ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⴹⵡⴰⵏ-ⵍⵃⵓⵙⵉⵎⴰ ⵜⴰⵙⵎⵓⵏⵉ ⵏⵏⵙ ⵜⵓⵏⵣⵉⵍⵜ ⵜⵉⵙ ⵚⴹⵉⵚⵜ, ⴰⵙⵙ ⵏ ⵓⵙⵉⵎⵡⴰⵙ 09 ⵛⵓⵜⴰⵏⴱⵉⵔ 2022 ⴳ ⵜⵖⵔⵎⵜ ⵏ ⵟⴰⵏⵊⴰ, ⵙ ⵓⵎⵙⴰⵙⴰ ⴰⴽⴷ ⵉⵙⴱⴷⴰⴷⵏ ⵏ ⵜⵎⵜⵜⴰ 46 ⵏ ⵓⵙⵍⴳⵏ ⵓⵟⵟⵓⵏ 76.15 ⵣⴷⵉⵏⵉⵏ ⵙ ⵡⴰⵍⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵜⵜⴰ 36 ⵏ ⵓⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ. ⵙ ⵜⵎⵍⴷⴰ ⴰⴷ, ⵜⵙⵎⵏⵉⴷ ⵎⴰⵙⵙⴰ ⵙⴰⵍⵎⴰ ⵟⵟⵓⴷ ⵜⴰⵎⴰⵖⵓⵏⵜ ⵏ ⵜⵡⵓⵔⵉ ⵏ ⵜⵙⵇⵇⵉⵎⵜ ⴳ ⵜⵉⵣⵉ ⵜⴰⵣⴳⵔⴰⵔⵜ ⵉⵏⴳⵔ ⵜⵙⵎⵓⵏⵉ ⵜⵉⵙ ⵙⵎⵎⵓⵙⵜ ⴷ ⵜⵙⵎⵓⵏⵉ ⵜⵉⵙ ⵚⴹⵉⵚⵜ, ⵜⵙⵙⴼⴰⵡ ⴰⴽⴽⵯ ⵉⴽⵛⵛⵓⵎⵏ ⴷ ⵜⴷⵔⴰⵡⵉⵏ ⴷ ⵜⵙⵏⵜⴰⵢⵉⵏ ⵏⵏⴰ ⵜⵙⴽⵔ ⵜⵙⵇⵇⵉⵎⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ, ⴷ ⵢⵉⴳⵔ ⵏ ⵓⵣⵓⵣⵣⵔ ⴷ ⵓⵙⴷⵓⵙ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⴷ ⵓⵍⴰ ⴰⴹⴼⴼⵓⵕ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴳ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ ⴳ ⵓⵙⵡⵉⵔ ⵏ ⵜⴳⵔⴰⵡⵉⵏ ⴷ ⵜⵙⴳⴳⵯⵉⵏ ⵏ ⵜⵎⵏⴰⴹⵜ. ⵜⵣⵎⵎⴻⵎ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵎⴰⵙ ⵉⵏⵏⴹⴼⵚ (ⵉⴹⵓⴱⵍ) ⵓⵟⵟⵓⵏ ⵏ ⵜⵏⵓⵔⵣⵉⵏ ⵏⵏⴰ ⴷ ⵢⵓⵡⴹⵏ ⴳ ⵜⵉⵣⵉ ⴰⴷ, ⵜⵙⵙⴼⴰⵡ ⵎⴰⵙ ⴷ ⴷⴷⴰⵏ ⵉⵙⵎⴰⵎⵎⵉⵜⵏ ⵣⴷⵉⵏⵉⵏ ⵙ ⵉⴱⴹⵉⵢⵏ ⵉⵏⵣⵔⴰⴼⵏ ⴷ ⵜⵎⵣⵡⴰⴳⵜ ⴷ ⵜⵓⵔⴳⵙⴰ ⴳ ⵜⵣⵡⵉⵔⵉ, ⴹⴼⵕⵏⵜ ⵜⵏⵜ ⴷ ⵜⵏⵓⵔⵣⵉⵏ ⵣⴷⵉⵏⵉⵏ ⵙ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵡⴰⵣⵣⴰⵏⵏ, ⴷ ⵜⵏⵓⵔⵣⵉⵏ ⴷ ⵢⵓⵡⴹⵏ ⵙⴳ ⵉⵖⵣⵓⵜⵏ ⵏ ⵜⵎⵏⴰⴹⵜ. ⵜⵜⵡⴰⵙⵙⴰⵏⵜ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⴰⴷ ⵙ ⵓⵙⵎⵏⵉⴷ ⵏ ⵉⴳⵎⴰⵎⵏ ⴷ ⵜⴳⵎⴰⵎⵉⵏ ⵏ ⵜⵙⵇⵇⵉⵎⵜ ⴽⵉⴳⴰⵏ ⵏ ⵜⵙⵓⵎⴰⵔ ⴷ ⵉⵙⵖⵍⴰⴼ ⵉ ⵓⵙⵎⵓⵜⵜⴳ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⴰⵎⴰⵢⵏⵓ ⵉ ⵓⵙⴳⴳⵯⴰⵙ 2023, ⵙ ⵓⵎⵙⴰⵙⴰ ⴰⴽⴷ ⵜⵙⵜⵔⴰⵜⵉⵊⵉⵜ ⵏ ⵓⵙⵇⵇⵉⵎ 2022-2024 ⴷ ⴰⴽⴷ ⵜⵥⵍⴰⵢⵉⵏ ⵏ ⵜⵎⵏⴰⴹⵜ, ⴷ ⵓⵙⴽⴰⵔ ⵙ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⴷ ⵉⴷⴷⴰⵏ ⴳ ⵜⵏⵓⵔⵣⵉⵏ ⴷ ⵉⵙⵎⴰⵎⵎⵉⵜⵏ ⵏⵏⴰ ⴷ ⵉⵜⵜⴰⵡⴹⵏ ⵜⴰⵙⵇⵇⵉⵎⵜ. ⴼⴼⵖⵏⵜ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⴰⴷ ⵜⵓⵏⵣⵉⵍⵜ ⵙ ⵜⵥⵕⵉⴳⵜ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⴳⴳⵯⴰⵙ 2023 ⵉⵜⵜⵡⴰⴼⴽⴰ ⴳⵉⵙ ⵓⵙⵉⵣⵡⵔ ⵉ ⵓⵣⵔⴼ ⴳ ⵜⴷⵓⵙⵉ ⴷ ⵓⵙⵍⵎⴷ ⴷ ⵓⵙⴷⵓⵙ ⵏ ⵜⵉⵍⴰⵍⵉⵏ ⵏ ⵜⵙⵇⵇⵉⵎⵜ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⴼⵓⵍⵉⵏ ⴽⵓⴽⴹⵏⵉⵏ ⴰⵎ ⴰⵣⵣⴰⵏⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵜⵡⵜⵎⵉⵏ ⵜⵓⵏⴳⵉⵙⵉⵏ ⵏ ⵜⴽⵕⴹⵉ ⴷ ⵉⵡⵙⵙⴰⵔⵏ ⴷ ⵉⵎⵖⵣⵓⵜⵏ ⴷ ⵉⵎⴰⵜⵔⴰⵡⵏ ⵏ ⵜⵓⵔⴳⵙⴰ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏⵏⵙⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ. ⵉⵙⵡⵓⵜⵜⵙ ⵓⵖⴰⵡⴰⵙ ⴰⵣⴷⴰⵢ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵉⵏ ⴰⴽⴷ ⵜⵎⵔⵙⴰⵍ ⵏⵜⴰⵢⵏⵉⵏ ⵙ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⴷ ⴰⴽⴷ ⵡⴰⵎⵓⵏ ⵓⵖⵔⵉⵎ ⴰⵎⴳⴳⴰⵢ, ⴷ ⵓⴽⴰⵎⴷ ⵏ ⵜⴷⵉⵏⴰⵎⵉⵜ ⵏ ⵉⵙⵏⴼⵍⵏ ⴷ ⵉⵏⴰⵥⴰⵕⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵡⴰⵣⵣⴰⵏⵏ ⴰⵎ ⵜⴰⵎⵓⵟⵟⵓⵏⵜ ⴷ ⵓⴼⵓⵍⵍⵙ ⴰⵎⴳⵓⵔⴰⵏ ⴷ ⵓⵣⵔⴼ ⴳ ⵜⵖⵔⵎⵜ ⵏ ⵜⵏⴼⵔⵓⵜ ⴷ ⵓⵙⵉⴷⴼ ⵉ ⵇⴰⵃ ⵉⵙⵎⵉⵍⵏ.