ⴰⵔ ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⴷⵔⴰ-ⵜⴰⴼⵉⵍⴰⵍⵜ ⵢⴰⵏ ⵡⴰⵙⵙ ⴰⵣⵔⴰⵡⴰⵏ ⵅⴼ ⵓⵙⴳⵓⵎ "ⵉⵏⵣⴳⵓⵎⵏ ⵉⵡⵏⴹⴰⵏⵏ ⵉⴽⵙⵡⴰⵜⵏ ⴳ ⵜⵎⵏⴰⴹⵜ ⵏ ⴷⵔⴰ ⵜⴰⴼⵉⵍⴰⵍⵜ", ⴰⵙⵙ ⵏ ⵓⵙⵉⵏⴰⵙ 11 ⴽⵟⵓⴱⵕ 2022 ⵙⴳ ⵜⵙⵔⴰⴳⵜ ⵜⵉⵙ ⵙⵏⴰⵜ ⴷ ⵓⵣⴳⵏ ⵏ ⵜⴷⴳⴳⵯⴰⵜ ⴳ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⴷ ⵜⵉⵜⵉⵇⵏⵉⵢⵉⵏ ⴳ ⵜⵖⵔⵎⵜ ⵏ ⵕⵕⴰⵛⵉⴷⵉⵢⴰ.
ⵢⴰⵎⵓ ⵓⵙⵏⵎⴰⵍⴰ ⵏ ⵡⴰⵙⵙ ⴰⴷ ⴰⵣⵔⴰⵡⴰⵏ ⴳ ⵓⵙⴰⵜⵉ ⵏ ⵓⵣⵣⵓⴳⵣ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴳⴳⵯⴰⵙ ⵏ 2022 ⴷ ⴳ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵉⵏⴳⵔ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⴷ ⵜⵙⴷⴰⵡⵉⵜ ⵏ ⵎⵓⵍⴰⵢ ⵙⵎⴰⵄⵉⵍ ⴳ ⵎⴽⵏⴰⵙ ⴷ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⵣⵓⵏⵉ ⵏ ⵜⵡⵏⵏⴰⴹⵜ, ⵏⵏⵉ ⵉⵙⵡⵓⵜⵜⵙⵏ ⴰⵙⴷⵔⴰⵡ ⵏ ⵜⵓⴳⵜ ⵏ ⵉⵎⴳⴳⴰⵢⵏ ⴷ ⵉⵎⵙⵡⵓⵔⵉⵏ ⵙⴳ ⵜⵣⵓⵏⴰ ⵜⵓⵏⴱⵉⴹⵉⵏ ⴷ ⵜⴰⵔⵓⵏⴱⵉⴹⵉⵏ ⴷ ⵉⵎⴳⴳⴰⵢⵏ ⵓⵖⵔⵉⵎⵏ ⴷ ⵉⵙⵍⵎⴰⴷⵏ ⴷ ⵉⵎⵃⴹⴰⵕⵏ ⵉⵎⵙⴷⴰⵡⵏ ⴳ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⵙⵓⵔⵙ ⴰⵡⵏⴹⴰⵏ ⴳ ⵜⵎⵏⴰⴹⵜ ⴷ ⵜⴱⵔⵉⴷⵉⵏ ⵏ ⵓⴼⵔⴰⴳ ⵏⵏⵙ ⴷ ⵡⴰⵍⵍⴰⵍ ⵏ ⵓⴼⵔⴽ ⵏ ⵇⴰⵃ ⵉⵎⴳⴳⴰⵢⵏ ⵙ ⵡⴰⴷⴷⵓⵔ ⵏ ⵓⴼⵔⴰⴳ ⵏ ⵜⵡⵏⵏⴰⴹⵜ ⴳ ⵜⵎⵏⴰⴹⵜ ⴷ ⵓⵙⴼⵔⴽ ⵙ ⵜⵉⵍⴰⵍⵜ ⵜⴰⵎⵣⵡⴰⵔⵜ ⵏ ⵉⵎⴳⴳⴰⵢⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵣⴷⴰⵖⵏ ⴳ ⵓⵙⵡⵓⴷⴷⵓ ⵏ ⵓⵙⴽⴽⵉⵏ ⴰⵡⵏⴹⴰⵏ ⴳ ⵜⵎⵏⴰⴹⵜ.
ⵔⴰⴷ ⵎⵔⴰⵔⴰⵏ ⵉⵎⴷⵔⴰⵡⵏ ⵉⵎⵔⵙⵉ ⵏ ⵉⵏⵣⴳⵓⵎⵏ ⵉⵡⵏⴹⴰⵏⵏ ⵉⴽⵙⵡⴰⵜⵏ ⴳ ⵜⵎⵏⴰⴹⵜ ⵙⴳ ⴽⵉⴳⴰⵏ ⵏ ⵉⵙⴳⵓⵎⵏ, ⵙⴳⵉⵙⵏ : "ⵉⵙⵏⴼⵍⵏ ⵏ ⵉⵏⴳⵔⴰⵡⵏ ⵏ ⵜⵖⴰⵣⵓⵜⵉⵏ ⴳ ⵜⵎⵏⴰⴹⵜ ⴷ ⵜⵎⵢⴰⴳⴰⵏⵜ ⵏ ⵓⵣⵔⴼ; ⴰⴷⴷⴰⴷ ⴰⵡⵏⴹⴰⵏ ⴳ ⵜⵎⵏⴰⴹⵜ ⴷ ⵜⵎⵢⴰⴳⴰⵏⵜ ⵏ ⵓⵣⵔⴼ"; "ⵜⵉⵏⵏⵓⴱⴹⴰ ⵏ ⵓⵙⵡⵓⴷⴷⵓ ⴰⵎⵙⵙⵉⴷⴼ ⵏ ⵡⴰⵎⴰⵏ"; "ⵉⵊⴷⴰⵔⵏ ⵏ ⵜⵖⴰⵣⵓⵜⵉⵏ ⴳ ⵜⵎⵏⴰⴹⵜ ⴷ ⵜⵎⵢⴰⴳⴰⵏⵜ ⵏ ⵓⵣⵔⴼ"; "ⵜⵉⵎⵔⴽⵉⵜ ⵜⴰⵡⵏⴹⴰⵏⵜ ⴷ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ". ⵎⴽⴷⴰ ⵔⴰⴷ ⵜⵜⵓⵙⵏⵎⴰⵍⴰⵏⵜ ⴳ ⵡⴰⵙⵙ ⴰⴷ ⴰⵣⵔⴰⵡⴰⵏ ⵙⵏⴰⵜ ⵜⵙⵓⵡⴰⵔ ⵅⴼ ⵓⵙⴳⵓⵎ ⵏ "ⴰⴼⵔⴰⴳ ⵏ ⵜⵡⵏⵏⴰⴹⵜ: ⵜⵉⵍⴰⵡⵜ ⴷ ⵉⵏⵎⵔⴰⵏ ⴷ ⵉⴼⵙⵙⴰⵢⵏ" ⴷ ⵓⵙⴳⵓⵎ ⵏ "ⴰⵎⵓⵏ ⵓⵖⵔⵉⵎ ⴷ ⵓⵙⴽⴽⵉⵏ ⴰⵏⵡⴹⴰⵏ ⴳ ⵜⵎⵏⴰⴹⵜ ⵏ ⴷⵔⴰ ⵜⴰⴼⵉⵍⴰⵍⵜ: ⵎⴰⵏ ⵜⴰⴷⵔⴰⵡⵜ?". ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵔⴰⴷ ⵢⵉⵙⴰⵏ ⵡⴰⵙⵙ ⴰⴷ ⴰⵣⵔⴰⵡⴰⵏ ⵜⴰⴷⵔⴰⵡⵜ ⵏ ⵉⴳⵏⵙⴰⵙⵏ ⵏ ⵜⵣⵓⵏⴰ ⵜⵓⵏⴱⵉⴹⵉⵏ ⴷ ⵜⴰⵔⵓⵏⴱⵉⴹⵉⵏ ⴷ ⵉⵙⵍⵎⴰⴷⵏ ⴷ ⵉⵎⵃⴹⴰⵕⵏ ⵉⵎⵙⴷⴰⵡⵏ ⴷ ⵉⵎⴳⴳⴰⵢⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵣⵔⴼⴰⵏⵏ, ⴷ ⵓⵍⴰ ⵉⴳⵏⵙⴰⵙ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ.
