ⵔⴰⴷ ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵓⵙⵙⴰⵏ ⵏ 13 ⴷ 14 ⵢⵓⵏⵢⵓ ⴷ ⵉⴷⴷⴰⵏ, ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵢⴰⵏ ⵓⵎⵛⴰⵡⴰⵕ ⴰⵏⴰⵎⵓⵔ ⴷ ⵡⴰⵣⵣⴰⵏⵏ ⵉⵙⵢⴰⴼⴰⵏ ⵢⴰⵏ ⵓⵙⴰⴽⴰ ⵉⵙⵙⵏⵜⵉⵏ ⴳ ⴱⵕⴰⵢⵕ 2023 ⵉⴽⴽⴰⵏ ⵓⴳⴳⴰⵔ ⵏ ⵓⵙⴳⴳⵯⴰⵙ ⵉⵙⵎⴷⵏ, ⴰⴷ ⵢⴰⵎⵓ ⴰⵙⵏⵎⴰⵍⴰ ⵏ ⵙⵉⵏ ⴷ ⵎⵔⴰⵡ ⵉⵎⵛⴰⵡⴰⵕⵏ ⵏⵎⵏⴰⴹⵏ ⴳ ⵓⴽⴽⵯ ⵜⵎⵏⴰⴹⵉⵏ ⵏ ⵜⴳⵍⴷⵉⵜ, ⴷⵔⵓⵏ ⴳⵉⵙⵏ ⵜⵉⵎⵉⴹⵉⵡⵉⵏ ⵏ ⵡⴰⵣⵣⴰⵏⵏ, ⵙ ⵉⵙⵎⵉⵍⵏ ⵏⵏⵙⵏ ⴷ ⵡⴰⴷⴷⴰⴷⵏ ⵏⵏⵙⵏ ⵉⵎⵢⴰⵏⴰⵡⵏ.

ⵜⴽⵛⵎ ⵜⵙⵏⵜⴰⵢⵜ ⴰⴷ, ⵏⵏⴰ ⵔⴰⴷ ⵉⵙⵙⵏⵜⵉ ⴰⵙⵙ ⵏ ⵓⵙⵉⵎⵡⴰⵙ 13 ⵢⵓⵏⵢⵓ ⵙⴳ ⵜⵙⵔⴰⴳⵜ ⵜⵉⵙⵙ ⴽⴽⵓⵥⵜ ⵏ ⵜⵣⴷⵡⵉⵜ ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴳ ⵓⵙⴰⵜⵉ ⵏ ⵓⵙⵏⵜⵉ ⵏⵏⴰ ⵉⵙⵙⵓⵜⵉⵢ ⵓⵙⵇⵇⵉⵎ, ⵙ ⵡⴰⵏⵏⴰⵍ ⵏ ⵜⵎⴰⴷⴷⴰⵙⵜ ⵏ ⵢⵓⵏⵉⵙⵉⴼ ⵍⵎⵖⵔⵉⴱ, ⵉⵡⴰⵜⵜⵙⵏ ⴰⴷ ⵉⵙⴷⵓⵙ ⴰⵙⵎⵔⵙⵍ ⵏ ⵓⵎⵏⵣⴰⵢ ⵏ ⵜⴷⵔⴰⵡⵜ ⵏ ⵡⴰⵣⵣⴰⵏⵏ, ⵓⵔ ⴷ ⵖⴰⵙ ⴳ ⵜⵎⵙⴰⵔⵉⵏ ⵏⵏⴰ ⵙⵔⵙⵏ ⵉⵥⵍⵉⵏ ⴷ ⵉⵣⵔⴼⴰⵏ ⵏⵏⵙⵏ ⵎⴰⵛⴰ ⴰⵡⴷ ⴳ ⵜⵎⵙⴰⵔⵉⵏ ⵏ ⵡⴰⵎⵓⵏⵏ ⵏⵏⵙⵏ ⴷ ⵜⵎⵙⴰⵔⵉⵏ ⵏⵏⴰ ⵉⵣⵎⵔⵏ ⴰⴷ ⴹⵉⵚⵏⵜ ⵅⴼⵙⵏ. ⵉⴷⴷⴰ ⴷ ⵖⴰⵢⴰⴷ ⵉⴷⴷⵖ ⵜⴳⴰ ⵜⴷⵔⴰⵡⵜ ⵢⴰⵏ ⵙⴳ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⵏⵏⴰ ⵖ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵢⴰⵜ ⵙⴳ ⵜⴼⵓⵍⵉⵏ ⵏⵏ ⵜⵜ ⵉⵙⵖⵣⵏⵏ.

ⴰⵙⴷⵔⵓⵡ ⵏ ⵡⴰⵣⵣⴰⵏⵏ ⴷ ⵓⵙⵎⵔⵙⵍ ⵏ ⵜⴷⵔⴰⵡⵜ ⵏⵏⵙⵏ ⵓⵔ ⵉⴳⵉ ⴰⵟⵕⵕⵃ ⵡⴰⵍⴰ ⴰⵙⵖⵓⴷⵓ, ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵛⴰ ⴷ ⴰⵣⵔⴼ ⴰⴷⵙⵍⴰⵏ ⴷ ⵢⴰⵏ ⵙⴳ ⵜⵔⵙⴰⵍ ⵏ ⵓⵚⴽⵓ ⵏ ⵜⵙⵔⵜⴰⵢ ⴷ ⵢⵉⵏⴰⵡ ⴰⴳⴷⵓⴷⴰⵏ ⵓⵖⴷⵉⵎ ⴷ ⵓⵎⵙⵉⴷⴼ ⴷ ⵓⵎⵙⵓⵎⵓ, ⵉⵙⵙⴼⵍⵉⴷⵏ ⴷ ⵉⵙⴰⴷⵎⴰⵔⵏ ⵉ ⵡⴰⵙⵙⴰⵔⵏ ⵏ ⵡⴰⵣⵣⴰⵏⵏ ⴷ ⵜⴱⵖⵓⵔⵜ ⵏⵏⵙⵏ ⵜⴰⵎⵓⴼⴰⵢⵜ… ⵜⵉⵡⵜⵎⵉⵏ ⴷ ⵉⵔⴳⴰⵣⵏ ⵏ ⵍⵎⵖⵔⵉⴱ ⵏ ⵢⵉⵎⴰⵍ ⵉⵜⵜⵡⴰⵥⵕⴰⵏ… ⵉⵎⴰⵍ ⵏ ⵡⴰⵎⵓⵔ.

ⵉⵜⵜⵡⴰⵥⵍⴰⵢ ⵓⵎⵛⴰⵡⴰⵕ ⴰⵏⴰⵎⵓⵔ, ⵏⵏⴰ ⵎⵉ ⵔⴰⴷ ⵙⵡⵓⴷⴷⵓⵏ ⵡⴰⵣⵣⴰⵏⵏ ⴰⴽⴽⵯ ⵜⵉⵖⵉⵎⵉⵜⵉⵏ ⵏⵏⵙ, ⵉ ⵓⵎⵢⴰⵖ ⵅⴼ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵜⵡⵓⵔⵉ ⵏ ⵜⵙⵇⵇⵉⵎⵜ ⵜⴰⵏⵎⵜⵜⴰⵏⵜ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵉⵙⵇⵙⵉⵜⵏ ⵏⵏⵙ ⴷ ⵜⴰⵏⴰⴹⵉⵏ ⵜⵉⵎⵙⴰⴷⴰⵖⵉⵏ ⵏⵏⴰ ⴰⵙ ⵉⵜⵜⵢⴰⵍⵍⵏ, ⵅⴼ ⵉⴳⴳⵉ ⵏ ⵓⵙⵜⴰⵢ ⵏ ⵉⴳⵏⵙⴰⵙ ⵏ ⵡⴰⵣⵣⴰⵏⵏ ⵏⵏⴰ ⵔⴰⴷ ⵉⵙⵎⵏⵉⴷ ⵜⴰⵏⴰⴹⵜ ⵜⴰⵎⵙⴰⴷⴰⵖⵜ ⵉ ⵜⵙⵇⵇⵉⵎⵜ ⵜⴰⵏⵎⵜⵜⴰⵏⵜ ⴳ ⵛⵓⵜⴰⵏⴱⵉⵔ ⴷ ⵉⴷⴷⴰⵏ.

ⵎⴽⴷⴰ ⵔⴰⴷ ⵉⵜⵜⵓⵙⵢⴰⴼⴰ ⵓⵎⵛⴰⵡⴰⵕ, ⵏⵏⴰ ⵔⴰⴷ ⵕⵥⵎⵏ ⵡⴰⵣⵣⴰⵏⵏ ⴰⴽⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵎⴰⵙⵙⴰ ⵏⴰⵄⵉⵎⴰ ⴱⵏ ⵢⴰⵃⵢⴰ, ⵜⴰⵎⴰⵡⵙⴰⵙⵜ ⵏ ⵓⵎⵓⵙⵙⵓ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵊⴰ, ⴷ ⵜⴳⵏⵙⴰⵙⵜ ⵏ ⵢⵓⵏⵉⵙⵉⴼ ⴳ ⵍⵎⵖⵔⵉⴱ, ⵜⵉⵡⵓⵔⵉⵡⵉⵏ ⵏⵏⵙ, (ⵔⴰⴷ ⵉⵙⵢⴰⴼⴰ) ⵙ ⵓⵙⵏⵜⵉ ⵏ ⵓⵖⵓⵔⵉ ⵏ ⵡⴰⵣⵣⴰⵏⵏ, ⵉⵎⵙⵎⴷⵢⴰⵏ ⵉⵥⵕⵉ ⵏⵏⵙⵏ ⴷ ⵉⵙⵉⵣⵡⵉⵔⵏ ⵏⵏⵙⵏ ⵉⵣⵔⴼⴰⵏⵏ.

ⵔⴰⴷ ⵜⴻⵜⵜⵓⵙⴳⵎⴹ ⴳ ⵓⵏⵎⵓⵇⵇⴰⵔ ⴰⴷ ⵢⴰⵜ ⵜⵎⵢⴰⵇⵇⴰⵏⵜ ⵏ ⵜⴷⵔⴰⵡⵜ ⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⵓⵏⵉⵙⵉⴼ.

ⵎⴽⴷⴰ ⵔⴰⴷ ⵜⵜⵓⵙⵏⵎⵉⵍⴰⵏⵜ ⵜⴳⵟⵟⵓⵎⵉⵏ ⵏ ⵓⵖⴰⵡⴰⵙ ⵏ ⵓⵎⵛⴰⵡⴰⵕ ⴰⵏⴰⵎⵓⵔ ⵢⴰⵜ ⵜⵙⴰⵡⵔⵜ ⵏ ⵡⵓⵏⵓⵖ ⴰⵎⵢⴰⵖ ⵅⴼ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵓⵙⵙⵎⵔⵙ ⵏ ⵡⴰⵏⵜⵉⵔⵏⵉⵜ ⵙ ⵜⵡⵉⵍⴰ ⵜⴰⵏⴼⵔⴰⵏⵜ.
ⴰⵙⵙⴼⵍⴷ. ⴰⵎⵢⴰⴳ. ⵜⴰⴷⵔⴰⵡⵜ.

ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ
35 ⵏ ⵓⵙⴳⴳⵯⴰⵙ
ⵉⵣⵔⴼⴰⵏ. ⵜⵉⴷⵔⴼⵉⵏ. ⵜⴰⵎⵢⴰⴳⴰⵏⵜ.