ⵜⵙⵙⵉⵅⴼ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⵉⴼⴰⵡⵜ ⵏ ⵡⴰⵙⵙ ⵏ ⵓⵚⵉⴹⵢⴰⵙ 18 ⵢⵓⵏⵢⵓ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⵜⵉⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⵜⴰⵎⵜ, ⵙ ⵓⵎⵙⴰⵙⴰ ⴰⴽⴷ ⵉⵙⴱⴷⴰⴷⵏ ⵏ ⵓⵙⵍⴳⵏ ⵓⵟⵟⵓⵏ 76.15 ⵉⵣⴷⵉⵏ ⵙ ⵡⴰⵍⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴷ ⵓⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ. ⵢⴰⵎⵓ ⴳ ⵓⵖⴰⵡⴰⵙ ⵏ ⵓⵏⴳⵔⴰⵡ ⴰⵎⴰⵜⴰⵢ, ⴰⵙⵎⵏⵉⴷ ⵏ ⵜⴰⵏⴰⴹⵜ ⵅⴼ ⵉⵎⵓⵙⵙⵓⵜⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⴳ ⵓⵣⴳⵏ ⴰⵎⵣⵡⴰⵔⵓ ⵏ ⵓⵙⴳⴳⵯⴰⵙ ⴰⴷ, ⵉⴷⵉⵡⵍ ⵓⴳⵔⴰⵡ ⵅⴼ ⵉⵙⵓⴳⴰⵎ ⵏ ⵓⵙⵖⵏⵓ ⵏ ⵓⵎⵏⴰⴷ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵣⴷⵉⵏⵉⵏ ⵙ ⵜⵎⵔⵔⵓⵜⵉⵏ ⵜⵉⵎⴽⴽⴰⵙⴰⵜⵉⵏ, ⵉⴽⴽⴰ ⵓⵙⵇⵇⵉⵎ ⵜⴻⵜⵜⵔ ⴰⵙ ⵜⵎⴰⵡⴰⵙⵜ ⵏ ⵜⵣⵔⴼⵜ ⵜⵉⴽⴽⵉ ⵏ ⵓⵎⵏⴰⴷ ⵅⵉⴼⵙ, ⴷ ⵓⵍⴰ ⴰⴷⵉⵡⵍ ⵅⴼ ⵜⵎⵙⴰⵙⵜⵍⵜ ⵜⴰⵎⴰⵜⴰⵢⵜ ⵏ ⵓⵙⵇⵇⵉⵎ ⴳ ⵓⵙⴳⴳⵯⴰⵙ ⵏ 2023. "ⴳ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⵜⴰⵎⵜ ⵏ ⵓⴳⵔⴰⵡ ⴰⵎⴰⵜⴰⵢ, ⵉⴷⵓⵙ ⴰⵖ ⴰⴷ ⵏⴱⵓⵔⵣ ⵎⴰⵙ ⵜⴳⴰ ⵜⵎⵙⵜⴳⴳⴰⵔⵜ ⴷ ⵓⵍⴰⵖⵎⵓ ⴰⵎⴳⵔⵓ ⵣⴷⵉⵏⵉⵏ ⵙ ⵉⵡⵉⵣ ⵅⴼ ⵉⴳⵉ ⵏ ⵜⵙⵎⵉⴳⴰⵍ ⵏⵏⵖ ⵏ ⵓⴼⵔⴰⴳ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵓⵜⵜⴳ ⵏ ⵜⴰⵏⴰⴹⵉⵏ ⵜⵉⵙⴳⵯⵙⴰⵏⵉⵏ ⴳ ⵓⵣⵎⵣ ⵏⵏⵙⵏⵜ (ⵜⴳⴰ) ⴰⵙⴽⴽⵉⵏ ⴰⵏⵉⵍⴰⵡ, ⴷ ⵎⴰⵙ ⵉⵡⵔⵔⵉ ⵓⵍⴰⵖⵎⵓ ⴰⴷ ⴰⵎⴳⵔⵓ ⵉⵙⵙⵏ ⵢⴰⵏ ⵓⴱⵓⵖⵍⵓ ⴰⵎⴰⵏⴰⵡ". ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ. ⵜⵙⵙⴽⵜⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵉⵎⵓⵙⵙⵓⵜⵏ ⵉⵎⵇⵇⵔⴰⵏⵏ ⵏⵏⴰ ⵜⵙⴽⵔ ⵜⵎⵔⵙⵍⵜ ⵙⴳ ⵓⵣⵎⵣ ⵏ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⵙⴰⵜ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵏⵎⵏⴰⴹ ⴷ ⵓⴳⵔⴰⵖⵍⴰⵏ, ⵙ ⵓⵙⵙⵉⴷⴷ ⵅⴼ ⵜⵣⵎⵣⴰⵏⵜ ⵏ ⵜⵥⵕⵉⴳⵜ ⵏ ⵜⴰⵏⴰⴹⵉⵏ ⴷ ⵓⵎⵢⴰⵖ ⴷ ⵜⴷⵉⵏⴰⵎⵉⵜ ⵏ ⵓⵙⵇⵇⵉⵎ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷ ⵓⵍⴰ ⵜⴰⴷⵔⴰⵡⵜ ⵏⵏⵙ ⵜⴰⴽⵙⵡⴰⵜ ⴳ ⵉⵎⵓⵙⵙⵓⵜⵏ ⵏ ⵜⵙⵓⵜⵍⵜ 27 ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵓⵙⴼⵙⵔ ⴷ ⵓⴷⵍⵉⵙ, ⴷ ⵓⴳⴳⴰⵔ. ⵙⴳ ⵜⵙⴳⴰ ⵢⴰⴹⵏⵉⵏ, ⵜⴻⵜⵜⵍⴰⵖⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵎⴰⵙ ⵉⵙⵓⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷⴰ ⵉⵜⵜⴳⴳⴰ ⵜⵓⴳⴳⴰⵙ ⵏⵏⵙ ⵅⴼ ⵓⴼⵔⴰⴳ ⵏ ⵓⵣⵔⴼ ⵏ ⵓⵏⵎⵓⵔⵉ ⴰⵎⵖⵔⵉⴱⵉ ⴱⵕⴰⵀⵉⵎ ⵙⵄⴷⵓⵏ ⴳ ⵜⵓⴷⵔⵜ ⴷ ⵓⴼⵔⴰⴳ ⵏⵏⵙ ⵙⴳ ⵉⵎⵉⵣⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⵙⴷⴷⵉⴷ ⵎⴰⵙ ⵉⵙⵙⵏⵜⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴳⵉ ⵏ ⵜⵓⴳⴳⴰⵙ ⵜⵉⴳⵔⴰⵖⵍⴰⵏⵉⵏ ⴷ ⵓⵎⵢⴰⵡⴰⴹ ⴰⴽⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⴰⴷ ⴰⴷ ⵉⵜⵜⵡⴰⴼⵔⴰⴳ ⴱⵕⴰⵀⵉⵎ ⵙⵄⴷⵓⵏ ⵙⴳ ⵉⵎⵉⵣⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵏⵏⴰ ⵎⵉ ⵏⵜⵜⵏⵄⴰⵕ ⵜⵓⵙⵙⵔⴰ ⵏⵏⵙ ⵙⴳ ⵇⴰⵃ ⵉⵣⵣⵔⴰⴼⵏ, ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ". ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵉⵙⵙⴰⵖ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵉⴳⴳⵉ ⵏ ⵜⵙⵓⵜⵍⵜ ⵜⵉⵙ ⵜⴰⵎⵜ ⵏ ⵓⴳⵔⴰⵡ ⵏⵏⵙ ⴰⵎⴰⵜⴰⵢ, ⴷ ⵙ ⵜⵙⵏⵜⴰⵢⵜ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴷ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏⵏⵙⵏ, (ⵉⵙⵙⴰⵖ) ⵉⵙⵎ ⵏ "ⵕⴰⵢⴰⵏ" ⵉ ⵢⴰⵏ ⵓⵙⴰⵢⵔⴰⵔ ⵉⵥⵍⵉⵏ ⵙ ⵓⵙⵙⴼⵍⴷ ⵉ ⵡⴰⵣⵣⴰⵏⵏ ⴳ ⵓⵙⵖⵉⵎ ⵏ ⵜⵎⵔⵙⵍⵜ ⴳ ⵕⵕⴱⴰⵟ.