ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵎⴷⵔⴰⵡⵜ ⴰⴽⴷ ⵜⴼⵏⵉⵇⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵎⵣⴷⴰⵖⵏ, ⵜⴰⵙⵓⵜⵍⵜ ⵏ ⵓⵙⵎⵓⵜⵜⴳ ⵜⵉⵙ ⴽⵕⴰⴹⵜ ⵅⴼ "ⵜⴰⴷⵔⴰⵡⵜ ⵏ ⵉⵄⵔⵔⵉⵎⵏ ⴳ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ: ⵉⵎⵊⵕⵉⵜⵏ ⵏ ⵜⴳⵉⵡⵉⵔⵉⵏ ⵜⵉⵎⵣⵡⵓⵔⴰ" ⵓⵙⵙⴰⵏ ⵏ 25 ⴷ 26 ⵖⵓⵛⵜ 2022 ⴳ ⵓⵙⵖⵉⵎ ⵏ ⵕⵕⴱⴰⵟ. ⵜⴰⵎⵓ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⴳ ⵓⵙⴰⵜⵉ ⵏ ⵓⵙⵙⵓⵊⴷ ⵉ ⵜⴷⵔⴰⵡⵜ ⴳ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⵏⵏⴰ ⵔⴰⴷ ⵉⵜⵜⵓⵙⵏⵎⴰⵍⴰ ⴰⵙⵙ ⵏ 8 ⵏⵓⵡⴰⵏⴱⵉⵔ 2022 ⴳ ⵊⵓⵏⵉⴼ. ⴰⵡⵜⵜⴰⵙ ⵏ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⴳ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⵉⵎⵙⵜⴰⵏⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵡⵙⵙⵏⴰ ⵏ ⵉⵎⵊⵕⵉⵜⵏ ⵏ ⵜⴳⵉⵡⵉⵔⵉⵏ ⵜⵉⵎⵣⵡⵓⵔⴰ ⴷ ⵉⵡⵜⵜⴰⵙ ⵏⵏⵙⵏⵜ ⴷ ⵉⵎⴰⵙⵙⵏ ⴷ ⵜⵉⵜⵉⵇⵏⵉⵢⵉⵏ ⵏ ⵓⵏⵄⴰⵕ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷ ⵓⵍⴰ ⵡⴰⵎⵎⴰⵥ ⵏ ⵜⵓⵙⴽⵉⵡⵉⵏ ⵏ ⵓⵎⴷⴰⵢ ⴷ ⵜⵖⴱⵉ ⵏ ⵜⵓⵙⵙⵏⴰ ⵅⴼ ⵉⵍⵓⴳⵏⵏ ⵉⴳⵔⴰⵖⵍⴰⵏⵏ, ⵅⴼ ⵉⴳⴳⵉ ⵏ ⵜⵓⴳⵜ ⵏ ⵉⵍⵓⵖⵎⴰ ⵓⵙⵏⵉⵙⵏ. ⵜⵙⵙⵓⵜⵍ ⵜⵙⵓⵜⵍⵜ ⴰⴷ ⵏ ⵓⵙⵎⵓⵜⵜⴳ ⵅⴼ ⵜⴳⵔⵓⵎⵎⴰ ⵏ ⵉⵙⴳⵓⵎⵏ ⴷ ⵢⵓⵡⵉⵏ ⵙ ⵓⵎⴰⵜⴰ ⵅⴼ: "ⵉⵎⵊⵕⵉⵜⵏ ⵏ ⵜⴳⵉⵡⵉⵔⵉⵏ ⵜⵉⵎⵣⵡⵓⵔⴰ", "ⵜⵉⵍⴰⵍⵜ ⵏ ⵡⴰⵎⵓⵏ ⵓⵖⵔⵉⵎ ⴳ ⵎⴰⴷ ⵉⵥⵍⵉⵏ ⵙ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ", "ⴰⵙⴽⵜⵉ ⵙ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ", "ⵜⵉⵔⵔⴰ ⴷ ⵓⵙⵖⵣⵏ ⵏ ⵜⴽⴰⵕⴹⵉⵡⵉⵏ ⵏ ⵓⵏⵄⴰⵕ", "ⵜⴰⵙⴰⵡⵔⵜ ⵏ ⵜⴰⵡⴰⵢⵜ : ⵜⵉⴳⵉⵡⵉⵔⵉⵏ ⵜⵉⵎⵣⵡⵓⵔⴰ ⵏ ⵜⵙⵓⵜⵍⵜ 41 ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⵅⴼ ⵓⵙⴳⵓⵎ ⵏ ⵉⵣⵔⴼⴰⵏ ⵉⵡⵏⴹⴰⵏⵏ, ⵉⵣⵔⴼⴰⵏ ⵉⵎⵓⵟⵟⵓⵏⵏ ⴷ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⵡⵙⵙⴰⵔⵏ". ⵉ ⵜⵎⴽⵜⵉⵢⵜ, ⵜⵉⵙⵓⵜⴰⵍ ⵏ ⵓⵙⵎⵓⵜⵜⴳ ⵜⵉⵎⵣⵡⵓⵔⴰ ⵓⵡⵙⵏⵜ ⵉ ⵜⴳⵔⵓⵎⵎⴰ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⵏⵏⴰ ⴷ ⵉⴷⴷⴰⵏ ⵙⴳ ⵎⴰⵕⵕⴰ ⵜⵎⵏⴰⴹⵉⵏ ⵏ ⵍⵎⵖⵔⵉⴱ ⵃⵎⴰ ⴰⴷ ⵙⴷⵓⵙⵏ ⵜⵉⵣⵎⵎⴰⵔ ⵏⵏⵙⵏ ⴷ ⵜⵓⵙⵙⵏⴰ ⵏⵏⵙⵏ ⵣⴷⵉⵏⵉⵏ ⵙ ⵜⵎⵀⵍⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⴷ ⵜⵉⵍⴰⵍⵉⵏ ⵏ ⵜⵓⴳⵜ ⵏ ⵉⵎⴳⴳⴰⵢⵏ ⴳ ⵓⴹⴼⴼⵓⵕ ⵏ ⵓⵙⵎⵀⵍ ⵏ ⵉⵍⵓⴳⵏⵏ ⵉⴳⵔⴰⵖⵍⴰⵏⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ. ⴹⴰⵕⴰⵜ ⵜⵉⵙⵓⵜⴰⵍ ⴰⴷ ⵏ ⵓⵙⵎⵓⵜⵜⴳ, ⵏⵎⴰⵍⴰⵏ ⵉⵄⵔⵔⵉⵎⵏ ⴰⴷ ⴳ ⵓⵙⴰⵜⵉ ⵏ ⵢⴰⵏ ⵓⵥⵟⵟⴰ ⵢⵓⵙⵉⵏ ⵙ ⵡⴰⵙⵙⴰⵖ "ⵜⴰⵎⵓⵏⵜ ⵜⴰⵎⵙⵎⵓⵏⵜ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵙⵎⵏⵉⴷⵏ ⵙ ⵡⴰⵙⵙⴰⵖ ⵏ ⵓⵥⵟⵟⴰ ⴰⴷ ⵢⴰⵜ ⵜⴰⵏⴰⴹⵜ ⵜⴰⵎⵏⴰⵡⴰⵢⵜ ⴳ ⵓⵙⴰⵜⵉ ⵏ ⵜⵙⵓⵜⵍⵜ ⵜⵉⵙ ⴽⴽⵓⵎⵕⴰⵡⵜ ⴷ ⵢⴰⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ. ⵎⴽⴷⴰ ⵜⵙⵜⵉ (UPR info), ⵏⵏⴰ ⵉⴳⴰⵏ ⵜⴰⵎⴰⴷⴷⴰⵙⵜ ⵜⴰⵔⵓⵏⴱⵉⴹⵜ ⵎⵉ ⵉⵍⵍⴰ ⵓⵙⵖⵉⵎ ⵏⵏⵙ ⴳ ⵊⵓⵏⵉⴼ, ⴰⵔ ⵜⵙⵡⵓⵔⵉ ⵅⴼ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴼⵔⴽ ⵏ ⵓⵎⵏⴰⴷ ⴰⵎⴰⵜⴰⵢ ⵙ ⵡⴰⴷⴷⵓⵔ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ, (ⵜⵙⵜⵉ) ⵉⵄⵔⵔⵉⵎⵏ ⴰⴷ ⵃⵎⴰ ⴰⴷ ⵎⴹⴰⴽⴰⵕⵏ ⵅⴼ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴰⴽⴷ ⵉⵡⴰⵏⴽⵏ ⵉⵏⴳⵎⴰⵎⵏ ⴳ ⵜⵎⵜⵜⴰ ⵉⵎⵓⵏⵏ, ⴳ 31 ⵖⵓⵛⵜ ⴳ ⵊⵓⵏⵉⴼ, ⴳ ⵓⵙⴰⵜⵉ ⵏ ⵜⴳⵉⵡⵉⵔⵉⵏ ⵜⵉⵎⵣⵡⵓⵔⴰ ⵏ ⵜⵙⵓⵜⵍⵜ 41 ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ.