ⵉⵜⵜⵡⴰⴼⵙⴰⵔ ⴳ
ⵙⴳ 3 ⴰⵔ 12 ⵢⵓⵏⵢⵓ 2022, ⵔⴰⴷ ⵏⵏ ⵉⵍⵉⵏ ⵉⵏⵔⵣⴰⴼ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⴳ ⵜⵙⵓⵜⵍⵜ ⵜⵉⵙ 27 ⵏ ⵓⵙⴼⵙⵔ ⴳ ⵓⵙⴰⵢⵔⴰⵔ ⵏ ⵙⵙⵡⵉⵙⵉ ⴳ ⵕⵕⴱⴰⵟ, ⴰⴽⴷ ⵓⵣⵎⵣ ⵉⵕⵚⴰⵏ ⵏ ⵓⵎⵢⴰⵖ ⴰⴽⴷ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⴳⵯⵏⵙⵓ ⵏ ⵢⴰⵏ ⵓⵙⴰⵢⵔⴰⵔ ⵢⵓⵎⵥⵏ ⴰⵏⵙⴰ ⵏ 200 ⵏ ⵉⴷ ⵎⵉⵜⵔⵓ ⴰⵎⴽⴽⵓⵥ, ⴷⴷⴰⵡ ⵜⵎⴰⵜⴰⵔⵜ "ⵉⵡⵏⵏⵉⵜⵏ ⵏ ⵓⵣⵔⴼ".
ⵔⴰⴷ ⵉⴳ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴰⵢⵔⴰⵔ ⵉⵕⵥⵎⵏ ⴷ ⵉⵙⵙⴰⵎⵓⵏ ⵏⵏⴰ ⴷ ⵢⵓⵡⵉⵏ ⴳ ⵇⴰⵃ ⵜⵉⵍⴰⵍ ⵏⵏⵙ ⵅⴼ ⵜⵎⴰⵢⵏⵓⵜⵉⵏ ⴷ ⵜⵎⵙⴰⵔⵉⵏ ⵜⵉⴷⵙⵍⴰⵏⵉⵏ ⵏⵏⴰ ⵅⴼ ⵉⵜⵜⵏⵄⴰⵕ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵢⴰⵏ ⵓⵙⴳⵓⵎ ⵏ ⵜⵉⵔⴰⵎ ⵜⵉⴷⵙⵍⴰⵏⵉⵏ ⵜⵉⴽⵓⵢⴰⵙⵙⵉⵏ : "ⵉⵎⴹⴰⴽⴰⵕⵏ ⴷ ⵉⵎⵙⴰⵡⴰⵍⵏ", " ⴰⵙⵉⵡⵍ ⵅⴼ ⵢⴰⵏ ⵓⴷⵍⵉⵙ", "ⴰⵏⴱⴳⵉ ⵏ ⵓⵙⴰⵢⵔⴰⵔ" ⴷ "ⵉⵡⵏⵏⵉⵜⵏ ⵉⵏⴰⵥⵓⵕⵏ" ⴷ ⵓⵍⴰ ⵢⴰⵜ ⵜⵉⵔⵎⵜ ⵏ ⵜⵉⴼⴰⵡⵜ ⵉⵥⵍⵉⵏ ⵙ ⵉⵡⵏⵏⵉⵜⵏ ⵏ ⵡⴰⵣⵣⴰⵏⵏ ⵅⴼ ⵉⵣⵔⴼⴰⵏ ⵏⵏⵙⵏ.
“ⴳ ⵎⴰⵕⵕⴰ ⵡⵓⵙⵙⴰⵏ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵓⵔ ⴷ ⵅⵙ ⴰⴷ ⵏⴰⴷⵣ ⵜⵉⵎⵙⴰⵔⵉⵏ, ⵏⴱⴹⵓ ⵉⴼⵔⴷⵉⵙⵏ ⵏ ⵡⴰⴽⴰⵣ, ⵎⴰⵛ ⴰⵡⴷ ⴰⴷ ⵏⴰⵔⵎ ⴰⴷ ⵏⴼⴼⵖ ⵢⴰⵏ ⵉⵎⵉⴽ ⵙⴳ, ⵉⵎⵏⴰⴷⵏ ⵉⵜⵜⵓⵙⵔⵙⵏ, ⵏⵙⵙⵏⵉⵢ ⴱⵍⴰ ⵜⵉⵍⵉⵜ ⵏ ⵜⵎⵙⵍⴰⵢⵉⵏ ⵜⵉⵎⴰⵢⵏⵓⵜⵉⵏ ⵙ ⵓⵎⵓⴷⴷⵓ ⴳ ⵉⴼⵔⵓⵔⵉⵏ ⵏⵏⵙⵏⵜ ⴳ ⵓⵣⵎⵣ ⵏ ⵜⵣⵣⵉⴳⵣⵉⵏ ⵜⵉⵏⴰⵎⵓⵏⵉⵏ ⵍⵍⴰⵏⵉⵏ, ⴰⵙⵓⵖⴷ ⵏⵏⵖ ⵉⴳⴰ ⵜ ⴰⴷ ⵏⵙⵎⴰⵢⵏⵓ ⴰⵏⵄⴰⵕ ⵏⵏⵖ, ⵏⵙⵔⵙ ⵜⵉⵔⵙⴰⵍ ⵏ ⵜⵎⵙⴽⵔⵉⵏ ⵜⵉⵎⴰⵢⵏⵓⵜⵉⵏ ⵉⵚⴰⵃⴰⵏ ⵉ ⵉⵎⵏⵖⵉ ⵅⴼ ⵉⵙⴽⵉⵍ ⴷ ⵅⴼ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ”, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵓⵎⵏⵉⴷ ⴰⴷ, ⵎⵔⴰⵡ ⵏ ⵡⵓⵙⵙⴰⵏ ⴰⵖ ⵔⴰⴷ ⵉⵙⴷⵍ ⵓⵙⴰⵢⵔⴰⵔ ⵏ ⵉⵡⵏⵏⵉⵜⵏ ⵏ ⵓⵣⵔⴼ ⵓⴳⴳⴰⵔ ⵏ 40 ⵏ ⵉⵎⵓⵙⵙⵓⵜⵏ, ⵏⵏⴰ ⵔⴰⴷ ⵙⵙⵓⵜⵉⵢⵏ ⵉⵎⵓⵣⴰⵢⵏ ⴷ ⵉⵎⴳⴳⴰⵢⵏ ⵉⵎⵖⵔⵉⴱⵉⵢⵏ ⴷ ⵉⴱⵕⵕⴰⵏⵉⵢⵏ (ⵎⴰⴷ ⵢⴰⵥⴹⵏ ⵉ 100 ⵏ ⵉⵎⴳⴳⴰⵢⵏ), ⵅⴼ ⵉⴳⴳⵉ ⵏ ⵜⴷⵔⴰⵡⵜ ⵏ ⵉⵎⴷⵔⴰⵡⵏ ⵉⵎⵔⵙⴰⵍⵏ ⴷ ⵓⵖⵔⵉⵎⵏ, ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ.
ⴳ ⵡⵓⵙⵙⴰⵏ ⵏ ⵓⵙⴼⵙⵔ, ⵔⴰⴷ ⴳⵏ ⵉⵎⵔⵙⵉⵜⵏ ⴰⵎ ⴰⵣⵔⴼ ⴳ ⵜⵓⴷⵔⵜ, ⴳ ⵜⴷⵓⵙⵉ, ⴳ ⵜⴷⵍⵙⴰ, ⴳ ⵜⴳⵎⵉ, ⵜⵉⵎⴽⵜⵉⵜ ⴷ ⵓⵎⵣⵔⵓⵢ, ⵜⴰⵎⵣⵡⴰⴳⵜ, ⴰⴼⵓⵍⵍⵙ ⴰⵎⴳⵓⵔⴰⵏ, ⵜⴰⵎⵓⵔⵉ ⵜⴰⵎⵓⵟⵟⵓⵏⵜ, ⵜⵉⵖⵔⵎⵉⵏ ⵜⵉⵎⵙⵙⴰⵎⵓⵜⵉⵏ, ⵜⴰⵢⵙⵉ ⵜⴰⵎⵖⵔⵉⴱⵉⵜ, ⵜⵓⵙⵙⵏⵉⵡⵉⵏ ⵜⵉⴼⵔⵉⵇⵉⵢⵉⵏ...ⵉⵙⴳⵓⵎⵏ ⵉⴷⵙⵍⴰⵏⵏ ⵏ ⵉⵎⴹⴰⴽⴰⵕⵏ ⴷ ⵉⵎⵙⴰⵡⴰⵍⵏ ⵏ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴼⵙⵔ.
ⵎⴽⴷⴰ ⵔⴰⴷ ⵉⵙⴷⵍ ⵓⵙⴰⵢⵔⴰⵔ ⵏ ⵉⵡⵏⵏⵉⵜⵏ ⵏ ⵓⵣⵔⴼ ⵜⵉⵖⵉⵎⵉⵜⵉⵏ ⵕⵥⵎⵏⵉⵏ ⵉ ⵓⵙⵎⵏⵉⴷ ⵏ ⵉⴷⵍⵉⵙⵏ ⴷ ⵜⵖⵓⵔⵉⵡⵉⵏ ⵜⵉⵜⵔⴰⵔⵉⵏ ⵏ ⵓⵣⵖⴰⵏ ⵏⵏⴰ ⴷ ⵢⵓⵡⵉⵏ ⵅⴼ ⵉⵎⵔⵙⵉⵜⵏ ⵉⵣⵔⴼⴰⵏⵏ ⵏ ⵖⵉⵍⴰⴷ : ⵉⵣⵔⴼⴰⵏ ⵏ ⵜⵡⵜⵎⵉⵏ, ⵜⴰⵎⵥⵉ, ⴰⵏⴳⵔⴰⵡ ⴰⴷⵓⵙⴰⵏ, ⵉⵣⵔⴼⴰⵏ ⵏ ⵉⵎⵣⵡⴰⴳⵏ, ⴰⵙⵍⵎⴷ ⵏ ⵡⴰⵣⵣⴰⵏⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵜⵉⵙⵔⵜⴰⵢ ⵜⵉⵏⴼⵔⵓⵜⵉⵏ, ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⴰⵢⵙⵉ ⵜⴰⵎⴰⵣⵉⵖⵜ ⴷ ⵜⵏⵣⵔⵓⴼⵜ, ⵜⴰⵢⵙⵉ ⵜⴰⴼⵔⵉⵇⵉⵜ, ⵜⵉⵎⴽⵜⵉⵜ...
ⵅⴼ ⵉⴳⴳⵉ ⵏ ⵓⵙⵎⵏⵉⴷ ⵏ ⵜⵉⵔⴰⵎ ⵜⵉⵏⴰⵥⵓⵕⵉⵏ (ⵉⵙⴼⵙⵔⵏ, ⵜⵉⴼⵍⵡⵉⵜⵉⵏ, ⵜⴰⵎⴷⵢⴰⵣⵜ, ⴰⵎⵣⴳⵓⵏ...) ⵉⵜⵜⵏⵄⴰⵕⵏ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵅⴼ ⵉⵣⵔⴼⴰⵏ ⵏ ⵉⴱⵕⵕⴰⵏⵉⵢⵏ ⴷ ⵉⵎⵣⵡⴰⴳⵏ, ⵜⴰⵎⵥⵉ, ⵜⴰⵢⵙⵉ ⵜⴰⵃⵙⵙⴰⵏⵉⵜ, ⵜⵉⵎⴽⵜⵉⵜ, ⵜⴰⵡⵍⴰⴼⵜ ⵏ ⵉⴼⵔⵉⵇⵢⴰ..., ⵔⴰⴷ ⵉⴼⴽ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⴳⵓⵔⵉ ⵉ ⵡⴰⵣⵣⴰⵏⵏ ⵏ ⵎⴰⵕⵕⴰ ⵜⵎⵏⴰⴹⵉⵏ ⵏ ⵜⴳⵍⴷⵉⵜ, ⴳ ⵢⴰⵜ ⵜⵉⵔⵎⵜ ⵜⴰⴽⵓⵢⴰⵙⵙⵜ ⵉⵕⵚⴰⵏ, ⴰⴼⴰⴷ ⴰⴷ ⵙⵔⵙⵏ ⵉⵜⵜⵓⵙⵙⴼⵍⴷ, ⵉⵜⵜⵓⵡⵛ ⴰⵙⵏ ⵓⵣⵎⵣ ⵏ ⵓⵙⵉⵡⵍ ⵅⴼ ⵉⵏⵣⴳⵓⵎⵏ ⵏⵏⵙⵏ ⴷ ⵉⵙⵉⵜⵉⵎⵏ ⵏⵏⵙⵏ, ⵙ ⵜⴱⵔⵉⴷⵜ ⵏ ⵜⴳⵓⵔⵉ ⴷ ⵜⵥⵓⵕⵉ ⴷ ⵜⴷⵍⵙⴰ.
