ⵜⴰⴷⵔⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵙ ⵏ ⴰⴽⵡⴰⵙ 11 ⴷⵓⵊⴰⵏⴱⵉⵔ 2024, ⴳ ⵓⵏⵎⵓⵇⵇⴰⵔ ⵏⵏⵉ ⵜⵙⵏⵎⴰⵍⴰ ⵜⵙⵎⵉⵔⵉⵜ ⵜⴰⵏⵎⴰⵡⵙⴰⵙⵜ ⵉⵜⵜⵓⵙⵎⴰⴳⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵎⴷⵔⴰⵡⵜ ⴰⴽⴷ ⵜⵎⴰⵡⴰⵙⵜ ⵏ ⵜⵣⵔⴼⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⴷⴰⵡⵉⵜ ⵎⵓⵃⴰⵎⵎⴰⴷ ⵡⵉⵙⵙ ⵙⵎⵎⵓⵙ ⴳ ⵕⵕⴱⴰⵟ, ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵜⵣⵡⴰⵔⵜ ⵏ ⵢⴰⵜ ⵜⴳⵓⵔⵉ, ⵉⵖⵔⴰ ⵜⵜ ⵎⴰⵙⵙ ⵎⵓⵃⴰⵎⵎⴰⴷ ⵍⵀⴰⵛⵎⵉ, ⴰⵏⵎⵀⴰⵍ ⵏ ⵜⵖⵓⵔⵉⵡⵉⵏ ⴷ ⵉⵔⵣⵣⵓⵜⵏ, ⵙ ⵜⵎⵓⵔⴰⵢⵜ ⵅⴼ ⵎⴰⵙⵙⴰ ⴱⵓⵄⵢⵢⴰⵛ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⴼⵓⴳⵍⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵉⵣⵉ ⵏ ⵓⵙⵡⵉⵏⴳⵎ ⴷ ⵓⵙⵉⵜⴳ ⵏ ⵜⵓⴳⴳⴰⵣ ⵉⵜⵜⵓⵙⴽⴰⵔⵏ ⵖ ⵓⵙⵎⵀⵍ ⵏ ⵉⵎⵏⵣⴰⵢⵏ ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵣⵎⵎⴻⵎ ⵎⴰⵙ ⴷ ⵜⴰⵎⴰⵜⴰⵔⵜ ⴰⵏⵎⵜⵜⴰ ⵏ ⵓⵙⴳⴳⵯⴰⵙ ⴰⴷ, "ⵉⵣⵔⴼⴰⵏ ⵏⵏⵖ ⵉⵎⴰⵍ ⵏⵏⵖ", ⵢⵓⵛⴽⴰⴷ ⴳ ⵢⴰⵏ ⵓⵎⵏⴰⴹ ⴰⴳⵔⴰⵖⵍⴰⵏ ⵉⵜⵜⵡⴰⵙⵙⴰⵏⵏ ⵙ ⵜⴰⵄⵜⵉ ⵏ ⵡⴰⵙⵙⴰⵙⵏ ⴷ ⵉⵎⵏⵣⴰⵖⵏ ⵉⵙⵙⴱⵖⵔⵏ ⵜⵉⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵜⵔⵏⵓ ⵎⴰⵙ ⴷ ⵉⵏⴰⵡⵏ ⵏ ⵓⵙⵓⵔⴷⵓ ⴳ ⵜⵖⵣⵓⵔⴰⵏⵜ ⵏ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵙⵔⵜⴰⵏ ⵏ ⵉⵎⴹⴰⴽⴰⵕⵏ ⴷ ⵜⵙⵢⴳⴰⵏⵜ ⴳ ⵉⵏⴰⵡⴰⵢⵏ ⴷⴰ ⵜⵜⴷⵔⵓⵏ ⴳ ⵓⵙⵇⵇⵉⵙ ⵏ ⵜⵓⴳⴳⴰⵣ ⵉⵜⵜⵓⵙⴽⴰⵔⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ.

ⴳ ⵓⵙⴰⵜⵉ ⵏ ⵓⵙⵉⵡⵍ ⵏⵏⵙ ⵅⴼ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ ⴳ ⵓⵎⴰⵍⵓ ⵏ ⵉⵎⵏⴰⴹⵏ ⵉⵜⵜⵓⵙⵏⴼⵍⵏ ⵙ ⵜⵙⵓⵍⵜ, ⵏⵏⴰ ⵢⵓⴷⵊⴰⵏ ⴰⵙⵇⵙⵉ ⵅⴼ ⵜⵓⵖⵓⵍⵉⵏ ⵏ ⵓⵍⴽⴰⵎ ⵙ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴰⴽⴰ ⵏⵏⵙⵏ ⵓⵔ ⵉⵙⵎⵉⴷⵏ ⵢⴰⵏ ⵓⵙⵇⵙⵉ ⵉⵜⵜⵓⵙⵎⴰⵢⵏⵓⵏ, ⵜⵙⵙⴽⵏ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷ ⵉⵙⴱⵔⵔⴽ ⵓⵙⵇⵇⵉⵎ ⵙ ⵜⵖⵜⴰⵙⵜ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ "ⴰⵙⵜⴰⵢ ⵉ ⵓⵙⵖⵍⴼ ⴰⵎⴰⴹⵍⴰⵏ ⵏ ⵓⵙⴱⵉⴷⴷ ⵓⵍⴳⵉⵏ ⵏ ⵓⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ", ⵜⵉⵏⵉ ⵎⴰⵙ ⵉⴳⴰ ⵎⴰⵢⴰⵏⵏ ⵜⴰⵙⵓⵔⵉⴼⵜ ⵖⵔ ⵜⵓⵙⵙⵔⴰ ⵜⵓⵣⵔⵉⴼⵜ ⵏ ⵜⵎⵔⵔⵓⵜ ⴰⴷ, ⴷ ⵎⴰⵙ ⵜⴳⴰ "ⵢⴰⵜ ⵜⵙⵓⵔⵉⴼⵜ ⵜⴰⵎⵣⵔⴰⵢⵜ ⴳ ⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ".

ⴰⵙⵙⴰⵔⵓ ⴳ ⵜⵓⵙⵙⵏⴰ ⵉ ⵓⵎⵏⴰⵍⴰ ⵏ ⵜⵏⵥⴰⵕ ⴷ ⵓⴳⴳⴰⵏⵉⵏ ⴷ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⵔⴰⴳ, ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵙⵓⵖⵏ ⵏ ⵓⵙⵙⴰⵔⵓ ⴳ ⵜⵓⵙⵙⵏⴰ, ⴰⵛⴽⵓ ⵜⴳⴰ ⵜⴰⵔⵙⵍⵜ ⵏ ⵓⵎⵏⴰⵍⴰ ⵏ ⵜⵕⵥⵉⵢⵉⵏ ⴷ ⵡⴰⵏⵏⴰⵍ ⵏ ⵓⵏⴳⵉⵙⵏ, ⴷ ⵜⵓⵎⵙⵉⵙⵜ ⵏ ⵜⵕⵥⵉ, ⵏⵏⴰ ⵉⴳⴰⵏ "ⵢⴰⵏ ⵓⵏⵣⴳⵓⵎ ⴰⵖ ⵉⵙⵙⵣⵎⵔⵏ ⴰⴷ ⵏⵙⴱⵓⵖⵍⵓ ⴰⵏⴳⵔⴰⵡ ⵏⵏⵖ ⴰⵏⴰⵎⵓⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ". ⵖⵎⴽ ⵍⵍⵉ ⵜⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵓⵎⵢⴰⵡⴰⵙ ⵊⴰⵔ ⵓⵙⵇⵇⵉⵎ ⴷ ⵜⵙⴷⴰⵡⵉⵢⵉⵏ ⵜⵉⵎⵖⵔⵉⴱⵉⵢⵉⵏ, ⵜⵙⵏⵓⵎⵎⵍ ⵜⵏⵜ ⵎⴰⵙ ⴳⴰⵏⵜ ⴰⵎⴷⵔⴰⵡ ⴰⵙⵜⵔⴰⵜⵉⵊⵉ ⵉ ⵜⵓⵚⴽⴰ ⵏ ⵜⵓⵙⵙⵏⴰ ⵜⴰⵎⴰⵙⵙⴰⵏⵜ ⵉⴳⴰⵏ ⵜⴰⵏⴱⵣⴰⵣⵜ ⵉ ⵓⵔⵎⴰⵙ ⵏ ⵉⵎⵓⴽⵔⵉⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵎⴰⵙ ⵜⴳⴰ "ⵙⴳ ⵉⵖⴱⵓⵍⴰ ⵏ ⵣⵔⴼ, ⵏⵏⴰ ⵉⵙⵙⵣⵎⴰⵔⵏ ⴰⴷ ⵜⵉⵍⵉ ⵜⵙⵉⵍⴰⵡⵜ ⵏ ⵉⴱⵔⴷⴰⵏ ⵉⵣⵎⵔⵏ ⴰⴷ ⵙⵎⵏⵉⴷⵏ ⵉⴼⵙⵙⴰⵢⵏ ⵏⵏⵉ ⴰⵙ ⴷ ⵢⵓⵙⴰⵏ".

ⵜⵔⵏⵓ ⵎⴰⵙ ⴷⴰ ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵓⵙⴷⵓⵙ ⵏ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴰⵎ ⵢⴰⵏ ⵓⵙⴰⴷⴰⴼ ⴰⴷⵙⵍⴰⵏ ⵏ ⵓⵣⵓⵣⵣⵔ ⵏ ⵜⵓⵙⵙⵏⴰ ⵜⴰⵣⵔⴼⴰⵏⵜ ⵙ ⵜⵉⵍⴰⵍ ⵏ ⵓⵙⵙⵍⵎⴷ ⴷ ⵓⵙⴼⵔⴽ, ⵜⵙⵙⴽⵏ ⵎⴰⵙ ⴰⵎⵓⵏⵜ ⴳ ⵜⵓⴳⴳⴰⵣ ⴰⴷ ⴰⵙⵏⵎⴰⵍⴰ ⵏ ⵜⵉⵍⴰⵍ ⵜⵉⵎⵢⴰⵏⴰⵡⵉⵏ ⴰⵎ ⵉⵙⴳⵔⴰⵡⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⴽⵉⴳⴰⵏ ⵏ ⵉⵎⵓⵙⵙⵓⵜⵏ ⵉⵏⴰⵎⵓⵔⵏ ⴷ ⵉⵎⵏⵥⴰⵡⵏ ⴷ ⵉⴳⵔⴰⵖⵍⴰⵏⵏ.

ⴳ ⵓⵙⴰⵜⵉ ⴰⴷ, ⵜⵙⵙⴽⵜⵉ ⵙ ⵜⵙⵏⵜⴰⵢⵜ "ⴰⴳⵓⵔⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ" ⵏⵏⴰ ⵉⵕⵥⵎ ⵓⵙⵇⵇⵉⵎ, ⴷ ⵏⵏⵉ ⵉⵙⵡⴰⵜⵜⵙⵏ ⴰⴷ ⵉⵕⵥⵎ ⵜⵉⵍⴳⵯⵉⵜⵉⵏ ⵏ ⵓⵎⴹⴰⴽⴰⵕ ⵊⴰⵔ ⵉⵎⵔⵣⵓⵜⵏ ⴷ ⵉⵎⵙⴽⴰⵔⵏ ⵉ ⵓⵎⵙⴳⴷⴰⵍ ⵅⴼ ⵜⵎⵙⴰⵔⵉⵏ ⵉⵣⴷⵉⵏ ⴷ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ. ⵖⵎⴽ ⵍⵍⵉ ⵜⵙⵙⴽⵜⵉ ⵙ ⵡⴰⴷⴷⵓⵔ ⴰⵅⴰⵜⴰⵔ ⵏⵏ ⴼⴽⴰⵏ ⵉⵎⵓⵙⵙⵓⵜⵏ ⵏ ⵓⴽⵜⵜⵓⵢ ⵏ ⵜⵙⵉⵎⵔⴰⵡⵜ ⵏ ⵜⵉⵔⵎⵉⵜ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴳ ⵓⵙⴳⴳⵯⴰⵙ ⴰⴷ ⵇⴰⵃ, "ⵉ ⵜⵉⵍⴰⵍⵜ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⴷⵓⵙ ⵏ ⵜⵣⵎⵎⴰⵔ, ⴰⵛⴽⵓ ⴳⴰⵏ ⵉⵏⵉⴳⵉ ⵅⴼ ⵜⵎⵓⵖⵍⵉ ⵏ ⵜⵎⵔⵙⴰⵍ ⴷ ⵡⴰⵎⵓⵏ ⴳ ⵓⵙⵎⴽⵍ ⵏ ⵜⵎⵙⴰⵔⵉⵏ ⵉⵜⵜⵓⵙⵎⴰⵢⵏⵓⵏ ⴷ ⵓⵙⴱⵓⵖⵍⵓ ⵏ ⵜⵎⴳⴳⵉⵜⵉⵏ ⵏ ⵓⴽⵛⵛⵓⵎ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ".

ⴳ ⵓⵙⴰⵜⵉ ⵏ ⵓⵙⵉⵡⵍ ⵏⵏⵙ ⵅⴼ ⵜⵏⵥⴰⵕ ⵜⵉⵎⴰⵢⵏⵓⵜⵉⵏ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵓⵙⵏⴼⵍ ⵏ ⵓⵏⴳⵉⴳⵜ ⴷ ⵜ ⵜⵖⵉⵙⵜ ⵜⵉⵎⵍⵥⵉⵜ ⵙⵏⴰⵜ ⵜⵏⵥⴰⵕ ⵜⵉⴷⵙⵍⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵜⵙⵙⴽⵏ ⵎⴰⵙ ⵓⵔ ⵢⴰⴷ ⵉⴳⵉ ⵓⵙⵏⴼⵍ ⵏ ⵓⵏⴳⵉⴳⵜ ⵜⵓⵔⴷⴰ, ⵎⴰⵛⴰ ⵉⴳⴰ ⵜⵉⴷⵜ ⴷⴰ ⵜⵜ ⴰⴽⴽⵯ ⵏⵜⵜⴷⴷⵔ", ⵜⵉⵖⵉⵙⵜ ⵜⵉⵎⵍⵥⵉⵜ ⵏⵜⵜⴰⵜ ⴷⴰ ⵜⵙⵔⴰⵙ ⵜⵉⵎⵙⴰⵔⵉⵏ ⵉⵣⴷⵉⵏ ⴷ "ⵓⵙⴱⴷⴷⵉ ⵏ ⵓⵙⵏⵓⵃⵢⵓ, ⴷ ⵓⵙⵉⵎⵎⵕ ⵅⴼ ⵓⵏⵖⴰⵍ ⵏ ⵜⴽⵏⴷⴰⵡⵜ ⴷ ⵉⵏⵖⵎⵉⵙⵏ ⵉⵣⴳⵍⵏ ⴷ ⵜⵕⵥⵉ ⵏ ⵜⵓⴷⵔⵜ ⵜⵓⵙⵍⵉⴳⵜ".

ⴳ ⵜⵙⴳⴰ ⵢⴰⴹⵏ, ⵜⴷⵔⵓ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⴼⵓⴳⵍⴰ ⵏ ⵜⵓⴽⴽⵉ ⵏ ⵜⵙⵎⵖⵓⵔⵜ ⵏ ⵜⵔⴰⵏⴰⵡⵜ ⵏ ⵓⵔⵣⵣⵓ ⴰⵎⴰⵙⵙⴰⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵍⴰⵖⴰ ⵙ ⵓⵣⵎⵣⵣⵓ ⴰⴷ ⵅⴼ ⵜⵉⵔⴰⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷ ⴷ ⵉⵙⵙⴰⴼⵖ ⵜⴰⵥⵕⵉⴳⵜ ⴷⴷⵓⴽⵜⵓⵕⴰ ⵏⵏⴰ ⴷ ⵢⵓⵡⵉⵏ ⵜⴰⵙⵎⵖⵓⵔⵜ ⵜⴰⵎⵣⵡⴰⵔⵓⵜ ⴳ ⵜⵙⵓⵜⵍⵜ ⴰⴷ, ⴰⴷ ⴰⴷ ⵜⵜ ⵉⴱⴹⵓ ⵅⴼ ⵜⵙⴷⴰⵡⵉⵢⵉⵏ ⴷ ⵉⵙⵉⵏⴰⴳⵏ ⴰⴽⴽⵯ ⴰⴼⴰⴷ ⴰⴷ ⵉⵜⵜⵓⵙⵎⴰⵜⴰ ⵓⵚⴰⵃⴰ.

ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⵏ ⵜⴼⵓⴳⵍⴰ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⵙⵉⴷⴷ ⵏ ⵉⵎⴷⵔⴰⵡⵏ ⵅⴼ ⵡⴰⴷⴷⵓⵔ ⵏ ⵜⵓⵙⵙⵏⴰ ⵏ ⵜⵎⵢⴰⴷⴰⵙⵜ ⵏ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴳ ⵓⵙⴰⵜⵉ ⵏ ⵜⵣⵣⵉⴳⵣⵉⵏ ⵏⵏⴰ ⵉⵙⵙⵏ ⵓⵎⴰⴹⴰⵍ, ⴷ ⵓⵙⵓⵖⵏ ⵏ ⵓⵙⵡⵓⵔⵉ ⵅⴼ ⵓⵙⴱⴷⴷⵉ ⵏ ⵜⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⵜⵓⵣⴷⵉⵔⵉⵏ ⴷ ⵉⵔⵎⵎⵓⵙⵏ ⵉⵣⴳⵍⵏ ⵏⵏⴰ ⵉⵜⵜⵎⵏⴰⵍⴰⵏ ⵜⵓⴳⴳⴰⵣ ⵜⵉⵏⴰⵎⵓⵔⵉⵏ ⵃⵎⴰ ⴰⴷ ⵜⵉⵍⵉ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵓⵙⵙⵏⴰ ⴷ ⵜⵎⵙⴽⵔⵜ.