ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ (CNDH), ⴰⵙⵙ 14 ⵏⵓⵡⴰⵏⴱⵉⵔ 2024, ⴷ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (RINADH), ⵙ ⵜⴼⵔⵉⵙⵜ ⵏ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵣⵡⴰⴳⵜ ⵏⵏⵉ ⴰⵙ ⵉⴹⴼⵕⵏ, ⵢⴰⵏ ⵓⵏⵎⵓⵇⵇⴰⵔ ⴰⵎⵙⴷⴰⵖ ⴳ ⵜⴰⵎⴰ ⵏ ⵜⵙⵓⵜⵍⵜ ⵜⵉⵙ 29 ⵏ ⵜⵉⵏⴰⵡⵜ ⵏ ⵜⴼⵓⵍⵉⵏ ⵅⴼ ⵓⵏⴳⵉⴳⵜ (COP 29) ⴳ ⴱⴰⴽⵓ, ⴰⵣⵉⵔⴱⵉⴷⵊⴰⵏ. ⵉⵜⵜⵡⴰⵥⵍⴰⵢ ⵓⵏⵎⵓⵇⵇⴰⵔ ⴰⴷ ⵉ ⵓⵎⴹⴰⴽⴰⵕ ⵅⴼ ⵉⴱⵔⴷⴰⵏ ⵏ ⵓⵙⴷⵓⵙ ⵏ ⵓⵏⵄⴰⵕ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵣⵡⴰⴳⵏ ⴳ ⵓⵎⵏⴰⴹ ⵏ ⵉⵙⵏⴼⵍⵏ ⵏ ⵓⵏⴳⵉⴳⵜ ⴳ ⵉⴼⵔⵉⵇⵉⵢⴰ.

ⵉⴼⵙⵔ ⵓⵙⵇⵇⵉⵎ ⵙ ⵜⵎⵍⴷⴰ ⴰⴷ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵣⵡⴰⴳⵜ ⵍⵓⵎⵎⵏ ⵎⴰⴷ ⵉⵥⵍⵉⵏ ⵙ ⵓⵎⵢⴰⵖ ⴰⴽⴷ ⵉⵎⴳⴳⴰⵢⵏ ⵉⵏⴰⵎⵓⵔⵏⵏ ⴷ ⵉⴳⵔⴰⵖⵍⴰⵏⵏ ⴷ ⵜⵓⴳⴳⴰⵣ ⵏⵏⵙ ⴳ ⵓⴱⵔⵉⴷ ⵏ ⵓⴹⴼⴼⵓⵕ ⵏ ⵓⵙⵎⵀⵍ ⵏ ⵓⵎⵉⵔⵓ ⴰⵎⴰⴹⵍⴰⵏ ⵏ ⵜⵎⵣⵡⴰⴳⵜ, ⴷ ⵉⵙⵖⵍⴰⴼ ⵏⵏⵙ ⵉⵣⴷⵉⵏ ⵙ ⵓⵙⴷⵓⵙ ⵏ ⵓⴼⵔⴰⴳ ⴷ ⵡⴰⵔⴰⵢ ⵙⴳ ⵜⵕⵥⵉⵢⵉⵏ, ⵍⵓⵎⵎⵏ ⴳ ⵓⵎⵏⴰⴹ ⵏ ⵉⵙⵏⴼⵍⵏ ⵏ ⵓⵏⴳⵉⴳⵜ.

ⵙⴳ ⵜⵙⴳⴰ ⵢⴰⴹⵏⵉⵏ, ⵉⵙⴷⴷⵉⴷ ⵓⵙⵇⵇⵉⵎ ⵅⴼ ⵡⴰⴷⴷⵓⵔ ⵏ ⵓⵙⵔⵓⵙ ⵏ ⵉⵏⵎⵓⵔⴰⵏ ⴳ ⵜⵓⵥⵥⵓⵎⵜ ⵏ ⵜⵙⵔⵜⴰⵢ ⴷ ⵜⵙⵜⵔⴰⵜⵉⵊⵉⵢⵉⵏ ⵉⵜⵜⵓⵙⵖⵣⴰⵏⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⵡⵉⵔ ⴰⵎⵏⵥⴰⵡ, ⴷ ⵓⵙⵡⵓⵔⵉ ⵅⴼ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ, ⴷ ⵓⵙⵓⵖⵏ ⵏ ⵡⴰⵏⵏⴰⵍ ⵏ ⵜⵉⵍⴰⵍⵉⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⴼⵔⵉⵇⵉⵢⵉⵏ ⴳ ⵜⴹⴼⵕⵉ ⵏ ⵜⵙⵔⵜⴰⵢ ⵉⵣⴷⵉⵏ ⵙ ⵓⵙⵏⴼⵍ ⵏ ⵓⵏⴳⵉⴳⵜ ⴷ ⵓⵙⴱⵉⴷⴷ ⵏ ⵉⴷⵔⵉⵣⵏ ⵏⵏⵙ, ⵍⵓⵎⵎⵏ ⵉ ⵉⵙⵎⵉⵍⵏ ⵍⵍⴰⵏⵉⵏ ⴳ ⵓⵙⵓⵔⵙ ⵏ ⵓⴽⵓⴽⴹ.

ⵉⵙⵙⵏ ⵓⵏⵎⵓⵇⵇⴰⵔ ⴰⴷ ⵜⴰⴷⵔⴰⵡⵜ ⵏ ⵉⴳⵏⵙⴰⵙ ⵅⴼ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴰⴹⴰ ⵜⴰⴼⵔⵉⵇⵉⵜ ⵏ ⵜⵣⵔⴼⵜ ⵏ ⵓⵏⴳⵉⴳⵜ ⴷ ⵜⵎⴰⵡⴰⵙⵜ ⵏ ⵓⵎⵓⵜⵜⵉ ⵏ ⵜⵥⴹⴰⵕⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⵜⴰⵎⵖⵔⵉⴱⵉⵜ.