ⵉⴷⵔⵓ ⵓⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴳ ⵜⵡⵔⵉⵡⵉⵏ ⵏ ⵓⴱⵔⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵜⵙⴷⵍ ⵜⵎⴰⵥⵓⵏⵜ ⵏ ⵇⴰⵟⴰⵕ ⴷⴷⴰⵡⵃⴰ ⵓⵙⵙⴰⵏ ⵏ 21 ⴷ 22 ⴱⵕⴰⵢⵕ 2023. ⵙ ⵜⵎⵍⴷⴰ ⴰⴷ, ⵉⵙⴷⴷⵉⴷ ⵎⴰⵙⵙ ⴱⵏⵚⴰⵍⵃ ⵎⴰⵙ ⴷⴰ ⵜⵜⴹⵉⵚⵏ ⵉⵙⵏⴼⵍⵏ ⵏ ⵓⵏⵣⵡⵉ, ⵙ ⵜⵡⵉⵍⴰ ⵜⵓⵙⵔⵉⴷⵜ ⴷ ⵜⴰⵔⵓⵙⵔⵉⴷⵜ, ⵅⴼ ⵜⴳⵔⵓⵎⵎⴰ ⵏ ⵉⵣⵔⴼⴰⵏ ⵏⵏⵉ ⵙⴷⵓⵙⵏ ⵉⴷⵓⵙⵜⵓⵔⵏ ⵉⵏⴰⵎⵓⵔⵏ ⴷ ⵡⴰⵔⵔⴰⵜⵏ ⵉⴳⵔⴰⵖⵍⴰⵏⵏ, ⴰⵎⵣⵡⴰⵔⵓ ⴳⵉⵙⵏ, ⴰⵣⵔⴼ ⴳ ⵜⵓⴷⵔⵜ ⴷ ⵓⵣⵔⴼ ⴳ ⵜⴳⵎⵉ ⴷ ⵓⵣⵔⴼ ⴳ ⵡⵓⵜⵛⵉ ⴷ ⵓⵣⵔⴼ ⴳ ⵡⴰⵎⴰⵏ..., 

ⵜⵙⵉⵙⴼⵉⵡ ⵜⵎⵙⵜⴳⴳⴰⵔⵜ ⵏ ⵉⵡⴰⵏⴽⵏ ⴳ ⵓⵙⵎⵀⵍ ⵏ ⵉⵙⵡⵓⴷⴷⵓⵜⵏ ⵉⵕⵡⴰⵏ ⵉ ⵓⵙⴳⴷⵍ ⵏ ⵉⵎⵙⴰⵔⴰⵙⵏ ⴰⴷ ⵏ ⵓⵏⵣⵡⵉ ⴷ ⵓⵙⵎⴽⵍ ⵏⵏⵙⵏ, ⵃⵎⴰ ⴰⴷ ⵉⴼⵙⵉⵙ ⵓⵙⵏⴼⵍ ⵏ ⵓⵏⵣⵡⵉ, ⵜⴻⵜⵜⵓⵏⴼⵔⵓ ⵜⵣⵎⵔⵜ ⵏ ⵓⴼⴳⴰⵏ ⵅⴼ ⵜⵓⵎⵙⵉⵙⵜ ⴰⴽⴷ ⵜⴰⵙⵙⴰⵙⵜ ⵏ ⵓⵏⵣⵡⵉ. ⵉⵔⵏⵓ ⴳ ⵓⵎⵏⴰⴹ ⴰⴷ, ⵎⴰⵙ ⵜⵙⵖⴰⵡⵙⴰ ⵜⵣⵔⴼⵜ ⵏ ⵓⵏⵣⵡⵉ ⵙ ⵓⵎⵙⴰⵙⴰ ⵏ ⵜⵡⵓⵔⵉ ⵏ ⵓⵏⵣⵡⵉ ⴰⴽⴷ ⵜⵎⵢⴰⵇⵇⴰⵏⵉⵏ ⴷ ⵜⵎⵔⵉⵙⵉⵏ ⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏⵏⵉ ⴷ ⴷⴰⵔ ⴰⵣⴷⴰⵢ ⵙ ⵉⵣⵔⴼⴰⵏ ⵏ ⵓⴼⴳⴰⵏ. 

ⴳ ⵓⵙⵎⵏⵉⴷ ⵏⵏⵙ ⵉ ⵜⵉⵔⵎⵉⵜ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙ, ⴳ ⵜⵉⵣⵉ ⵍⵍⵉ ⵖ ⴳⴳⵓⴷⵉⵢⵏ ⵉⵏⴰⵥⴰⵕⵏ ⵏⵏⵉ ⵉⵙⵙⵏ ⵓⵙⵏⴼⵍ ⵏ ⵓⵏⵣⵡⵉ, ⵉⵙⵙⵎⵜⵔ ⵎⴰⵙⵙ ⴱⵏⵚⴰⵍⵃ ⵎⴰⵙ ⵉⵙⵡⵓⵜⵜⵙ ⵓⵙⵇⵇⵉⵎ ⴰⴷ ⵉⵙⵎⵢⴰⴷⴰⵙ ⵜⵉⵎⵓⴽⵔⵉⵙⵉⵏ ⵏ ⵓⴼⵊⵊⵉⵊ ⵙ ⵉⵣⵔⴼⴰⵏ ⵉⴷⵙⵍⴰⵏⵏ ⴳ ⵓⵣⵎⵣ ⵍⵍⵉ ⵖ ⵣⵣⵉⴳⵣⵉⵏⵜ ⴽⵔⴰ ⵏ ⵜⵎⵙⴽⵔⵉⵏ ⵉⵜⵜⵄⵏⴼⴰⵊⵏ ⵜⴰⵡⵏⵏⴰⴹⵜ (ⵉⵜⵜⴳⴳⴰⵏ ⵉⵎⴰⵍⴰⴷⵏ ⵉ ⵜⵡⵏⵏⴰⴹⵜ), ⵏⵏⵉ ⵉⵣⵎⵔⵏ ⴰⴷ ⵜⵟⵟⴰⵚ ⴰⴼⵊⵊⵉⵊ ⵏ ⵓⴼⵔⵉⴷⵏ ⵙⵉⴻⵔⴼⴰⵏ ⵏⵏⵙⵏ ⵉⴷⵙⵍⴰⵏⵏ, ⵉⵔⵏⵓ ⵎⴰⵙ ⴷⴰ ⵉⵜⵜⴳⴳⴰ ⵓⵙⵇⵇⵉⵎ ⴰⵎⴷⴰⵢ ⴷ ⵢⵉⵎⵉⵥ ⵏ ⵜⵏⵓⵔⵣⵉⵏ ⴷ ⵓⵎⵢⴰⵖ ⴷⵉⴷⵙⵏⵜ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵓⵙⵡⴰⵍⴰ ⵏ ⵉⵙⵖⵍⴰⴼ ⵉ ⵜⵓⴳⵜ ⵏ ⵜⵙⴳⴳⵯⵉⵏ ⵜⵉⵎⴰⴷⴷⵓⴷⵉⵏ ⵏⵏⵉ ⴳⴰⵏⵉⵏ ⵜⵉⵎⵏⵜⴰⵢⵉⵏ. ⴳ ⵓⵙⴰⵜⵉ ⴰⴷ, ⵉⵙⵙⴽⵜⵉ ⵙ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ ⵅⴼ ⵓⵣⵔⴼ ⴳ ⵡⴰⵎⴰⵏ ⵉⴳⴰⵏ ⵙ ⵓⵣⵡⵍ "ⴰⵣⵔⴼ ⴳ ⵡⴰⵎⴰⵏ : ⵉⵙⴰⴷⴰⴼⵏ ⵉ ⵓⵎⵏⴰⵍⴰ ⵏ ⵓⵙⴷⴷⵔⴼⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ". 

ⵉⵙⵎⴷ ⵎⴰⵙⵙ ⴱⵏⵚⴰⵍⵃ ⵙ ⵜⵖⵓⵔⵉ ⵙ ⵓⵏⵄⴰⵕ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷⴷⴰⵡ ⵓⵎⴰⵍⵓ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵖ ⴷⴰⵔ ⵜⵏⴼⵍⵓⵙⵜ ⵏ ⵜⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵜⴰⵎⵙⴰⵜⵉⵜ ⵅⴼ ⵓⵙⵏⴼⵍ ⵏ ⵓⵏⵣⵡⵉ, ⵃⵎⴰ ⴰⴷ ⴰⵎⵥⵏⵜ ⴰⵙⵓⵔⵙ ⵏ "ⵉⵎⵏⵥⵉ", ⵣⵎⵔⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴰⴷ ⴷⵔⵓⵏⵜ ⴳ ⵜⵓⴳⵜ ⵏ ⵜⵙⵓⵜⵍⵉⵏ ⵏ ⵓⴱⵔⴳⵔⴰⵡ ⵏ ⵜⴼⵓⵍⵉⵏ ⵅⴼ ⵓⵙⵏⴼⵍ ⵏ ⵓⵏⵣⵡⵉ ⴷ ⵜⵙⵎⵓⵏⵉⵏ ⵏⵏⵙ ⵏ ⵓⵙⵙⵓⵊⴷ ⵙⴳ ⵜⵙⵓⵜⵍⵜ ⵜⵉⵙ 28 ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵓⵡⴰⵏⴽ ⵏ ⵍⵉⵎⴰⵕⴰⵜ ⵜⵉⵄⵕⴰⴱⵉⵏ ⵉⵎⵓⵏⵏ ⴰⵙⴳⴳⵯⴰⵙ ⴰⴷ.