ⵔⴰⴷ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵏⴳⵔ 28 ⵎⴰⵕⵚ ⴷ 2 ⵉⴱⵔⵉⵔ 2022, ⵢⴰⵏ ⵓⴽⴰⴱⴰⵕ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ/ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵏ ⵜⴳⴷⵓⴷⴰⵏⵜ ⵏ ⵏⵉⵢⵊⵔ, ⴰⴼⴰⴷ ⴰⴷ ⴷⵉⴷⵙ ⵉⴱⴹⵓ ⵜⵉⵔⵎⵉⵜ ⴷ ⵜⵎⵓⵣⴰⵢⵜ ⵏ ⵓⵙⵇⵇⵉⵎ ⵏⵏⴰ ⵉⴳⴰⵏ ⵜⵉⵎⵔⵙⵍⵜ ⵏ ⵓⴼⵔⴰⴳⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⵙ ⵓⵙⵎⵙⵙⵉ ⵅⴼ ⵜⵡⵓⵔⵉ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵏⵏⴰ ⵉⵙⴷⴰⵍ ⵓⵙⵇⵇⵉⵎ. ⵢⴰⵎⵓ ⵓⵔⵣⴰⴼ ⴰⴷ, ⵏⵏⴰ ⵔⴰⴷ ⴰⵙ ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵜⵉⵡⵓⵔⵉⵡⵉⵏ ⵏⵏⵙ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⴷ ⵎⴰⵙⵙ ⵎⴰⵜⵉ ⵍⵃⴰⴷⵊⵉ ⵎⵓⵙⴰ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵏⵉⵢⵊⵔ, ⴰⵙⵙ ⵏ ⵓⵙⵉⵏⴰⵙ 29 ⵎⴰⵕⵚ 2022, ⴳ ⵓⵙⴰⵜⵉ ⵏ ⵓⴱⵟⵟⵓ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⵏ ⵓⵙⵇⵇⵉⵎ ⴰⴽⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴳⵎⴰⵎⵉⵏ ⴳ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴰⵜⵉ ⵏ ⵓⵣⴷⴰⵢ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵍⵍⴰⵏ ⵉⵏⴳⵔ ⵓⵙⵇⵇⵉⵎ ⴷ ⵜⵙⵇⵇⵉⵎⵜ, ⵍⵓⵎⴰⵕ ⵍⵍⵉⵖ ⵔⴰⴷ ⵉⴳ ⴰⵔⵣⴰⴼ ⴰⵎⵣⵡⴰⵔⵓ ⵏ ⵉⴳⵎⴰⵎⵏ ⵉⵎⴰⵢⵏⵓⵜⵏ ⵏ ⵜⵙⵇⵇⵉⵎⵜ ⵙ ⵓⵙⵇⵇⵉⵎ. ⵢⴰⵎⵓ ⴳ ⵓⵖⴰⵡⴰⵙ ⵏ ⵓⵔⵣⴰⴼ ⴰⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴰⴽⴷ ⵉⴳⵎⴰⵎⵏ ⴷ ⵉⵎⵙⵖⴰⵏⵏ ⵏ ⵓⵙⵇⵇⵉⵎ ⵃⵎⴰ ⴰⴷ ⵉⵙⴰⵏⵏ ⵜⵉⵙⵎⵉⴳⴰⵍ ⵏⵏⵙ ⴷ ⵜⴱⵔⵉⴷⵉⵏ ⵏ ⵓⵙⵡⵓⵔⵉ ⵏⵏⵙ ⴳ ⵜⵓⴳⵜ ⵏ ⵉⴳⵔⴰⵏ, ⵙ ⵓⵎⴷⵢⴰ; ⵜⴰⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴽⵛⵛⵓⵎ ⴰⴼⵔⴳⴰⵏ ⵙ ⵉⵎⵉⵥ ⴷ ⵓⵙⵎⴽⵍ ⵏ ⵜⵏⵓⵔⵣⵉⵏ, ⵉⵎⴰⵙⵙⵏ ⵏ ⵓⵎⴷⴰⵢ ⴷ ⵓⵙⴰⴳⴳⵯ, ⴰⴹⴼⴼⵓⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎⵢⴰⵡⴰⵙ ⴷ ⵉⵎⵢⴰⵙⵙⴰⵜⵏ ⵉⴳⵔⴰⵖⵍⴰⵏⵏ, ⴷ ⵓⴳⴳⴰⵔ. ⵔⴰⴷ ⵢⵉⵍⵉ ⵓⵙⵎⵙⵙⵉ ⴳ ⵓⵔⵣⴰⴼ ⴰⴷ ⵙ ⵓⵥⵍⴰⵢ ⵅⴼ ⵜⵉⵔⵎⵉⵜ ⵏ ⵓⵙⵇⵇⵉⵎ ⵉⴷⴷⵖ ⵉⴳⴰ ⵜⵉⵎⵔⵙⵍⵜ ⵉⵙⴷⵍⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵙ ⵓⵙⴽⵏ ⵅⴼ: ⵓⵙⵏⵎⴰⵍⴰ ⵏ ⵉⵎⵉⵙ ⴷ ⵜⵙⵎⵉⴳⴰⵍ ⵏⵏⵙ, ⵜⴰⴱⵔⵉⴷⵜ ⴷ ⵜⵉⵇⵏⵉⵢⵉⵏ ⵏ ⵓⵔⵣⴰⴼ ⵙ ⵉⴷⵖⴰⵔⵏ ⵏ ⵓⴽⵓⵙ ⵏ ⵜⴷⵔⴼⵉ ⴷ ⵓⵙⵏⵎⴰⵍⴰ ⵏ ⵜⵎⵏⵢⵓⴳⴰⵔⵉⵏ, ⴰⵎⵢⴰⵖ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴰⴽⴷ ⵉⵎⴰⵙⵙⵏ ⵏ ⵜⵎⵜⵜⴰ, ⵜⵉⵔⵔⴰ ⵏ ⵜⴰⵏⴰⴹⵉⵏ, ⴰⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ, ⴷ ⵓⴳⴳⴰⵔ. ⴰⴼⴰⴷ ⴰⴷ ⵜⵜⵡⴰⵙⵙⴰⵏ ⵙ ⵡⴰⴷⴰⵙ ⵜⵡⵓⵔⵉ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴳ ⵓⵙⵡⵉⵔ ⴰⵏⵎⴹⴰⵏ, ⵔⴰⴷ ⴳⵏ ⵉⴳⵎⴰⵎⵏ ⵏ ⵓⴽⴰⴱⴰⵕ ⵢⴰⵏ ⵓⵔⵣⴰⴼ ⵉ ⵜⵙⵇⵇⵉⵎⵜ ⵜⴰⵏⵎⴹⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⴼⴰⵙ-ⵎⴽⵏⴰⵙ. ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵙⵙⵏⵜⵉ ⵓⵙⵇⵇⵉⵎ ⵜⴰⵖⵓⵔⵉ ⵙ ⵓⵙⵔⵓⵙ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵓⵙⴰⵜⵉ ⵏ ⵓⵙⵏⵎⴰⵍⴰ ⵏⵏⵙ, ⵙ ⵜⴷⵔⴰⵡⵜ ⴰⴽⴷ ⵜⵎⵙⵎⵓⵏⵜ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵜⵉⵏⴰⵡⵜ ⵜⴰⵙⴳⴰⵡⴰⵏⵜ ⵅⴼ “ⵉⵎⴰⵙⵙⵏ ⵉⵏⴰⵎⵓⵔⵏ ⵉⴼⵔⵉⵇⵉⵢⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ: ⵉⵣⵎⴰⵣ ⴷ ⵉⵏⴰⵥⴰⵕⵏ ⴳ ⵜⵉⵣⵉ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ-19 ⴷ ⴹⴰⵕⴰⵜ ⵏⵏⵙ” ⴳ ⵓⵙⴰⵜⵉ ⵏ ⵜⵙⵓⵜⵍⵜ 46 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴳ ⵓⵎⵏⴰⴹ ⴰⴷ, ⵜⵖⵔⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⴰⵙⵙⵏ ⵉⵜⵜⵓⵙⵔⴰⵙⵏ ⴷ ⵓⵙⵡⵀⵏ ⵏ ⵜⴱⵔⵉⴷⵉⵏ ⵏ ⵓⴱⵟⵟⵓ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⵉⵏⴳⵔⴰⵜⵙⵏ, ⴷ ⵓⵍⴰ ⴰⵙⵡⵓⵔⵉ ⵅⴼ ⵓⵙⵔⵇⴱ ⵏ ⵉⵡⴰⵏⴽⵏ ⵢⴰⴹⵏⵉⵏ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⵅⴼ ⵓⵙⵔⵓⵙ ⴷ ⵓⵙⵏⵎⵍ ⵏ ⵉⵎⴰⵙⵙⵏ ⵏⵏⵙⵏ ⵉⵏⴰⵎⵓⵔⵏ ⴰⴼⴰⴷ ⴰⴷ ⵉⵎⵓⵔⵙ ⵓⵙⵔⵓⵙ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ.