ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵜⵎⵏⴰⴹⵜ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ ⵜⴰⵙⵎⵓⵏⵉ ⵏⵏⵙ ⵜⵓⵏⵣⵉⵍⵜ ⵜⵉⵙ ⵙⴰⵜ ⵏⵏⵉ ⵉⵜⵜⵡⴰⵥⵍⴰⵢⵏ ⵉ ⵜⵎⵖⵓⵏⵜ ⵏ ⵜⵡⵓⵔⵉ ⵉⵏⴳⵔ ⵜⵙⵎⵓⵏⵉⵏ ⵙ ⵙⵏⴰⵜ ⴷ ⵉⴱⴷⴷⵉ ⵅⴼ ⵜⵡⵓⵔⵉⵡⵉⵏ ⵜⵉⴽⵙⵡⴰⵜⵉⵏ ⵏⵏⵉ ⵉⵜⵜⵢⴰⵡⴰⴹⵏ ⴳ ⵓⵙⴳⴳⵯⴰⵙ ⵏ 2022. ⴳ ⵜⴳⵓⵔⵉ ⵏ ⵓⵕⵥⵥⵓⵎ ⵏ ⵜⵙⵎⵓⵏⵉ ⴰⴷ, ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ ⵓⵙⵉⵎⵡⴰⵙ 23 ⴷⵓⵊⴰⵏⴱⵉⵔ 2022 ⴳ ⵟⴰⵏⵊⴰ.
ⵜⵙⵙⴽⵜⵉ ⵎⴰⵙⵙⴰ ⵙⴰⵍⵎⴰ ⵟⵟⵓⴷ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵙ ⵜⴽⵛⵛⵓⵎⵉⵏ ⵜⵉⵎⵇⵇⵔⴰⵏⵉⵏ ⵏⵏⵉ ⵉⵜⵜⵓⴳⴰⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵎ ⴰⵙⵏⵓⴱⴳ ⴷ ⵓⵙⵎⴽⵍ ⵏ ⵜⵏⵓⵔⵣⵉⵏ ⴷ ⵓⵙⴰⴳⴳⵯ ⴷ ⵓⵙⵙⵉⴼⴹ ⵉ ⵜⵙⴳⴳⵯⵉⵏ ⴳⴰⵏⵉⵏ ⵜⵉⵎⵏⵜⴰⵢⵉⵏ, ⵜⵔⵏⵓ ⵎⴰⵙ ⵣⴷⵉⵏⵜ ⵜⵏⵓⵔⵣⵉⵏ ⴰⴷ ⴱⴰⵀⵔⴰ ⵙ ⵜⵎⵣⵡⴰⴳⵜ ⴷ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵎⵥⵉ, ⴷ ⵓⴳⴳⴰⵔ. ⵙⴳ ⵜⵙⴳⴰ ⵢⴰⴹⵏⵉⵏ, ⵜⵙⴰⵡⵍ ⵎⴰⵙⵙⴰ ⵟⵟⵓⴷ ⵅⴼ ⵉⵔⵣⴰⴼⵏ ⵉⵎⵖⵣⵓⵜⵏ ⵏ ⵓⵙⵔⵙ ⵏ ⵉⵥⵕⵉ ⵅⴼ ⵓⵙⵓⵔⵙ ⵏ ⵉⵎⵖⵣⵓⵜⵏ ⴷ ⵜⵎⵖⵣⵓⵜⵉⵏ, ⴷ ⵓⴽⵛⵛⵓⵎ ⴳ ⵡⴰⴷⴷⴰⴷⵏ ⵏ ⵓⵙⵍⴰⴳ ⵅⴼ ⵡⵓⵜⵛⵉ ⵙ ⵓⵙⵎⵀⵍ ⵏ ⵉⵙⵡⴰⵍⴰⵜⵏ ⵏⵏⵉ ⵉⵙⵙⵎⵜⵔ ⵓⵏⵎⵎⴰⵍ ⴷ ⵉⴼⴼⵖⵏ ⵢⵓⵙⵉⵏ ⵙ ⵓⵣⵡⵍ "ⵉⵣⵔⵉⵔⵉⴳⵏ ⵉⵏⵉⵍⴰⵏⵏ ⵉ ⵓⵙⵡⵓⴷⴷⵓ ⵏ ⵓⵙⵍⴰⴳ ⵅⴼ ⵡⵓⵜⵛⵉ ⴳ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ".
ⴳ ⵓⵎⵏⴰⴹ ⴰⴷ, ⵜⵓⵍⵍⵖ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵙ ⵓⵎⵢⴰⵡⴰⵙ ⵉⴷⵓⵙⵏ ⴰⴽⴷ ⵜⵎⵀⵍⴰ ⵜⴰⵏⵎⵏⴰⴹⵜ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ, ⴷ ⵙ ⵓⵎⵢⴰⵖ ⵉⴷⵓⵙⵏ ⵏ ⵜⵓⴳⵜ ⵏ ⵜⵎⵔⵙⴰⵍ ⵜⵉⵣⵓⵏⴰⵏⵉⵏ ⴰⴽⴷ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴳⴳⴰⵔ. ⵓⵡⵉⵏⵜ ⴷ ⵜⵏⵇⵇⴰⴹ ⵢⴰⴹⵏⵉⵏ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵜⵙⵎⵓⵏⵉ ⴰⴷ ⵅⴼ ⵓⵙⵎⵏⵉⴷ ⵏ ⵜⵎⵖⵓⵏⵜ ⵏ ⵜⵡⵓⵔⵉ ⵜⴰⵙⴳⵯⵙⴰⵏⵜ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵙ ⴽⵕⴰⴹⵜ ⴷ ⵓⵎⵙⴳⴷⴰⵍ ⵏ ⵜⵎⵙⵓⵜⴰⵍ ⵜⵉⵣⵔⴼⴰⵏⵉⵏ ⴼⴰⵡⵏⵉⵏ ⴳ ⵜⵎⵏⴰⴹⵜ, ⵎⴽⴷⴰ ⵜⴻⵜⵜⵓⵙⵎⵏⴰⴷ, ⵜⵜⵓⵎⵙⴳⴷⴰⵍ ⵜⵖⵓⵔⵉ ⵏⵏⵉ ⵉⵙⵎⵓⵜⵜⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ "ⵜⵎⵛⵓⵛⵛⴰⴹ ⵜⵉⵏⵣⵔⴰⴼⵉⵏ ⵜⵜⵓⵙⵖⵣⵏⵏⵉⵏ ⴳ ⵓⵙⵢⵉⵡⵍ ⵏ ⵜⴰⵣⵣⴰⵏⵉⵏ", ⵉⵍⵎⵎⴰ ⴰⵙⵖⵣⵏ ⵏ ⵜⴰⵏⴰⴹⵉⵏ ⵏⵏⴰ ⵙⴽⵔⵏⵜ ⵜⵏⴳⵎⴰⵎⵉⵏ ⴷ ⵉⵏⴳⵎⴰⵎⵏ.
ⵜⴻⵜⵜⵡⴰⵙⵙⴰⵏ ⵜⵙⵎⵓⵏⵉ ⵙ ⵓⵎⴹⴰⴽⴰⵕ ⵉⴼⵔⵓⵔⵉⵏ ⵏ ⵜⵏⴳⵎⴰⵎⵉⵏ ⴷ ⵉⵏⴳⵎⴰⵎⵏ ⵏⵏⵉ ⵉⵙⴷⴷⵉⴷⵏ ⵅⴼ ⵓⵣⴷⴰⵢ ⵏ ⵜⵥⵕⵉⴳⵜ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵉⵙⴳⵔⴰⵡⵏ ⵉⵙⴳⵎⴰⵏⵏ ⵜⵜⵡⴰⵙⵔⵙⵏⵉⵏ ⴳ ⵜⵎⵔⵙⴰⵍ ⵜⵉⵏⵎⵍⴰⵏⵉⵏ ⴷ ⵜⵎⵙⴷⴰⵡⵉⵢⵉⵏ, ⴷ ⵉⴳⵉ ⵏ ⴽⵉⴳⴰⵏ ⵏ ⵜⵓⴳⴳⴰⵣ ⵅⴼ ⵓⵏⵄⴰⵕ ⵅⴼ ⵓⵎⵓⵔⵙ ⵏ ⵜⴳⵎⵉ ⵜⴰⵎⵙⵙⵓⵎⵓⵜ ⵉ ⵡⴰⵣⵣⴰⵏⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵓⵙⴹⵓⴼ ⵏⵏⵙⵏ ⴰⵎⵢⴰⴳⴰⵏ ⵉ ⵓⵍⵎⵎⵓⴷ, ⵎⴽⴷⴰ ⵉⵜⵜⵓⵙⴷⴷⵉⴷ ⵓⵙⵓⵖⵏ ⵏ ⵓⴼⵔⴰⴳ ⵏ ⵜⴰⵣⵣⴰⵏⵉⵏ ⵙⴳ ⵓⵙⵢⵉⵡⵍ ⴷ ⵎⴰⵙ ⵉⵙⵖⴰⵡⵙⴰ ⵎⴰⵢⴰ ⵏⵏ ⴳ ⵓⵙⴳⴳⴷ ⵏ ⵓⵙⵍⴳⵏ ⵏ ⵜⵡⵊⴰ, ⴷ ⵓⵣⴷⴰⵢ ⵏ ⵉⴳⵉ ⵏ ⴽⵉⴳⴰⵏ ⵏ ⵜⵓⴳⴳⴰⵣ ⵅⴼ ⵓⵡⴰⴹ ⵏ ⵉⵙⵓⵖⴰⴷ ⵏ ⵓⵖⴰⵡⴰⵙ ⴰⵙⴳⵯⵙⴰⵏ ⵏ ⵜⵡⵓⵔⵉ ⴳ 2023.
