ⵉ ⵜⵉⵎⵔⵔⵓⵜⵉⵏ ⵜⵉⵎⴷⴷⵓⴽⴽⴰⵍ ⵏ ⵜⴷⵔⴼⵉ
ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ

"ⴰⵙⴷⵓⵙ ⵏ ⵜⴳⴳⴰⵥⵜ ⵏ ⵡⴰⴷⴷⵓⵔ ⴰⵏⴼⴳⴰⵏ ⴷ ⵜⵏⴽⵔⴰ ⵙ ⵜⴼⵍⵙⴰⴼⵜ ⵏ ⵡⴰⵍⴰⵙ ⵏ ⵓⵙⵖⵔⵜ ⴳ ⵡⴰⵏⵙⴰ ⵏ ⵜⵎⵔⵔⵓⵜⵉⵏ ⵏ ⵓⴽⵓⵙ ⵏ ⵜⴷⵔⴼⵉ, ⴳ ⵜⵎⵙⴰⵔⵉⵏ ⵓⵔ ⵉⵙⵖⴰⵡⵙⴰⵏ ⵙ ⵖⴰⵢⴰⴷ, ⴰⵔⴰⵢ ⵙⴳ ⵜⵔⵏⴰⵡⵜ ⵏ ⵓⴷⵏⵏⴽ ⵏⵏⴰ ⵉⵣⵎⵔⵏ ⴰⴷ ⵉⵙⴳⴷⵍ ⵙ ⵜⵡⵉⵍⴰ ⵜⴰⵅⴰⵜⴰⵔⵜ ⴰⴼⵊⵊⵉⵊ ⵙ ⵉⵣⵔⴼⴰⵏ ⵉⴷⵙⵍⴰⵏⵏ ⴳ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ (…), ⵏⵜⵜⵏⵉ ⴰⴽⴽⵯ ⴷ ⵜⵎⵏⵜⵉⵍⵉⵏ ⵉⵙⴽⴰⵔⵏ ⵙⴳ ⵜⵎⵔⵔⵓⵜⵉⵏ ⵜⵉⵎⴽⴽⵉⵙⵉⵜⵉⵏ ⴰⵙⴰⵡⵔ ⴰⵣⵔⴼⴰⵏ ⴰⵅⴰⵜⴰⵔ ⴳ ⵡⴰⵎⵎⴰⵙ ⵏ ⵡⴰⵏⴰⵡ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ", ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵣⵎⵣⵣⵓ ⵏ ⵓⵙⵏⵜⵉ ⵏ ⵓⵣⵣⴳⵉⵔ ⵏ ⵓⵙⵍⴳⵏ ⵡⵉⵙⵙ 43.22 ⵉⵥⵍⵉⵏ ⵙ ⵜⵉⵎⵔⵔⵓⵜⵉⵏ ⵜⵉⵎⴽⴽⵉⵙⵉⵜⵉⵏ, ⴰⵙⵙ ⵏ ⵓⵙⵉⵎⵡⴰⵙ 22 ⵖⵓⵛⵜ 2025.

