ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ 49 ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵊⵓⵏⵉⴼ, ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵢⵏⴰⵙ 14 ⵎⴰⵕⵚ 2022, ⴳ ⵓⵎⴹⴰⴽⴰⵕ ⴰⵎⵢⴰⵖ ⵅⴼ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ, ⴷⵔⵓⵏ ⴳⵉⵙ ⵉⵎⴷⵔⴰⵡⵏ ⵜⴰⵎⵙⵍⴰⵢⵜ ⵏ "ⴰⵙⵎⵓⵏ ⵏ ⵉⵙⵏⵎⴽⵜⴰⵜⵏ ⴷ ⵉⵙⵎⵎⴰⵍⵏ ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ 31 ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ". 

ⵉⵙⴱⵔⵔⴽ ⵓⵙⵇⵇⵉⵎ ⵏⵏⴰ ⵜⵙⵎⴷⵢⴰ ⵎⴰⵙⵙⴰ ⵣⵀⵓⵕ ⵍⵃⵓⵕⵕ, ⵜⴰⵙⵎⵣⴷⴰⵢⵜ ⵏ ⵉⵎⵉⵙ ⴰⵏⴰⵎⵓⵔ ⴰⵎⵥⵍⵉ ⵙ ⵓⴼⵔⴰⴳ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵙ ⵜⴰⵏⴰⴹⵜ ⵏ ⵜⴳⵏⵙⴰⵙⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵉⵙⵏⵎⴽⵜⴰⵜⵏ ⴷ ⵓⵙⵎⵓⵏ ⵏ ⵉⵙⵎⵎⴰⵍⵏ, ⵏⵏⴰ ⵉⵙⵙⵉⴷⴷⵏ ⵉ ⵜⵉⵍⴰⵍⵜ ⵏⵏⴰ ⵜⵜⵓⵔⴰⵔⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⵉⴳⵔ ⴰⴷ. 

ⵜⵙⵙⴼⴰⵡ ⵎⴰⵙⵙⴰ ⵍⵃⵓⵕⵕ ⵎⴰⵙ ⵢⵉⵡⵣ ⵓⵙⵇⵇⵉⵎ, ⵙ ⵉⵎⵉⵙ ⵏⵏⵙ ⵉⵏⵜⴰⵢⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⵅⴼ ⵓⵙⵎⵔⵙ ⵏ ⵜⵎⵓⵛⴰ ⵏⵏⴰ ⵉⵙⵎⵓⵏ ⵙ ⵜⵖⵓⵔⵉ ⵏ ⵜⵏⵓⵔⵣⵉⵏ ⴷ ⵜⵉⵍⴰⵍ ⵏⵏⵙ ⵜⵉⴼⵔⴳⴰⵏⵉⵏ ⵅⴼ ⵓⵎⴷⴰⵢ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴰⴷ. 

ⵉⵙⵎⴽⵍ ⵉⵎⵉⵙ ⴰⵙⴳⴳⵯⴰⵙ ⵏ 2021, ⵎⴰⴷ ⵉⵜⵜⴳⴳⴰⵏ 41 ⵏ ⵜⵏⵓⵔⵣⵉⵜ, ⵉⵙⵏⵎⴰⵍⴰ 12 ⵏ ⵓⵏⵎⵓⵇⵇⴰⵔ ⴰⴽⴷ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⴷ ⵜⵎⵙⵎⵓⵏⵉⵏ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵓⵎⵎⵓⵄⴹⵕ, ⴰⵢⵍⵍⵉ ⵉⵙⵙⵡⵀⵏⵏ ⴰⵎⴷⴰⵢ ⵏ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⵙ ⵓⵙⵉⴷⴼ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⵙ ⵉⵣⵔⴼⴰⵏ ⵏⵏⵙⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ. ⴳ ⵓⵎⵏⴰⴹ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⵜⵔⵏⴰ ⵜⴳⵏⵙⴰⵙⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵉⵎⵉⵙ ⴰⵙⴳⴳⵯⴰⵙ ⵏ 2021 ⴽⴽⵓⵥ ⵏ ⵉⵔⵣⴰⴼⵏ ⵙ ⵡⴰⵎⵎⴰⵙⵏ ⵏ ⵓⵙⵏⵓⴱⴳ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵜⵎⵉⵣⴰⵔ ⵏ ⴼⴰⵙ ⴷ ⵡⵊⴷⴰ ⴷ ⵜⴳⵎⵎⵉ ⵜⵓⵎⵍⵉⵍⵜ ⴷ ⵍⵄⵢⵓⵏ, ⵉⵙⵖⵣⵏ ⴼⵍⵍⴰⵙⵏ ⵉⵎⵙⴳⵔⴰ ⴷ ⵉⵙⵖⵍⴰⴼ ⵣⵎⵔⵏⵉⵏ ⴰⴷ ⴼⵔⴳⵏ ⵉⵣⵔⴼⴰⵏ ⵏ ⵜⴼⵓⵍⵜ ⴰⴷ ⴷ ⵓⵙⴷⵓⵙ ⵏⵏⵙ. 

ⵓⵔ ⵉⵜⵜⵓ ⵓⵙⵇⵇⵉⵎ, ⵙ ⵜⵎⵍⴷⴰ ⴰⴷ, ⴰⴷ ⵉⵙⵙⴽⵜⵉ ⵙ ⵓⵙⵓⵖⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵎⵙⴰⵡⴰⴹ ⴰⴽⴷ ⵜⵓⴳⵜ ⵏ ⵉⵎⴳⴳⴰⵢⵏ, ⴰⵎ ⵉⵙⵉⵔⴰⵜⵏ ⵏ ⵓⵙⵏⵎⴽⵜⴰ ⴷ ⵓⵙⵖⵉⵡⵙ ⴳ ⵓⵙⵡⵉⵔ ⴰⵏⴰⵎⵓⵔ, ⴰⴼⴰⴷ ⴰⴷ ⵉⵜⵜⵓⴳⴰ ⵓⵙⵎⵓⵏ ⵏ ⵉⵙⵎⵎⴰⵍⵏ ⵙ ⵓⵙⵓⵖⵏ ⵏ ⵓⵡⵇⵇⵔ ⵏ ⵉⵎⵏⵣⴰⵢⵏ ⵣⴷⵉⵏⵉⵏ ⵙ ⵓⴼⵔⴰⴳ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ.