ⵉⵜⵜⵡⴰⵙⵜⴰⵢ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴼⵔⵉⵙⵜ ⵏ ⵓⴳⵏⵙⴰⵙ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ, ⴰⴳⵎⴰⵎ ⴳ ⵓⵙⵉⵔⴰ ⵏ ⵜⴰⴹⴰ ⵉⴳⴳⵉⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI), ⵙ ⵜⵎⵍⴷⴰ ⵏ ⵓⵏⵎⴰⵍⴰ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ 2 ⵏⵓⵡⴰⵏⴱⵉⵔ 2021. 

ⴳ ⵓⵎⵏⴰⴹ ⴰⴷ, ⵉⵜⵜⵡⴰⵍⵙ ⵓⵙⵜⴰⵢ ⵏ ⵓⵙⵇⵇⵉⵎ, ⵙ ⵜⴼⵔⵉⵙⵜ ⵏ ⵓⴳⵏⵙⴰⵙ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⴰⴳⵎⴰⵎ ⴳ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏⵏⴰ ⵢⴰⴽⴽⴰⵏ ⵜⴰⵙⵖⵣⵏⵜ ⵉ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (SCA), ⵉⴹⴼⵕⵏ ⵉ ⵜⴰⴹⴰ ⵉⴳⴳⵉⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴳⵎⴰⵎ ⴳ ⵜⵔⴰⴱⴱⵓⵜ ⵏ ⵜⵡⵓⵔⵉ ⵏ ⵜⴰⴹⴰ ⵉⵏⵜⴰⵢⵏ ⵙ ⵜⵎⵙⵙⵏⵜⵉⵜⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵉⴳⴳⵉ ⵏ ⵙⵏⴰⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵍⵎⴰⵍⴰⵡⵉ ⴷ ⵍⴽⴰⵎⵉⵕⵓⵏ. 

ⴳ ⵜⵙⵎⵓⵏⵉ ⴰⴷ, ⵉⵜⵜⵡⴰⵍⵙ ⴰⵡⴷ ⵓⵙⵜⴰⵢ ⵏ ⵓⵙⵇⵇⵉⵎ ⴷ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵓⵣⵡⴰⴳ, ⵙ ⵜⵎⵔⵏⵉⵡⵜ ⵅⴼ ⵓⵙⵜⴰⵢ ⵏⵏⵙ ⴷ ⴰⵏⴳⵎⴰⵎ ⴳ ⵜⵙⵇⵇⵉⵎⵜ ⵏ ⵓⵜⵓⵢ ⵉⴹⴼⵕⵏ ⵉ ⵜⵎⵔⵙⴰⵍ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴳⵏⵙⴰⵙ ⵏ ⵜⵎⵏⴰⴹⵜ ⵜⴰⵢⵢⴰⵡⵜ ⵏ ⵉⵥⵥⵍⵎⴹ, ⵅⴼ ⵉⴳⴳⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵖⴰⵏⴰ ⴷ ⵕⵓⵡⴰⵏⴷⴰ ⴷ ⵜⴳⴷⵓⴷⴰⵏⵜ ⵏ ⵍⴽⵓⵏⴳⵓ ⵉⴳⴳⵉⴳⴷⵓⵜ ⴷ ⵟⵟⵓⴳⵓ ⴷ ⴽⵉⵏⵢⴰ ⴷ ⵎⵉⵚⵕ. ⵙ ⵜⵙⵓⵎⵔⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵙⵉⵖⵥⵉⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵏⴰⵢ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵉⵜⵜⵡⴰⵙⵜⴰⵢ ⴳⵉⵙ ⵓⵙⵇⵇⵉⵎ ⴷ ⴰⵏⴳⵎⴰⵎ. 

ⵅⴼ ⵉⴳⴳⵉ ⵏ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵉⵏⴳⵎⴰⵎⵏ ⵏ ⵓⵥⵟⵟⴰ, ⵉⵎⵙⴳⴷⴰⵍ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵙⵜⵕⴰⵜⵉⵊⵉⵜ ⵏ 2022-2025, ⵜⴼⵙⵔ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏ ⵜⵔⴰⴱⴱⵓⵜ ⵉⵏⵜⴰⵢⵏ ⵙ ⵓⵣⵡⴰⴳ ⴳ ⵜⵉⵣⵉ ⵏ ⵓⵙⴳⴳⵯⴰⵙ 2020. ⵎⴽⴷⴰ ⵜⵙⵙⵏ ⵜⵙⵎⵓⵏⵉ ⴰⵙⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵣⵉⵎⴱⴰⴱⵡⵉ ⴷ ⴰⵏⵙⵙⵉⵅⴼ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. 

ⵉⴼⵓⴽ ⴰⴷ ⵏⵉⵏⵉ ⵎⴰⵙ ⵜⴷⵔⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵙ ⵏ 4 ⵏⵓⵡⴰⵏⴱⵉⵔ 2021 ⴳ ⵉⴳⴳⵉ ⵏ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵏⵎⵓⵇⵇⴰⵔ ⴰⵎⵢⴰⵖ ⴳ ⵜⵓⴳⴳⵓⴳⵜ ⴰⴽⴷ ⵓⵎⴰⵍⴰⵍ ⵏ ⵜⵎⵜⵜⴰ ⵉⵎⵓⵏⵏ ⵢⴰⵜⵜⵓⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⵎⵉⵛⵉⵍ ⴱⴰⵛⵍⵉⵜ, ⵅⴼ ⵉⴳⴳⵉ ⵏ ⵙⵙⵎⵓⵙⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵜⵎⵙⴽⵔⵜⵉⵏ ⵖⵓⴷⴰⵏⵉⵏ ⵏⵏⴰ ⵙⵖⵣⵏⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴳ ⵓⵣⵎⵣ ⵏ ⵓⴱⴰⵢⵢⵓⵕ ⴽⵓⴼⵉⴷ-19. 

ⵙⴳ ⵜⵙⴳⴰ ⵢⴰⴹⵏⵉⵏ, ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⴰⵜ ⵜⵉⵏⴰⵡⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵉⵎⵔⵙⵉ "ⵜⴰⵎⵍⵉⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵙⵉⴷⵔⵓⵙ ⵏ ⵓⵎⵣⴰⵔⴰⵢ ⵏ ⵜⵎⵙⵜⴳⴳⴰⵔⵜ ⴳ ⵡⴰⴷⴷⴰⴷ ⵏ ⵉⵖⴰⵡⵍⵏ ⵏ ⵓⵏⵣⵡⵉ", ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ 5 ⵏⵓⵡⴰⵏⴱⵉⵔ 2021 ⴳ ⵉⴳⴳⵉ ⵏ ⵓⴳⵔⴰⵡ 26 ⵏ ⵉⵡⴰⵏⴽⵏ ⴳⴰⵏⵉⵏ ⵜⵉⴼⵓⵍⵉⵏ ⴳ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵏⵏⴰ ⵉⴳⴰⵏ ⴰⵙⴰⵜⵉ ⵅⴼ ⵓⵙⵏⴼⵍ ⵓⵏⵣⵡⵉ. 

ⴳ ⵜⵉⵏⴰⵡⵜ ⴰⴷ, ⵜⵙⵏⵓⴱⴳ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵙ ⵜⵖⵜⴰⵙⵜ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ, ⵏⵏⴰ ⵉⵇⵕⵕⴰⵏ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ ⵙ ⵓⵣⵔⴼ ⴳ ⵜⵡⵏⵏⴰⴹⵜ ⵜⴰⵎⵉⵣⴷⵉⴳⵜ ⵜⴰⴷⵓⵙⴰⵏⵜ ⴷ ⵜⵙⵓⵍⴰⵏⵜ ⴰⴷ ⵉⴳ ⵢⴰⵏ ⵓⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵏⵉ ⵎⴰⵙ ⵉⴳⴰ ⵓⵙⵖⵏⵓ ⵏ ⵜⵖⵜⴰⵙⵜ ⵏⵏⴰ ⵙⵓⵎⵔⵏ ⵙⵎⵎⵓⵙ ⵏ ⵉⵡⴰⵏⴽⵏ, ⴳⵉⵙⵏ ⵍⵎⵖⵔⵉⴱ, ⵉⴳⴰ ⴰⵙⴷⴷⵉⴷ ⵏ ⵜⵣⵎⵎⴰⵔ ⵏⵏⴰ ⵜⵜⴳⴳⴰⵏ ⴽⵉⴳⴰⵏ ⵏ ⵉⵎⴳⴳⴰⵢⵏ, ⵏⵏⴰ ⴳ ⵍⵍⴰⵏⵜ ⴰⵡⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.