ⴳ ⵓⵙⴰⵜⵉ ⵏ ⵜⵙⵓⵜⵍⵜ ⵜⵉⵙ ⵜⵥⴰⵜ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵡⴰⵎⴰⵏ, ⵉⵜⵜⵓⵙⵏⵎⴰⵍⴰⵏ ⴷⴷⴰⵡ ⵜⵎⴰⵜⴰⵔⵜ "ⵜⴰⵏⴼⵔⵓⵜ ⵏ ⵡⴰⵎⴰⵏ ⵅⴼ ⵓⴼⵔⴰ ⴷ ⵜⴳⵎⵉ" ⴳ ⵜⵎⴰⵥⵓⵏⵜ ⵜⴰⵙⵉⵏⵉⴳⴰⵍⵉⵜ ⴷⴰⴽⴰⵕ, ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵎⴷⵔⴰⵡⵜ ⴰⴽⴷ ⵜⴰⴹⴰ ⵜⴰⵎⵖⵔⵉⴱⵉⵜ ⵏ ⵡⴰⵎⴰⵏ, ⴰⵙⵙ ⵏ ⵓⵙⵉⵏⴰⵙ 22 ⵎⴰⵕⵚ 2022, ⵢⴰⵏ ⵓⵏⵎⵓⵇⵇⴰⵔ ⵅⴼ ⵉⵎⵔⵙⵉ "ⴰⵣⵔⴼ ⴳ ⵡⴰⵎⴰⵏ: ⵉⴳⵔ ⵉⵏⵏⵖⵍⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⴼⵔⵉⵇⵢⴰ". ⵙ ⵜⵎⵍⴷⴰ ⴰⴷ, ⵜⵙⵙⴼⴰⵡ ⵎⴰⵙⵙⴰ ⵃⵓⵔⵉⵢⴰ ⵚⴰⴷⵉⵇ ⵜⵜⴰⵣⵉ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵕⵕⴱⴰⵟ-ⵙⵍⴰ-ⵍⵇⵏⵉⵟⵕⴰ, ⵎⴰⵙ ⴷ ⵙ ⵓⵎⵙⴰⵙⴰ ⴰⴽⴷ ⵜⵎⵥⵍⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ ⴷ ⵓⴹⴼⴼⵓⵕ ⵏ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ, ⵜⵙⵔⵙ ⵜⵙⵇⵇⵉⵎⵜ ⵢⴰⵜ ⵜⴳⵔⵓⵎⵎⴰ ⵉⵏⵜⴰⵢⵏ ⵙ ⵓⵣⵔⴼ ⴳ ⵡⴰⵎⴰⵏ ⵢⵓⵎⴰⵏ ⵜⵓⴳⵜ ⵏ ⵉⵏⴽⵛⴰⵎⵏ ⴷ ⵉⵎⴳⴳⴰⵢⵏ ⵉⵏⵜⴰⵢⵏ ⵙ ⵓⵙⴽⴽⵉⵏ ⴰⴷ ⴳ ⵓⵙⵡⵉⵔ ⵏ ⵜⵎⵏⴰⴹⵜ, ⴰⴼⴰⴷ ⴰⴷ ⵜⵙⵎⴽⵍ ⵜⴰⵎⵙⵍⴰⵢⵜ ⵏ ⵓⵣⵔⴼ ⴳ ⵡⴰⵎⴰⵏ ⵙⴳ ⵓⵎⵏⴰⴷ ⵏ ⵜⴳⵎⵉ ⵜⴰⵙⵓⵍⴰⵏⵜ. ⵓⵔ ⵜⴻⵜⵜⵓ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⴰⴷ ⵜⵙⵙⴽⵜⵉ ⵎⴰⵙ ⵓⵔ ⵉⴳⵉ ⵓⵣⵔⴼ ⴳ ⵡⴰⵎⴰⵏ ⴰⵣⵔⴼ ⵏⵏⴰ ⵉⵜⵜⵓⵙⴷⵓⵙⵏ ⵖⵉⵍⴰⴷ, ⵎⴰⵛ ⴰⵣⵔⴼ ⵉⵜⵜⵢⴰⵔⴰⵏ ⴳ ⴽⵉⴳⴰⵏ ⵏ ⵜⴻⵜⴳⴰⵔⵉⵏ ⴷ ⵜⵎⵢⴰⵇⵇⴰⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎ ⵜⴰⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵇⴰⵃ ⵡⴰⵏⴰⵡⵏ ⵏ ⵓⵙⵏⵓⵃⵢⵓ ⵎⴳⴰⵍ ⵜⵎⵖⴰⵔⵜ ⴷ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ, ⵜⵔⵏⵓ ⵎⴰⵙ ⵔⴰⴷ ⵜⵎⵄⵏ ⵜⵓⵙⵏⵜ ⴰⴷ ⴽⵉⴳⴰⵏ ⵍⵍⵉⵖ ⵉⵙⵖⵣⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴰⵙⴳⴳⵯⴰⵙ ⵏ 2010 ⵜⴰⵖⵜⴰⵙⵜ ⵅⴼ ⵓⵣⵔⴼ ⴳ ⵡⴰⵎⴰⵏ ⴷ ⵓⵍⴰ ⵜⴰⵖⵜⴰⵙⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵉⵣⴷⴳ ⴰⴷⵓⵙⴰⵏ. ⵙⴳ ⵜⵙⴳⴰ ⵏⵏⵙ, ⵉⴷⵔⵓ ⵎⴰⵙⵙ ⵜⴰⵡⴼⵉⵇ ⵍⴱⵔⴷⵉⵊⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⴳ ⵜⵎⵏⴰⴹⵜ ⵏ ⵍⵄⵢⵓⵏ-ⵙⵙⴰⵇⵢⴰ-ⵍⵃⵎⵕⴰ, ⴳ ⵢⴰⵜ ⵜⵙⴰⵡⵔⵜ ⵏ ⵓⵎⴹⴰⴽⴰⵕ ⵜⵙⵏⵎⴰⵍⴰ ⵜⵜ "ⵜⴰⴹⴰ ⵜⴰⵎⵖⵔⵉⴱⵉⵜ ⵏ ⵡⴰⵎⴰⵏ", ⴰⵙⵙ ⵏ ⵓⴽⵕⴰⵙ 23 ⵎⴰⵕⵚ 2022, ⵅⴼ ⵉⵎⵔⵙⵉ "ⴰⵙⵡⵓⴷⴷⵓ ⵏ ⵉⵎⵉⵣⵉⵜⵏ ⵣⴷⵉⵏⵉⵏ ⵙ ⵉⵙⵓⴳⴰⵎ ⵏ ⵡⴰⵎⴰⵏ ⴷ ⵜⴱⵔⵉⴷⵉⵏ ⵏ ⵓⵎⵢⴰⵡⴰⵙ ⴷ ⵜⴷⵔⴰⵡⵉⵏ ⵉⵏⴳⵔ ⵜⵣⵓⵏⵉ ⵜⴰⵎⴰⵜⴰⵢⵜ ⴷ ⵜⵣⵓⵏⵉ ⵜⵓⵙⵍⵉⴳⵜ?". ⵉⴳ ⵓⵏⵎⵓⵇⵇⴰⵔ ⴰⴷ ⴰⵣⵎⵣ ⵏ ⵓⴼⵙⴰⵔ ⵏ ⵜⵙⵎⵉⴳⴰⵍ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵓⵎⴰⵕ ⴰⴳⵣⵣⵓⵎ ⵣⴷⵉⵏⵉⵏ ⵙ ⵓⴹⴼⴼⵓⵕ ⴷ ⵓⵙⵓⵜⴳ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴳ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⴳ ⵓⵙⵡⵉⵔ ⴰⵏⵎⵏⴰⴹ, ⴰⵎ ⴰⵣⵔⴼ ⴳ ⵡⴰⵎⴰⵏ. ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵙⵙⵓⵜⵔ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵡⴰⵎⴰⵏ, ⵏⵏⴰ ⵎⵉ ⵜⵙⴷⵍ ⵜⵖⵔⵎⵜ ⵏ ⵎⵕⵕⴰⴽⵛ ⵜⴰⵙⵓⵜⵍⵜ ⵏⵏⵙ ⵜⴰⵎⵣⵡⴰⵔⵓⵜ ⴰⵙⴳⴳⵯⴰⵙ 1997, ⴰⵙⵎⵓⵙⵙⵓ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⵅⴼ ⵜⵎⵙⴰⵔⵉⵏ ⵣⴷⵉⵏⵉⵏ ⵙ ⵡⴰⵎⴰⵏ ⴷ ⵓⵔⵣⵣⵓ ⵏ ⵜⴱⵔⵉⴷⵉⵏ ⵏ ⵓⵙⵎⴽⵍ ⵏ ⵉⵏⵏⴳⵣⵉⵜⵏ ⵏ ⵖⵉⵍⴰⴷ ⴳ ⵢⵉⴳⵔ ⵏ ⵡⴰⵎⴰⵏ ⴷ ⵓⵍⴽⴰⵎ ⵙⵔⵙⵏ ⴷ ⵓⵙⴷⵓⵙ ⵏ ⵜⵙⵔⵜⴰⵢ ⵜⵉⵏⴰⵎⵓⵔⵉⵏ ⵅⴼ ⵓⵙⵉⴷⴼ ⵏ ⵇⴰⵃ ⵙ ⵡⴰⵎⴰⵏ ⴷ ⵓⵙⵉⵣⴷⴳ.