ⵉⵜⵜⵡⴰⴼⵙⴰⵔ ⴳ
ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵜⵜ ⵉⵙⵙⵓⵙⵎ ⵓⵎⵢⴰⵖ ⴰⴽⴷ ⵉⵙⵖⵍⴰⴼ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵓⵙⵎⵀⵍ ⵏ ⴽⵉⴳⴰⵏ ⴳⵉⵙⵏ, ⴷ ⴰⵡⴷ ⵜⴰⵏⴼⵔⵓⵜ ⵏ ⵜⵎⵙⴰⴷⵓⵔⵜ ⵏ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙ ⴳ ⵓⵣⵎⵣ ⵏ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ.
ⵉⴷⴷⴰ ⴷ ⵎⴰⵢⴰ ⵏⵏ ⴳ ⵢⴰⵜ ⵜⴳⵓⵔⵉ ⵜⵙⵎⵏⵉⴷ ⵜⵜ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⵏ ⵓⵎⵢⴰⵡⴰⴹ ⵏⵏⵉ ⵜⵙⵏⵎⴰⵍⴰ ⵜⵎⴰⵡⴰⵙⵜ ⵏ ⵜⵣⵔⴼⵜ ⴰⵙⵙ ⵏ ⵓⵢⵏⴰⵙ 2 ⵉⵏⵏⴰⵢⵔ 2023 ⴳ ⵕⵕⴱⴰⵟ ⵅⴼ ⵓⵙⵙⵏⵜⵉ ⴰⵎⴰⴷⴷⵓⴷ ⵏ ⵓⵣⵣⴳⵉⵔ ⵏ ⵓⵎⵕⵚⵓⵎ ⵉⵣⴷⵉⵏ ⵙ ⵜⵎⵙⴰⴷⵓⵔⵜ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ ⴷ ⵓⵎⵥⵉⵢⵏ ⵉⵜⵜⵡⴰⵃⴹⴰⵡⵏ, ⵜⵙⵉⵙⴼⵉⵡ ⵎⴰⵙ ⵉⴳⴰ ⵉⵎⵔⵙⵉ ⵏ ⵜⵎⵙⴰⴷⵓⵔⵜ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴷⴷⴰⵡ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⵏⵉⵖ ⵜⵉⴹⴰⴼ "ⵓⵔ ⵉⴳⵉ ⴰⵙⴳⵓⵎ ⴰⵜⵉⵇⵏⵉ ⴷ ⵜⵎⴳⴳⵉⵜ ⵜⴰⵔⵓⵏⵣⵉⵍⵜ ⵎⴰⵛ ⵜⴳⴰ ⵜⴰⵎⵀⵍⵜ ⵉⵎⵎⴰⵍⵏ ⴰⵙⵡⵉⵔ ⵏ ⵓⵙⵓⵖⵍ ⵏ ⵉⵡⴰⵏⴽⵏ ⵉ ⵜⵎⵔⵉⵙⵉⵏ ⵏⵏⵙⵏ ⴱⴰⵀⵔⴰ ⴳⴰⵏⵉⵏ ⵜⵉⵏⴼⴳⴰⵏⵉⵏ ⴷ ⵜⵣⵔⴼⴰⵏⵉⵏ".ⵜⴰⵎⵙⴰⴷⵓⵔⵜ, ⵅⴼ ⵉⴳⴳⵉ ⵏ ⵎⴰⵙ ⵜⴳⴰ ⴰⵣⵔⴼ ⵙⴳ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵓⴼⴳⴰⵏ, ⵎⴰⵛ ⵉⴳⴰ ⴳ ⵜⵉⵍⵍⴰⵡⵜ ⵜⴰⴼⴰⴷⴰ ⵉ ⵓⵡⵇⵇⵔ ⵏ ⵓⴱⵓⵔⵣ ⴰⵏⴼⴳⴰⵏ ⵎⴽⵏⵏⴰ ⴰⴽⴽⵯ ⴳⴰⵏⵜ ⵜⵎⵙⵓⵜⴰⵍ ⴷ ⵉⵎⵊⵕⵉⵜⵏ".
ⴳ ⵓⵙⴰⵜⵉ ⵏ ⵓⵙⵙⴽⵜⵉ ⵏⵏⵙ ⵙ ⵓⵙⵏⵓⴱⴳ ⵏ ⵓⵙⵇⵇⵉⵎ ⵙ ⵜⵙⵖⵣⵏⵜ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ, ⴳ ⵓⵙⵇⵇⵉⵎ ⵏⵏⵙ ⵏⵏⵉ ⵉⵜⵜⵓⵙⵏⵎⴰⵍⴰⵏ ⴳ ⵉⴱⵔⵉⵔ ⴰⵎⴳⴳⴰⵔⵓ, ⴰⵙⵖⵏⵓ ⵏ ⵓⵎⵕⵚⵓⵎ ⵅⴼ ⵓⵙⵡⵓⵜⵜⵓ ⵏ ⵉⵍⵓⴳⵏⵏ ⵏ ⵓⵏⴰⴳⵔⴰⵡ ⵏ ⵜⵎⵙⴰⴷⵓⵔⵜ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⴷ ⵓⵎⵥⵉⵢⵏ ⵉⵍⵍⴰⵏ ⴳ ⵉⵙⵡⵓⴷⴷⵓⵜⵏ ⵏ ⵜⵃⴹⵉ ⴳ ⵉⵙⴰⵢⵔⴰⵔⵏ ⵏ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴷ ⵍⴱⵓⵍⵉⵙ ⴷ ⵜⵎⴰⵎⴽⵉⵏ ⵏ ⵓⵙⵎⵏⵉⴷ ⵏ ⵜⵉⵔⴰⵎ ⵜⵉⵎⵙⴰⴷⵓⵔⵉⵏ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴼⴰⵡ ⵡⴰⴷⴷⵓⵔ ⵏ ⵓⵎⵕⵚⵓⵎ ⴰⵡⴷ ⴳ "ⵓⵙⵎⴰⴷ ⵏ ⵓⵙⵎⵙⴰⵙⴰ ⵏ ⵉⵙⴱⴷⴰⴷⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴰⴽⴷ ⵎⴰⴷ ⴷ ⵢⵓⵡⵉ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵏ ⵜⵖⵔⴰⵔⵜ ⵜⴰⵣⵔⴼⴰⵏⵜ ⵜⴰⵎⴰⴷⵓⵙⵜ ⵉⵙⴷⵓⵙⵏ ⵜⵉⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⵏⵏⵉ ⵉⵙⵙⵓⵊⴰⴷⵏ ⵜⵉⴼⴰⴷⵉⵡⵉⵏ ⵜⵉⵏⴼⴳⴰⵏⵉⵏ ⴳ ⵓⵙⴱⴷⴷⵉ ⴷ ⵜⴼⵔⴽⵜ ⵏ ⴷⴰⵜ ⴰⵎⵚⵉⵕⵉⴹ".
ⴳ ⵓⵎⵏⴰⴹ ⴰⴷ ⵏⵉⵜ, ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵙⵡⵏⵏⵉ ⵓⵙⵇⵇⵉⵎ, ⴳ ⵉⵙⴳⴳⵯⴰⵙⵏ ⵏⵏⵉ ⵉⵣⵔⵉⵏ, ⵅⴼ ⵓⵏⵣⴳⵓⵎ ⵏⵏⵙ ⵅⴼ ⵉⵏⵎⵔⴰⵏ ⵏⵏⵉ ⵜⵜⴷⵔⵏ ⵉⵎⴼⴰⵜⵜⵓⵢⵏ ⵙⴳ ⵜⴷⵔⴼⵉ ⵏⵏⵙⵏ ⴳ ⵓⵙⴱⵖⵔ ⵙ ⵓⵣⵔⴼ ⴰⴷ, ⵉⵙⵙⴰⵎⵓ ⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵉⵙⴳⴳⵯⴰⵙⵏ ⵏ 2020 ⴷ 2021 ⵉⵙⵖⵍⴰⴼ ⵅⴼ "ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵎⵚⵕⴰⵢ ⵏ ⵜⵏⴼⵔⵓⵜ", ⵏⵏⵉ ⴷ ⵉⵙⵙⴰⴼⵖ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ (ⵉⵍⵍⴰⵏ ⴳ ⵓⵙⵇⵇⵉⵎ), ⴹⴰⵕⴰⵜ ⵉⵔⵣⴰⴼⵏ ⵏⵏⵉ ⵉⴳⴰ ⵙ ⴽⵉⴳⴰⵏ ⵏ ⵡⴰⵎⵎⴰⵙⵏ ⴹⴼⵕⵏⵉⵏ ⵉ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ.
ⵎⴽⴷⴰ ⵜⵙⴷⴷⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵎⴰⵙ ⵢⵓⵊⴷ ⵓⵙⵇⵇⵉⵎ ⵉ ⵜⴰⵎⵓⵏⵜ ⴰⴽⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉ ⵓⵙⵎⵀⵍ ⵏ ⵓⵎⵕⵚⵓⵎ ⴰⴷ ⵙ ⵎⴰⴷ ⵉⵜⵜⵏⴼⵔⵓⵏ ⵜⵉⵙⵏⵙⵉ ⴷ ⵢⵓⵙⴰⵏ ⵉ ⵉⴹⵕⵉⵚⵏ ⵓⵣⵔⵉⴼⵏ ⵉⵏⴰⵎⵓⵔⵏ ⴳ ⵜⵎⴰⵣⵉⵔⵜ ⵏⵏⵖ ⴷ ⵉⵎⵏⵣⴰⵢⵏ ⴷ ⵉⵍⵓⴳⴰⵏⵏ ⵉⵜⵜⵢⴰⵔⴰⵏ ⴳ : ⵜⵎⵜⵜⴰ 11, ⵜⴰⵙⴷⴷⴰⵔⵜ 2 ⵏ ⵓⵎⵉⵔⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ, ⵏⵏⵉ ⵉⵇⵔⵔⴰⵏ ⵙ ⵓⵣⵔⴼ ⴰⴷⵙⵍⴰⵏ ⵏ ⴽⵓ ⵓⴼⵔⵉⴷ ⴳ ⵜⵓⴽⴽⵙⴰ ⵏ ⵍⴰⵥ; ⵉⵍⵓⴳⴰⵏⵏ ⵏ ⵜⵎⵜⵜⴰ ⵉⵎⵓⵏⵏ ⵉⵎⴷⵢⴰⵜⵏ ⵓⵣⴷⵉⵔⵏ ⵏ ⵓⵎⵓⴳⴳⵓ ⵏ ⵉⵎⵖⵣⵓⵜⵏ ⵜⵜⵡⴰⵙⵙⵏⵏⵉⵏ ⵙ ⵉⵍⵓⴳⴰⵏⵏ ⵏ ⵏⵉⵍⵙⵓⵏ ⵎⴰⵏⴷⵉⵍⵍⴰ; ⴰⵙⵔⵓⵙ ⵏ ⵜⴱⵔⵉⴷⵉⵏ ⴷ ⵜⵎⴳⴳⵉⵜⵉⵏ ⵏ ⵜⵙⵏⵙⵉ ⵉ ⵓⵎⵕⵚⵓⵎ ⵙ ⵓⵎⵙⴰⵙⴰ ⴰⴽⴷ ⵓⵎⴰⴳⵔⴰⴷ 23 ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏⵏⵉ ⵉⵙⴷⴷⵉⴷⵏ ⵅⴼ ⵓⴼⵊⵊⵉⵊ ⵏ ⴽⵓ ⵓⴳⴳⵉⴷ ⵉⵜⵜⵡⴰⵎⴰⵥⵏ ⵙ ⵉⵣⵔⴼⴰⵏ ⵉⴷⵙⵍⴰⵏⵏ ⴷ ⵜⵎⵙⵓⵜⴰⵍ ⵏ ⵡⴰⵎⵎⴰⵥ ⵜⵉⵏⴼⴳⴰⵏⵉⵏ; ⴷ ⵉⵍⵎⵎⴰ ⵜⵓⴳⵔⵉⵡⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵍⵓⴳⴰⵏⵏ ⵏ ⵜⵎⵙⴽⵉⵔⵜ ⵏ ⵉⵎⵙⵖⴰⵏⵏ ⵏⵏⵖⵍⴼⵏⵉⵏ ⵙ ⵓⵣⵣⴳⵉⵔ ⵏ ⵉⵙⵍⴳⵏⵏ.
ⵉⵏⵏⴰ ⵎⴰⵙⵙ ⵍⵃⴰⵙⴰⵏ ⴷⴷⴰⴽⵉ, ⴰⴳⵏⵙⴰⵙ ⴰⵎⴰⵜⴰⵢ ⵏ ⵓⴳⵍⵍⵉⴷ ⵖ ⴷⴰⵔ ⵜⵙⵏⴱⴹⴰⵢⵜ ⵏ ⵜⵕⵓⵥⵉ, ⴰⵏⵙⵙⵉⵅⴼ ⵏ ⵜⵎⵓⵔⴰⵢⵜ, ⵎⴰⵙ ⵉⴳⴰ ⵓⵣⵣⵓⴳⵣ ⵏ ⵉⴱⴹⵉⵢⵏ ⵏ ⵓⵎⵕⵚⵓⵎ ⵉⴳⴰⵏ "ⵜⴰⵙⵓⵔⵉⴼⵜ ⵜⴰⵎⵏⴰⵡⴰⵢⵜ ⴷ ⵜⵏⴹⵡⴰ ⵜⴰⵣⵔⴼⴰⵏⵜ ⵜⴰⴽⵙⵡⴰⵜ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵜⵓⴳⵜ ⵏ ⵉⵣⵔⴼⴰⵏ ⵏⵏⵉ ⴷ ⵉⴷⴷⴰⵏ ⴳ ⵉⵙⴱⴷⴰⴷⵏ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⴷ ⵓⵎⵥⵉⵢⵏ ⵉⵜⵜⵡⴰⵃⴹⴰⵡⵏ", ⵉⵔⵏⵓ ⵎⴰⵙ ⵉⴳⴰ ⵓⵙⵖⵏⵓ ⴰⵙⵓⵜⵔ ⴰⵎⵇⵇⵔⴰⵏ ⵉ ⵡⴰⵏⵏⴰⵍ ⵏ ⵉⵎⴰⵙⵙⵏ ⵏ ⵓⵣⵣⵓⴳⵣ ⵏ ⵓⵙⴳⴳⴷ ⵏ ⵓⵏⴰⴳⵔⴰⵡ ⵓⵍⴳⵉⵏ, ⵏⵏⵉ ⵢⴰⵎⵓⵏ ⴳ ⵓⵙⴷⵓⵙ ⵏ ⵢⴰⵏ ⵙⴳ ⵉⴳⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵏ ⵉⴳⴰⵏ ⴷ ⵉⵣⵔⴼⴰⵏ ⵏ ⵡⵉⴷⴰ ⵉⵜⵜⵓⵙⴱⴷⴷⴰⵏ ⵙ ⵡⴰⵙⵙⴰⵖ ⵏ ⵓⵙⵍⴳⵏ ⵉⴷⴷⵖ ⴷⵉⴷⵙ ⵎⵎⵏⵣⵖⵏ, ⴳ ⵜⵉⵣⵉ ⵏ ⵓⵔⵣⵣⵓ ⴷⵉⴷⵙⵏ ⵉⴷⴷⵖ ⵉⵜⵜⵓⴷⵎⴰ ⵎⴰⵙ ⵙⴽⵔⵏ ⵉⴳⵉⵜⵏ ⵉⵏⴱⴽⴰⴹⵏ".
ⵙⴳ ⵜⵙⴳⴰ ⵏⵏⵙ, ⵢⵓⵍⵍⵖ ⵓⵎⴰⵡⴰⵙ ⵏ ⵜⵣⵔⴼⵜ, ⵎⴰⵙⵙ ⵄⴱⴷ ⵍⵍⴰⵟⵉⴼ ⵡⵀⴱⵉ, ⵙ ⵓⵙⵙⵓⴼⵖ ⵏ ⵓⵎⵕⵚⵓⵎ ⵉⵣⴷⵉⵏ ⵙ ⵉⵍⵓⴳⴰⵏⵏ ⵏ ⵓⵏⴰⴳⵔⴰⵡ ⵏ ⵜⵎⵙⴰⴷⵓⵔⵜ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⴷ ⵓⵎⵥⵉⵢⵏ ⵉⵜⵜⵡⴰⵃⴹⴰⵡⵏ ⴷ ⵜⵎⴰⵎⴽⵉⵏ ⵏ ⵓⵙⵎⵏⵉⴷ ⵏ ⵜⵉⵔⴰⵎ ⵜⵉⵎⵙⴰⴷⵓⵔⵉⵏ ⴳ ⵜⵉⵍⵍⴰⵡⵜ, ⵉⵙⴷⴷⵉⴷ ⵎⴰⵙ ⵉⴽⴽⴰ ⵉⴳⴰ ⴷⴰⵔⵙ ⵓⵙⵖⵏⵓ ⴰⴷ ⵜⴰⵡⴰⵔⴳⵉⵜ, ⵖⵉⵍⴰⴷ ⵉⴳⴰ ⵏⵉⵜ ⵜⵉⵍⵍⴰⵡⵜ. ⵢⵉⵏⵉ ⵎⴰⵙ ⴰⵖ ⴷ ⵉⵇⵇⴰⵏ ⴰⴷ ⵏⴱⵓⵔⵣ ⵙ ⵜⵎⴰⵣⵉⵔⵜ ⵏⵏⵖ ⵉⴷⴷⵖ ⵜⵍⵍⴰ ⵜⴰⵡⵉⵜ ⴳ ⵓⵏⵎⵓⵔⵉ ⴰⵏⴰⵎⵓⵥ, ⵏⵏⵉ ⵉⵣⴷⴷⵉⴳ (ⴷ ⵓⴷⵔⵉⵡⵛ) ⴰⵔⴷ ⵜⵉⵍⵉ ⵜⵉⵍⴰⵡⵜ ⵏ ⵓⵏⴽⴰⴹ ⵏⵏⵙ, ⵉⵇⵇⴰⵏ ⴰⵖ ⴷ, ⵏⴽⴽⵯⵏⵉ ⵏⵏⵉ ⵉⴳⴰⵏ ⴰⵡⴰⵏⴽ, ⴰⴷ ⴰⵙ ⵏⵙⵙⵓⵊⴷ ⵓⵜⵛⵉ".
ⵉ ⵓⵙⵙⴽⵜⵉ, ⵜⴽⴽⴰ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵜⵙⵖⵣⵏ ⴳ ⵡⴰⵢⵢⵓⵔ ⵏ ⵉⴱⵔⵉⵔ ⵏ ⵓⵙⴳⴳⵯⴰⵙ ⴰⴷ ⵉⵣⵔⵉⵏ ⴰⵙⵖⵏⵓ ⵏ ⵓⵎⵕⵚⵓⵎ ⵓⵟⵟⵓⵏ 2.22.222 ⵉⵣⴷⵉⵏ ⵙ ⵓⵙⵡⵓⵜⵜⵓ ⵏ ⵉⵍⵓⴳⴰⵏⵏ ⵏ ⵓⵏⴳⵔⴰⵡ ⵏ ⵜⵎⵙⴰⴷⵓⵔⵜ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵜⵏⵎⴰⵜⴰⵔⵜ ⵜⵉⵎⵉⵥⵉⵕⵜ ⴷ ⵓⵎⵥⵉⵢⵏ ⵉⵜⵜⵡⴰⵃⴹⴰⵡⵏ ⴷ ⵜⵎⴰⵎⴽⵉⵏ ⵏ ⵓⵙⵎⵏⵉⴷ ⵏ ⵜⵉⵔⴰⵎ ⵜⵉⵎⵙⴰⴷⵓⵔⵉⵏ, ⵙ ⵓⵣⵣⵓⴳⵣ ⵏ ⵉⴱⴹⵉⵢⵏ ⵏ ⵓⵙⵍⴳⵏ ⵓⵟⵟⵓⵏ 22-01 ⵉⵣⴷⵉⵏ ⵙ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴳ ⵜⵎⵜⵜⴰⵡⵉⵏ ⵏⵏⵙ 66 ⴷ 460.
