ⵉⵙⵙⵏⴽⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴼⵔⵉⵙⵜ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵙⵉⵎⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ, ⵢⵓⵎⵥⵏⵉⵏ ⵜⴰⵙⴽⵯⴼⵍⵜ ⵏ ⵜⵙⵖⵣⵏⵜ ⵜⴰⴳⵔⴰⵖⵍⴰⵏⵜ (ⵢⴰ), ⵜⴰⵏⴰⴹⵜ ⵏⵏⵙ ⵜⴰⵎⵙⴷⴰⵖⵜ ⵙ ⵜⵎⵍⴷⴰ ⵏ ⵜⵙⵓⵜⵍⵜ ⵜⵉⵙ ⴽⴽⵓⵥⵜ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ.
"ⴰⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⴷ ⵉⵎⵉⵙ ⵉⵍⴰⵏ ⴰⴷⴷⵓⵔ ⴷⴰⵔ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ" ⴰⴷ ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, "ⴰⵣⵎⵣ ⵉⵜⵜⵡⴰⴼⴽⴰⵏ ⵉ ⵇⴰⵃ ⵉⵡⴰⵏⴽⵏ ⵃⵎⴰ ⴰⴷ ⵙⵙⵏⴽⴷⵏ ⵜⴰⵎⴰⵖⵓⵏⵜ ⵏ ⵜⵎⴳⴳⵉⵜⵉⵏ ⵏⵏⴰ ⵜⵜⴰⵙⵉⵏ ⵅⴼ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵖⴹⴼ ⵙ ⵉⵏⴰⵥⴰⵕⵏ ⵏⵏⴰ ⵉⵙⵏⵉⵍⵏ ⴰⴼⵊⵊⵉⵊ ⴰⵎⵢⴰⴳⴰⵏ ⵙⵔⵙⵏ, ⵉⴳ ⴰⵡⴷ ⴰⵣⵎⵣ ⵉ ⵉⵎⵙⵜⴰⵏⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⵃⵎⴰ ⴰⴷ ⵙⵉⵡⵍⵏ ⵅⴼ ⵉⵏⵣⴳⵓⵎⵏ ⵏⵏⵙⵏ, ⵙⵙⵏⴽⴷⵏ ⵉⵙⵖⵍⴰⴼ ⵏⵏⵙ, ⴷ ⵓⵙⴰⵢⵔⴰⵔ ⴰⵎⴰⴹⵍⴰⵏ ⵏ ⵓⵙⵓⵜⴳ ⵏ ⵜⵙⴽⵯⴼⵍⵜ ⵏ ⵜⴷⵔⴰⵡⵜ ⵏ ⵉⵡⴰⵏⴽⵏ ⵏⵏⴰ ⴳⴰⵏⵉⵏ ⵜⵉⴼⵓⵍⵉⵏ ⴳ ⵓⵏⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵓⵖⵏ ⵙ ⵉⵏⴰⵡⴰⵢⵏ ⵏⵏⵙⵏ".
ⵜⴳⴰ ⵜⴰⵏⴰⴹⵜ ⵏ ⵓⵙⵇⵇⵉⵎ ⴰⵙⵓⵜⴳ ⴰⵎⵣⵡⴰⵔⵓ ⵉ ⵓⵙⵎⵀⵍ ⵏ ⵉⵙⵖⵍⴰⴼ ⵉⵎⵣⵡⴰⵔⵏ ⵏ ⵉⵎⵉⵙ ⴰⴷ, ⵜⵓⵎⴰ 26 ⵏ ⵓⵙⵖⵍⴼ ⵉ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ, ⵎⵎⴱⴹⴰⵏⵉⵏ ⵅⴼ ⴽⴽⵓⵥ ⵏ ⵉⵙⴳⵓⵎⵏ ⵉⵎⵇⵇⵔⴰⵏⵏ ⵉⵏⵏⴰⵍⵏ ⵅⴼ ⵓⵙⴷⵓⵙ ⵏ ⵜⵎⵙⴽⵔⵜ ⵜⴰⵎⵢⴰⵇⵇⴰⵏⵜ ⵙ ⵓⵙⵖⵣⵏ ⵏ ⵎⴰ ⵉⵇⴰⵎⴰⵏ ⵙⴳ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴽⴷ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ; ⴷ ⵓⵙⴷⵓⵙ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⵅⴼ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ; ⴷ ⵓⵙⴱⵓⵖⵍⵓ ⵏ ⵓⵙⴰⵜⵉ ⴰⵎⵔⵙⴰⵍ ⵉⵏⵏⴰⵍⵏ ⴰⵏⴰⴳⵔⴰⵡ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ, ⴷ ⵓⵙⴷⵓⵙ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉ ⵜⵏⴼⵔⵓⵜ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙ ⵜⵓⵙⵙⵏⴰ ⵏⵏⵙⵏ.
