ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴳⵔⴰⵡ ⵏ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵜⵓⵙⵏⵎⴰⵍⴰⵏⵉⵏ ⴷⴰⵜ ⵜⴰⵙⵓⵜⵍⵜ ⵜⵓⵏⵣⵉⵍⵜ ⵜⵉⵙ 73 ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ ⴷⴷⴰⵡ ⵜⵎⴰⵜⴰⵔⵜ "ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵏⴱⴰⴹ ⴳ ⵉⴼⵔⵉⵇⵢⴰ: ⵜⴰⵙⵖⵣⵏⵜ ⵏ ⵜⵎⵢⴰⴷⴰⵙⵜ ⵜⴰⴳⵜ ⵉⵎⵏⵉⴷⵏ ⴳ ⵉⵎⵏⵣⴰⵖⵏ ⴷ ⵜⴰⵙⵙⴰⵙⵉⵏ ⴷ ⵡⴰⵔ ⵉⵙⴽⵉⵍ", ⵏⵏⵉ ⵉⵙⵏⵎⴰⵍⴰ ⵡⴰⵎⵎⴰⵙ ⴰⴼⵔⵉⵇⵉ ⵏ ⵜⵖⵓⵔⵉⵡⵉⵏ ⵜⵉⴷⵉⵎⵓⵇⵕⴰⵟⵉⵢⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵓⵙⵙⴰⵏ ⵏ 17 ⴷ 18 ⴽⵟⵓⴱⵕ 2022, ⴳ ⴱⴰⵏⵊⵓⵍ (ⴳⴰⵎⴱⵢⴰ). ⴳ ⵓⵙⴰⵜⵉ ⴰⴷ, ⵉⵙⵎⵏⵉⴷ ⵓⵙⵇⵇⵉⵎ, ⵙ ⵜⴳⵏⵙⴰⵙⵜ ⵏ ⵎⴰⵙⵙ ⵎⵓⵕⴰⴷ ⵕⵕⴰⵖⵉⴱ, ⴰⵏⵎⵀⴰⵍ ⵏ ⵓⴱⵔⵙⵉⵔⴰ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵢⴰⵜ ⵜⴽⵛⵛⵓⵎⵜ ⵙ ⵡⴰⵙⵙⴰⵖ ⵏ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵖⵜⵙⵏ ⵉⵎⵣⴰⵢⵏ ⴱⴰⵔⵉⵣ, ⴷ ⵏⵏⵉ ⵉⵙⵙⵓⵔⵓⴼⵏ ⵉ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴰⴷ ⵙⴱⵓⵖⵍⵓⵏⵜ ⵉⵎⵢⴰⵙⵙⴰⵜⵏ ⴰⴽⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵅⴼ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⴷ ⵓⵙⴱⴷⴷⵉ ⵏ ⵜⵎⵙⵙⴰⵥⵓⵕⵜ, ⵍⵓⵎⵎⵏ ⴰⴼⵔⴰⴳ ⵏ ⵉⵙⵎⵉⵍⵏ ⴽⵓⴽⴹⵏⵉⵏ. 

ⵉⵙⴷⴷⵉⴷ ⵓⵙⵇⵇⵉⵎ ⵎⴰⵙ ⵉⴳⴰ ⵓⵎⵢⴰⵡⴰⵙ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴽⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵢⴰⵏ ⵙⴳ ⵉⵙⵖⴰⵍⵏ ⵉⴷⵙⵍⴰⵏⵏ ⵏⵏⵉ ⵅⴼ ⵉⵜⵜⵓⴳⴰ ⵓⵙⵓⵜⴳ ⵏ ⵓⵙⵖⴰⵍ ⵏ ⵓⵡⵇⵇⵔ ⵏ ⵉⵎⵏⵣⴰⵢⵏ ⵏ ⴱⴰⵔⵉⵣ, ⵎⴽⴷⴰ ⵉⴳⴰ ⵓⵎⵢⴰⵙⵙⴰ ⵏⵏⵙⵏ ⵜⴰⵍⴳⴳⵯⵉⵜ ⵏ ⵓⵣⴷⴰⵢ ⵉⵏⴳⵔ ⵓⵡⴰⵏⴽ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ. ⵙ ⵎⴰⵏ ⴰⵢⴰ, ⵉⵙⵙⴽⵕⵥ ⵓⵙⵇⵇⵉⵎ ⵅⴼ ⵡⴰⴷⴷⵓⵔ ⵏ ⵓⵙⵔⵓⵙ ⵏ ⵜⵙⵜⵔⴰⵜⵉⵊⵉⵜ ⵏ ⵓⵏⵖⴰⵍ ⵏ ⵓⵎⵢⴰⵡⴰⵙ ⵉⵏⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⴳ ⵓⵎⵏⵉⴷ ⵏ ⵜⵏⴽⵔⴰ ⵙ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⵏⵥⴰⵡ ⵏ ⵉⴼⵔⵉⵇⵢⴰ. 

ⴳ ⵓⵎⵏⴰⴹ ⴰⴷ, ⵉⵙⵙⴽⵜⵉ ⵓⵙⵇⵇⵉⵎ ⵙ ⵓⵙⵓⵔⵙ ⵏⵏⵉ ⵉⵜⵜⴷⴷⵔ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⴳ ⵓⵣⵎⵣ ⵏ ⵉⵎⵏⵣⴰⵖⵏ ⴷ ⵜⴰⵙⵙⴰⵙⵉⵏ ⵏ ⵖⵉⵍⴰⴷ, ⴰⵔ ⵉⵇⵇⴰⵔ ⵉ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵃⵎⴰ ⴰⴷ ⴼⴽⵏⵜ ⴰⵙⵉⵣⵡⵔ ⵏ ⵜⵎⵙⵍⴰⵢⵜ ⵏ ⵓⵙⵔⵓⵙ ⵏ ⵉⵎⴰⵙⵙⵏ ⵏ ⵓⵙⵎⵉⴳⵍ ⵏ ⵣⵉⴽⴽ ⵙ ⵉⵎⵏⵣⴰⵖⵏ ⴰⴷ ⴷ ⵜⵎⵔⴰⵔⵓⵜ ⵅⵉⴼⵙⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⴳⴰⵡⴰⵏ ⵙ ⵓⵎⵢⴰⵡⴰⵙ ⴰⴽⴷ ⵜⵎⵓⵏⵉ ⵏ ⵉⴼⵔⵉⵇⵢⴰ ⵃⵎⴰ ⴰⴷ ⵉⵜⵜⵡⴰⵍⴽⴰⵎ ⵓⵏⴰⵔⵓⵣ ⵏ ⵓⵎⵏⵥⴰⵡ ⴱⵍⴰ ⵉⵎⴰⵍⴰⴼⵏ. ⵓⵔ ⵉⵜⵜⵓ ⵓⵙⵇⵇⵉⵎ ⴰⴷ ⵢⴰⵍⵍⵖ ⵙ ⵜⵣⵉⴳⵣⵜ ⵏⵏⵉ ⵓⵡⴹⵏ ⵉⵡⴰⵏⴽⵏ ⴳ ⵎⴰⴷ ⵉⵥⵍⵉⵏ ⵙ ⵜⴷⵔⴰⵡⵜ ⴳ ⵜⵎⵢⴰⵇⵇⴰⵏⵜ ⵏ ⵜⵎⵏⴰⴹⵜ ⵏ ⵜⵙⴱⴱⴰⴱⵜ ⵜⵉⵎⵍⴻⵍⵍⵉⵜ ⵜⴰⵏⵎⵏⵥⴰⵡⵜ ⵜⴰⴼⵔⵉⵇⵉⵜ, ⵏⵏⵉ ⵉⴳⴰⵏ ⵙⴳ ⵉⵙⵖⵏⵓⵜⵏ ⵉⵎⵣⵡⴰⵔⵏ ⴳ ⵜⵎⵙⵙⴽⵜⵉⵜ ⵏ 2063, ⵉⵙⵙⴽⵜⵉ ⵎⴰⵙ ⵢⵉⵡⵣ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵅⴼ ⵜⵏⴼⵔⵓⵜ ⵏ ⵓⵙⵉⴷⴼ ⵏ ⵉⵙⵎⵉⵍⵏ ⴽⵓⴽⴹⵏⵉⵏ ⴳ ⵓⵍⴽⴰⵎ ⵏ ⵓⵙⵖⵏⵓ ⴰⴷ ⵏⵏⵉ ⵉⵣⵎⵔⵏ ⴰⴷ ⴷ ⵢⴰⵍⵍ ⴽⵉⴳⴰⵏ ⵏ ⵉⴷ ⵎⵍⵢⵓⵏ ⵏ ⵉⴼⵔⵉⵇⵉⵢⵏ ⵙⴳ ⵓⵙⵡⵉⵔ ⵏ ⵥⵥⵍⴹ ⴰⴽⵙⵡⴰⵜ. 

ⵉⵙⵉⵙⴼⵉⵡ ⵓⵙⵇⵇⵉⵎ ⵎⴰⵙ ⵉⵙⵡⵓⵜⵜⵙ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⴰⵎⵓⵏⵜ ⵏⵏⵙ ⴰⴽⴷ ⵓⵙⵖⵏⵓ ⴰⴷ ⴰⵙⵉⴷⴼ ⵏ ⵜⵎⵢⴰⴷⴰⵙⵜ ⴱⴷⴷⵏⵉⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵓⴳⵜ ⵏ ⵜⴼⵔⴽⵉⵡⵉⵏ ⵏⵏⵙ ⴷ ⵉⵎⵙⴳⴷⴰⵍⵏ ⵙⵔⵙ ⵣⴷⵉⵏⵉⵏ. ⵉ ⵓⵙⴽⵜⵉ, ⵙⵡⵓⵔⵉⵏ ⵉⵎⴷⵔⴰⵡⵏ ⴳ ⵜⵡⵓⵔⵉⵡⵉⵏ ⵏ ⵓⵙⴳⵔⴰⵡ ⴰⴷ ⵅⴼ ⵜⵖⵓⵔⵉ ⵏ ⴽⵉⴳⴰⵏ ⵏ ⵉⵎⵔⵙⵉⵜⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ "ⵉⵣⵔⴼⴰⵏ ⵉⵎⵓⵟⵟⵓⵏⵏ ⴷ ⵜⵏⴼⵔⵓⵜ", "ⴰⵙⵏⴼⵍ ⵏ ⵓⵏⵣⵡⵉ", "ⴽⵓⴼⵉⴷ-19", "ⴰⵏⴰⵡ ⴰⵏⴰⵎⵓⵏ", "ⵜⴰⵎⵙⴰⵔⵜ ⵏ ⵉⵎⵙⵜⴰⵏⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ", ⴷ ⵓⴳⴳⴰⵔ.