ⵏⵢⵓⵢⵓⵔⴽ, 19 ⵢⵓⵏⵢⵓ 2025 – ⴳ ⵢⴰⵏ ⵓⵏⵎⵓⵇⵇⴰⵔ ⵎⵉ ⵢⴰⵜⵜⵓⵢ ⵓⵙⵡⵉⵔ, ⵉⵜⵜⵓⵙⴽⴰⵔⵏ ⴰⵙⵙ ⴰ ⴳ ⵓⵙⵖⵉⵎ ⵏ ⵜⵎⵜⵜⴰ ⵉⵎⵓⵏⵏ ⴳ ⵏⵢⵓⵢⵓⵔⴽ, ⵜⵎⵎⴰⵇⵇⴰⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵙ ⵜⴼⵔⵉⵙⵜ ⵏⵏⵙ ⴷ ⵜⴰⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI), ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ, ⵎⴰⵙⵙ ⴰⵏⵟⵓⵏⵢⵓ ⴳⵓⵜⵉⵔⵉⵛ ⵉ ⵓⵙⵎⴰⵢⵏⵓ ⵏ ⵓⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵜⵉⵍⴰⵍⵜ ⵜⴰⵎⴰⵏⴰⵔⵜ ⵏⵏⴰ ⵙⴽⴰⵔⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⵏⴰⵍⴰ ⵏ ⵜⵏⵥⴰⵕ ⵜⵉⵎⴰⴹⵍⴰⵏⵉⵏ ⵉⵜⵜⵡⴰⵔⵏⴰⵏ, ⴷ ⴳ ⵡⴰⵏⵏⴰⵍ ⵏ ⵜⴱⵔⵉⴷⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.

ⴳ ⵜⵙⵎⵓⵏⵉ ⴰⴷ, ⵜⵙⵉⵡⵍ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⵙⵉⵜⴳ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵉ ⵎⴰⴷ ⵉⵙⴽⴰⵔ ⵓⵏⴼⵍⵓⵙ ⴰⵎⴰⵜⴰⵢ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵍⵉⵖ ⵉⴳⴰ ⵢⴰⵏ ⵙⴳ ⵜⵔⵙⴰⵍ ⵜⵉⴷⵙⵍⴰⵏⵉⵏ ⵏ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ. ⵎⴽⴷⴰ ⵜⵓⵍⵍⵖ ⵙ ⵜⵖⵓⵔⵉ ⵏ ⵓⵏⴼⵍⵓⵙ ⴰⵎⴰⵜⴰⵢ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵙ "ⵜⵏⵜⵜⴰⵎⵜ ⵏ ⵢⵉⵎⴰⵍ", ⵜⵙⵏⵓⵎⵎⵍ ⵜⵏⵜ ⵎⴰⵙ ⴳⴰⵏⵜ ⵙⵏⴰⵜ ⵜⵏⵜⵜⴰⵎⵉⵏ "ⵜⵉⵙⴰⵖⵓⵍⵉⵏ" ⵜⵉⵅⴰⵜⴰⵔⵉⵏ ⴳ ⵜⵙⴰⵖⵓⵍⵉⵏ ⵏⵏⵉ ⵏ ⵓⵙⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴳ ⵓⵎⴰⴹⴰⵍ.

ⴳ ⵓⵎⵏⴰⴹ ⵉⵣⴷⵉⵏ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ "ⵉⵅⵚⵚⴰ ⴰⴷ ⵓⵔ ⴳⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵡⵏⴳⵉⵎⵜ ⵜⴰⵎⴹⴼⵕⵜ, ⵎⴰⵛ ⴰⵙⵉⵣⵡⵔ ⴰⴷⵙⵍⴰⵏ", ⵜⵙⵎⵖⵔ ⵙ ⵜⵉⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⵙⵡⵓⵔⵉⵏ ⴳ ⵏ ⵎⴰⴷ ⵢⴰⵥⵏ ⵉ 120 ⵏ ⵓⵡⴰⵏⴽ, ⴰⵔ ⴳⵉⵙⵏⵜ ⵙⵙⴼⵍⵉⴷⵏⵜ ⵉ ⵉⵎⵙⵍⵍⵉⵜⵏ ⵏ ⵓⵏⴳⵉⵙⵏ ⴷ ⵉⵎⵙⴽⴰⵔⵏ/ⵜⵉⵎⵙⴽⴰⵔⵉⵏ ⴷ ⵉⵏⵎⵓⵔⵉⵏ/ⵜⵉⵏⵎⵓⵔⵉⵢⵉⵏ ⴷ ⵉ ⵜⵉⵍⴰⵡⵜ ⵏⵏⵙⵏ/ⵜⵏⵜ ⴷ ⵡⴰⴷⴷⴰⴷⵏ ⵏⵏⵙⵏ/ⵜⵏⵜ ⵙⵎⴰⵜⵜⵉⵏⵜ ⵜⵏ ⵙⴳ ⵓⴱⴰⵔⴰⵣ ⵖⵔ ⵉⵙⴰⵢⵔⴰⵔⵏ ⵏ ⵜⵎⴳⵓⵔⵉ ⵏ ⵜⵖⵜⴰⵙⵜ ⵜⴰⵏⴰⵎⵓⵔⵜ ⴷ ⵜⴳⵔⴰⵖⵍⴰⵏⵜ. "ⵜⵉⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⴰⵎⴷⵔⴰⵡ ⴰⵎⴰⵏⴰⵔ ⴳ ⵓⵚⴽⵓ ⵏ ⵓⵏⴰⴳⵔⴰⵡ ⴰⵎⴰⴹⵍⴰⵏ ⴳ ⵜⵍⵍⴰ ⵜⵓⴳⵜ ⵏ ⵜⵣⵔⴼⵜ ⴷ ⵓⵙⵓⵎⵓ". ⴰⴷ ⵜⵔⵏⴰ ⵎⴰⵙⵙⴰ ⴱⵓⵄⵢⵢⴰⵛ. ⵏⴼⵔⴽ ⵉ ⵜⵉⵍⴰⵍⵜ ⴰⴷ, ⵏⵕⵕⴰⵥ ⵜⵜ. ⵏⵡⴰⵜⵜⵙ ⴰⵙⵙ ⴰ ⴰⴷ ⵏⵙⴷⵓⵙ ⴰⵏⵙⴰ ⴰⴷ, ⵏⴷⵔⵓ ⵙ ⵜⵡⵉⵍⴰ ⵉⴳⴳⵓⵜⵏ ⴰⴷ ⵏⵙⵔⵙ ⴷⴰⵖ ⵉⵣⵔⴼⴰⵏ ⴳ ⵡⴰⵎⵎⴰⵙ ⵏ ⵉⵙⵉⵣⵡⵉⵔⵏ.

ⴳ ⵓⵙⴰⵜⵉ ⵏ ⵓⵏⵄⴰⵕ ⴰⴷ ⴰⴳⵔⴰⵖⵍⴰⵏ ⵏⵏⴰ ⵜⵏⴰⵔⴰ ⴳ ⵏⵢⵓⵢⵓⵔⴽ ⵉⵎⴰⵍⴰⵙⵙ ⴰⴷ, ⵜⵙⵎⵏⵉⴷ ⵎⴰⵙⵙⴰ ⴱⵓⵄⵢⵢⴰⵛ ⴳ ⵓⵏⵎⵓⵇⵇⴰⵔ ⴰⴷ ⵢⴰⵜ ⵜⵙⵓⵎⵔⵜ ⵉ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵉ:

(1) ⴰⵙⵖⵣⵏ ⵏ ⵓⵣⵔⴼ ⵏ ⵜⴷⵔⴰⵡⵜ ⵜⴰⵎⴰⴷⴷⵓⴷⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴳ ⵉⵙⴳⵔⴰⵡⵏ ⵏ ⵜⵎⵜⵜⴰ ⵉⵎⵓⵏⵏ ⴳ ⵏⵢⵓⵢⵓⵔⴽ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵜⵙⵓⵜⵍⵉⵏ ⴷ ⵜⵖⵜⴰⵙⵉⵏ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ (ECOSOC), ⴰⵙⴳⵔⴰⵡ ⴰⵙⵔⵜⴰⵏ ⵢⴰⵜⵜⵓⵢⵏ ⵓⵙⵡⵉⵔ ⵉⵏⵜⴰⵢⵏ ⵙ ⵜⴳⵎⵉ ⵜⴰⵙⵓⵍⴰⵏⵜ (HLPF) ⴷ ⵜⵙⵇⵇⵉⵎⵜ ⵏ ⵡⴰⴷⴷⴰⴷ ⵏ ⵜⵎⵖⴰⵔⵜ CSW (…), ⵍⵍⵉⵖ ⴳⴰⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⵏⵏⴰ ⵉⴹⴼⴼⵕⵏ ⴰⴷⴷⴰⴷⵏ ⵙⴳ ⵡⴰⴷⴰⵙ, "ⵜⵉⵣⵎⵎⴰⵔ ⴰⴷ ⵙⵎⵏⵉⴷⵏⵜ ⵜⵉⴷⵔⴰⵡⵏ ⵜⵉⵏⴰⵡⴰⵢⵉⵏ ⴳ ⵉⵎⴹⴰⴽⴰⵕⵏ ⴰⴷ ⵉⵏⵎⵜⵜⴰⵏ" ;

(2) ⵜⴰⴷⵔⴰⵡⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴳ ⵜⵙⵏⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ “UN80”, ⵙⵍⴰⵡⴰⵏ ⴰⴽⴽⵯ ⴳ ⵓⵣⵎⵣ ⵏ ⵎⴰⴷ ⵉⵜⵜⵉⴷⵉⵔ ⵓⵎⴰⴹⴰⵍ ⵙⴳ ⵓⵖⵓⵍ ⵏ ⵜⵓⵍⴳⵉⵏⵜ ⵜⴰⴳⵔⴰⵖⵍⴰⵏⵜ ⴷ ⵓⵍⵓⵢ ⵏ ⵉⵎⵏⵖⴰⵏ. ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⵙⵖⵓⵏ ⵏ ⵓⵙⵎⴰⵢⵏⵓ ⵏ ⵓⵎⵢⴰⵙ ⵏⴳⵔ ⴽⵕⴰⴹⵜ ⵜⵔⵙⴰⵍ ⵏ ⵜⵎⵜⵜⴰ ⵉⵎⵓⵏⵏ: ⵜⴰⵏⴼⵔⵓⵜ, ⵜⵉⴳⵎⵉ, ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⵎⴰⵙ ⵉⵅⵚⵚⴰ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷ ⵉⵍⵉⵏ ⴳ ⵡⴰⵎⵎⴰⵙ ⴷ ⵡⵓⵍ ⵏ ⴽⵔⴰⵢⴳⴰⵜ ⴰⵙⵏⴰⵎ ⴰⵏⵎⵜⵜⴰ.

ⵜⵙⵙⵉⴷⴷ ⵜⵏⵙⵙⵉⵅⴼⵜ ⵏ ⵜⴰⴹⴰ ⵅⴼ ⵓⵎⵢⴰⵡⴰⵙ ⴰⵎⴰⴷⵓⵙ ⵏⵏⴰ ⵉⵙⵎⵓⵏⵏ GANHRI ⴷ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⴳ ⵊⵓⵏⵉⴼ, ⴷ ⵜⵓⵙⵏⵜ ⵙ ⵜⵉⵍⴰⵍ ⵏⵏⵙ ⴷ ⵜⵎⴰⵏⵜ ⵏⵏⵙ ⴳ ⵎⵏⵏⴰⵡ ⵏ ⵜⵖⵜⴰⵙⵉⵏ ⵜⵉⵏⵎⵜⵜⴰⵏⵉⵏ. ⵎⴽⴷⴰ ⵜⵙⵎⵖⵔ ⵙ ⵜⴷⵔⴰⵡⵜ ⵜⴰⴽⵕⴰⴹⵜ ⵏⴳⵔ "ⴳⴰⵏⵖⵉ" ⴷ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵖⴰⵡⴰⵙ ⵏ ⵜⵎⵜⵜⴰ ⵉⵎⵓⵏⵏ ⵉ ⵜⴳⵎⵉ, ⵏⵏⴰ ⵉⵡⴰⵜⵜⵙⵏ ⴰⴷ ⵢⴰⵍⵍ ⵜⵉⵥⴹⴰⵕⵉⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵉⵙⴷⵓⵙ ⵜⵉⵕⵡⵉ ⵏⵏⵙⵏⵜ, ⵏⵏⴰ ⵉⵙⵎⴷⵏ ⴰⵏⵎⵓⵇⵇⴰⵔ ⵏⵏⵙ ⴰⵙⴳⵯⵙⴰⵏ ⴰⵙⵙ ⵏ ⵓⴽⵡⴰⵙ, ⴷⴰⵜ ⵓⵏⵎⵓⵇⵇⴰⵔ ⵏ ⵎⴰⵙⵙⴰ ⴱⵓⵄⵢⵢⴰⵛ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ.

ⴳ ⵉⵣⵎⴰⵣ ⴰⴷ ⵉⵀⵔⵛⵏ, ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ, ⵍⴰ ⵜⵙⵎⴰⵢⵏⵓ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI) ⴰⵙⵓⵖⵏ ⵏⵏⵙ ⵉⴷⵓⵙⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙⵏ, ⵜⵙⴷⴷⵉⴷ ⵅⴼ ⵓⵙⵖⵓⵏ ⵏ ⵓⵙⵎⴰⵢⵏⵓ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⴰⵙⵓⵖⵏ ⵏⵏⵙ ⵙ ⵉⵎⵏⵣⴰⵢⵏ ⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴰⵎ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, "ⵏⴱⴷⴷ ⵅⴼ ⵜⵎⵜⵜⴰ ⵉⵎⵓⵏⵏ ⴰⴷ ⵜⵣⴷⵉ ⴰⵏⵏⴰⵍ ⵏⵏⵙ ⵜⵙⴷⵓⵙ ⵜ, ⵙ ⵎⴰⴷ ⵉⵜⵜⵏⴼⵔⵓⵏ ⵜⵉⵍⵉⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵉⴷⵓⵙⵏ ⴷ ⵉⵕⵡⴰⵏ ⴳⴰⵏⵉⵏ ⵜⵉⵙⵉⵎⴰⵏⵉⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴰⴽⴽⵯ ⵉⴷⵖⴰⵔⵏ ⵏ ⵓⵎⴰⴹⴰⵍ".