"ⵜⴳⴰ ⵜⵎⵖⵓⵏⵜ ⵏ ⵜⵡⵓⵔⵉ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵜⵓⵎⵏⵉⴳⵜ ⴷ ⵜⵎⵙⵙⵔⵇⴱⵜ ⴽⵉⴳⴰⵏ, ⵉⴷⴷⵖ ⵉⴳⵓⵍⴰ ⵓⵎⵢⴰⵖ ⴰⴽⴷ ⵉⵙⵖⵍⴰⴼ ⵏⵏⵙ 80 ⴰⵔ 90 ⴳ ⵜⴳⵎⵉⴹⵉ, ⵉⵖ ⵉⴳⴰ ⵙⴳ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⵏⵉⵖ ⵜⴰⵎⵀⵍⴰ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵏⵉⵖ ⵜⴰⵊⵉⴹⵕⵎⵜ ⵜⴰⴳⵍⴷⴰⵏⵜ".

ⵉⴷⴷⴰ ⴷ ⵎⴰⵢⴰ ⵏⵏ ⴳ ⵜⴳⵓⵔⵉ ⵏ ⵜⵏⵙⵙⵉⵅⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⵉⴼⴰⵡⵜ ⵏ ⵡⴰⵙⵙ ⴰⴷ ⴰⴽⵡⴰⵙ 19 ⵏⵓⵡⴰⵏⴱⵉⵔ 2023 ⴳ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵓⴱⵔⴳⵔⴰⵡ ⴰⵙⴳⴰⵡⴰⵏ ⵅⴼ "ⵜⵉⵍⴰⵍⵜ ⵏ ⵜⵎⵔⵙⴰⵍ ⵏ ⵜⵏⴼⵔⵓⵜ ⴳ ⵡⴰⵔⴰⵢ ⵙⴳ ⵓⵙⵔⴼⵓⴼⵏ", ⵜⵙⴷⴷⵉⴷ ⵎⴰⵙ ⴳⴰⵏⵜ ⵜⵢⴰⴼⵓⵜⵉⵏ ⴰⴷ "ⴰⵙⵍⴽⴰⵎ ⴰⴼⴰⴷ ⴰⴷ ⵉⵣⵣⵉⴳⵣ ⵓⵙⴱⴷⴷⵉ ⵏ ⴽⵓⵍⵍⵓ ⵎⴰⴷ ⵉⵣⵎⵔⵏ ⴰⴷ ⵉⵟⵟⴰⵚ ⴰⴷⴷⵓⵔ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵏⵖ".

ⵙ ⵓⵎⴰⵜⴰ, ⵣⴷⵉⵏ ⵉⵙⵖⵍⴰⴼ ⴰⴷ ⵙ ⵓⵃⵟⵟⵓ ⵏ ⵡⴰⴷⴷⵓⵔ ⵏ ⵓⴳⴳⵉⴷⵏ ⴳ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ ⴷ ⵓⴼⵔⴰⴳ ⵏⵏⵙⵏ ⴷ ⵓⵣⴷⴰⵢ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⵙⵡⵓⵔⵉⵢⵏ ⵏⵏⵙⵏ, ⴷ ⵓⵙⴷⵓⵙ ⵏ ⵉⵍⵓⴳⵏⵏ ⵏ ⵓⴹⴼⴼⵓⵕ ⴷ ⵓⵙⵡⵓⴷⴷⵓ ⴷ ⵓⵙⴱⵓⵖⵍⵓ ⵏ ⵜⵓⴳⴳⴰⵣ ⵏ ⵓⵎⴷⴰⵢ ⴳ ⵜⵎⵚⵕⴰⵢ ⵏ ⵜⵏⴼⵔⵓⵜ, ⵎⴰⵢⴰ ⵏⵏ ⵙ ⵜⵓⵚⴽⴰ ⵅⴼ ⵜⵓⵍⵍⵣⴰ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵡⴰⵔⴰⵢ ⵜⴰⵡⵓⵔⵉ ⵜⵓⵙⵎⵉⴷⵜ ⵉⵙⵡⵓⵜⵜⵙⵏ ⴰⵙⴷⵓⵙ ⵏ ⵜⵓⵙⵙⵏⴰ ⵏ ⵓⵏⴱⴰⴹ ⵉⵖⵓⴷⴰⵏ ⴷ ⵓⵣⵣⵓⴳⵣ ⵏ ⵉⵙⵖⵍⴰⴼ ⵉⵜⵜⵓⵙⵎⵏⵉⴷⵏ ⴰⴼⴰⴷ ⴰⴷ ⵜⵜⵡⴰⵣⵔⴰⵢⵏⵜ ⵜⵎⵏⵜⵉⵍⵉⵏ ⵜⵉⵥⵓⵕⴰⵏⵉⵏ ⵏⵏⵉ ⵉⵣⵎⵔⵏ ⴰⴷ ⵜⵙⵎⵏⵜⵍⵜ ⵙ ⵓⵙⵔⴼⵓⴼⵏ ⴷ ⵓⴷⵔⵡⵙ (ⴳⴰⵔ ⴰⵎⵓⴳⴳⵓ).

ⵓⵔ ⵜⴻⵜⵜⵓ ⵜⵏⵙⵙⵉⵡⴼⵜ ⵏ ⵓⵙⵇⵇⵉⵎ ⴰⴷ ⵜⵙⵙⴽⵜⵉ ⵙ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵎⵔⵙⴰⵍ ⵏⵏⵉ ⵉⵙⴳⵎⴹ ⵓⵙⵇⵇⵉⵎ ⴰⴽⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵏⵏⵉ ⵉⴳⴰⵏ ⵢⴰⵏ ⵓⵙⵜⴰⵢ ⴰⵎⵅⴰⵙ ⴷ ⵜⵎⵙⴽⵔⵜ ⵉⵙⵙⵉⴷⴷⵏ ⵉ ⵓⵎⵢⴰⵡⴰⵙ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⵜⵉⵏⵉ ⵎⴰⵙ ⵜⴳⴰ ⵜⵉⵔⵎⵉⵜ ⵜⴰⵎⵓⴼⴰⵢⵜ ⵏ ⵜⵓⵥⵥⵓⵎⵜ ⵏ ⵉⴳⵉ ⴰⵏⴰⵎⵓⵔ ⴰⵣⵔⴼⴰⵏ, ⴷ ⵢⴰⵏ ⵙⴳ ⵉⵎⴰⵙⵙⵏ ⵏ ⵜⴷⵔⴰⵡⵜ ⵜⴰⵎⵅⴰⵙⵜ ⴷ ⵜⵎⴳⵔⵓⵜ ⵏ ⵓⵙⴷⵓⵙ ⵏ ⵉⵍⵓⴳⵏⵏ ⵏ ⵓⵏⴱⴰⴹ ⴰⵏⴼⵔⵓ ⴷ ⵜⵔⵙⵍⵜ ⵏ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ.

ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵓⵎⴰⵡⵙⴰⵙ ⵏ ⵜⵣⵔⴼⵜ, ⵎⴰⵙⵙ ⵄⴱⴷ ⵍⵍⴰⵟⵉⴼ ⵡⵀⴱⵉ, ⵎⴰⵙ ⵉⴳⴰ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴰⵙⴳⴳⵯⴰⵙ ⵏ 2019, ⵜⴰⴷⴰⵙⵉⵍⵜ ⵜⴰⵎⴰⵢⵏⵓⵜ ⴳ ⵓⴱⵔⵉⴷ ⵏ ⵓⵙⵎⴰⴷ ⵏ ⵜⵓⵚⴽⴰ ⵜⴰⵎⵔⵙⴰⵍⵜ ⵜⴰⵏⴰⵎⵓⵔⵜ. ⵉⵙⵉⵙⴼⵉⵡ ⵎⴰⵙ ⵉⴳⴰ ⵉⵎⵉⵙ ⴰⵏⴰⵎⵓⵔ ⵢⴰⵜ ⵜⵔⵏⴰⵡⵜ ⵜⴰⵎⴰⵏⴰⵡⵜ ⴷ ⵉⵎⵉⵙ ⵉⵕⵡⴰⵏ ⴳ ⵎⴰⴷ ⵉⵥⵍⵉⵏ ⵙ ⵜⵓⴳⴳⴰⵥ ⵜⵉⵏⴰⵎⵓⵔⵉⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵙ ⵎⴰⴷ ⵉⵜⵜⴳⴳⴰ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴷ ⵜⴷⵔⴰⵡⵉⵏ ⵜⵉⴽⵙⵡⴰⵜⵉⵏ ⴳ ⵢⵉⴳⵔ ⴰⴷ.

ⵉⵣⵎⵎⴻⵎ ⵓⵎⴰⵡⵙⴰⵙ ⵏ ⵜⵣⵔⴼⵜ ⵎⴰⵙ ⵢⵓⵡⵙ ⵉⵎⵉⵙ ⴰⴷ ⴰⵡⴷ ⴳ ⵓⵣⴷⴰⵢ ⵏ ⵓⵙⴷⵓⵙ ⵏ ⵓⵏⵣⵡⵉ ⵏ ⵜⵎⵢⵉⵎⴰⵏⵜ ⵉⵜⵜⵓⵎⵔⴰⵔⴰⵏ ⴰⴽⴷ ⵜⵓⴳⵜ ⵏ ⵉⵎⴳⴳⴰⵢⵏ ⴷ ⵓⵙⵎⵓⵜⵜⴳ ⵏ ⵡⴰⵏⵏⴰⵍ ⵉ ⵜⵡⵓⵔⵉⵡⵉⵏ ⵏⵏⵙ ⴷ ⵉⵙⵖⵍⴰⴼ ⵏⵏⵙ, ⴳ ⵜⵉⵣⵉ ⵏ ⵉⵔⵣⴰⴼⵏ ⵏⵏⵙ ⵉⵍⵓⴳⴰⵏⵏ ⵙ ⵜⵓⴳⵜ ⵏ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ, ⵎⴰⵢⴰ ⵏⵏ ⴰⴷ ⵉⵙⵢⵉⵍⵉⵏ ⴳ ⵓⵙⵡⵉⵔ ⴰⵎⵔⵙⴰⵍ ⴷ ⵓⵎⵀⵉⵍ ⴷ ⵓⵏⵉⵍⴰⵡ "ⵜⵉⵔⵎⵉⵜ ⵜⴰⵎⵓⴼⴰⵢⵜ ⴳ ⵓⵙⵡⵉⵔ ⵏ ⵓⵙⴷⵓⵙ ⵏ ⵜⵙⵓⵙⵖⵜ ⴷ ⵓⵏⴱⴰⴹ ⵏ ⵉⵏⴰⴳⵔⴰⵡⵏ ⵏ ⵜⴼⴰⵜⵉⵜ ⴷ ⵓⴹⴰⴽⴰⵍ ⵏ ⵜⵙⵏⵙⵉ ⵏ ⵓⵎⴰⵜⵔ ⵏ ⴱⵕⵕⴰ ⴷ ⵓⵙⵓⵍⴰⵏ ⴼⵍⵍⴰⵙ."

