ⴳ ⵢⴰⵜ ⵜⵎⵙⵙⴽⵜⵉⵜ ⵜⴰⵣⵔⴼⴰⵏⵜ, ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵓⴳⴳⴰⵔ ⵏ 100 ⵏ ⵓⵙⵖⵍⴼ ⵉ ⵓⵙⵏⴼⵍ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵓⵙⵎⴰⴷ ⵏⵏⵙ
ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵙ ⵏ ⵓⵙⵉⵎⵡⴰⵙ 11 ⵉⴱⵔⵉⵔ ⵉⵣⵔⵉⵏ ⵢⴰⵜ ⵜⵎⵙⵙⴽⵜⵉⵜ ⵜⴰⵣⵔⴼⴰⵏⵜ ⴳ ⵍⵍⴰⵏ ⵓⴳⴳⴰⵔ ⵏ 100 ⵏ ⵓⵙⵖⵍⴼ ⵉⵥⵍⵉⵏ ⵙ ⵓⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 03.23 ⵉⵥⵍⵉⵏ ⵙ ⵓⵙⵏⴼⵍ ⵏ ⵓⵙⵍⴳⵏ ⵓⵟⵟⵓⵏ 22.01 ⵉⵥⵍⵉⵏ ⵙ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵓⵙⵎⴰⴷ ⵏⵏⵙ. ⵜⴱⴷⴷ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ ⵅⴼ ⵓⵏⴰⴳⵔⴰⵡ ⴰⵙⴰⵖⵓⵍ ⴰⵎⵙⵎⵓⴷ ⵢⵓⵎⴰⵏ ⴰⴷⵓⵙⵜⵓⵔ ⴰⵎⵖⵔⵉⴱⵉ, ⵜⵉⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵏⵏⴰ ⵜⵙⵖⵣⵏ ⵜⴳⵍⴷⵉⵜ, ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ, ⵉⵎⵏⵣⴰⵢⵏ ⵏ ⵎⵉⵏⴷⵉⵣ ⴷ ⵉⵙⵖⵍⴰⴼⵏ ⵏ ⵉⵎⵉⵙ ⴰⵏⴰⵎⵓⵔ ⵏ ⵓⵔⴰⵢ ⵙⴳ ⵓⵙⵔⴼⵓⴼⵏ, ⴷ ⵓⵍⴰ ⵜⵉⵎⵙⴽⵔⵉⵏ ⴷ ⵜⵎⴰⴳⵍⴰⵢⵉⵏ ⵜⵉⵏⵣⵔⴰⴼⵉⵏ ⵜⵉⵎⵓⴼⴰⵢⵉⵏ. ⵡⴰⵜⵜⵙⵏ ⵉⵙⵖⵍⴰⴼ ⴰⴷ ⴰⴷ ⵙⴷⵓⵙⵏ ⵜⵉⵏⴼⵔⵓⵜⵉⵏ ⵏ ⵜⵣⵔⴼⵜ ⵜⴰⵏⴱⴽⴰⴹⵜ ⴷ ⵓⵙⴷⵓⵙ ⵏ ⵓⵎⵏⵣⴰⵢ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ.
ⵙ ⵎⴽⴰ, ⵜⵜⵓⴱⴹⴰⵏ ⵉⵙⵖⵍⴰⴼ ⵏ ⵓⵙⵇⵇⵉⵎ ⴷ ⵜⴰⵏⵏⴰⵢⵉⵏ ⵏⵏⵙ ⵅⴼ 79 ⵏ ⵓⵙⵖⵍⴼ ⵉⵥⵍⵉⵏ ⵉⵏⴰⵡⵍⵏ ⵉⵙⴱⴷⴰⴷⵏ ⵉⴼⴰⵡⵏ ⵉⵜⵜⵓⵙⵡⵓⵜⵜⴰⵏ ⴳ ⵓⵙⵏⵜⵉ ⵏ ⵓⵙⵍⴳⵏ, ⴷ 24 ⵏ ⵓⵙⵖⵍⴼ ⴰⵎⴰⵜⴰⵢ ⵉⵥⵍⵉⵏ ⵙ ⵜⵎⵙⴰⵔⵉⵏ ⵜⵓⵚⴽⵉⵡⵉⵏ ⴷ ⵜⵙⵜⵔⴰⵜⵉⵊⵉⵢⵉⵏ ⵓⵔ ⵢⴰⵎⵓⵏ ⴳ ⵓⵙⵏⵜⵉ, ⵎⴰⵛⴰ ⵙⵖⴰⵡⵙⴰⵏⵜ ⵙ ⵓⵙⵎⴽⵍ ⵃⵎⴰ ⴰⴷ ⵜⵉⵍⵉ ⵜⵏⴼⵔⵓⵜ ⵏ ⵓⵎⵙⴰⵙⴰ ⴰⴽⴷ ⵉⵏⴰⵡⴰⵢⵏ ⵉⴷⵙⵜⴰⵔⵏ ⴷ ⵉⴳⵔⴰⵖⵍⴰⵏⵏ. ⵙⴷⵍⵏ ⵉⵙⵖⵍⴰⴼ 42 ⵏ ⵓⵙⵏⵜⵍ ⴰⴷⵙⵍⴰⵏ, ⵉⵜⵜⵡⴰⴱⴹⴰⵏ ⵅⴼ ⴽⴽⵓⵥ ⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ:
1- ⴰⵙⴷⵓⵙ ⵏ ⵓⵎⵏⵣⴰⵢ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ: ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵙⵙⵓⵜⵓⵔ ⵖⴰⵢⴰⴷ ⵏ ⵓⵙⵎⵔⵙ ⵏ ⵉⵙⴱⴷⴰⴷⵏ ⵏ ⵜⵓⵍⴳⵉⵏⵜ ⴷ ⵓⵙⵖⵓⵏ ⴷ ⵓⵎⵙⴰⵙⴰ ⵅⴼ ⵜⵏⴱⴰⴹⵉⵏ ⵜⵉⵎⵣⵣⴳⵉⵔⵉⵏ ⴷ ⵜⵏⵣⵔⴰⴼⵉⵏ ⴳ ⵉⴳⵉ ⵏ ⴽⵔⴰⵢⴳⴰⵜ ⵜⵎⴳⴳⵉⵜ ⵉⵣⵎⵔⵏ ⴰⴷ ⵜⴹⵉⵚ ⵅⴼ ⵉⵣⵔⴼⴰⵏ ⴷ ⵜⴷⵔⴼⵉⵏ, ⵉⵙⴽⵉⵍ ⴷⴰⵜ ⵓⵙⵍⴳⵏ, ⴷ ⵉⵙⵓⵜⵔⵏ ⵏ ⵜⵙⵓⵙⵖⵜ ⴷ ⵓⵙⵇⵙⵉ ⴷ ⵓⵙⵉⴹⵏ, ⴳ ⵓⵎⵙⴰⵙⴰ ⵉⵙⵎⴷⵏ ⴰⴽⴷ ⵉⵙⴱⴷⴰⴷⵏ ⵏ ⵓⴷⵓⵙⵜⵓⵔ. ⴰⵎⵓⵏⵜ ⴳⵉⵙⵏ ⵜⵙⵓⵎⵔⵉⵏ ⵏ ⵓⵙⵇⵇⵉⵎ ⴳ ⵓⵎⵏⴰⴹ ⴰⴷ, ⵙ ⵓⵎⴷⵢⴰ, ⴰⵙⴹⵕⵚ ⵅⴼ ⵜⵣⵎⵔⵜ ⵏ ⵓⵙⵙⴼⵍⴷ ⵙ ⵓⵎⵔⴷⴰⵢ ⴱⵍⴰ ⴰⴷ ⵉⵜⵜⵓⵙⵔⴰⵙ ⴳ ⵉⵎⵉⵥ ⴰⵙⵙⵓⵍⴰⵏ, ⵜⴰⵏⴼⵔⵓⵜ ⵏ ⵉⵣⵔⴼⴰⵏ ⵏ ⵓⵎⵣⴰⵖ, ⴰⵙⵖⵣⵏ ⵏ ⵓⵣⵔⴼ ⵏ ⵓⵎⵔⴷⴰⵢ ⴳ ⵓⵙⵏⵖⵎⵙ ⴰⵎⵖⴰⵡⵍ ⴳ ⵓⵣⵎⵣ ⵏ ⵉⵎⵉⵥ ⴰⵙⵙⵓⵍⴰⵏ ⴷ ⵜⴰⵍⵖⵉⵡⵉⵏ ⵏ ⵓⵣⵣⴳⵉⵔ ⵏⵏⵙ, ⴷ ⵜⵣⵎⵔⵜ ⵏ ⵓⵙⵎⴰⵎⵎⵉ ⴷⴰⵜ ⵜⵙⴳⴰ ⵜⴰⵏⵣⵔⴰⴼⵜ ⵜⴰⵙⵉⵎⴰⵏⵜ, ⵙ ⵎⴰⴷ ⵉⵙⴷⵓⵙⵏ ⴰⵎⵏⵣⴰⵢ ⵏ ⵜⵙⵉⵙⵓⵖⵜ ⴷ ⵓⵎⴰⵜⵔ ⴰⵏⵣⵔⴰⴼ ⵉⵜⵜⵓⵎⵔⴰⵔⴰⵏ.
2- ⵜⵉⵏⴼⵔⵓⵜⵉⵏ ⵏ ⵓⵎⵚⵉⵕⵉⴹ ⵓⵖⴷⵉⵎ : ⴰⵎ ⵜⴰⴼⴰⴷⴰ ⵓⵔ ⵉⵣⵎⵔⵏ ⴰⴷ ⵜⴻⵜⵜⵓⵙⴽⵔⴼ, ⴷ ⵜⴰⵙⵉⵍⴰ ⵉ ⵜⵓⵍⴳⵉⵏⵜ ⵏ ⵜⵎⴳⴳⵉⵜ ⵜⴰⵏⵣⵔⴰⴼⵜ ⵇⴰⵃ .. ⵙⴳ ⵉⵙⵖⵍⴰⴼ ⵏ ⵓⵙⵇⵇⵉⵎ ⴳ ⵓⵎⵏⴰⴹ ⴰⴷ, ⴰⵙⵣⵎⵔ ⵏ ⵓⵎⵔⴷⴰⵢ ⴰⴷ ⵉⵎⵢⴰⵡⴰⴹ ⴷ ⵓⵎⵙⵜⴰⵏ ⵏⵏⵙ ⵙⴳ ⵜⵉⵣⵉ ⵏ ⵓⵙⴱⴷⴷⵉ, ⴰⵙⵙⵉⴷⵔⵓⵙ ⵏ ⵉⵣⵎⴰⵣⵏ ⵏ ⵉⵎⵉⵥ ⴰⵙⵙⵓⵍⴰⵏ, ⴷ ⵓⵙⵎⵔⵙ ⵏ ⵓⵏⵜⴰⵎ ⴰⵙⵍⵉⵥⵕ ⵃⵎⴰ ⴰⴷ ⵉⴳ ⵜⴰⵎⵏⴼⵔⵓⵜ ⵜⵓⵎⵀⵉⵍⵜ ⵉ ⵜⵏⴼⵔⵓⵜ ⵏ ⵉⵣⵔⴼⴰⵏ ⵏ ⵓⵎⵔⴷⴰⵢ ⴷ ⵓⵙⴷⵓⵙ ⵏ ⵜⵙⵓⵙⵖⵜ.
3- ⵜⴰⴳⴷⴰⵣⴰⵍⵜ ⴷ ⵓⵎⵢⴰⵙ ⵏⴳⵔ ⵉⴳⵎⴰⵎⵏ ⵏ ⵓⵎⵚⵉⵕⵉⴹ : ⵉⴷⴷⵖ ⵜⴳⴰ ⵜⴰⵏⴼⵔⵓⵜ ⵜⴰⴷⵙⵍⴰⵏⵜ ⵉ ⵜⵉⵎⵓⵏⴼⵔⵜ ⵏ ⵜⵏⴱⴹⴰⵢⵜ ⴷ ⵜⵔⴰⵡⵙⴰⵏⵜ ⵏⵏⵙ, ⵙ ⵓⵙⵣⵎⵔ ⵏ ⵓⵎⵣⴰⵖ ⴰⴷ ⵉⵙⴽⵔ ⵉⵣⵔⴼⴰⵏ ⵏⵏⵙ ⵙ ⵢⵉⵙⴽⵉⵍ ⴰⴽⴷ ⵜⵏⴱⴰⴹⵜ ⵏ ⵜⵓⵔⴷⴰⵢⵜ, ⵜⴰⵏⴼⵔⵓⵜ ⵏ ⵜⵉⵍⵉⵜ ⵏ ⵓⵎⵙⵜⴰⵏ ⵙⴳ ⵜⵉⵣⵉ ⵏ ⵓⵙⵙⵏⵜⵉ ⵏ ⵓⵣⵣⴳⵉⵔ ⵏ ⵉⵎⵉⵥ ⴰⵙⵙⵓⵍⴰⵏ, ⵜⵓⴽⴽⵉ ⵏ ⵓⵙⵓⵍⴼ ⵉ ⵓⵎⵣⴰⵖ ⵃⵎⴰ ⴰⴷ ⵉⵖⵔ ⴰⵙⴷⴰⵡ ⵏ ⵍⴱⵓⵍⵉⵙ ⴰⵏⵣⵔⴰⴼ ⵉⵜⵜⵓⵙⵡⴰⵍⴰⵏ ⵉ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⵙ ⵎⴰⴷ ⴰⵙ ⵉⵜⵜⴰⵊⵊⴰⵏ ⴰⴷ ⵉⵙⵙⵓⵊⴷ ⴰⵎⵣⴰⵖ ⵏⵏⵙ ⵙ ⵜⵕⵡⵉ ⴷ ⵓⵎⵏⴰⵍⴰ ⵏ ⵡⴰⵏⵥⴰⵜⵏ ⵏ ⵜⵓⵔⴷⴰⵢⵜ ⴳ ⵜⵎⵙⵓⵜⴰⵍ ⵜⵉⵎⴳⴷⴰⵣⴰⵍⵉⵏ, ⴰⵙⵣⵎⵔ ⵏ ⵜⵎⵙⵎⵓⵏⵉⵏ ⵜⵉⵖⵔⵎⴰⵏⵉⵏ ⴰⴷ ⴰⴷⴼⵏⵜ ⵖⵔ ⵜⵏⴱⴹⴰⵢⵜ ⴱⵍⴰ ⵉⵙⴽⵔⴰⴼ ⵉⵎⵙⵙⵓⴳⵓⵔⵏ, ⵙⵍⴰⵡⴰⵏ ⴰⴽⴽⵯ ⵜⵓⵙⵙⵔⴰ ⵏ ⵜⴼⴰⴷⴰ ⵏ ⵓⵙⵓⵔⴳ ⵉⵣⵡⵓⵔⵏ ⵙⴳ ⵜⵙⴳⴰ ⵜⵓⵏⴱⵉⴹⵜ ⵉⵜⵜⵓⵙⵎⴰⴳⵍⵏ ⵙ ⵜⵣⵔⴼⵜ, ⴷ ⵓⵙⵎⵔⵙ ⵏ ⵓⵏⴳⵔⴰⵡ ⵏ ⵓⵙⵍⵖⵓ ⴳ ⵓⴷⵖⴰⵔ ⵏ ⵓⵙⵓⵔⴳ, ⵙ ⵎⴰⴷ ⵉⵙⴷⵓⵙⵏ ⵜⴰⵙⵉⵎⴰⵏⵜ ⵏ ⵜⵎⵙⵎⵓⵏⵉⵏ ⴳ ⵜⵎⵙⴽⵔⵜ ⵏ ⵓⵣⵔⴼ ⴳ ⵓⵎⵚⵉⵕⵉⴹ.