ⵙ ⵜⵔⵏⴰⵡⵜ ⵅⴼ ⵜⵏⴽⴷⴰ ⵏ ⵜⴰⵏⴰⴹⵜ ⵏⵏⵙ ⵜⴰⵎⵥⵍⵉⵜ, ⵉⵎⵓⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴽⴷ ⵢⴰⵜ ⵜⴳⵔⵓⵎⵎⴰ ⵏ ⵉⵄⵔⵔⵉⵎⵏ ⵉⵎⵙⵜⴰⵏⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⴷ ⴷⴷⴰⵏⵉⵏ ⵙⴳ ⵎⴰⵕⵕⴰ ⵜⵎⵏⴰⴹⵉⵏ ⵏ ⵜⴳⵍⴷⵉⵜ, ⵙ ⵜⵎⴷⵔⴰⵡⵜ ⴰⴽⴷ ⵜⴼⵏⵉⵇⵜ ⵏ ⵜⵎⵜⵜⴰ ⵉⵎⵓⵏⵏ ⵉ ⵉⵎⵣⴷⴰⵖⵏ ⴷ ⵜⵎⴰⴷⴷⴰⵙⵜ ⵏ ⵜⵎⵓⵛⴰ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ (UPR Info) ⴷ ⵓⵙⵉⵏⴰⴳ ⴱⵕⵓⵎⵉⵜⵢⵓⵙ ⵉ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵜⵓⵙⵏⵎⴰⵍⴰⵏⵜ ⴳ ⵓⵎⵏⵉⴷ ⴰⴷ ⵙⵏⴰⵜ ⵜⵙⵓⵜⵍⵉⵏ ⵏ ⵓⵙⵎⵓⵜⵜⴳ ⵉ ⵉⵄⵔⵔⵉⵎⵏ ⴰⴷ, ⵉⵜⵜⵡⴰⵏⵏⴰⵍ ⵓⵙⵏⵎⴰⵍⴰ ⵏ ⵓⵥⵟⵟⴰ ⵉⵏⴳⵔⴰⵜⵙⵏ.
ⵉⴼⴼⵓⵖ ⵓⴱⵔⵉⴷ ⴰⴷ ⵙ ⵓⵙⵔⵓⵙ ⵏ "ⵜⴰⵎⵓⵏⵜ ⵜⴰⵎⵙⵎⵓⵏⵜ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏⵓⴼⴳⴰⵏ", ⵏⵏⵉ ⵉⵙⵙⵏⴽⴷⵏ ⵉⵎⴰⵍⴰⵙⵙ ⵍⵍⵉ ⵉⵣⵔⵉⵏ ⵜⴰⵏⴰⴹⵜ ⵏⵏⵙ ⵜⴰⵎⵥⵍⵉⵜ ⴳ ⵓⵙⴰⵜⵉ ⵏ ⵜⵙⵓⵜⵍⵜ ⴰⴷ. ⵉⴷⵔⵓ ⵓⵙⵇⵇⵉⵎ ⵏⵏⴰ ⵉⴳⴰⵏ ⵜⵉⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⵎⵓⵜⵜⴳ ⵏ ⵜⴰⵏⴰⴹⵜ ⵜⴰⵏⴰⵎⵓⵔⵜ, ⵏⵏⴰ ⵔⴰⴷ ⵜⵙⵙⵏⴽⴷ ⵜⵏⴱⴰⴹⵜ ⵉ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⴹⴼⵕⵏ ⵉ ⵜⵎⵜⵜⴰ ⵉⵎⵓⵏⵏ ⴳ ⵓⵙⴰⵜⵉ ⵏ ⵉⵎⵉⵙ ⴰⴷ, ⵉⴷⵔⵓ ⴳ ⵉⵎⵛⴰⵡⴰⵕⵏ ⴰⴽⴷ ⵜⵓⴳⵜ ⵏ ⵉⵎⴳⴳⴰⵢⵏ, ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵏⵎⵏⴰⴹ.
ⵉⴼⵓⴽ ⴰⴷ ⵏⵙⵙⵎⵜⵔ ⵎⴰⵙ ⵉⵍⵍⴰ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ, ⴳ ⵄⵍⴰⵢⵏ ⴽⵓ ⴽⴽⵓⵥ ⵏ ⵉⵙⴳⴳⵯⴰⵙⵏ ⴷ ⵓⵣⴳⵏ, ⵅⴼ ⵇⴰⵃ ⵉⵡⴰⵏⴽⵏ ⴳⴰⵏⵉⵏ ⵜⵉⴼⵓⵍⵉⵏ ⴳ ⵜⵎⵜⵜⴰ ⵉⵎⵓⵏⵏ, ⴰⵔ ⴳⵉⵙ ⵉⵜⵜⵡⴰⵙⵔⴰⵙ ⵉⵥⵕⵉ ⵅⴼ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴼⴼⵓⵖⵏ ⴷ ⴼⵍⵍⴰⵙⵏⵜ ⵉⵙⵖⵍⴰⴼ. ⴳ ⵓⵎⵏⵉⴷ ⴰⴷ, ⵔⴰⴷ ⵉⵜⵜⵓⴳⴰ ⵓⵣⵣⵔⴰⵢ ⵅⴼ ⵜⴰⵏⴰⴹⵜ ⵏ ⵍⵎⵖⵔⵉⴱ ⴳ ⵜⵙⵓⵜⵍⵜ 41 ⵏ ⵉⵎⵉⵙ ⴰⴷ ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵜⵉⵣⵉ ⵢⵓⵎⵥⵏ ⵙⴳ 7 ⴰⵔ 18 ⵏⵓⵡⴰⵏⴱⵉⵔ 2022. ⵉⴽⴽⴰ ⵉⵜⵜⵓⴳⴰ ⵓⵙⵎⵏⵉⴷ ⴰⵣⵎⵣⴰⵏ ⴰⵎⴳⴳⴰⵔⵓ ⵉ ⵜⵎⴰⵣⵉⵔⵜ ⵏⵏⵖ ⴳ ⵎⴰⵢⵢⵓ 2017, ⵜⴻⵜⵜⵓⵙⵖⵣⵏ ⵜⴰⵏⴰⴹⵜ ⵏ ⵜⴳⵔⵓⵎⵎⴰ ⵉⵥⵍⵉⵏ ⵙ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ ⵉⵥⵍⵉⵏ ⵙ ⵍⵎⵖⵔⵉⴱ ⴳ ⵛⵓⵜⴰⵏⴱⵉⵔ 2017.