ⴰⵏⵎⵓⵇⵇⴰⵔ ⴰⴷ ⴰⵙⴳⴰⵡⴰⵏ, ⵏⵏⵉ ⵜⵙⵏⵎⵍⴰ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵓⵔⴰⵢⵜ ⵜⴰⵎⴰⵡⵙⴰⵙⵜ ⵉⵜⵜⵓⵙⵎⴰⴳⵍⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵓⵙⵙⴰⵏ ⵏ 15 ⴷ 16 ⵏⵓⵡⴰⵏⴱⵉⵔ 2023 ⴷⴷⴰⵡ ⵜⵎⴰⵜⴰⵔⵜ "ⵜⵉⵔⵎⵉⵜⵉⵏ ⴷ ⵉⵏⴰⵥⴰⵕⵏ ⴳ ⵜⵎⵏⴰⴹⵜ ⵏ ⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ ⴷ ⵓⴳⵎⵎⵓⴹ ⴰⵏⴰⵎⵎⴰⵙ", ⵉⵜⵜⵡⴰⵙⵙⴰⵏ ⵙ ⵜⴷⵔⴰⵡⵜ ⵏ ⵉⵎⵙⵜⴳⴳⴰⵔⵏ ⵓⵏⴱⵉⴹⵏ ⴷ ⵉⵣⵔⴼⴰⵏⵏ ⴷ ⵉⵏⴼⵔⵓⵜⵏ ⴷ ⵉⵎⵓⵣⴰⵢⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ, ⵉⵙⵡⵓⵜⵜⵙ ⴰⵙⵔⵇⴱ ⵏ ⵜⵎⵔⵙⴰⵍ ⵏ ⵜⵏⴼⵔⵓⵜ ⵉⵏⵜⴰⵢⵏ ⵙ ⵉⵡⴰⵏⴽⵏ ⵏ ⵜⵎⵏⴰⴹⵏ ⵏ "ⵎⵉⵏⴰ" ⴰⴼⴰⴷ ⴰⴷ ⵣⴷⵉⵏ ⴰⵙⵎⵀⵍ ⵏ ⵜⵎⵔⵉⵙⵉⵏ ⵏⵏⵙⵏⵜ ⵜⵉⴳⵔⴰⵖⵍⴰⵏⵉⵏ ⴷ ⵉⵙⵍⴳⵏⵏ ⵉⵏⴰⵎⵓⵔⵏ ⴳ ⵢⵉⴳⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ.

ⴰⵎⵓⵏⵜ ⴳ ⵓⵖⴰⵡⴰⵙ ⵏ ⵓⴱⵔⴳⵔⴰⵡ ⴰⴷ ⴽⵉⴳⴰⵏ ⵏ ⵜⴳⵉⵡⵔⵉⵏ ⵜⵉⵙⴳⵓⵎⴰⵏⵉⵏ ⵏⵏⵉ ⵔⴰⴷ ⵉⵎⴹⴰⴽⴰⵕ ⵅⴼ ⵉⵙⵓⴳⴰⵎ "ⴰⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵉⴹⴼⵕⵏ ⵉ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ" ⴷ "ⵜⵉⵍⴰⵍⵉⵏ ⵏ ⵜⵎⵔⵙⴰⵍ ⵏ ⵜⵏⴼⵔⵓⵜ ⴳ ⵡⴰⵔⴰⵢ ⵙⴳ ⵓⵙⵔⴼⵓⴼⵏ" ⴷ "ⵜⵉⵍⴰⵍⵜ ⵏ ⵓⵎⴰⵜⵔ ⴰⵏⵣⵔⴰⴼ (ⴰⵏⴱⴹⴰⵢ) ⴳ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵓⵎⵢⴰⵖ ⵏ ⵜⵎⵔⵙⴰⵍ ⵏ ⵜⵏⴼⵔⵓⵜ ⴰⴽⴷ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ", ⴷ ⵓⴳⴳⴰⵔ.

 ⴰⴳⴰⵎ ⵏ ⵜⴳⵓⵔⵉ ⵏ ⵜⵏⵙⵙⵉⵅⴼⵜ (ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ)