ⵜⵙⵙⵉⵅⴼ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ, ⵢⴰⵜ ⵜⵙⵎⵓⵏⵉ ⴰⴽⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵃⵎⴰ ⴰⴷ ⵎⴹⴰⴽⴰⵕⵏ ⵜⵉⵎⴰⵢⵏⵓⵜⵉⵏ ⵏⵏⵉ ⵉⵙⵙⵏ ⵓⵙⴰⵔⴰⴳ ⴰⵏⴰⵎⵓⵔ ⴳ ⵜⵉⵣⵉ ⴰⴷ ⵉⴳⴳⵯⵔⴰⵏ. ⴰⵎⵓⵏⵜ ⴳ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵙⵎⵓⵏⵉ ⴰⴷ ⵙⵏⴰⵜ ⵜⵏⵇⵇⴰⴹ ⵣⴷⵉⵏⵉⵏ ⵙ ⵜⴰⵎⵓⵏⵜ ⴰⴽⴷ ⵜⵓⵙⵓⵔⵉⵏ ⵏ ⵓⵄⴷⵔⵉⵇ ⵏ ⵓⵏⴷⵓⴷⵉ ⵏ ⵍⵃⵓⵣ ⵏⵏⵉ ⵉⵇⵇⵉⵇⵏ ⵜⴰⵎⴰⵣⵉⵔⵜ ⵏⵏⵖ ⴷ ⵜⴱⵔⵉⴷⵉⵏ ⵏ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴳ ⵎⴰⴷ ⵉⵥⵍⵉⵏ ⵙ ⵓⵄⴷⵔⵉⵇ ⵏ ⵓⵏⴷⵓⴷⵉ ⵏⵏⵉ ⵉⵟⵟⴰⵚⵏ ⵉⵎⵣⴷⴰⵖⵏ ⵏ ⴽⴽⵓⵥⵜ ⵏ ⵜⵎⵏⴰⴹⵉⵏ ⵏ ⵜⴳⵍⴷⵉⵜ (ⵎⵕⵕⴰⴽⵛ-ⴰⵙⴼⵉ, ⵙⵓⵙ-ⵎⴰⵙⵙⴰ, ⴷⵔⴰ-ⵜⴰⴼⵉⵍⴰⵍⵜ, ⴱⵏⵉ ⵎⵍⵍⴰⵍ-ⵅⵏⵉⴼⵕⴰ), ⵜⵓⵍⵍⵖ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵙ ⵜⵙⵏⵜⴰⵢⵉⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⴳⴳⵯⵉⵏ ⴰⴷ ⵙ ⵉⴳⵉ ⵏ ⵉⵔⵣⴰⴼⵏ ⵙ ⵓⴱⴰⵔⴰⵣ ⴷ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴰⴽⴷ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⴷ ⵉⵎⴳⴳⴰⵢⵏ ⵉⵎⵙⵎⵓⵏⵏ ⴷ ⵉⵎⵣⴷⴰⵖⵏ ⵃⵎⴰ ⴰⴷ ⴱⴷⴷⵏⵜ ⵅⴼ ⵜⵓⴳⴳⴰⵣ ⵉⵜⵜⵓⴳⴰⵏ ⴰⴼⴰⴷ ⴰⴷ ⵉⴼⵙⵉⵙⵏⵜ ⵜⵓⵙⵓⵔⵉⵏ ⵅⴼ ⵉⵎⵣⴷⴰⵖⵏ. ⴳ ⵓⵎⵏⵉⴷ ⴰⴷ, ⵜⴻⵜⵜⵍⴰⵖⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ ⵔⴰⴷ ⴱⴷⴷⴰ ⵉⵎⵓⵏ ⵓⵙⵇⵇⵉⵎ ⴰⴽⴷ ⵉⴷⵔⵉⵣⵏ ⵏ ⵓⵄⴷⵔⵉⵇ ⵙ ⵓⵙⵔⵓⵙ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵉⴼⴰⵡⵏ ⴷ ⵜⵙⵏⵜⴰⵢⵉⵏ ⵜⵉⵎⴰⵏⴰⵡⵉⵏ ⴳ ⵓⴱⴰⵔⴰⵣ, ⵎⴽⴷⴰ ⵔⴰⴷ ⵉⵣⴷⵉ ⵜⴰⵎⵓⵏⵜ ⵏⵏⵙ ⴰⴽⴷ ⵜⵙⵏⵜⴰⵢⵉⵏ ⵜⵉⵎⵔⵙⴰⵍⵉⵏ ⴷ ⵜⴰⵔ ⵜⵎⵔⵙⴰⵍⵉⵏ ⴳ ⵓⵙⵡⵓⴷⴷⵓ ⵏ ⵉⴷⵔⵉⵣⵏ ⵏ ⵓⵄⴷⵔⵉⵇ ⴰⴷ. ⴳ ⵎⴰⴷ ⵉⵥⵍⵉⵏ ⵙ ⵓⵙⴰⵡⵔ ⵏ ⵓⵙⴳⴳⴷ ⵏ ⵓⵙⵍⴳⵏ ⵏ ⵜⵡⵊⴰ, ⴷ ⵙ ⵓⵙⵢⵉⵍⵉ ⵏ ⵓⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ, ⵉⵜⵜⵓⵎⵙⴰⵙⴰ ⵅⴼ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⴳ ⵜⵎⵏⴰⴹⵉⵏ ⵙ ⵙⵏⴰⵜ ⴷ ⵎⵔⴰⵡⵜ ⵏ ⵜⴳⵍⴷⵉⵜ, ⴰⴼⴰⴷ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⴷⵔⴰⵡⵜ ⴳ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⵙⴰⵡⵔ ⴰⴷ ⴰⵎⵇⵇⵔⴰⵏ. ⵉⵙⵡⵓⵜⵜⵙ ⵓⵙⵇⵇⵉⵎ, ⵙ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴰⴷ ⵙ ⵓⵎⵙⴰⵙⴰ ⴰⴽⴷ ⵜⵎⵢⴰⴷⴰⵙⵜ ⵜⴰⵏⵊⵎⵓⵜ ⵜⴰⵎⴰⵍⴰⵢⵜ (bottom-up) ⴰⴷ ⵉⵙⵙⴼⵍⴷ ⵙ ⵉⵎⴳⴳⴰⵢⵏ ⴰⴼⴰⴷ ⴰⴷ ⴼⴽⵏ ⵜⴰⵏⵏⴰⵢⵉⵏ ⵏⵏⵙⵏ, ⵙⵎⵏⵉⴷⵏ ⵜⵉⵙⵓⵎⵔⵉⵏ ⵏⵏⵙⵏ ⵅⴼ ⵓⵙⵏⴼⵍ ⵏ ⵓⵙⵍⴳⵏ ⵏ ⵜⵡⵊⴰ.