ⵙⵎⵎⵓⵙ ⵏ ⵉⵙⵔⴰⵙ ⵉⴷⵙⵍⴰⵏⵏ ⴳ ⵜⵜⵓⵙⵉⵍⴰⵡⵏⵜ ⵜⵖⵜⴰⵙⵉⵏ ⵜⵉⵏⴱⴰⴹⵉⵏ ⵉ ⵓⵙⵎⵔⵙⵍ ⵏ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ ⵜⴰⵎⴰⴷⴷⵓⴷⵜ ⴷ ⵜⵓⵙⵙⵏⴰ ⵏⵏⵙ

ⴰⵎⵉⵏⴰ ⴱⵓⵄⵢⵢⴰⵛ
ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ

 

ⴳ ⵢⴰⵏ ⵓⵕⴰⵄⴰ ⵓⴷⵔⵉⴼ ⵅⴼ ⵡⵉⵙⵙ ⴽⴽⵓⵥ ⵏ ⵜⴰⵙⵓⵜ ⵏ ⵜⵉⵣⵉ, ⵙ ⵜⵙⴽⵔⴰⵡⵉⵏ ⵏⵏⵙ ⴷ ⵜⵏⵥⴰⵕ ⵏⵏⵙ, ⴼⴰⵡⵏⵜ ⴷ ⵜⴼⵔⴰⵙ ⵜⵉⵎⴰⴼⴰⵡⵉⵏ ⵏ ⵉⵙⵜⴰⵢⵏ ⵏ ⵓⴱⵔⵉⴷ ⴰⵎⵅⴰⵙ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵢⴰⵏ ⵡⴰⵎⵓⵏ ⵉⴱⵓⵔⵣⵏ ⵙ ⵓⵎⵢⴰⵏⴰⵡ ⵏ ⵜⵓⵙⵙⵏⴰ ⵏⵏⵙ ⴷ ⵜⵏⴱⵖⵓⵔⵜ ⵏ ⵉⵎⵓⵖⵍⵏ ⵏ ⵜⵎⴰⴳⵉⵜ ⵏⵏⵙ, ⵉⵙⴰⴳⵍⴰⵏ ⵉⵣⵔⵉ ⵏⵏⵙ, ⵉⵜⵜⵓⵙⴷⵓⵙ ⵙⵔⵙ, ⴷ ⵙ ⵜⵎⴰⴳⵓⵜ ⵏⵏⵙ ⵉ ⵓⵎⵏⴰⴷ ⵙ ⵢⵉⵎⴰⵍ ⵏⵏⵙ.

ⵓⵔ ⵉⴳⵉ ⵓⵙⴰⴳⵍⴰ ⵏ ⵜⵓⵙⵙⵏⴰ ⵏⵏⵖ ⴷ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ ⴷ ⵓⵙⴱⵓⵔⵣ ⵙⵔⵙⵏⵜ ⴷ ⵡⴰⵏⵙⴰ ⵏⵏⵙⵏ, ⴰⵎⴰⴳⴳⵓⴳ ⵏⵉⵖ ⴰⵎⴰⵥⵍⴰⵢ ⵅⴼ ⵓⴱⵔⵉⴷ ⴰⴷ, ⵎⴰⵛⴰ ⵉⴳⴰ ⵢⴰⵏ ⵙⴳ ⵉⵙⵔⴰⵙ ⵏⵏⵙ ⵉⵎⵇⵇⵔⴰⵏⵏ... ⵎⵇⵇⴰⵔ ⵓⵔ ⵜⴳⵉ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴳ ⵓⵙⵏⵜⵉ ⵏ ⵜⵏⵉⴼⴹⵜ ⵜⵉⵙⵙ ⴽⵕⴰⴹⵜ, ⵢⴰⵏ ⵉⵎⵣⵣⵉ ⴰⵎⴰⵢⵏⵓ ⵏⵉⵖ ⴰⵎⴰⴳⴳⵓⴳ ⵅⴼ ⵓⵙⵎⵔⵙ ⴰⴳⴷⵓⴷⴰⵏ ⴰⵏⴰⵎⵓⵔ... ⵉⴷⴷⵖ ⵉⴳⴰ ⵓⵙⵎⵔⵙ ⵏ ⵜⵓⵜⵍⴰⵢⵜ ⴰⴷ ⴳ ⵜⵎⵏⴰⴹⵉⵏ ⴰⴽⴽⵯ ⵏ ⵍⵎⵖⵔⵉⴱ ⴰⵇⴱⵓⵔ, ⴰⵎⵎ ⴰⵙⴼⵓⴳⵍⵓ ⵙ ⵜⵓⵙⵙⵏⴰ ⵏⵏⵙ ⵜⴰⵏⴰⵎⵓⵔⵜ ⴷ ⵜⴰⵏⵎⵏⴰⴹⵜ.

ⴰⴱⵔⵉⴷ ⴰⴷ ⴰⵎⴰⵢⵏⵓ, ⵍⵍⵉ ⵉⵣⴷⵉⵏ ⵙⵏⴰⵜ ⵜⵎⵔⴰⵡⴰⵏⵉⵏ ⴷ ⵉⵎⵉⴽⴽ ⴰⵢⴰ, ⵜⵜⵡⴰⵥⵍⴰⵢ ⵙ ⵡⴰⵎⵎⴰⵥ ⵏ ⵜⵎⴰⵣⵉⵖⵜ ⴰⵙⴰⵜⵉ ⴰⵎⵔⵙⴰⵍ ⴰⵎⴰⴼⴰⵡ, ⴳ ⵓⵡⴰⵏⴽ ⴷ ⵡⴰⵎⵓⵏ, ⴳ ⵙⵎⵎⵓⵙⵜ ⵏ ⵜⴽⵍⵉⵡⵉⵏ ⴷ ⵉⵙⵔⴰⵙ ⵉⵎⵇⵇⵔⴰⵏⵏ ⵣⵔⵉⵏⵉⵏ, ⵏⵏⵉ ⵉⵜⵜⵓⵚⴽⴰⵏ ⴽⵔⴰⵢⴳⴰⵜ ⵢⴰⵏ ⵅⴼ ⵡⴰⵢⵢⴰⴹ.

ⵉⴼⴰⵡ ⵓⵙⵔⵙ ⴰⵎⵣⵡⴰⵔⵓ ⵙⴳ ⵉⵙⵔⴰⵙ ⴰⴷ ⴳ ⵓⵙⵙⴽⵛⵎ ⵏ ⵜⵎⴰⵣⵉⵖⵜ ⴳ ⵡⴰⵎⵎⴰⵙ ⵏ ⵜⵖⵜⴰⵙⵜ ⵜⴰⵙⵔⵜⴰⵏⵜ, ⵙⴳ ⵉⵙⵉⵣⵡⵉⵔⵏ ⵏ ⵓⴱⵔⵉⴷ, ⵍⵍⵉⵖ ⵜⴳⴰ ⵜⵉⵏⴰⵡⵜ ⵜⴰⴳⵍⴷⴰⵏⵜ ⵏ ⴰⵊⴷⵉⵔ ⴳ 17 ⴽⵟⵓⴱⵕ 2001, ⵜⴰⵏⵇⵇⵉⴹⵜ ⵏ ⵓⵙⵏⴼⵍ ⵜⴰⵅⴰⵜⴰⵔⵜ ⴳ ⵜⵡⴰⴷⴰ ⵏ ⵓⵙⵎⵔⵙⵍ ⵏ ⵜⵎⴰⵣⵉⵖⵜ, ⵜⵓⵜⵍⴰⵢⵜ ⴷ ⵜⵓⵙⵙⵏⴰ, ⵏⵏⵉ ⵉⴳⴰⵏ ⵉⵙⴳⵔ ⴰⴷⵙⵍⴰⵏ ⵏ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ. ⴱⵉⴷⴷⵏⵜ ⵜⵙⵏⵜⴰⵢⵉⵏ ⴳⴳⵓⵜⵏⵉⵏ ⴷ ⵉⴷⴷⴰⵏ ⵅⴼ ⵓⵙⵔⵙ ⴰⴷ ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵡⴰⵏⵙⴰ ⵏ ⵜⵎⴰⵣⵉⵖⵜ ⴳ ⵡⴰⵎⵓⵏ ⴰⵎⵖⵔⵉⴱⵉ, ⴷ ⵓⵍⴰ ⴰⵙⵔⵓⵙ ⵏ ⵢⴰⵜ ⵜⵎⵔⵙⴰⵍⵜ ⵉⵏⵏⵖⵍⴼⵏ ⵙ ⵓⵙⴱⵓⵖⵍⵓ ⵏ ⵜⵙⴳⴳⵯⵉⵏ ⴰⴷ, ⵜⵜ ⵉⴳⴰⵏ ⴷ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ.

ⵜⵉⴽⵍⵉ ⵜⵉⵙ ⵙⵏⴰⵜ ⴳ ⵓⴱⵔⵉⴷ ⴰⴷ, ⵜⴳⴰ ⵜⵜ ⵜⴰⵣⵣⵉⴳⵣⵜ ⵏ ⵜⴷⵉⵏⴰⵎⵉⵜ ⵏ ⵓⵔⵣⵣⵓ ⴰⴽⴰⴷⵉⵎⵉ, ⴰⵎⵣⵔⴰⵢ ⴷ ⵓⵏⴰⵎⵓⵏ, ⵍⵍⵉ ⵉⵙⵉⵙⴼⵉⵡⵏ ⵉⵙⵡⵉⵏⴳⵉⵎⵏ ⵉⴷⵍⵙⴰⵏⵏ ⴷ ⵉⵏⴰⵎⵓⵏⵏ, ⵢⴰⴷⵊ ⴰⵖ ⴰⴷ ⵏⵎⵎⴰⵜⵜⵉ ⵙⴳ ⵜⵎⴰⵣⵉⵖⵜ ⵏⵏⵉ ⵉⴳⴰⵏ ⵜⵓⵜⵍⴰⵢⵜ ⵜⴰⵏⴰⵎⵓⵔⵜ ⵖⵔ ⵜⴰⵎⴰⵣⵉⵖⵜ ⵉⴳⴰⵏ ⵜⵓⵜⵍⴰⵢⵜ ⵏ ⵓⵙⵡⵉⵏⴳⵎ ⴷ ⵓⵙⵍⵎⴷ ⴷ ⵓⴷⵉⵡⵍ ⴷ ⵏ ⵜⵉⵔⵔⴰ, ⵉⵜⵜⵢⴰⵔⴰⵏ ⵙ ⵓⵙⴽⴽⵉⵍ ⵏ ⵜⵉⴼⵉⵏⴰⵖ, ⵜⴳ ⵜⵓⵜⵍⴰⵢⵜ ⵢⵓⴷⴼⵏ ⵙ ⵓⵏⴳⵔⴰⵡ ⵏⵏⵖ ⵏ ⵓⵙⵙⵍⵎⴷ ⴰⵏⴰⵎⵓⵔ ⴳ ⵓⵙⴳⴳⵯⴰⵙ ⵏ 2003... ⵜⵓⵜⵍⴰⵢⵜ ⵉⵜⵜⵓⵙⵎⵔⵙⵏ ⵙ ⵜⵡⵉⵍⴰ ⵜⴰⵎⵉⵔⵉⵡⵜ, ⴷⴰ ⵜⴻⵜⵜⵢⴰⵔⴰ ⴰⵔ ⵜⵜⵓⵙⵖⵖⵔⴰ ⵙ ⵉⵙⴽⴽⵉⵍⵏ ⵏⵏⵙ ⵉⵎⵥⵍⴰⵢⵏ, ⵓⵔ ⵉⴽⴽⴰ ⵉⵅⵚⵚⴰ ⵜⵜ ⴰⴱⵍⴰ ⵜⵓⵙⵏⵜ ⵜⴰⴷⵙⵜⴰⵔⵜ ⵉⵙⴷⵓⵙⵏ ⴰⵏⵙⴰ ⵏⵏⵙ...

ⵙ ⵎⴰⵏⴰⵢⴰ, ⵉⴷⴷⴰ ⴷ ⴳ ⵡⵉⵙ ⴽⵕⴰⴹ ⵏ ⵉⵙⵔⴰⵙ ⵉⵎⵇⵇⵔⴰⵏⵏ ⵉⵙⴷⵉⵏ ⵙ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵏⵏⵖ ⵜⴰⵎⴰⵣⵉⵖⵜ, ⴰⵙⵔⵙ ⵏ ⵓⵙⵖⵜⵙ ⴰⴷⵙⵜⴰⵔ ⵏ ⵓⵙⴳⴳⵯⴰⵙ ⵏ 2011, ⵏⵏⴰ ⵉⵙⴽⵔⵏ ⵙⴳ ⵜⴰⵎⴰⵣⵉⵖⵜ ⵜⵓⵜⵍⴰⵢⵜ ⵜⴰⵎⴰⴷⴷⵓⴷⵜ ⵏ ⵓⵡⴰⵏⴽ ⴷ ⵡⴰⵎⵓⵏ, ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ, ⵉⴷⴷⵖ ⵜⴳⴰ ⴰⴳⵣⵣⵓⵎ ⵓⵔ ⵉⵜⵜⵓⴳⵣⵣⵎⵏ ⵙⴳ ⵜⵎⴰⴳⵉⵜ ⵜⴰⵏⴰⵎⵓⵔⵜ ⵜⴰⵎⴰⴳⵓⵜ ⵏ ⵉⵎⵓⵖⵍⵏ ⴷ ⵙⴳ ⵓⵎⵢⴰⵏⴰⵡ ⴰⴷⵍⵙⴰⵏ.

ⵉⵙⴷⵓⵙ ⵓⵙⵔⵙ ⴰⴷ ⴰⵎⴰⵣⴰⵔ ⴰⵎⴰⵜⴰⵢ ⵉⵏⴳⵔ ⵜⵓⴳⵜ ⵉⵙⴳⵔⵏ ⵏ ⵡⴰⵎⵓⵏ, ⴳ ⵢⴰⵜ ⵜⵎⴰⵣⵉⵔⵜ ⵉⴳⴳⵓⵎⵎⵉⵏ ⴰⴷ  ⵉⵙⴽⵔ ⵙⴳ ⵓⵙⴱⵓⵔⵣ ⵙ ⵜⴳⵯⵎⴰⵏⵉⵜ ⴷ ⵜⵎⵢⵉⴷⵉⵔⵜ ⵉⵏⴳⵔ ⵜⵓⴳⵜ ⵏ ⵜⵓⵙⵙⵏⵉⵡⵉⵏ ⵏⵏⵙ ⵜⵉⵏⴰⵎⵓⵔⵉⵏ ⴰⴷⵔⵉⵎ ⴰⵏⴰⵎⵓⵔ ⵎⵉ ⵓⵔ ⵙⵎⵉⴷⵏⵜ ⵜⵡⵓⵔⵉⵡⵉⵏ ⴳ ⵡⴰⵏⵙⴰ ⵏⵉⵖ ⴰⴽⵓⴷ… ⵉⵙⴷⴷⵉⴷ ⵓⵙⵔⵙ ⴰⴷ ⵙ ⵓⵥⵍⴰⵢ, ⴷⴼⴼⵉⵔ ⵏ ⵜⵙⴼⵔⵓⵜ ⵜⴰⵎⴷⵏⴰⵏⵜ ⵜⴰⵖⵣⵓⵔⴰⵏⵜ, ⴰⵙⵖⵓⵏ ⵏ ⵍⵎⵖⵔⵉⴱ ⵉⵕⵚⴰⵏ ⵙ ⵓⵙⴷⵓⵙ ⵏ ⵜⵏⵎⴰⴳⵓⵜ ⵏⵏⵙ ⵜⴰⴷⵍⵙⴰⵏⵜ ⴷ ⵓⵙⴱⵓⵖⵍⵓ ⵏ ⵜⵓⵜⵍⴰⵢⵜ ⵏⵏⵙ ⵜⴰⵎⴰⵣⵉⵖⵜ ⴷ ⵓⵙⵎⵔⵙ ⵏⵏⵙ ⴳ ⵜⵓⴳⵜ ⵏ ⵢⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ.

ⴷⴼⴼⵉⵔ ⵏ ⴽⵕⴰⴹ ⵉⵙⵔⴰⵙ ⴰⴷ ⵉⴷⵙⵍⴰⵏⵏ, ⵜⴷⴷⴰ ⴷ ⵜⴽⵍⵉ ⵜⵉⵙ ⴽⴽⵓⵥⵜ, ⵓⵔ ⵉⴷⵔⵓⵙⵏ ⴳ ⵡⴰⵜⵉⴳ ⵡⴰⵍⴰ ⴳ ⵡⴰⴼⴼⴰⴼ ⵏⵏⵙ, ⵏⵜⵜⴰⵜ ⴷ ⵓⵙⵔⵙ ⵏ ⵓⵙⵎⵀⵍ , ⵙ ⵓⵙⵙⵓⴼⵖ ⵏ ⵢⴰⵏ ⵓⵙⵍⴳⵏ ⵉⵙⵏⵎⴰⵍⵏ ⵜⵉⴽⵍⵉⵡⵉⵏ ⵏ ⵓⵙⵏⵚⵉⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵖⴰⵔⴰⵙⵉⵏ ⵏ ⵓⵙⵙⴽⵛⵎ ⵏⵏⵙ ⴳ ⵜⵓⴷⵔⵜ ⵜⴰⴳⴷⵓⴷⴰⵏⵜ ⴷ ⵢⵉⴳⵔⴰⵏ ⵉⵎⵣⵡⵓⵔⴰ, ⴰⴼⴰⴷ ⴰⴷ ⵉⵜⵜⵓⵙⴷⵓⵙ ⵓⵙⵎⵔⵙ ⵏⵏⵙ ⴳ ⵓⵙⵙⵍⵎⴷ ⴷ ⵜⴷⵓⵙⵉ ⴷ ⵜⵣⵔⴼⵜ ⴷ ⵜⴷⵍⵙⴰ ⴷ ⵜⵏⵖⵎⴰⵙⵜ.

ⵓⵔ ⵜⵍⵍⵉ ⵜⵓⵔⴷⴰ ⵎⴰⵙ ⵉⵣⵎⵔ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵢⵉⴳⵔⴰⵏ ⵏ ⵓⵙⵎⵔⵙ ⴰⴽⵓⵢⴰⵙⵙ ⵏ ⵓⵙⵉⵣⵡⵔ ⴰⴷ ⵉⵙⴷⴷⵔⴼ ⴰⵙⵖⵍ ⵏ ⵓⵙⵎⵀⵍ ⴰⵎⴰⴷⴷⵓⴷ ⴷ ⵓⵎⵢⴰⴳⴰⵏ ⴷ ⵜⵏⴼⵔⵓⵜ ⵏ ⵜⵎⵢⴰⴳⴰⵏⵜ ⵏ ⵓⴼⵊⵊⵉⵊ ⵏ ⵉⵎⵖⵔⵉⴱⵉⵢⵏ ⵙ ⵉⵣⵔⴼⴰⵏ ⵏⵏⵙⵏ ⵉⵙⵏⵉⵍⵙⵏ ⴷ ⵉⴷⵍⵙⴰⵏⵏ ⵓⵙⵎⵉⴷⵏ. 

ⴳ ⵓⵙⴳⴳⵯⴰⵙ ⵏ 2023, ⵉⵙⵢⴰⴼⴰ ⵓⴱⵔⵉⴷ ⴰⴷ ⵙ ⵢⴰⵏ ⵓⵙⵔⵙ ⴰⴷⵙⵍⴰⵏ ⵡⵉⵙ ⵙⵎⵎⵓⵙ, ⵜ ⵉⴳⴰⵏ ⴷ ⵓⴼⵓⵖ ⵏ ⵜⵖⵜⴰⵙⵜ ⵏ ⵓⵙⴼⵓⴳⵍⵓ ⵙ ⵜⵉⵙⴳⴳⵯⵉⵏ ⴰⴽⴽⵯ ⵜⵉⵎⵔⵙⴰⵍⵉⵏ ⵏ ⵢⴰⵏ ⵓⵎⵓⵖⵍ ⵙⴳ ⵉⵎⵓⵖⵍⵏ ⵏ ⵜⵏⴱⵖⵓⵔⵜ ⴷ ⵜⵎⴰⴳⵓⵜ ⵏ ⵜⵓⵙⵙⵏⴰ ⵏⵏⵖ ⴷ ⵓⵎⵢⴰⵏⴰⵡ ⵏⵏⵙ. ⵉⴳⴰ ⵓⵙⴳⴳⵯⴰⵙ ⵉⵣⵔⵉⵏ ⴰⵙⴳⴳⵯⴰⵙ ⵏ ⵓⴱⵔⵔⵃ ⵙ ⵢⴰⵜ ⵜⵙⵓⵔⵉⴼⵜ ⵉⵖⵎⴰⵏ ⴰⵙⴰⵜⵉ ⵉⵥⵍⵉⵏ ⵉ ⵓⴱⵔⵉⴷ ⵏ ⵓⵙⵎⵀⵍ ⵏ ⵓⵙⴰⵜⵉ ⴰⵎⴰⴷⴷⵓⴷ ⵉ ⵜⵎⴰⵣⵉⵖⵜ, ⵏⵏⵉ ⵓⵔ ⵉⵏⵏⵉⵏ ⴰⴷ ⵉⵙⵎⴷ ⴱⵍⴰ ⵏⵜⵜⴰⵜ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵜⵣⴷⵉ ⴳ ⵓⵏⴰⵎⴽ ⵏⵏⵙ ⴷ ⵓⵡⵜⵜⴰⵙ ⵏⵏⵙ ⵙ ⵓⵙⴼⵓⴳⵍⵓ ⵙ ⵜⵎⵢⵓⵔⵉⵏ ⴷ ⵜⵓⵙⵙⵏⴰ ⵏ ⵡⴰⵎⵓⵏ ⴰⵎⵖⵔⵉⴱⵉ ⴷ ⵓⵙⵎⵔⵙⵍ ⵏ ⵜⵓⵙⵏⵜ ⵙⵔⵙ.

ⵙ ⵎⴰⵏⴰⵢⴰ, ⵜⴳⴰ ⵜⵉⵏⴷⵉ ⵏ ⵓⵙⵖⵜⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵎⴰⵢⵢⵓ 2023 ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉ, ⵉⴹ ⵉⵏⵏⴰⵢⵔ, ⴰⵎⵓⴷ ⴰⵏⴰⵎⵓⵔ ⴷ ⵡⴰⵙⵙ ⵏ ⵜⴰⵏⵓⵕⵥⵎⵜ ⵜⴰⵎⴰⴷⴷⵓⴷⵜ ⵉⵜⵜⵓⵙⵖⵔⴹⵏ… ⵏⵙⴼⵓⴳⵍⵓ, ⴷⴼⴼⵉⵔ ⵏ 8 ⵏ ⵡⴰⵢⵢⵓⵔⵏ ⴷ ⵉⵎⵉⴽ ⴳ 14 ⵉⵏⵏⴰⵢⵔ 2024 ⵙ ⵜⵡⵉⵍⴰ ⵜⴰⵎⴰⴷⴷⵓⴷⵜ ⴷ ⵜⵎⵓⵏⴰⵏⵜ, ⵉⵙⴷⵓⵙ ⵓⵙⴼⵓⴳⵍⵓ ⴰⵎⴷⵏⴰⵏ ⴷ ⵓⴳⵔⴰⵡⴰⵏ ⵏⵏⴰ ⵉⴳⴰⵏ ⴰⵍⵓⴳⵏ ⵉⵍⵍⴰⵏ, ⵙ ⵢⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ, ⴷ ⴰⴷ ⵉⴳ 14 ⵉⵏⵏⴰⵢⵔ ⵢⴰⵏ ⵓⵎⵣⵔⵓⵢ ⵉⵍⴰⵏ ⵜⴰⵛⵜⵔⵜ ⴷ ⵉⵏⵓⵎⴰⴽ ⵉⵥⵍⵉⵏ ⴳ ⵜⵡⴰⴷⴰ ⵏⵏⵖ ⵉ ⵓⵙⵎⵔⵙⵍ  ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵎⴰⴷⴷⵓⴷⵜ ⴷ ⵜⵓⵙⵙⵏⴰ ⵏⵏⵙ.

ⵎⴰⵛⴰ, ⵎⴰⵢⴰ ⴷ ⵓⵔ ⴷⴰ ⵉⵎⵎⴰⵍ ⵎⴰⵙ ⵏⵓⵍⵍ ⴰⴽⴽⵯ ⵉⵎⵙⵓⵔⴰⵙ ⵏⵏⵖ... ⵉⴷⴷⵖ ⵉⵍⵍⴰ ⵓⵙⵢⴰⴼⴰ ⵉⵙⵎⴷⵏ ⴷⴰⵔ ⴰⴽⴽⵯ ⵉⵎⵙⴽⴰⵔⵏ ⵏⵜⴰⵢⵏⵉⵏ ⵙ ⵜⵏⵥⴰⵕ ⵍⵍⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵍⵍⴰ, ⴳ ⵓⵙⵡⵉⵔ ⴰⵎⵢⴰⴳⴰⵏ, ⵓⵙⵖⵍ ⵏⵉⵖ ⵉⵙⵖⵍⵏ ⵎⵣⴰⵔⴰⵢⵏⵉⵏ ⵉⵏⴳⵔ ⵢⵉⴳⵔⴰⵏ ⴳ ⵜⵡⵉⵍⴰⵜⵉⵏ ⵏ ⵓⵙⵖⵉⵡⵙ ⵏ ⵜⵎⵀⴰⵍ ⵏ ⵓⵙⵎⵀⵍ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⴷ ⵓⵍⴰ ⵜⴰⵏⵥⵕⵜ ⵜⴰⵅⴰⵜⴰⵔⵜ, ⵏⵏⴰ ⵉⵍⵍⴰⵏ, ⴳ ⵜⴰⵏⵏⴰⵢⵜ ⵉⵏⵓ, ⴳ ⵜⵏⴼⵔⵓⵜ ⵏ ⵓⵣⵣⴳⵉⵔ ⵏ ⵜⵙⵔⵜⴰⵢ ⴷ ⵜⵙⵏⵜⴰⵢⵉⵏ ⵉⵥⵍⵉⵏ ⵙ ⵓⵙⵎⴰⵜⴰ ⵏ ⵓⵙⵎⵔⵙ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵉⴳⵔⴰⵏ ⵉⵎⵢⴰⵏⴰⵡⵏ. ⵓⵔ ⵉⵍⵍⵉ ⵎⴰⵙ ⵉⵜⵜⵢⴰⵔⵉ ⵖ ⵡⴰⵙⵙ ⴰⴷ ⵏⵉⵖ ⵉⵜⵜⵓⵙⵏⴼⵍ ⵓⵙⵉⵣⵡⵔ ⴷ ⵜⵏⴱⵣⴰⵣⵜ ⵏ ⵓⵙⵙⵓⵊⴷ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴷ ⵉⵥⵕⴼⴰⵏⵏ ⵉⵅⵚⵚⴰⵏ ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵙ ⵢⴰⵜ ⵜⵡⵉⵍⴰ ⵉⵙⴷⵓⵙⵏ ⵜⵉⵙⵓⴳⴰⵔ ⵍⵍⵉ ⵔⴰⴷ ⵉⵙⴼⵙⵉⵙ ⴰⵙⵎⵔⵙ ⵏ ⵜⵓⵜⵍⴰⵢⵜ ⵏⵏⵖ ⵜⴰⵎⴰⴷⴷⵓⴷⵜ ⴳ ⵇⴰⵃ ⵉⴳⵔⴰⵏ ⵏ ⵜⵓⴷⵔⵜ ⵜⴰⵎⴰⵜⴰⵢⵜ, ⵏⵜⵜⴰⵜ ⴰⵎ ⵜⵓⵜⵍⴰⵢⵜ ⵏⵏⵖ ⵜⴰⵎⴰⴷⴷⵓⴷⵜ ⵜⴰⵄⵕⴰⴱⵜ.

ⵉⵜⵜⵡⴰⵙⵙⵏ ⵓⵙⵏⵜⵉ ⵏ ⵜⵏⵉⴼⴹⵜ ⵜⵉⵙ ⴽⵕⴰⴹⵜ ⴳ ⵍⵎⵖⵔⵉⴱ, ⵙ ⵓⴱⵔⵔⵃ ⵙ ⵓⵡⵜⵜⵓ ⵏ ⵉⵎⴰⴳⴳⵓⵎⵏ ⴷ ⵉⵙⵓⵖⴰⴷ ⵏ ⵢⴰⵏ ⵓⴱⵔⵉⴷ ⵉⵙⵙⵏⵜⵉⵏ ⴷ ⵓⵔ ⵉⴱⴷⴷⵉⵏ/ⵓⵔ ⵉⵏⵏⵉ ⴰⴷ ⵉⴱⴷⴷ, ⴰⴼⴰⴷ ⴰⴷ ⵏⵙⵕⵚⵚⵓ ⴰⴱⵔⵉⴷ ⵍⵍⵉ ⵙ ⵏⴼⵍⵙ ; ⴷ ⵙ ⵓⵙⴷⴷⵉⴷ, ⵔⴰⴷ ⵏⵉⵜ ⵉⵣⵣⵉⴳⵉⵣ.