4- ⵜⴰⵖⵣⵓⵔⴰⵏⵜ ⴷ ⵓⵙⴽⴰⵔ ⵙ ⵉⵙⵎⵉⵍⵏ ⴽⵓⴽⴹⵏⵉⵏ : ⵉ ⵡⴰⵎⵎⴰⵥ ⵏ ⵜⵥⵍⴰⵢⵉⵏ ⵉⵣⴷⵉⵏ ⵙ ⵡⴰⴷⴷⴰⴷ ⴰⵏⴰⵎⵓⵏ ⵏⵖ ⴰⴽⵎⴰⵎ ⵏⵖ ⴰⵏⵢⵉⵎⴰⵏ ⵏⵖ ⵓⵍⴳⵉⵏ ⵏ ⵓⴼⵔⵉⴷⵏ. ⴳ ⵓⵎⵏⴰⴹ ⴰⴷ ⵜⵙⵙⵓⵎⵔ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ ⵉⵎⴰⵙⵙⵏ ⵉⵏⴱⵔⴷⴰⵏⵏ ⵉⵎⵙⴰⵙⴰⵏ ⴰⴽⴷ ⵜⵥⵍⴰⵢⵉⵏ ⵏ ⵜⵡⵜⵎⵉⵏ ⴷ ⵡⴰⵣⵣⴰⵏⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵜ/ⵉⵎⵣⵡⴰⴳⵏ/ⵉⵏ. ⴷⴰ ⴷⴷⵓⵏ ⵉⵙⵖⵍⴰⴼ ⵏ ⵜⵎⵙⵙⴽⵜⵉⵜ ⵖ ⵎⴰⵢⴰⴷ ⵖⵔ ⵓⵎⵏⵉⴷ ⵏ: ⴰⵙⴽⴰⵔ ⵙ ⵡⴰⵏⴰⵡ ⴰⵏⴰⵎⵓⵏ ⴳ ⵡⴰⴷⴷⴰⴷⵏ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ, ⴰⵙⵎⵀⵍ ⵏ ⵓⵎⵏⵣⴰⵢ ⵏ ⵓⵙⵙⵡⵀⵏ ⵓⵎⵀⵉⵍ ⴳ ⵜⵎⵙⴰⵔⵉⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵜⴰⵎⵢⴰⴷⴰⵙⵜ ⵏ ⵡⴰⴷⴷⴰⴷⵏ ⵏ ⵡⴰⵣⵣⴰⵏⵏ ⴳ ⵜⴱⵔⵉⴷⵜ ⵙⴳ ⵓⵎⵏⵉⴷ ⵏ ⵜⵏⴰⴼⵓⵜ ⵜⴰⵎⵓⴼⴰⵢⵜ ⵏ ⵡⴰⵣⵣⴰⵏ, ⴷ ⵓⵙⴽⴰⵔ ⵏ ⵜⵙⵓⵖⵍⵜ ⵉ ⵉⵎⵣⵡⴰⴳⵏ/ⵜⵉⵎⵣⵡⴰⴳⵉⵏ.
ⵉⵥⵕⵉ ⴰⵣⵔⴼⴰⵏ ⵉ ⵜⵣⵔⴼⵜ ⵜⴰⵏⴱⴽⴰⴹⵜ
ⵜⴰⵏⵏⴰⵢⵉⵏ ⵏ ⵜⵎⵙⵙⴽⵜⵉⵜ ⴰⴷ ⴷ ⵉⵙⵖⵍⴰⴼ ⵏⵏⵙ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵣⵎⵣⵣⵓ ⵏ ⵓⵙⵎⵏⵉⴷ ⵏⵏⵙ, ⴷⴰ ⵎⵎⴰⵍⵏ ⴰⵙⵓⵖⵏ ⵏ ⵓⵙⵇⵇⵉⵎ ⵙ ⵜⴷⵔⴰⵡⵜ ⴳ ⵓⵚⴽⵓ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⵉⵙⴽⴰⵔⵏ ⵙ ⵓⵜⵡⴰⵍ ⴰⴷⵙⵜⴰⵔ, ⵜⴼⵔⴳ ⵉⵣⵔⴼⴰⵏ ⴷ ⵜⴷⵔⴼⵉⵏ. ⵜⴰⴱⵔⵉⴷⵜ ⵜⴰⵏⴱⴽⴰⴹⵜ, ⵜⵔⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵓⵔ ⵜⴳⵉ ⵖⴰⵙ ⵉⵎⵉⵙ ⵓⵎⵀⵉⵍ, ⵎⴰⵛⴰ ⵜⴳⴰ ⴰⵡⵏⵏⵉ ⵅⴼ ⵉⵥⵕⵉ ⵏ ⵡⴰⵎⵓⵏ ⵅⴼ ⵜⵣⵔⴼⵜ, ⵍⵍⵉⵖ ⵢⴰⵖⵓⵍ ⵓⴽⵛⵛⵓⵎ ⵏ ⵜⵏⴱⴰⴹⵜ ⵍⴰ ⵉⵜⵜⵎⵙⴰⵙⴰ ⴷ ⵉⵙⴱⴷⴰⴷⵏ ⵓⵍⴳⵉⵏⵏ ⵉⵙⴽⴰⵔⵏ ⴰⵎⵢⴰⵙ ⵏⴳⵔ ⵓⴼⵔⴰⴳ ⵏ ⵜⵏⴼⵔⵓⵜ ⵜⴰⵎⴰⵜⴰⵢⵜ ⴷ ⵜⵎⵢⴰⴳⴰⵏⵜ ⵏ ⵜⴳⴳⴰⵥⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ. ⵏⵡⴰⵜⵜⵙ ⴰⴷ ⵏⴷⵔⵓ, ⵜⵙⴷⴷⵉⴷ, ⴳ ⵓⵍⴽⴰⵎ ⵙ ⵢⴰⵜ ⵜⵏⴹⵡⴰ ⵜⴰⵏⴰⵡⴰⵢⵜ ⵜⴰⵏⴱⵣⴰⵣⵜ ⴳ ⵓⵙⴰⵜⵉ ⵏⵏⵖ ⴰⵎⵔⵙⴰⵍ ⴷ ⵓⵎⴰⴷⴷⴰⵙ, ⵙ ⵎⴰⴷ ⵉⵜⵜⵏⴼⵔⵓⵏ (ⵉⵜⵜⴹⵎⴰⵏⵏ) ⵜⴰⵙⵓⵍⵜ ⵏ ⵡⴰⵎⵎⴰⵥⵏ ⵉⵣⵔⴼⴰⵏⵏ.
"ⴽⵓ ⴰⴼⴳⴰⵏ, ⵎⴽⵏⵏⴰ ⴽⴰ ⵉⴳⴰ ⵡⴰⴷⴷⴰⴷ ⵏⵏⵙ ⵏⵖ ⴰⵏⴰⵡ ⵏ ⵓⵎⵏⵖⵉ ⵏⵏⴰ ⵉⴷⴷⵔ ⴰⴽⴷ ⵓⵙⵍⴳⵏ, ⵢⵓⴽⵍⴰⵍ ⵜⴰⵏⴼⵔⵓⵜ ⵏ ⵡⴰⴷⴷⵓⵔ ⵏⵏⵙ ⵉⵜⵜⵔⴰⵊⴰ ⴷⵉⴳⵏⵖ ⴰⴽⴽⵯ ⴰⴷ ⴰⵙ ⵏⴻⵏⴼⵔⵓ ⵜⵉⴼⴰⴷⵉⵡⵉⵏ ⵏ ⵓⵙⵓⵎⵓ ⴷ ⵜⵣⵔⴼⵜ. ⴰⵎⵙⴱⴷⴷⵉ ⵓⵔ ⵉⴳⵉ ⵖⴰⵙ ⴰⵣⵡⵉⵍ ⵏⵖ ⴰⵙⴷⴰⵡ… ⵎⴰⵛⴰ ⴰⴼⴳⴰⵏ ⵉⵍⴰⵏ ⵜⴰⵍⵍⴰⵙⵜ ⴷ ⵓⵏⴰⵔⵓⵣ ⴳ ⵢⴰⵏ ⵓⵙⴽⴽⴰ ⴰⵎⵓⴼⴰⵢ ⴷ ⴳ ⵜⵓⵖⵓⵍⵜ ⵖⵔ ⵡⴰⵎⵓⵏ. ⴷ ⴰⵢⴰⴷ ⴷ ⴰⴼⵔⴷⵉⵙ ⵓⵔ ⵉⵜⵜⵡⴰⴳⵣⴰⵎⵏ ⵙⴳ ⵉⵥⵕⵉ ⵏⵏⵖ ⵉ ⵜⵣⵔⴼⵜ ⵜⴰⵎⵢⴰⴳⴰⵏⵜ ⴷ ⵜⵏⵉⵍⴰⵡⵜ".
ⴰⴳⴰⵎ ⵏ ⵜⵎⵙⵙⴽⵜⵉⵜ ⵏ ⵓⵙⵇⵇⵉⵎ ⵅⴼ ⵓⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 03.23 ⵉⵥⵍⵉⵏ ⵙ ⵓⵙⵏⴼⵍ ⵏ ⵓⵙⵍⴳⵏ ⵓⵟⵟⵓⵏ 22.01 ⵉⵥⵍⵉⵏ ⵙ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵓⵙⵎⴰⴷ ⵏⵏⵙ (ⵙ ⵜⴰⵄⵕⴰⴱⵜ)
