ⵔⴰⴷ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ 11 ⴰⵔ 15 ⵉⴱⵔⵉⵔ 2022, ⵢⴰⵏ ⵓⴽⴰⴱⴰⵕ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵔⴰⴷ ⵜ ⵉⵙⵙⵉⵅⴼ ⵓⵏⵎⵖⵓⵔ ⵎⴰⵙⵙ ⵔⵉⵎⵉ ⵏⴳⵡⵉ ⵍⵓⵎⴱⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ. ⵉⴷⴷⴰ ⴷ ⵓⵔⵣⴰⴼ ⴰⴷ, ⵏⵏⵉ ⵔⴰⴷ ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⴰⵜⵉ ⵏ ⵓⵏⵄⴰⵕ ⵏⵏⴰ ⵉⵙⵙⵉⵅⴼ ⵓⵙⵇⵇⵉⵎ ⴷ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⵙⵙⵉⵅⴼ ⵏⵏⵙ ⴰⴼⴰⴷ ⴰⴷ ⵉⵙⵖⵣⵏ ⵍⵎⵖⵔⵉⴱ ⵜⴰⵎⵜⵜⴰⵏⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵉⵙⴷⵓⵙ ⴰⵎⵙⴰⵡⴰⵍ ⵉⵏⴳⵔ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵓⵖⵔⵉⵎⵏ ⵅⴼ ⵓⵙⵔⵇⴱ ⵏ ⵜⴷⵔⴰⵡⵜ ⴳ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵓⵎⵢⴰⵖ ⴷⵉⴷⵙ.
ⵜⴰⵎⵓ ⴳ ⵓⴽⴰⴱⴰⵕ ⵏ ⵜⵙⵇⵇⵉⵎⵜ ⵎⴰⵙⵙⴰ ⵎⴰⵕⵉ ⵍⵡⵉⵙ ⴰⴱⵓⵎⵓ, ⵜⴰⵎⴰⵍⴰⵍⵜ ⴷ ⵜⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵉⴹⵕ ⴳ ⵉⴼⵔⵉⵇⵢⴰ, ⵎⴰⵙⵙⴰ ⵓⴼⵉⵏⴰ ⵊⵉⵔⵉⵏⴰ ⵜⵓⴱⵙⵉ, ⵜⴰⵎⴰⵍⴰⵍⵜ, ⵜⴰⵏⴽⴽⴰⴹⵜ ⵜⴰⵎⵥⵍⵉⵜ ⵉⵏⵜⴰⵢⵏ ⵙ ⵜⴷⵔⴼⵉ ⵏ ⵓⵡⵏⵏⵉ ⴷ ⵓⵙⵉⴷⴼ ⵙ ⵓⵎⵍⵉ ⴳ ⵉⴼⵔⵉⵇⵢⴰ, ⵎⴰⵙⵙ ⵉⴷⵔⵉⵙⴰ ⵙⵓ, ⴰⵎⴰⵍⴰⵍ, ⴰⵏⵙⵙⵉⵅⴼ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵉⵎⵚⵉⵕⵉⴹⵏ ⵏ ⴱⵕⵕⴰ ⵏ ⵜⵏⴱⴹⴰⵢⵜ ⵏⵉⵖ ⵙ ⵜⵎⴳⴳⵉⵜⵉⵏ ⴳⵣⵣⵓⵍⵏⵉⵏ ⵏⵉⵖ ⴰⵙⵇⴷⴷⵛ ⴳ ⵉⴼⵔⵉⵇⵢⴰ, ⴷ ⵎⴰⵙⵙⴰ ⴰⵏⴰ ⴼⵓⵕⵙⵜⵕ, ⵜⴰⵏⵎⵀⴰⵍⵜ ⵜⴰⵎⵣⵣⴳⵉⵔⵜ ⵏ ⵡⴰⵎⵎⴰⵙ ⴰⴼⵔⵉⵇⵉ ⵉ ⵜⴷⵉⵎⵓⵇⵕⴰⵟⵉⵜ ⴷ ⵜⵖⵓⵔⵉⵡⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵢⴰⵎⵓ ⴳ ⵓⵖⴰⵡⴰⵙ ⵏ ⵓⵔⵣⴰⴼ ⴰⴷ, ⴰⵙⵏⵎⴰⵍⴰ ⵏ ⵢⴰⵏ ⵓⵏⵎⵓⵇⵇⴰⵔ ⴰⵎⵢⴰⵖ ⵅⴼ "ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷ ⵉⵎⵏⵉⴷⵏ ⵏ ⵓⵙⴷⵓⵙ ⵏ ⵓⵎⵢⴰⵖ ⴰⴽⴷ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⴰⵙⵙ ⵏ ⵓⵢⵏⴰⵙ 11 ⵉⴱⵔⵉⵔ 2022 ⴳ ⵜⵖⵉⵡⴰⵏⵜ ⵏ ⵜⵎⴰⵙⵙⴰⵏⵉⵏ ⵜⵓⵍⴳⵉⵏⵉⵏ ⴷ ⵜⴷⴰⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴳ ⵕⵕⴱⴰⵟ-ⴰⴳⴷⴰⵍ, ⴳ ⵜⵙⵔⴰⴳⵜ ⵜⵉⵙ ⴽⵕⴰⴹⵜ (15.00), ⵉⵙⵡⵓⵜⵜⵙ ⵜⴰⴷⵔⴰⵡⵜ ⴳ ⵜⵣⵎⵎⴰⵔ ⵏ ⵓⵙⵓⵜⵔ ⵏ ⵓⵙⵖⵣⵏ ⵏ ⵍⵎⵖⵔⵉⴱ ⵉ ⵜⵏⵜⵜⴰⵎⵜ ⵜⴰⴼⵔⵉⵇⵉⵜ ⴷ ⵜⵡⵙⵙⵏⴰ ⵏ ⵉⵣⵎⴰⵣ ⴷ ⵜⵎⵔⵉⵙⵉⵏ ⵏⵏⴰ ⵔⴰⴷ ⴼⵍⵍⴰⵙ ⵉⴳⴳⵔ, ⴷ ⵡⴰⵏⴰⵡⵏ ⵏ ⵓⵎⵢⴰⵖ ⵏ ⴽⵓ ⴰⵙⴳⴳⵓⵔ ⵙⴳ ⵉⵙⴳⴳⵓⵔⵏ ⵏ ⵓⵏⴰⴳⵔⴰⵡ ⴰⵏⴰⵎⵓⵔ ⴰⴽⴷ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵜⵉⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵔⴰⴷ ⵉⵙⵙⵏ ⵜⴰⴷⵔⴰⵡⵜ ⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵉⴽⴰⴷⵉⵎⵉⵢⵏ ⴷ ⵓⵖⵔⵉⵎⵏ, ⵔⴰⴷ ⵜⵏⵜ ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⴷ ⵎⴰⵙⵙ ⵔⵉⵎⵉ ⵏⴳⵡⵉ ⵍⵓⵎⴱⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ.
ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵙⴰⵡⴰⵍ ⵉⵏⴳⵔ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⴷ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⴷ ⵡⴰⵎⵓⵏ ⵓⵖⵔⵉⵎ ⴰⵏⴰⵎⵓⵔ, ⵔⴰⴷ ⵉⵙⵏⵎⴰⵍⴰ ⵓⴽⴰⴱⴰⵕ ⵏ ⵜⵙⵇⵇⵉⵎⵜ ⵢⴰⵏ ⵓⵏⵎⵓⵇⵇⴰⵔ ⴰⴽⴷ ⵎⴰⵙⵙ ⵕⴰⵛⵉⴷ ⵟⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙ ⵏⵏⴰⵄⴰⵎ ⵎⵢⵢⴰⵕⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴽⴷⴰ ⵔⴰⴷ ⵜⵜⵓⵙⵏⵎⴰⵍⴰⵏ ⵉⵏⵎⵓⵇⵇⴰⵔⵏ ⵉⵙⴳⵓⵎⴰⵏⵏ ⵉⵏⴳⵔ ⵉⵎⴰⵍⴰⵍⵏ ⵏ ⵜⵙⵇⵇⵉⵎⵜ ⴰⴽⴷ ⵜⴰⴹⴰⵡⵉⵏ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵙⵡⵓⵔⵉⵏⵉⵏ ⴳ ⵢⵉⴳⵔⴰⵏ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⴰⴷⵔⴼⵉ ⵏ ⵓⵡⵏⵏⵉ ⴷ ⵓⵙⵉⴷⴼ ⵙ ⵓⵎⵍⵉ, ⵓⴳⴳⵉⴷⵏ ⵉⵡⵙⵙⴰⵔⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ.
ⵉ ⵓⵙⴽⵜⵉ, ⵉⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵙⵙⵓⵜⵔ ⵙⴳ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ, ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵏ 2019 ⴷ 2020 ⴷ ⵉⵙⵖⵍⴰⴼ ⵏⵏⵙ ⴷ ⵜⵙⵓⵎⴰⵔ ⵏⵏⵙ ⵣⴷⵉⵏⵉⵏ ⵙ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏⵏⴰ ⵉⵜⵜⵓⵙⵡⴰⵍⴰⵏ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⴰⵙⵖⵣⵏ ⵏ ⵜⵎⵜⵜⴰⵏⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⴳ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
