ⴳ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ
ⵙ ⵢⵉⵡⵉⵣ ⴰⵎⴰⵜⵜⴰⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⴷ ⴳ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵔ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴷⵡⴰⵍ ⴰⴳⵔⴰⵖⵍⴰⵏ "ⵜⴰⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ : 30 ⵏ ⵓⵙⵖⵓⵏ ⴰⵖⵣⵓⵔⴰⵏ ⴰⴼⴰⴷ ⴰⴷ ⵢⵉⵍⵉ ⵡⴰⴷⴷⵓⵔ ⴰⵏⴼⴳⴰⵏ : ⵜⴰⵎⵢⴰⴳⴰⵏⵜ ⵉⵜⵜⵓⵙⵙⴹⵕⴰⵏ ⵏⵖⴷ ⴰⴱⵔⵉⴷ ⵉⵎⵏⵏⴳⵣⵉ?", ⵓⵙⵙⴰⵏ ⵏ 7 ⴷ 8 ⴷⵓⵊⴰⵏⴱⵉⵔ 2023 ⴳ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵕⵕⴱⴰⵟ.
ⵔⴰⴷ ⵜⵜⵡⴰⵕⵣⴰⵎⵏⵜ ⵜⵡⵓⵔⵉⵡⵉⵏ ⵏ ⵓⴷⵡⴰⵍ ⴰⴳⵔⴰⵖⵍⴰⵏ ⵙ ⵜⵖⵓⵔⵉ ⵏ ⵜⴱⵔⴰⵜ ⵜⴰⵎⴰⵜⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⵏⵏⵉ ⵉⵜⵜⵓⵙⵡⴰⵍⴰⵏ ⵉ ⵉⵎⴷⵔⴰⵡⵏ ⴷ ⵜⵎⴷⵔⴰⵡⵉⵏ, ⵉⵙⵡⵓⵜⵜⵙ ⵓⴷⵡⴰⵍ ⴰⴷ ⵉⴳ ⴰⵙⴰⵢⵔⴰⵔ ⵏ ⵜⵡⵏⴳⵉⵎⵉⵏ ⴷ ⵉⵎⵏⴰⴷⵏ ⴰⴼⴰⴷ ⴰⴷ ⵉⵜⵜⵡⴰⵍⴰⵙ ⵓⵙⴷⴷⵉⴷ ⵏ ⵓⵙⵖⵓⵏ ⴰⵎⴳⵔⵓ ⵙ ⵢⴰⵏ ⵓⵎⴰⴹⴰⵍ ⴳ ⵉⵜⵜⴼⵊⵊⵉⵊ ⵓⴼⴳⴰⵏ ⵙ ⵜⵣⵔⴼⵜ ⴷ ⵡⴰⴷⴷⵓⵔ ⴷ ⵜⴷⵔⴼⵉ.
“ⵔⴰⴷ ⵉⵎⴹⴰⴽⴰⵕ ⵓⵎⵓⵙⵙⵓ ⴰⴷ ⴰⴳⵔⴰⵖⵍⴰⵏ ⵅⴼ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⵍⴳⴷⵉⵙⵜ ⵏⵏⵙ, ⵉⴷⴷⵖ ⵜⴳⴰ ⵜⴰⵢⴰⴼⵓⵜ ⵏ ⵜⴷⵉⵏⴰⵎⵉⵜ ⵏ ⵜⴷⵔⴰⵡⵜ ⵉⵎⵉⴽ ⵙ ⵉⵎⵉⴽ ⴳ ⵡⴰⵕⵕⴰⵥ ⵓⴼⵔⵉⴷ ⴷ ⵓⵎⴳⵔⵓ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵡⵉⵍⴰ ⵏⵏⵉ ⴳ ⵜⴻⵜⵜⴰⴼⴰ ⵜⵓⵙⵙⵏⴰ ⵜⴰⵏⴰⵎⵓⵔⵜ ⴰⴷⴷⵓⵔ ⵏⵏⵙ ⴰⴳⴰⵎⴰⵏ ⴱⵍⴰ ⵜⴰⵎⴰⵖⵜ ⵡⴰⵍⴰ ⵜⴰⵎⴰⴳⵍⴰ”. ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵎⴽⴷⴰ ⵔⴰⴷ ⵉⴳ ⵓⴷⵡⴰⵍ ⴰⵣⵎⵣ ⵏ ⵓⵙⵓⵜⴳ ⵏ ⵜⵣⵎⵔⵜ ⵏ ⵜⵏⴼⴳⴰⵏⵜ ⵅⴼ ⵓⵣⵔⴰⵢ ⵏ ⵉⵡⵜⵜⴰ ⵏⵏⵙ ⴰⴼⴰⴷ ⴰⴷ ⵜⵚⴽⵓ ⵜⵓⵚⴽⵉⵡⵜ ⵉⵛⵛⴰⵔⵏ ⵏⵏⵉ ⵙⴱⵓⵖⵍⴰⵏ ⵉⴱⵔⴷⴰⵏ ⵉⵏⴰⵎⵓⵔⵏ ⵉⵎⵏⴰⵡⴰⵢⵏ, ⵙ ⵓⵎⴷⵔⵓ ⴰⴽⴰⴷⵉⵎⵉ ⴷ ⵓⵡⵏⴳⵉⵎ, ⵉⵙⵙⵎⵔⴰⵙⵏ ⴰⵙⴼⵙⵉ ⵏ ⵓⵔⵎⴰⵙ ⵏ ⵜⵏⵥⴰⵕ ⵜⵉⵇⴱⵓⵔⵉⵏ ⴷ ⵜⵉⵎⵖⴰⵡⴰⵍⵉⵏ ⴳ ⵓⵎⵏⴰⴹ ⵉⵜⵜⵏⴼⴰⵍⵏ ⵙ ⵉⵎⵙⴰⵔⴰⵙⵏ ⴳⴳⵓⵜⵏⵉⵏ ⵏ ⵜⵙⵎⴰⴹⵍⴰⵏⵜ ⴷ ⵉⵡⵏⵏⵉⵜⵏ ⵉⴷⵍⵙⴰⵏⵏ ⵉⴷⵖⵔⴰⵏⵏ ⴷ ⵉⵏⴰⵎⵓⵔⵏ.
ⵔⴰⴷ ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⴰⴷ ⵙ ⵜⵎⴷⵔⴰⵡⵜ ⵏ ⵜⴳⵔⵓⵎⵎⴰ ⵏ ⵉⵎⴰⵔⴰⵜⵏ ⴷ ⵉⵏⴼⵍⵙⴰⴼⵏ ⴷ ⵉⵏⵎⵣⵔⴰⵢⵏ ⴷ ⵉⵏⵖⵎⴰⵙⵏ ⴷ ⵉⵏⴰⵥⵓⵕⵏ, ⴷ ⴰⵡⴷ ⵉⵎⵙⵡⵉⵏⴳⵉⵎⵏ ⴷ ⵉⵎⵓⵣⴰⵢⵏ ⴷ ⵉⵎⴳⴳⴰⵢⵏ ⴷ ⵉⵎⵙⴽⵍⴰⵏⵏ ⵉⵎⵖⵔⵉⴱⵉⵢⵏ, ⵔⴰⴷ ⵙⵡⵓⵔⵉⵏ, ⴳ ⵙⵉⵏ ⵡⵓⵙⵙⴰⵏ, ⵅⴼ ⵓⵎⴹⴰⴽⴰⵕ ⵏ ⵉⵎⵔⵙⵉⵜⵏ ⵣⴷⵉⵏⵉⵏ ⵙ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵙⵉⴷⴷ ⵏ ⵉⵙⵏⴼⵍⵏ ⵉⵎⴷⵔⵓⵜⵏ ⴷ ⵜⵏⵥⴰⵕ ⵏⵏⵉ ⴷ ⵢⵓⴳⴳⴰⵏ ⴷ ⵏⵏⵉ ⵉⵜⵜⵎⵏⴰⵍⴰ ⵓⵎⴰⴹⴰⵍ.
ⵎⵎⴱⴹⴰⵏⵜ ⵜⵡⵓⵔⵉⵡⵉⵏ ⵏ ⵓⴷⵡⴰⵍ ⵅⴼ ⵚⴹⵉⵚⵜ ⵏ ⵜⵖⵉⵎⵉⵜⵉⵏ ⵣⴷⵉⵏⵉⵏ ⵙ ⵉⵙⵓⴳⴰⵎ “ⵜⴰⵖⵣⵓⵔⴰⵏⵜ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵎⵏⴰⴹⵏ ⵉⵜⵜⵓⵙⵏⴼⴰⵍⵏ ⵙ ⵜⵎⵖⵍⴰⵍⵜ”, “ⵉⴼⵔⵉⵇⵉⵢⴰ ⴳ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ: ⴰⴼⴰⴷ ⴰⴷ ⵜⵉⵍⵉ ⵜⵉⵍⵉⵜ ⵉⵕⵡⴰⵏ”, “ⵜⴰⴼⵓⴳⵍⴰ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ”, “ⵉⵏⴰⵥⴰⵕⵏ ⴷ ⵜⵎⵙⵜⴳⴳⴰⵔⵉⵏ ⵉⵛⵛⴰⵕⵏ ⴳ ⵓⵎⵏⴰⵍⴰ ⵏ ⵓⵙⵏⴼⵍ ⵏ ⵓⵏⴳⵉⴳⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⴷ ⵜⵙⵎⵓⵟⵟⵓⵏⵜ”, “: ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ : ⴰⵍⵍⴰⵍ ⵏ ⵓⵙⴷⵓⵙ ⵏ ⵜⵖⵣⵓⵔⴰⵏⵜ” ⴷ “ⵜⴰⵥⵓⵕⵉ ⴷ ⵜⵡⴰⵍⵉⵜ ⴳ ⵜⵏⴰⴼⵓⵜ ⵏ ⵉⵥⵕⵉ ⴰⵏⴼⴳⴰⵏ ⴰⵖⵣⵓⵔⴰⵏ”.
ⵎⴽⴷⴰ ⵔⴰⴷ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵍⴱⴰⵏⴽ ⵏ ⵍⵎⵖⵔⵉⴱ ⴷ ⵜⴳⵔⵓⵎⵎⴰ ⵏ ⴱⴰⵔⵉⴷ ⵍⵎⵖⵔⵉⴱ ⴰⵙⴼⵓⴳⵍⵓ ⵙ ⵓⴽⵜⵜⵓⵢ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴰⴼⵓⴳⵍⴰ ⵏ ⵓⵙⵎⵏⵉⴷ ⵏ ⵢⴰⵏ ⵓⵇⴰⵕⵉⴹ ⴷ ⵢⴰⵏ ⵓⵏⴷⵍ ⴷ ⴼⴼⵖⵏⵉⵏ ⵙ ⵜⵎⵍⴷⴰ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⴷ ⵙ ⵜⵎⴷⵔⴰⵡⵜ ⴰⴽⴷ ⵡⴰⵎⵎⴰⵙ ⵏ ⵜⵎⵜⵜⴰ ⵉⵎⵓⵏⵏ ⵉ ⵓⵙⵏⵖⵎⵙ, ⵎⴰⵢⴰ ⵏⵏ ⵜⴰⴷⴳⴳⵯⴰⵜ ⵏ ⵓⴽⵡⴰⵙ 7 ⴷⵓⵊⴰⵏⴱⵉⵔ ⵙⴳ ⵜⵙⵔⴰⴳⵜ ⵜⵉⵙ ⵚⴹⵉⵚⵜ ⴳ ⵜⵙⴷⵍⵉⵙⵜ ⵜⴰⵏⴰⵎⵓⵔⵜ ⵏ ⵜⴳⵍⴷⵉⵜ.
ⵉ ⵓⴳⴳⴰⵔ ⵏ ⵓⵎⵍⴰⵏ, ⵏⵙⵙⵓⵜⵔ ⴰⴷ ⵜⵎⵢⴰⵡⴰⴹⵎ ⴰⴽⴷ ⵓⵟⵟⵓⵏ ⴰⴷ : 0662762410
