ⵙ ⵓⵎⵙⴰⵙⴰ ⴰⴽⴷ ⵉⴱⴹⵉⵢⵏ ⵏ ⵓⵙⵍⴳⵏ ⵓⵟⵟⵓⵏ 76.15 ⵣⴷⵉⵏⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⵙⴱⴷⴰⴷⵏ ⵏ ⵓⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ, ⵉⵙⵏⵎⴰⵍⴰ ⵓⵙⵉⵔⴰ ⵏ ⵓⵙⵇⵇⵉⵎ ⵜⴰⵙⵎⵓⵏⵉ ⵏⵏⵙ ⵜⴰⵢⵢⵓⵔⴰⵏⵜ ⵜⵓⵏⵣⵉⵍⵜ ⴳ 01 ⵢⵓⵏⵢⵓ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵙ ⵓⵙⵡⵓⴷⴷⵓ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏⵏⴰ ⵜⵙⵙⵉⵔⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵙ ⵓⵎⵙⴰⵙⴰ ⴰⴽⴷ ⵜⵎⵎⴰ 49 ⵏ ⵓⵙⵍⴳⵏ ⴷ ⵜⵎⵜⵜⴰ 15 ⵏ ⵓⵏⴳⵔⴰⵡ ⴰⴳⵯⵏⵙⴰⵏ. ⵉⵙⵙⵉⵜⴳ ⵓⵙⵉⵔⴰ ⴳ ⵜⵣⵡⵉⵔⵉ ⵏ ⵜⵙⵎⵓⵏⵉ ⵙ ⵜⵥⵕⵉⴳⵜ ⵏ ⵓⵙⵇⵇⵉⵎ ⵉ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵏ 2021 ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⴰⴷ, ⴷ ⵓⵃⵟⵟⵓ ⵏⵏⵙ ⵉ ⵜⵣⵎⵣⴰⵏⵜ ⵏⵏⵙ, ⴷ ⵜⴰⵏⴰⴹⵜ ⵏⵏⵙ ⵅⴼ ⵓⵣⵔⴼ ⴳ ⵜⴷⵓⵙⵉ. ⵉⵙⵙⵉⵜⴳ ⵓⵙⵉⵔⴰ ⴰⵡⴷ ⵜⴰⵙⵓⵍⵜ ⵏ ⵓⵎⵢⴰⵖ ⵏ ⵓⵙⵇⵇⵉⵎ ⴰⴽⴷ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵇⴰⵃ ⵉⵎⵙⵡⵓⵔⵉⵢⵏ ⵣⵓⴳⵏⵉⵏ ⴷ ⵉⴼⵔⴷⵉⵢⵏ ⵏ ⵜⵡⵊⵉⵡⵉⵏ ⵏⵏⵙⵏ ⵙ ⵜⴷⵔⴰⵡⵜ ⵕⵡⴰⵏⵉⵏ ⵏ ⵓⵙⵇⵇⵉⵎ ⴳ ⵓⵙⵎⵏⵉⴷ ⴰⴳⵔⴰⵖⵍⴰⵏ ⵉ ⵜⵎⵣⵡⴰⴳⵜ, ⴷ ⵙ ⵉⵏⵎⵓⵇⵇⴰⵔⵏ ⵉⵎⴰⵙⵙⴰⵏⵏ ⵉⵜⵜⵓⵙⵏⵎⴰⵍⴰⵏ ⵙ ⵜⵎⴷⵔⴰⵡⵜ ⴰⴽⴷ ⵜⵙⴷⴰⵡⵉⵢⵉⵏ ⵏ ⵉⴱⵏ ⵣⵓⵀⵕ ⴷ ⵎⵓⵃⵎⵎⴰⴷ ⴰⵎⵣⵡⴰⵔⵓ ⵅⴼ ⵜⵎⵣⵡⴰⴳⵜ ⴷ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴳ ⵜⵙⵔⴰⵜⵢ ⵜⵉⴳⴷⵓⴷⴰⵏⵉⵏ ⴷ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ. ⵉⵙⵎⵏⵉⴷ ⵓⵙⵉⵔⴰ ⴰⵣⵣⴳⵉⵔ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵜⴰⵙⴳⵯⵙⴰⵏⵜ ⵏ 2022 ⵏ ⵓⵙⵇⵇⵉⵎ ⴷ ⵉⵖⴰⵡⴰⵙⵏ ⵏ ⵜⵓⴳⵜ ⵉⵏⴳⵎⴰⵎⵏ ⵏ ⵓⵙⵇⵇⵉⵎ, ⵉⴷⵉⵡⵍ ⵅⴼ ⵜⵓⴳⵜ ⵏ ⵉⵎⵓⵙⵙⵓⵜⵏ ⵉⵜⵜⵓⵙⵖⵉⵡⵙⵏ ⴳ ⵡⴰⵢⵢⵓⵔ ⵏ ⵢⵓⵏⵢⵓ ⴰⵎ ⵜⴰⴷⵔⴰⵡⵜ ⵏ ⵓⵙⵇⵇⵉⵎ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⵙ ⵢⴰⵏ ⵓⵖⴰⵡⴰⵙ ⴰⵏⴱⵖⵓⵔ ⴷ ⵓⵎⵢⴰⵏⴰⵡ ⵏⵏⴰ ⵖ ⵔⴰⴷ ⴷⵔⵓⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⵏⴳⵎⴰⵎⵏ ⵏⵏⵙ. ⵎⴽⴷⴰ ⵎⴹⴰⴽⴰⵕⵏ, ⵙⵖⵣⵏⵏ ⵉⴳⵎⴰⵎⵏ ⵏ ⵓⵙⵉⵔⴰ, ⴳ ⵜⴳⵉⵔⴰ ⵏ ⵜⵙⵎⵓⵏⵉ, ⵅⴼ ⵓⵙⵖⵏⵓ ⵏ ⵜⵎⵙⴰⵙⵜⵍⵜ ⵏ ⵓⵙⵇⵇⵉⵎ ⵏ ⵓⵙⴳⴳⵯⴰⵙ 2023 ⴳ ⵓⵎⵏⵉⴷ ⵏ ⵓⵙⵎⵏⵉⴷ ⵏⵏⵙ ⵅⴼ ⵜⵙⵓⵜⵍⵜ ⵜⴰⵎⴹⴼⴰⵕⵜ ⵏ ⵓⴳⵔⴰⵡ ⴰⵎⴰⵜⴰⵢ.