴼ ⵉⵎⵔⵙⵉ ⵏ ⵜⴷⵔⵙⵉ ⵏ ⵡⴰⵎⴰⵏ ⴳ ⵓⵙⴰⵢⵔⴰⵔ ⴰⴼⴰⵔⴰⵏ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵛ ⵜⵙⵎⵏⵜⵍ ⵜⴷⵔⵙⵉ ⵏ ⵓⵙⴰⵜⵉⵎ ⵏ ⵡⴰⵎⴰⵏ ⴷ ⵓⵖⵓⵍ ⵏ ⵡⴰⵎⴰⵏ ⵏ ⵊⴰⵊ ⵏ ⵡⴰⴽⴰⵍ ⵙ ⵜⴰⵢⵢⵓⵖⵉⵏ ⵏ ⵜⵎⵣⵡⴰⴳⵜ ⵜⴰⴼⴰⵔⵏⵜ, ⵢⵓⵡⵙ ⴳⵉⵙ ⵓⵙⵙⵉⵏⴼ ⴷ ⵡⴰⵔ ⵜⵉⵍⵉⵜ ⵏ ⵜⵓⵚⴽⵉⵡⵉⵏ ⴷ ⵜⵏⵓⴼⴰ ⵜⵉⵏⴰⵎⵓⵏⵉⵏ, ⴰⴼⴰⴷ ⴰⴷ ⵥⴹⴰⵕⵏⵜ ⵉ ⵓⵟⵟⵓⵏⵏ ⵜⵜⵡⴰⵔⵏⴰⵏⵉⵏ ⵏ ⵡⵉⴷ ⵜⵜⵎⴰⵜⵜⴰⵢⵏⵉⵏ ⵙ ⵜⵖⵔⵎⵉⵏ. ⵜⵙⵉⵙⴼⵉⵡ ⵎⴰⵙ ⵙⵎⵏⵜⵍⵏ ⵉⵙⴳⴳⵯⴰⵙⵏ ⵏ ⵜⴰⵖⴰⵔⵜ ⴷ ⵜⴷⵔⵙⵉ ⵏ ⵡⴰⵎⴰⵏ ⵉ ⵓⵙⵎⵔⵙ ⵏ ⵜⴰⴷⴷⴰⵔⵜ ⵡⴰⵍⴰ ⵡⵉⵏ ⵜⵎⵙⵡⵉⵜ ⵉ ⵉⵏⴼⵍⴰⵃⵏ ⵉⵎⵥⵢⴰⵏⵏ ⵏⵏⴰ ⵎⵉ ⵜⴳⴰ ⵜⵏⴼⵍⴰⵃⵜ ⴰⵙⴰⴳⵯⵎ ⴰⵎⵢⵢⵉⵡⵏ ⵏ ⵜⵏⵓⴷⴰⴼ, ⵙ ⵜⵕⵥⵉ ⵏ ⵉⵣⵔⴼⴰⵏ ⵏ ⵉⵙⵎⵉⵍⵏ ⴽⵓⴽⴹⵏⵉⵏ ⴷ ⵉⵣⵔⴼⴰⵏ ⵉⵎⵇⵇⵔⴰⵏⵏ ⵢⴰⴹⵏⵉⵏ, ⵙⵍⴰⵡⴰⵏ ⴰⴽⴽⵯ ⴰⵣⵔⴼ ⴳ ⵜⵣⴷⵓⵖⵜ, ⴰⵣⵔⴼ ⴳ ⵡⵓⵜⵛⵉ, ⴰⵣⵔⴼ ⴳ ⵜⴷⵓⵙⵉ ⴷ ⵓⵙⵍⵎⴷ. 

ⵉⵙⵙⵓⵜⵍ ⵓⵎⴹⴰⴽⴰⵕ ⴳ ⵜⵙⵇⵇⴰⵢⵎⵓⵜ ⴰⴷ, ⵏⵏⴰ ⵎⵉ ⵉⵙⵙⵡⵀⵏ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ, ⵜⵉⵡⵓⵔⵉⵡⵉⵏ ⵏⵏⵙ, ⵜⴻⵜⵜⵡⴰⵙⵙⵏ ⵙ ⵜⴷⵔⴰⵡⵜ ⵏ ⵉⵎⵓⵣⴰⵢⵏ ⴳ ⵢⵉⴳⵔ ⵏ ⵡⴰⵎⴰⵏ ⴷ ⵓⵏⵣⵡⵉ, ⴷ ⵜⵣⵓⵏⴰ ⵜⵓⵏⴱⵉⴹⵉⵏ ⴷ ⵡⴰⵎⵓⵏ ⵓⵖⵔⵉⵎ ⴷ ⵉⵙⵍⵎⴰⴷⵏ ⵉⵙⴷⴰⵡⴰⵏⵏ, ⵅⴼ ⵜⵎⴰⵎⴽⵜ ⵏ ⵓⵎⵓⴳⴳⵓ ⴰⴽⴷ ⵜⴰⵖⴰⵔⵜ ⵏⵏⵉ ⵉⴳⴰⵏ ⵓⵎⵍⵉ ⵓⵚⴽⵉⵡ ⴳ ⵉⵙⵜⴰⵢⵏ ⵉⵏⴳⵎⵓⵜⵏ ⴷ ⵓⵙⴽⴰⵔ ⵙⴳ ⵓⵣⵔⴼ ⴳ ⵡⴰⵎⴰⵏ ⵎⵓⵎⵎⵓ ⵏ ⵜⵏⴼⵔⵓⵜ ⵏ ⵡⵓⵜⵛⵉ ⴷ ⵓⵎⵙⴰⵔⴰⵙ ⵅⴼ ⵓⵙⵖⵓⴷⵓ ⵏ ⵜⵉⵏⵏⵓⴱⴹⴰ ⵏ ⵜⵣⵓⵏⵉ ⵏ ⵡⴰⵎⴰⵏ ⵏⵏⵉ ⵉⴳⴰⵏ ⴰⵙⴰⴷⴼ ⵉ ⵓⵙⵡⵓⴷⴷⵓ ⵏ ⵓⵙⵙⵎⵓⵔ ⵏ ⵡⴰⵎⴰⵏ, ⴷ ⵓⴳⴳⴰⵔ. 

ⵎⴽⴷⴰ ⵎⴹⴰⴽⴰⵕⵏ ⵉⵎⴷⵔⴰⵡⵏ ⵅⴼ ⵜⵎⵓⴽⵔⵉⵙⵉⵏ ⵜⵉⴷⵙⵍⴰⵏⵉⵏ ⵣⴷⵉⵏⵉⵏ ⵙ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵏ ⵡⴰⵎⴰⵏ ⵙⵎⵏⵉⴷⵏ ⵉⵙⵖⵍⴰⴼ ⴷ ⵜⵙⵓⵎⵔⵉⵏ ⵏ ⵉⴼⵙⵙⴰⵢⵏ (ⵓⵍⴳⵉⵏⵏ, ⵉⵜⵉⵇⵏⵉⵢⵏ, ⵏⴼⴳⴰⵏⵏ,ⵉⵎⴰⵙⵙⴰⵏⵏ, ⵉⴼⵔⴽⴰⵏⵏ, ⵉⴷⵍⵙⴰⵏⵏ..) ⵣⵎⵔⵏⵉⵏ ⴰⴷ ⵜⵏ ⵎⵏⴰⵍⴰⵏ ⵙⴳ ⵜⵖⵎⵔⵜ ⵏ "ⵓⵙⵔⴼ ⴳ ⵡⴰⵎⴰⵏ" ⴳ ⵓⵣⴷⴰⵢ ⵏⵏⵙ ⵙ ⵉⵣⵔⴼⴰⵏ ⵢⴰⴹⵏⵉⵏ, ⵙⵍⴰⵡⴰⵏ ⴰⴽⴽⵯ ⴰⵣⵔⴼ ⴳ ⵜⵓⴷⵔⵜ, ⴷ ⵓⵣⵔⴼ ⵏ ⵜⵙⵓⵜⵉⵏ ⵏ ⵢⵉⵎⴰⵍ ⴳ ⵡⴰⵢⴷ ⴰⴷ ⴰⵎⴰⴷⵔⴰⵏ. 

ⴹⴰⵕⴰⵜ ⴰⵙⵙⵉⴽⵣ ⵏⵏⵙⵏ ⵉ ⵓⵙⵓⵔⵙ ⵏ ⵉⵙⵓⴳⴰⵎ ⵏ ⵡⴰⵎⴰⵏ ⴳ ⵜⵎⴰⵣⵉⵔⵜ ⵏⵏⵖ ⴷ ⵜⵓⵙⵓⵔⵉⵏ ⵏⵏⵙ ⵅⴼ ⵎⴰⵕⵕⴰ ⵉⵙⵡⵉⵔⵏ, ⵎⵛⴰⵛⴽⴰⵏ ⵉⵎⴷⵔⴰⵡⵏ ⵅⴼ ⵓⵙⵖⵓⵏ ⵏ ⵓⵙⴷⵓⵙ ⵏ ⵜⵎⴳⴳⵉⵜⵉⵏ ⵣⵎⵔⵏⵉⵏ ⴰⴷ ⵜⵙⵡⵓⵜⵜⵙⵏ ⴰⵙⵙⵎⵓⵔ ⵏ ⵡⴰⵎⴰⵏ ⵙ ⵜⵓⵎⵙⵉⵙⵜ ⵏ ⵜⵙⵔⵜⵉⵜ ⵜⴰⵏⴰⵎⵓⵔⵜ ⵏ ⵡⴰⵎⴰⵏ ⴰⴽⴷ ⵉⴱⵔⵔⵉⵡⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ; ⴰⵙⵖⵓⴷⵓ ⵏ ⵓⵙⵎⵓⵔ ⵏ ⵡⴰⵎⴰⵏ ⵙ ⵜⵓⵎⵙⵉⵙⵜ ⵏ ⵜⵓⵜⵜⵔⴰ ⴰⴽⴷ ⵉⵙⴳⵓⵎⵏ ⵍⵍⴰⵏⵉⵏ; ⴰⵙⴷⵓⵙ ⵏ ⵓⵙⴹⴼⵓⵜ ⵏ ⵡⴰⵎⴰⵏ ⵏ ⵢⵉⵍⵍ ⴷ ⵓⵙⵎⴽⵍ ⵏ ⵡⴰⵎⴰⵏ ⵏ ⵓⵙⵉⵣⴷⴳ; ⵉⴳⵉ ⵏ ⵜⵖⵓⵔⵉⵡⵉⵏ ⵏ ⵓⵚⴰⵃⴰ ⵉⵏⵖⴷⵏ ⵉ ⵉⵙⵖⵏⵓⵜⵏ ⵉⵡⵏⴹⴰⵏⵏ ⴷ ⵡⵉⵏ ⵡⴰⵎⴰⵏ (ⵜⵓⵚⴽⴰ ⵏ ⵓⴳⴳⵓⴳⵏ, ⴰⵎⴰⵏ ⵉⵜⵜⵓⵙⵡⴰⵍⴰⵏ ⵙ ⵜⵎⵙⵡⵉⵜ ⴷ ⵜⵉⵍⴰⵍ ⵜⵉⴷⵎⵙⴰⵏⵉⵏ, ⵜⴰⵢⵔⵣⴰ ⵏ ⵉⵙⴽⵯⵍⴰ, ⴷ ⵓⴳⴳⴰⵔ); ⴰⵙⴳⴳⴷ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵣⵓⵏⴰⵏⵉⵏ ⵏⵏⴰ ⴷ ⴷⴰⵔ ⴰⵣⴷⴰⵢ; ⴰⵙⴷⵓⵙ ⵏ ⵜⵉⵏⵏⵓⴱⴹⴰ ⵏ ⵡⴰⵎⴰⵏ ⵉ ⵜⵣⵓⵏⵉ ⴷ ⵓⵣⵣⵔⴰⵢ ⵏ ⵉⵙⵍⴳⵏⵏ ⵣⴷⵉⵏⵉⵏ ⵙ ⵡⴰⵎⴰⵏ ⴰⴽⴷ ⵢⵉⵡⵉⵣ ⵅⴼ ⵓⵣⵣⴳⵉⵔ ⵏⵏⵙ; ⴰⵙⵔⵓⵙ ⵏ ⵜⵙⵏⴱⴹⴰⵢⵉⵏ ⵏ ⵡⴰⵎⴰⵏ; ⴰⵙⴷⵔⴰⵡ ⵏ ⵉⵎⵙⵎⵔⴰⵙⵏ ⵏ ⵡⴰⵎⴰⵏ ⴳ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵏ ⵡⴰⵎⴰⵏ; ⴷ ⵓⴳⴳⴰⵔ.