ⵉⵜⵜⵡⴰⵙⵜⴰⵢ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵕⴰⵙ 9 ⵎⴰⵕⵚ 2022, ⵅⴼ ⵉⵅⴼ ⵏ ⵜⵏⴼⵍⵓⵙⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI), ⵏⵏⴰ ⴳ ⴰⵎⵓⵏⵜ ⴳ ⵜⴳⵎⴰⵎⵜ ⵏⵏⵙ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵉⴳⵏⵙⴻⵙⵏ 122 ⵏ ⵓⵡⴰⵏⴽ, ⴰⵔ ⵉⵙⵡⵓⵔⵉ ⴷⴷⴰⵡ ⵓⵏⵀⵍⵍⴰ ⵏ ⵜⴳⵏⵙⴰⵙⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⵎⵜⵜⴰ ⵉⵎⵓⵏⵏ. ⵉⴷⴷⴰ ⴷ ⵎⴰⵢⴰ ⵏⵏ ⴳ ⵓⴳⵔⴰⵡ ⴰⵎⴰⵜⴰⵢ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵉⵜⵜⵓⵙⵏⵎⴰⵍⴰⵏ ⴰⵙⵙ ⴰⴷ ⴳ ⵜⵓⴳⴳⵓⴳⵜ.

ⵔⴰⴷ ⵜⴻⵜⵜⵡⴰⵍⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵙⵎⵉⴳⴰⵍ ⵏⵏⵙ ⵜⵉⵎⵢⴰⴳⴰⵏⵉⵏ ⵏ ⵜⵏⴼⵍⵓⵙⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⴷ ⵜⵎⵓⵔⴰⵢⵜ ⵏ ⵜⵏⵙⵙⵉⵅⴼⵜ ⵏⵏⵙ, ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ ⵜⴰⵎⵣⵡⴰⵔⵓⵜ ⵏ ⵓⵏⴰⴳⵔⴰⵡ ⴰⴷⵙⵍⴰⵏ ⵏ ⵜⴰⴹⴰ, ⴳ ⵢⴰⵜ ⵜⵎⴰⵥⵍⴰⵢⵜ ⵏ ⴽⵕⴰⴹ ⵉⵙⴳⴳⵯⴰⵙⵏ. "ⵉⴳⴰ ⵓⵙⵜⴰⵢ ⴰⴷ ⵢⴰⵏ ⵓⵣⵎⵣ ⵓⴼⵔⵉⴷ ⴳ ⵓⴱⵔⵉⴷ ⵏ ⵜⵎⵔⵙⵍⵜ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵜⵢⴰⴼⵓⵜ ⵏ ⵓⴱⵔⵉⴷ ⵉⴳⴳⵓⴷⵉⵏ ⵏ ⵜⵎⵔⵙⵍⵜ ⴳ ⵉⵙⴳⴳⵯⴰⵙⵏ ⵉⵎⴳⴳⵓⵔⴰ", ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, "ⵍⵓⵎⴰⵕ ⴹⴰⵕⴰⵜ ⵎⴰⴷ ⴰⵖ ⵉⵙⵜⵉ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⵉⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵡⴰⵢⵢⵓⵔ ⵏ ⵏⵓⵡⴰⵏⴱⵉⵔ ⴰⵎⵣⵔⴰⵢ ⴷ ⴰⴳⵏⵙⴰⵙ ⵏ ⵓⵎⵏⵥⴰⵡ ⴰⴼⵔⵉⵇⵉ ⴳ ⵓⵙⵉⵔⴰ ⵏ ⵜⴰⴹⴰ ⵜⴰⵎⴰⴹⵍⴰⵏⵜ".

ⴰⵔ ⵉⵎⵎⴰⵍ ⵓⵙⵜⴰⵢ ⵏ ⵓⵙⵇⵇⵉⵎ, ⴳ ⵡⵓⴷⵎ ⵏ ⵜⵏⵙⵙⵉⵅⴼⵜ ⵏⵏⵙ, ⵜⵉⵍⴰⵍ ⵏⵏⴰ ⵉⵜⵜⴳⴳⴰ ⴳ ⵓⵙⵡⵉⵔ ⴰⵎⵏⵥⴰⵡ ⴷ ⵓⴳⵔⴰⵖⵍⴰⵏ, ⴷ ⵜⴷⵔⴰⵡⵜ ⵏⵏⵙ ⵉⵙⵎⴷⵏ ⴳ ⵉⵙⵉⵣⵡⵉⵔⵏ ⴷ ⵜⵎⵙⴰⵔⵉⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ ⴷ ⵉⵡⵉⵣ ⵏⵏⵙ ⵅⴼ ⵓⴱⵟⵟⵓ ⵏ ⵜⴷⵔⴰⵡⵉⵏ ⵏⵏⵙ ⴷ ⵜⵉⵔⵎⵉⵜⵉⵏ ⵏⵏⵙ ⵜⵉⵎⵓⴼⴰⵢⵉⵏ ⴰⴽⴷ ⵇⴰⵃ ⵜⵎⵔⵙⴰⵍ ⴷ ⵜⵎⴰⴷⴷⴰⵙⵉⵏ ⵜⵉⴼⵔⵉⵇⵉⵢⵉⵏ ⴷ ⵜⴳⵔⴰⵖⵍⴰⵏⵉⵏ. "ⵉⴳⴰ ⵓⵙⵜⴰⵢ ⴰⴷ , ⴳ ⵓⴱⵔⵉⴷ ⴰⵙⵓⵍⴰⵏ ⵏ ⵓⵙⵇⵇⵉⵎ, ⵜⴰⴼⵔⴽⵜ ⵜⴰⵎⵣⵣⵉⴳⵣⵜ ⵏ ⵜⴷⵔⴰⵡⵜ ⴷ ⵓⵙⵡⵓⴷⴷⵓ ⴷ ⵜⵎⵣⵡⴰⵔⵜ ⴷ ⵜⵙⵏⵜⴰⵢⵜ ⴳ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵉⵏ ⵏ ⵓⴼⵔⴰⴳ ⴷ ⵜⵏⴽⵔⴰ ⴷ ⵜⵙⵔⵜⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵙⴳ ⵡⴰⵏⵙⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

“ⵉⴳⴰ ⵓⵙⵜⴰⵢ ⵉⵏⵓ ⵅⴼ ⵉⵅⴼ ⵏ ⵜⵏⴼⵍⵓⵙⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵢⴰⴼⵓⵜ ⴰⵡⴷ ⵏ ⵜⴷⵔⴰⵡⵜ ⵏ ⵉⴳⵎⴰⵎⵏ ⴷ ⵉⵎⵙⵖⴰⵏⵏ ⵏ ⵓⵙⵇⵇⵉⵎ, ⵏⵏⴰ ⵙⵏⵉⵎⵎⵉⵔⵖ ⴽⵉⴳⴰⵏ ⵅⴼ ⵜⵎⵔⵙⵉⵜ ⵏⵏⵙⵏ ⴷ ⵜⴰⵎⵓⵏⵜ ⵏⵏⵙⵏ ⵜⴰⵎⴳⵔⵓⵜ ⵜⴰⵙⵓⵍⴰⵏⵜ ⴰⴽⴷ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵡⵏⵏⴰⴹⵜ ⵏⵏⵖ ⵜⴰⵙⴳⴰⵡⴰⵏⵜ ⴷ ⵜⴳⵔⴰⵖⵍⴰⵏⵜ, ⵍⵓⵎⴰⵕ ⴳ ⵓⵣⵎⵣ ⵏ ⵓⴱⴰⵢⵢⵓⵕ ⴽⵓⴼⵉⴷ19 ⴷ ⵜⵏⵙⵉⵅⴼⵜ ⵏⵏⵖ ⵉ ⵜⵙⵇⵇⵉⵎⵜ ⵏ ⵜⵙⵖⵣⵏⵜ ⵜⴰⴳⵔⴰⵖⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ..." ⴰⴷ ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ. " ⵜⴰⵏⵎⵎⵉⵔⵜ ⵉ ⵉⵎⴷⴷⵓⴽⴽⴰⵍ ⵉⵏⵓ ⴷ ⵜⵎⴷⴷⵓⴽⴽⴰⵍ ⵉⵏⵓ ⴳ ⵓⵥⵟⵟⴰ ⴰⴼⵔⵉⵇⵉ ⵅⴼ ⵓⵙⵜⴰⵢ ⵏ ⵓⵙⵇⵇⵉⵎ ⴷ ⴰⴳⵏⵙⴰⵙ ⵏ ⵉⴼⵔⵉⵇⵢⴰ ⴳ ⵓⵙⵉⵔⴰ ⵏ ⵜⴰⴹⴰ".

ⵉⴼⵓⴽ ⴰⴷ ⵏⵙⵎⵍ ⵎⴰⵙ ⵉⵙⵙⵉⵅⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⴳ ⵜⴳⵉⵔⴰ ⵏ 2018 ⵜⴰⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵣⵡⴰⴳⵜ ⴳ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⵉⵜⵜⵡⴰⵍⵙ ⵓⵙⵜⴰⵢ ⵏⵏⵙ ⵜⵉⴳⵉⵔⴰ ⵏ ⵓⵙⴳⴳⵯⴰⵙ ⴰⴷ). ⴳ ⵏⵓⵡⴰⵏⴱⵉⵔ ⴰⵎⴳⴳⴰⵔⵓ, ⵉⵜⵜⵡⴰⵍⵙ ⵓⵙⵜⴰⵢ ⵏ ⵓⵙⵇⵇⵉⵎ, ⵙ ⵜⴼⵔⵉⵙⵜ ⵏ ⵓⴳⵏⵙⴰⵙ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴳⵎⴰⵎ ⴳ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏⵏⴰ ⵢⴰⴽⴽⴰⵏ ⵜⴰⵙⵖⵣⵏⵜ ⵉ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (SCA), ⵉⴹⴼⵕⵏ ⵉ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴳ ⵓⵙⵇⵇⵉⵎ ⴰⴳⵎⴰⵎ ⴳ ⵜⴳⵔⵓⵎⵎⴰ ⵏ ⵜⵡⵓⵔⵉ ⵏ ⵜⴰⴹⴰ ⵉⵏⵜⴰⵢⵏ ⵙ ⵜⵎⵙⵙⵏⵜⴰⵢ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴳⵎⴰⵎ ⴳ ⵜⵙⵇⵇⵉⵎⵜ ⵏ ⵓⵜⵓⵢ ⵉⴹⴼⵕⵏ ⵉ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴳⵏⵙⴰⵙ ⵏ ⵜⵎⵏⴰⴹⵜ ⵜⴰⵢⵢⴰⵡⵜ ⵜⴰⵥⵍⵎⴰⴹⵜ. ⵉⴳ ⵓⵙⵇⵇⵉⵎ ⴰⵡⴷ ⴰⴳⵎⴰⵎ ⴳ ⵜⴳⵔⵓⵎⵎⴰ ⵏ ⵜⵡⵓⵔⵉ ⵏ ⵓⵥⵟⵟⴰ ⴰⴼⵔⵉⵇⵉ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵏⵏⴰ ⵉⴽⴽⴰ ⵉⵙⵙⵏⵜⵉ ⵜⴰⵙⵓⵎⵔⵜ ⵏ ⵓⵙⵏⴰⵢ ⵏⵏⵙ.