ⴰⵔ ⵏⵙⵙⵉⵜⵉⴳ ⴰⵎⵢⴰⵖ ⵓⵎⵏⵉⴳ ⴰⴽⴷ ⵓⵟⵟⵓⵏ ⴰⵅⴰⵜⴰⵔ ⵏ ⵉⵙⵖⵍⴰⴼ ⵏⵏⵖ ⵏⵙⵎⵏⵉⴷ ⴰⵙⵙⵓⵙⵎ ⵏⵏⵖ ⵙ ⵓⵣⵎⵣⵣⵓ ⵏ ⵓⵙⵏⵜⵉ ⵏ ⵓⵣⵣⴳⵉⵔ ⵏ ⵓⵙⵍⴳⵏ ⴰⵙⵙ ⴰ, ⵎⴰⵛⴰ ⵉⵙⵓⵍ ⵖⴰⵢⴰⴷ ⵉⵣⴷⵉ ⵙ ⵜⵕⵡⵉ ⵏ ⵓⵣⵣⴳⵉⵔ, ⵜⵔⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⵖⵔ ⵙ ⵓⵙⵖⵓⵏ ⵏ ⵓⵙⵓⵊⴷ ⵏ ⵜⴼⴰⴷⵉⵡⵉⵏ ⴷ ⵜⵎⵙⵓⵙⵜⴰⵍ ⵜⵉⵏⴱⵣⴰⵣⵉⵏ ⵢⵓⴷⴰⵏ ⵉ ⵓⵙⵎⵀⵍ, ⴷ ⵉⵎⵣⵉⵣⵣⵍⵏ ⵏ ⵓⵙⵙⴼⵔⴽ ⴷ ⵓⵙⴷⵓⵙ ⵏ ⵜⵣⵎⵎⴰⵔ… "ⵉ ⵜⵎⵔⵔⵓⵜⵉⵏ ⵜⵉⵎⴽⴽⵉⵙⵉⵜⵉⵏ ⵉⵜⵜⵏⴼⵔⵓⵏ ⴰⵍⴽⴰⵎ ⵙ ⵜⵣⵔⴼⵜ, ⴱⵍⴰ ⴰⵙⴽⴰⵔ ⵏ ⵓⵏⵎⵔⵉ ⵢⴰⴹⵏⵉⵏ ⵓⵔ ⵉⵜⵜⵓⵙⵖⵓⵏⵏ, ⵣⵓⵏ ⴷ ⵉ ⵓⴳⴳⵉⴷⵏ ⵉⵏⵜⴰⵢⵏ ⵏⵖ ⵜⵉⵡⴰⵛⵓⵏⵉⵏ ⵏⵏⵙⵏ, ⴰⵔ ⵙⴷⵓⵙⵏⵜ ⵉⵣⵎⴰⵣ ⵏ ⵓⵙⵖⵔⵜ ⴷ ⵡⴰⵍⴰⵙ ⵏ ⵓⵙⵉⴷⴼ, ⴷ ⵡⴰⴷⴷⵓⵔ ⵏ ⵜⴷⵔⴰⵡⵜ ⴳ ⵓⵙⵎⵏⵉⴷ ⵏ ⵜⵏⴰⴼⵓⵜⵉⵏ ⵜⵉⵎⵓⵏⴰⵏⵉⵏ ⵉⵜⵜⴱⵖⴰⵔⵏ ⵇⴰⵃ".

ⵙⴳ ⵓⵎⵏⵉⴷ ⴰⴷ ⴰⵣⵔⴼⴰⵏ, ⵉⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵙⵎⵏⵉⴷ ⵢⴰⵜ ⵜⵎⵙⵙⴽⵜⵉⵜ ⵜⴰⵣⵔⴼⴰⵏⵜ ⵉⵙⵏⵎⴰⵍⴰ ⵉⵏⵎⵓⵇⵇⴰⵔⵏ ⴷ ⵉⵎⵙⴰⵡⴰⵍⵏ, ⵙ ⵓⵣⵎⵣⵣⵓ ⵏ ⵓⵎⴹⴰⴽⴰⵕ ⵅⴼ ⵜⵉⵎⵔⵔⵓⵜⵉⵏ ⵜⵉⵎⴽⴽⵉⵙⵉⵜⵉⵏ. ⵉⵙⵎⴰⵢⵏⵓ ⵓⵙⵇⵇⵉⵎ, ⵙ ⵓⵣⵎⵣⵣⵓ ⵏ ⵓⵙⵙⵏⵜⵉ ⵏ ⵓⵣⵣⴳⵉⵔ ⵏ ⵓⵙⵍⴳⵏ ⴰⵙⵙ ⴰ, ⴰⵙⵙⵉⵜⴳ ⵏⵏⵙ ⵉ ⵓⵎⵢⴰⵖ ⴰⴽⴷ ⵉⵙⵖⵍⴰⴼ ⵏ ⵜⵎⵙⵙⴽⵜⵉⵜ ⵏⵏⵙ.

ⵉⴷⴷⵖ ⵜⵙⵓⵍ ⵜⵙⵓⵜⵍⵜ ⵏ ⵓⵙⵎⵀⵍ ⵜⴳⴰ ⵜⴰⵎⵖⵜⴰⵙⵜ ⵉ ⵓⵙⵎⵓⵔⵙ ⵏ ⵓⵙⴰⵡⵔ ⴰⴷ, ⵉⵙⵎⴰⵢⵏⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵖⵓⵔⵉ ⵏⵏⵙ ⵙ:
ⴰⵙⵓⵊⴷ ⵏ ⵜⵎⵙⵓⵙⵜⴰⵍ ⵢⵓⴷⴰⵏ ⵉ ⵓⵣⵣⴳⵉⵔ ⵏ ⵉⵙⴱⴷⴰⴷⵏ ⵏ ⵓⵙⵍⴳⵏ ⴰⵎⴰⵢⵏⵓ ⴷ ⵜⵏⴼⵔⵓⵜ ⵏ ⵜⵙⵓⵍⵜ ⵏⵏⵙ;

ⴰⵙⵏⵎⴰⵍⴰ ⵏ ⵉⵎⵣⵉⵣⵣⵍⵏ ⵉⵎⵉⵔⵉⵡⵏ ⵏ ⵓⵙⴼⵔⴽ, ⵙ ⵜⴷⵔⴰⵡⵜ ⵏ ⵜⵏⵖⵎⴰⵙⵜ ⴷ ⵡⴰⵎⵓⵏ ⵓⵖⵔⵉⵎ ⴷ ⴰⴽⴽⵯ ⵉⵎⵙⵡⵓⵔⵉⵢⵉⵏ, ⵉⴹⵎⵏⵏ ⵜⵉⵍⵉⵜ ⵏ ⵓⵎⵏⵉⴷ ⴰⵎⴰⵜⴰⵢ ⵉⵏⵏⴰⵍⵏ ⴷ ⵓⵙⴷⵔⵓⵡ ⵏ ⵡⴰⵎⵓⵏ ⵙ ⵜⵡⵉⵍⴰ ⵜⵓⵎⵏⵉⴳⵜ ⴳ ⵜⵎⵀⵍⴰ ⵏ ⵓⵙⵎⴰⵢⵏⵓ ⵏ ⵓⵙⵖⵔⵜ ⵏ ⵡⵉⴷⴰ ⵅⴼ ⵉⵜⵜⵡⴰⵏⴱⴹ ⴷ ⵓⵙⵎⴰⵢⵏⵓ ⵏ ⵓⵙⵉⴷⴼ ⵏⵏⵙⵏ;

ⴰⵙⴷⵓⵙ ⵏ ⵜⵣⵎⵎⴰⵔ ⵏ ⵉⵏⴱⴷⴰⴷⵏ ⵅⴼ ⵓⵣⵣⴳⵉⵔ ⵏ ⵓⵙⵍⴳⵏ ⵙ ⵎⴰⴷ ⴰⵙⵏ ⵉⵣⵎⵔⵏ ⴰⴷ ⵣⵣⴳⵉⵔⵏ ⵉⵙⴱⴷⴰⴷⵏ ⴰⴷ ⵙ ⵓⵡⵇⵇⵔ ⵉⵙⵎⴷⵏ ⵏ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵉ ⵓⵙⵙⴽⵜⵉ, ⴰⵎⵓⵏ ⴳ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ (ⵎⴰⵢⵓ 2022) ⴰⴷⴰⵙ ⵏ 50 ⵏ ⵓⵙⵖⵍⴼ ⴰⵎⴰⵜⴰⵢ ⴷ ⵓⵎⴼⵔⵓⵔⵉ ⵉⵡⴰⵜⵜⵙⵏ ⵙ ⵓⵥⵍⴰⵢ ⴰⴷ ⵉⵙⵙⵔⵇⴱ ⴰⵙⵖⵣⵏ ⵏ ⵜⵎⵔⵔⵓⵜⵉⵏ ⵢⵉⵎⴷⴷⵓⴽⴽⴰⵍ ⵏ ⵜⴷⵔⴼⵉ ⴷ ⵓⵙⵎⵉⵔⵉⵡ ⵏ ⵢⵉⴳⵔ ⵏⵏⵙⵏⵜ. ⵜⵙⴷⴷⵉⴷ ⵜⵎⵙⵙⴽⵜⵉⵜ ⵅⴼ ⵓⵙⵖⵓⵏ ⵏ ⵓⵙⴼⵔⴰⵔ ⵏ ⵜⵡⵉⵍⴰ ⵏ ⵓⵙⵎⵀⵍ ⵏ ⵜⵎⵔⵔⵓⵜⵉⵏ ⵜⵉⵎⴽⴽⵉⵙⵉⵜⵉⵏ, ⵙ ⵓⵙⵎⵉⵔⵉⵡ ⵏ ⵓⵙⴰⵢⵔⴰⵔ ⵏ ⵓⵣⵣⴳⵉⵔ ⵏⵏⵙⵏⵜ ⴷ ⵓⵙⵏⵢⵓⵎⵓ ⵏ ⵜⵍⴳⴰⵎⵜ ⵏ ⵉⴱⴽⴽⵉⴹⵏ ⵙⴳⵉⵙⵏⵜ ⵉⵜⵜⵓⵙⵍⵉⴷⵏ, ⵎⴽⴷⴰ ⵜⵖⵔⴰ ⵙ ⵓⵙⵖⵓⵏ ⵏ ⵓⵏⵀⵍⵍⴰ ⵏ ⵉⵎⵏⵣⴰⵢⵏ ⵏ ⵓⵎⵙⴰⴷⴰⵙ ⴷ ⵡⴰⵔⴰⵙⵏⵓⵃⵢⵓ ⴳ ⵜⴼⵔⴽⵜ ⵏ ⵓⵣⵣⴳⵉⵔ, ⵙ ⵓⵙⴽⴰⵔ ⵙ ⵡⴰⴷⴷⴰⴷⵏ ⵏⵡⵉⴷⴰ ⵅⴼ ⵉⵜⵜⵡⴰⵏⴱⴹ, ⵙⵍⴰⵡⴰⵏ ⴰⴽⴽⵯ ⵜⵉⵡⵜⵎⵉⵏ, ⴷ ⵓⵎⵥⵉⵢⵏ, ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴷ ⵉⵎⵣⵡⴰⴳⵏ, ⴷ ⵓⴳⴳⵉⴷⵏ ⵉⵡⵙⵙⴰⵔⵏ, ⴷ ⵓⴳⴳⵉⴷⵏ ⴳ ⵡⴰⴷⴷⴰⴷ ⵏ ⵓⵏⴳⴰⴹ, ⴰⴽⴷ ⵓⵙⵎⵉⵔⵉⵡ ⵏ ⵜⵡⵓⵔⵉⵡⵉⵏ ⵏ ⵜⵎⵔⵙⵍⵜ ⵏ ⵓⵏⴱⴹⴰⵢ ⵏ ⵜⵙⵏⵙⵉ ⵏ ⵜⵉⵎⵔⵔⵓⵜⵉⵏ, ⴷ ⵓⵙⵢⵉⵍⵉ ⵏ ⵡⴰⵎⵎⴰⵙ ⵓⵍⴳⵉⵏ ⵏ ⵓⵏⴳⵉⵙⵏ.