ⵜⴻⵜⵜⵓⵙⵎⴰⵢⵏⵓ ⵜⵙⵖⵣⵏⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵎⵉⵍ (ⴰ) ⴷ ⵜⵉⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵙⵉⵎⴰⵏⵜ ⵉⵎⵙⴰⵙⴰⵏ ⵙ ⵜⵡⵉⵍⴰ ⵉⵙⵎⴷⵏ ⴰⴽⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵉⵙⵏⵎⴰⵍⴰⵏ ⵜⴰⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⵡⴰⵙⵙⴰⵏⵏ ⵙ ⵉⵎⵏⵣⴰⵢⵏ ⵏ ⴱⴰⵔⵉⵙ, ⵏⵏⵉ ⵙ ⵜⵍⵍⴰ ⵜⵡⵓⵔⵉ ⵙ ⵓⵎⵙⴰⵙⴰ ⴰⴽⴷ ⵜⵖⵜⴰⵙⵜ ⵏⵏⵉ ⴷ ⵉⵙⵙⴰⴼⵖ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⴰⵙⴳⴳⵯⴰⵙ ⵏ 1993. ⵜⴽⴽⴰ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵜⵙⵖⵣⵏⵜ, ⵏⵏⵉ ⵎⵉ ⵜⵜⴳⴳⴰ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⵜⵉⵎⵉⵔⵉⵜ ⵏⵏⵙ, ⵜⴼⵙⵔ ⵜⴰⵡⵓⵔⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵓⵜⵍⵜ ⵏⵏⵙ ⵉⵜⵜⵓⵙⵏⵎⴰⵍⴰⵏ ⵉⵏⴳⵔ 20 ⴷ 24 ⵎⴰⵕⵚ 2023, ⴰⴽⴷ ⵢⴰⵏ ⵓⴽⴰⴱⴰⵕ ⵏ ⵓⵙⵇⵇⵉⵎ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵏⵏⵉ ⵖ ⵉⵙⵎⵏⵉⴷ ⴰⵙⴰⵜⵉ ⵓⵍⴳⵉⵏ ⵉⵙⵏⵎⴰⵍⴰⵏ ⴰⵙⵇⵇⵉⵎ ⴷ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏⵏⵙ ⴷ ⵜⵉⵍⴰⵍ ⵏ ⵓⵙⵇⵇⵉⵎ ⴳ ⴰⵎⵓⵏⵜ ⴰⵡⴷ ⵜⵉⵍⴰⵍ ⵏ ⵉⵎⴰⵙⵙⵏ ⵏⵏⵙ ⵉⵏⴰⵎⵓⵔⵏ ⴷ ⵜⵙⵏⵜⴰⵢⵉⵏ ⵏⵏⵙ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙ ⴷ ⵡⴰⵔⴰⵢ ⵙⴳ ⵜⵕⵥⵉⵢⵉⵏ ⵏⵏⵉ ⵜⵏ ⵉⵜⵜⴰⵡⴹⵏ, ⴷ ⵓⵙⵙⵓⴷⵙ ⴰⵎⵙⵙⵓⴳⵓⵔ ⴳ ⵓⵙⵡⵉⵔ ⴰⵏⴰⵎⵎⴰⵙ ⴷ ⵓⵏⵎⵏⴰⴹ ⴷ ⵉⵎⵢⴰⵖⵏ ⵏⵏⵙ ⴰⴽⴷ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ. ⵜⴰⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵜⵙⵖⵣⵏⵜ ⴷ ⵢⴰⵏ ⵙⴳ ⵉⵏⴳⵎⴰⵎⵏ ⵉⴷⵙⵍⴰⵏⵏ ⵉⴹⴼⵕⵏ ⵉ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⵜⵜⵖⵜⴰⵙⵏ ⴳ ⵜⵓⵜⵜⵔⵉⵡⵉⵏ ⵏ ⵜⵙⵖⵣⵏⵜ ⴷ ⵓⵙⵎⴰⵢⵏⵓ ⵏ ⵜⵙⵖⵣⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ ⵙ ⵓⵙⵔⵙ ⵏ ⵉⵥⵕⵉ ⵅⴼ ⵓⵙⵡⵉⵔ ⵏ ⵓⵎⵙⴰⵙⴰ ⵏ ⵜⵎⵔⵙⴰⵍ ⵉ ⵉⵎⵏⵣⴰⵢⵏ ⵏ ⴱⴰⵔⵉⵙ. ⵜⵙⴽⵔ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵙ ⵓⵎⵙⴰⵙⴰ ⵏ ⵓⵙⵍⴳⵏ ⵏ ⵓⵙⵇⵇⵉⵎ ⴰⴽⴷ ⵉⵎⵏⵣⴰⵢⵏ ⵏ ⴱⴰⵔⵉⵙ ⵏⵏⵉ ⵅⴼ ⵉⵜⵜⵓⴳⴰ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵉⵎⵉⵙ ⴰⵏⴰⵎⵓⵔ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ. ⵉ ⵓⵙⴽⵜⵉ, ⴰⵎⵓⵏ ⴳ ⵉⵎⵏⵣⴰⵢⵏ ⵏ ⴱⴰⵔⵉⵙ ⵜⵓⴳⵜ ⵏ ⵉⵎⵏⵣⴰⵢⵏ ⵉⵏⵉⵍⴰⵏⵏ ⵉⵣⴷⵉⵏ ⵙ ⵓⵙⵓⵔⵙ ⴰⵍⵓⴳⴰⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵎⴰⴷ ⵉⵜⵜⵏⴼⵔⵓⵏ ⵜⴰⵏⵙⵉⵎⴰⵏⵜ ⵏⵏⵙⵏⵜ ⴷ ⵉⴳⵉ ⵏ ⵜⵥⵍⴰⵢⵉⵏ ⵏⵏⵙⵏⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴷ ⵜⵏⴼⵔⵓⵜ ⵏ ⵓⵎⵢⴰⵏⴰⵡ ⴳ ⵜⵓⵚⴽⵉⵡⵜ ⵏⵏⵙⵏⵜ, ⴷ ⵜⵉⵍⵉⵜ ⵏ ⵉⵙⵓⴳⴰⵎ ⵉⵥⵕⴼⴰⵏⵏ ⴷ ⵉⵏⴰⴼⴳⴰⵏⵏ ⵉⵜⵜⵓⵙⵓⵖⵏⵏ ⵃⵎⴰ ⴰⴷ ⴳⵏⵜ ⵜⵉⵙⵎⵉⴳⴰⵍ ⵏⵏⵙⵏⵜ. ⴰⵔ ⵉⵜⵜⴱⵔⵔⴰⴽ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⵓⵜⴳ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵜⵙⵖⵣⵏⵜ ⵅⴼ ⵜⵏⵙⵉⵎⴰⵏⵜ ⵏ ⵜⴽⵛⵛⵓⵎⵉⵏ ⵏⵏⵙ ⴷ ⵜⵕⵡⵉ ⵏⵏⵙ ⴳ ⵜⵎⵙⴽⵔⵜ ⵏ ⵜⵙⵎⵉⴳⴰⵍ ⵏⵏⵙ ⵉⵣⴷⵉⵏ ⵙ ⵡⴰⵔⴰⵢ ⵉ ⵜⵕⵥⵉⵢⵉⵏ ⴷ ⵓⴼⵔⴰⴳ ⵏ ⵓⵏⴳⵉⵙⵏ ⴷ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ.