ⵉⵙⵏⵎⴰⵍⴰ ⵓⴳⵔⴰⵡ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵜⴰⵙⵓⵜⵍⵜ ⵏⵏⵙ ⵜⵓⵏⵣⵉⵍⵜ ⵜⵉⵙ ⵙⴰⵜ ⵙ ⵜⵉⵍⵉⵜ ⴷ ⴳ ⵜⵓⴳⴳⵓⴳⵜ ⵓⵙⵙⴰⵏ ⵏ 24 ⴷ 25 ⴱⵕⴰⵢⵕ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ ⵙ ⵓⵎⵙⴰⵙⴰ ⴰⴽⴷ ⵉⵙⴱⴷⴰⴷⵏ ⵏ ⵓⵙⵍⴳⵏ ⵓⵟⵟⵓⵏ 76.15 ⵉⵣⴷⵉⵏ ⵙ ⵡⴰⵍⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ. ⵉⵙⵖⵣⵏ ⵓⴳⵔⴰⵡ ⴰⵎⴰⵜⴰⵢ ⴳ ⵜⵙⵓⵜⵍⵜ ⴰⴷ :ⴰⵙⵖⵏⵓ ⵏ ⵓⵎⵏⴰⴷ ⵅⴼ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 71.17 ⵉⵏⴱⴹⵏ ⴰⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵓⵟⵟⵓⵏ 88.13 ⵉⵣⴷⵉⵏ ⵙ ⵜⵏⵖⵎⴰⵙⵜ ⴷ ⵜⵥⵕⵉⴳⵜ ⵏⵏⴰ ⴳ ⵍⵍⴰⵏ ⴽⵉⴳⴰⵏ ⵏ ⵉⵙⵏⴼⵍⵏ ⵉⵜⵜⵡⴰⵖⵔⴰⵏ ⴳ ⵓⵙⵉⴷⴷ ⵏ ⵉⵙⴱⴷⴰⴷⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵍⴰ ⴰⵙⵉⵔⵎ ⵙ ⴽⵔⴰ ⵏ ⵜⵉⵔⵎⵉⵜⵉⵏ ⵉⵜⵜⵓⵣⵏⵎⵣⴰⵍⵏ ⴷ ⵓⵍⴰ ⵜⵉⵎⴰⵢⵏⵓⵜⵉⵏ ⴷ ⵉⵣⵣⵉⴳⵣⵏ ⵏⵏⴰ ⵉⵙⵙⵏ ⵉⴳⵔ ⵏ ⵜⵏⵖⵎⴰⵙⵜ ⴷ ⵜⵥⵕⵉⴳⵜ ⵍⵓⵎⴰⵕ ⴰⵙⴷⴷⵔⴼ ⵏ ⵉⵍⵉⵢ ⴰⵜⵉⴽⵏⵓⵍⵓⵊⵉ ⴷ ⵓⵙⵎⵔⵙ ⵏ ⵜⵉⵜⵉⴽⵏⵓⵍⵓⵊⵉⵜⵉⵏ ⵜⵉⵜⵔⴰⵔⵉⵏ ⴳ ⵢⵉⴳⵔ ⴰⴷ; ⴰⵙⵖⵏⵓ ⵏ ⵜⴰⵏⴰⴹⵜ ⵅⴼ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ ⵅⴼ ⵢⴰⵏ ⵓⵏⴳⵔⴰⵡ ⴰⴷⵓⵙⴰⵏ ⴰⵏⴰⵎⵓⵔ ⵉⴱⴷⴷⵏ ⵅⴼ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⵏⵏⴰ ⵉⵜⵜⵓⵙⵎⵓⵜⵜⴳⵏ ⵙ ⵓⵣⵣⴳⵉⵔ ⵏ ⵓⵙⵖⵉⵡⵙ ⵏ ⵜⵡⵓⵔⵉ ⴰⵙⵜⵕⴰⵜⵉⵊⵉ ⵏ ⵓⵙⵇⵇⵉⵎ. ⵜⴳⵓ ⵜⴰⵏⴰⴹⵜ ⴰⴼⴰⵔⵙ ⵏ ⵓⵙⴷⴷⵉ ⵏ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⵅⴼ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⴷⵓⵙⵉ ⴰⵡⵜⵜⴰⵙ ⵏⵏⵙ ⴰⵙⴷⵔⴰⵡ ⵏ ⵉⵎⴳⴳⴰⵢⵏ ⵉⴷⵖⴰⵔⴰⵏⵏⴳ ⵜⵙⵓⵎⵔⵜ ⵏ ⵉⴼⵙⵙⴰⵢⵏ ⵓⵎⵀⵉⵍⵏ ⵉⵣⵎⵔⵏ ⴰⴷ ⵉⵜⵜⵓⵣⵣⴳⵉⵔⵏ ⵎⵙⴰⵙⴰⵏ ⴰⴽⴷ ⵜⵥⵍⴰⵢⵉⵏ ⵜⵉⵏⵎⵏⴰⴹⵉⵏ ⴷ ⵜⴷⵖⵔⴰⵏⵉⵏ ⵉⵖⵉⵢⵏ ⴰⴷ ⴷⵔⵓⵏⵜ ⴳ ⵓⵙⴷⵓⵙ ⵏ ⵓⵣⵔⴼ ⴳ ⵜⴷⵓⵙⵉ ⵉ ⵇⴰⵃ ⵉⵏⵎⵓⵔⴰⵏ ⴷ ⵜⵏⵎⵓⵔⵉⵢⵉⵏ; ⴰⵙⵖⵏⵓ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⴳⴳⵯⴰⵙ 2021 ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ 35 ⵏ ⵓⵙⵍⴳⵏ ⵉⵣⴷⵉⵏ ⵙ ⵡⴰⵍⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵡⵇⵇⵔ ⵉⵙⵎⴷⵏ ⵏ ⵓⵎⵏⵣⴰⵢ ⵏ ⵓⵏⵎⴰⵍⴰ ⴷ ⵜⵙⵓⵏⴹⵜ ⵜⴰⵙⴳⵯⵙⴰⵏⵜ ⴳ ⵓⵙⵎⵓⵜⵜⴳ ⵏⵏⵙ ⵙ ⵓⵣⵣⴳⵉⵔ ⵏ ⵉⵙⴱⴷⴰⴷⵏ ⵓⵍⴳⵉⵏⵏ ⴷ ⵉⵎⵏⵣⴰⵢⵏ ⵏ ⴱⴰⵔⵉⵙ ⵉⵙⵏⵎⴰⵍⴰⵏ ⵜⵉⵎⵔⵙⴰⵍ ⵜⵉⵏⴰⵎⵓⵔⵉⵏ. ⵣⵣⵉⴳⵣⵏⵜ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵙⵇⵇⵉⵎ ⴳ ⵡⴰⵙⵙ ⵏⵏⵙ ⵡⵉⵙ ⵙⵉⵏ ⵙ ⵓⵎⵙⴳⴷⴰⵍ ⵏ ⵙⵉⵏ ⵉⴼⵙⵔⵏ ⵏⵏⴰ ⵜⵙⵙⴰⴼⴹ ⵜⵎⴰⵡⴰⵙⵜ ⵏ ⵜⵣⵔⴼⵜ ⵉ ⵓⵙⵇⵇⵉⵎ ⵜⵏ ⵉⴳⴰⵏ ⴷ ⵓⵙⵖⵏⵓ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵓⵙⵖⵏⵓ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⵓⵖⵔⵉⵎⵜ. ⵜⴻⵜⵜⵓⵙⵔⴰⵙ ⵢⴰⵜ ⵜⵙⵇⵇⵉⵎⵜ ⵏ ⵓⵙⴱⵓⵖⵍⵓ ⵏ ⵎⴰⴷ ⴷ ⵉⴷⴷⴰⵏ ⴳ ⵉⴼⵙⵔⴰⵏ ⵎⴰⵛ ⴰⵙⵖⵣⵏ ⴰⵎⴳⴳⴰⵔⵓ ⵔⴰⴷ ⵜ ⵉⴳ ⵓⵙⵉⵔⴰ ⵏ ⵓⵙⵇⵇⵉⵎ. ⵉⴱⵔⵔⴽ ⵓⴳⵔⴰⵡ ⴰⵎⴰⵜⴰⵢ ⵙ ⵢⴰⵏ ⵓⴽⴰⴱⴰⵕ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⴷⵔⴼⵉⵏ ⵜⵉⵎⴰⵜⴰⵢⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵡⴰⵏⴽ ⵏ ⵍⵉⴱⵢⴰ ⴳ ⵉⵍⵍⴰ ⵓⵏⵙⵙⵉⵅⴼ ⵏⵏⵙ ⴷ ⵓⵎⴰⵔⵉ ⵏ ⵓⵏⵙⵙⵉⵅⴼ ⴷ ⴽⵔⴰ ⵏ ⵉⴳⵎⴰⵎⵏ ⴷ ⵉⵎⵙⵖⴰⵏⵏ ⵏⵏⵙ. ⵜⴻⵜⵜⵓⵙⴳⵎⴹ ⵜⵎⵢⴰⵇⵇⴰⵏⵜ ⵏ ⵓⵎⵙⴰⵙⴰ ⴷ ⵜⵎⴷⵔⴰⵡⵜ ⵉⵏⴳⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴷ ⵎⴰⵙⵙ ⵄⵓⵎⴰⵕ ⵃⴰⵎⴷ ⵄⴰⵟⵉⵢⵢⴰ ⴰⵍⵍⴰⵀ ⵍⵃⵉⵊⴰⵣ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵍⵉⴱⵢⴰ ⵜⵙⵡⵓⵜⵜⵙ ⴰⵙⴷⵓⵙ ⵏ ⵓⵎⵢⴰⵡⴰⵙ ⵉⵏⴳⵔ ⵜⴼⵓⵍⵉⵏ ⵙ ⵙⵏⴰⵜ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵕⵚⵚⴰ ⴷ ⵓⵙⴱⵓⵖⵍⵓ ⵏ ⵜⵡⵓⵔⵉ ⵉⵛⵛⴰⵕⵏ. ⵉⵙⵔⴰⵙ ⵉⴼⴰⵡⵏ ⵉⵏⴳⵔ (15 ⴽⵟⵓⴱⵕ 2021 - 24 ⴱⵕⴰⵢⵕ 2022) ⵅⴼ ⵉⴳⴳⵉ ⵏ ⵉⵎⵓⵙⵙⵓⵜⵏ ⴷ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵉⵎⴰⵙⵙⵏ ⵉⵏⴰⵎⵓⵔⴱ ⴷ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⴷ ⵉⴳⵔⴰⵡⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵜⴻⵜⵜⵡⴰⵙⵙⵏ ⵜⴷⵉⵏⴰⵎⵉⵜ ⵏ ⵓⵙⵇⵇⵉⵎ ⴳ ⵓⵣⵎⵣ ⴰⴷ ⵙ ⵓⵎⵢⴰⵖ ⴰⴽⴷ ⵜⵓⴳⵜ ⵏ ⵜⵎⵙⵍⴰⵢⵉⵏ ⵏⵏⴰ ⵢⵓⵡⵉⵏ ⴰⵎⵏⴰⴷ ⴰⴳⴷⵓⴷⴰⵏ ⴰⵏⴰⵎⵓⵔ ⴷ ⵓⵙⵎⵙⵉ ⵏ ⵜⴽⵛⵛⵓⵎⵉⵏ ⵏⵏⵙ ⴳ ⵎⴰⴷ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ ⵍⵓⵎⴰⵕ:ⴰⵙⵎⵏⵉⴷ ⵏ ⵉⵙⵖⵍⴰⴼ ⵏ ⵜⵏⴱⴰⴹⵜ ⵅⴼ ⵓⵙⵏⴼⵍ ⵏ ⵓⵎⵣⵣⵔⵉ ⵏ ⵜⴳⵣⵣⴰⵢⵜ ⵙ ⵓⵎⵣⵣⵔⵉ ⴰⴷⵓⵙⴰⵏ; ⵉⴳⴰ ⵢⴰⵏ ⵓⴽⴰⴱⴰⵕ ⵙⴳ ⵓⵙⵇⵇⵉⵎ ⴷ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⴳ ⵜⵎⵏⴰⴹⵜ ⵏ ⵍⵄⵢⵓⵏ-ⵙⵙⴰⵇⵢⴰ ⵍⵃⵎⵕⴰ ⵢⴰⵏ ⵓⵔⵣⴰⴼ ⵙ ⵜⵖⵔⵎⵜ ⵏ ⴱⵓⵊⴷⵓⵕ ⴰⴼⴰⴷ ⴰⴷ ⵉⵃⵇⵇⴰ ⵉⴱⵔⵔⵉⵡⵏ ⵏ ⵢⴰⵜ ⵜⵏⵎⵓⵔⵉⵜ ⴳ ⵜⵖⵔⵎⵜ ⵎⴰⵙ ⴰⵙ ⴳⴰⵏⵜ ⵜⵏⴱⴰⴹⵉⵏ ⵜⵉⵏⴼⵔⵓⵜⵉⵏ ⴰⵎⵔⵎⴷ ⴷ ⴳⴰⵔ ⴰⵎⵓⴳⴳⵓ; ⴰⵎⵢⴰⵖ ⴰⵎⵣⵡⴰⵔ ⴰⴽⴷ ⵜⵙⴽⴰⵏⵉⵏ ⵏⵏⴰ ⵜⵙⵙⵏ ⵜⵎⴰⵣⵉⵔⵜ ⵏⵏⵖ ⴳ 20 ⴱⵕⴰⵢⵕ, ⴳ ⵓⵙⴰⵜⵉ ⴰⴷ ⵜⵜⵡⴰⴷⴰⵍⵏ 40 ⵏ ⵜⵙⴳⴳⵯⵉⵏ ⴱⴹⴰⵏⵉⵏ ⵅⴼ 12 ⵏ ⵜⵎⵏⴰⴹⵜ; ⴰⴹⴼⴼⵓⵕ ⵏ ⵜⵓⴳⵜ ⵏ ⵉⵎⵚⵉⵕⵉⴹⵏ, ⵍⵓⵎⴰⵕ ⵜⵉⴷⴰ ⴳ ⵜⵏ ⵢⵓⵡⵉ ⵓⵎⵏⴰⴷ ⴰⴳⴷⵓⴷⴰⵏ ⴷ ⵓⴳⵔⴰⵖⵍⴰⵏ; ⴰⵏⵏⵖⴰⵍ ⵏ ⵓⵙⴰⵜⵉ ⵏ ⵉⵏⵥⵉ ⵏ ⵉⵎⵚⵉⵕⵉⴹⵏ; ⴰⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⵉⴳⵯⵏⵙⴰⵏⵏ ⴷ ⵉⵏⵎⵏⴰⴹⵏ ⵅⴼ ⵓⵙⵙⴼⵍⴷ ⵙ ⵓⵏⴳⵉⵙⵏ ⴷ ⵡⵉⵢⵢⴰⴹ ⴰⴽⴷ ⵉⵎⵙⵜⴳⴳⴰⵔⵏ ⴷ ⵉⵎⴳⴳⴰⵢⵏ ⴰⵔⵓⵏⴱⵉⴹⵏ ⴷ ⵉⴳⵏⵙⴰⵙ ⵏ ⵓⵎⵓⵍⵍⵉ ⴰⵏⴰⵎⵓⵔ ⵏ ⵓⵙⵍⵎⴷ ⴰⵏⴰⴼⵍⵍⴰ ⵅⴼ ⵓⵙⴷⴰⵡ ⵏ ⵜⴷⴱⴰⵔⵜ ⵜⴰⵡⵙⵢⴰⵏⵜ ⴷ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴳ ⵜⵙⴷⴰⵡⵉⵢⵉⵏ; ⴰⵣⵣⵉⴳⵣ ⵏ ⵓⵖⴰⵡⴰⵙ ⵏ ⵓⵙⴳⴳⴷ ⵏ ⵉⵎⴰⵍⴰⴷⵏ ⵓⴼⵔⵉⴷⵏ ⴷ ⵡⴰⵏⵏⴰⵍ ⴰⵏⴰⵎⵓⵏ ⵉ ⵓⵏⴳⵉⵙⵏ ⵏ ⵓⵎⵣⵔⵓⵢ ⵏ ⵜⵕⵥⵉⵢⵉⵏ; ⴰⵣⵣⵉⴳⵣ ⵏ ⵜⵡⵓⵔⵉⵡⵉⵏ ⵏ ⵓⵖⴰⵡⴰⵙ ⵏ ⵓⵙⵎⵙⴰⵙⴰ ⵏ ⵓⵙⴰⵢⵔⴰⵔ ⵏ ⵜⵣⵎⴰⵎⵎⴰⵔⵜ ⵙ ⵓⵙⵖⴰⵍ ⵢⵓⵡⴹⵏ 95%; ⴰⵙⵙⵉⴼⴹ ⵏ ⵜⵎⵢⴰⵣⴰⵏⵜ ⵉ ⵍⴰⵕⵛⵉⴼ ⴰⴷⵉⴱⵍⵓⵎⴰⵙⵉ ⴰⴼⵕⴰⵏⵚⵉ ⵉⴹⴼⵕⵏ ⵉ ⵜⵎⴰⵡⴰⵙⵜ ⵏ ⵜⴱⵕⵕⴰⵏⵜ ⵅⴼ ⵓⵙⵡⵔⵔⵉ ⵏ ⵍⴰⵕⵛⵉⴼ ⵏ ⵎⵓⵃⵎⵎⴰⴷ ⴱⵏ ⵄⴱⴷ ⵍⴽⵔⵉⵎ ⵍⵅⵟⵟⴰⴱⵉ; ⴰⵙⵜⴰⵢ ⵏ ⵓⵙⵇⵇⵉⵎ ⴷ ⴰⴳⵎⴰⵎ ⴳ ⵓⵙⵉⵔⴰ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⴷ ⵡⴰⵍⵍⴰⵙ ⵏ ⵓⵙⵜⴰⵢ ⵏⵏⵙ ⴷ ⴰⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵣⵡⴰⴳⵜ ⴷ ⵓⴳⵎⴰⵎ ⴳ ⵜⵙⵇⵇⵉⵎⵜ ⵏ ⵓⵜⵓⵢ ⵉⴹⴼⵓⵕⵏ ⵉ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ...; ⴰⵏⵄⴰⵕ ⵏ ⵓⵙⵇⵇⵉⵎ ⴷⴰⵔ ⵓⵎⴰⵣⴰⵏ ⴰⵎⵖⵍⴰⵍ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵏⵢⵓⵢⵓⵕⴽ ⴰⴼⴰⴷ ⴰⴷ ⵜⵏⵏⴰⵍ ⵜⵎⴰⵣⵉⵔⵜ ⵏⵏⵖ ⵢⴰⵜ ⵜⵖⵜⴰⵙⵜ ⵜⴰⴽⵙⵡⴰⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵏⵏⴰ ⵉⵙⴷⵓⵙⵏ ⵜⴰⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⵜⴼⴼⵓⵖ ⴷ ⵜⵖⵜⴰⵙⵜ ⴳ ⴷⵓⵊⴰⵏⴱⵉⵔ 2021; ⴰⵣⵣⵉⴳⵣ ⵏ ⵜⵓⵍⵖⴰ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵉⴹⴼⵓⵕⵏ ⵉ ⵜⵎⵜⵜⴰ ⵉⵎⵓⵏⵏ ⵙ ⵜⵉⵍⴰⵍⵜ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵉⵏ ⵏ ⵍⵄⵢⵓⵏ-ⵙⵙⴰⵇⵢⴰ ⵍⵃⵎⵕⴰ ⴷ ⴷⴷⴰⵅⵍⴰ ⵡⴰⴷⵉ-ⴷⴷⴰⵀⴰⴱ, ⴳ ⵜⵖⵜⴰⵙⵜ ⵏⵏⵙ ⵜⴰⵎⴳⴳⴰⵔⵓⵜ ⴷ ⵉⴼⴼⵓⵖⵏ ⴳ 29 ⴽⵟⵓⴱⵕ 2021; ⵉⵙⵎⵏⵉⴷ ⵓⵙⵇⵇⵉⵎ ⵙ ⴽⵉⴳⴰⵏ ⵏ ⵜⴽⵛⵛⵓⵎⵉⵏ ⵙ ⵡⴰⵙⵙⴰⵖ ⵏⵏⵙ ⴷ ⵙ ⵡⴰⵙⵙⴰⵖ ⵏ ⵉⵥⵟⵟⴰⵜⵏ ⵉⴳⵔⴰⵖⵍⴰⵏⵏ ⵎⵏⵉⴷ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵓⵕⵏ ⵉ ⵜⵎⵜⵜⴰ ⵉⵎⵓⵏⵏ, ⴳ ⵎⴰⴷ ⵉⵥⵍⵉⵏ ⵙ ⵉⵎⵔⵉⵙⵏ ⵏ ⵜⵎⵙⵙⵏⵜⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⴽⴰⵏⵉⵏ ⵜⵉⵏⴳⵔⴰⵢⵉⵏ ⴷ ⵜⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ...